Jeowa kãgaba akʉza biga diaiba kʼarebabʉ buru kʼoeita

1, 2. Hechos 8:27-31, 35-38⁠ba jarabʉdebara, ¿kʼãrẽa buru kʼoe zesi ẽbẽra Etiopíadebemara?

¿BɄRA buru kʼoe zekĩrãbʉka akʉza Jesús kʼaidu babari ba zekĩrãbʉka? Ẽbẽrarã mejãchaʉba kãgaba akʉza biga diakĩrãbʉba maʉ̃ta opanʉ, krĩchara yumakẽrã nokʼo wẽrã Etiopíadebema kʼarebabadata.

² Maʉ̃ yumakẽrãba Daizeze Bedʼeadeba kʼawuaside buru kʼoeibarata buru kʼoe zesi (akʉra Hechos 8:27-31, 35-38). ¿Kʼãrẽa maʉ̃ta okĩrãbasi iyara? Iyara Daizeze Bedʼeata kãgabasi, maʉ̃ kʼarea iyi karrude wãne librota lebasi Isaíasba bʉdata. Akʉza Felipeba jara ũrĩbiside Jesúsba iyi kʼarea kʼãrẽ odata, iyara mejãcha biga diasi. Adewara iyara Daizezera wãrĩnu kãga zesi, maʉ̃ba iyira Jerusalén pʉwʉrʉidu jʉ̃ẽsi Daizezeʼa yiwidʼita. Naʉ̃ba ũdubibʉ iyara iyi religion nãã erbadara amaesita, mawũã zeita Daizeze pʉwʉrʉeda. Mawũã Jeowata kãgabasi baera iyira buru kʼoe zesi akʉza Jesús kʼaidu babari ba zesi (Mat. 28:19).

3. ¿Kʼãrẽba bʉitara zarea baseabʉ buru kʼoe zeira? (Akʉra rekuadro «¿Saʉ̃ egorodebema kĩrãkʼabʉ bʉ sora?»).

³ Jeowa kãgaba buru kʼoe zeseabʉ. Mamina maʉ̃ awuara bʉa nekʼãrẽta audre kãgabʉrʉ zarebayi buru kʼoe zeira. Bari jaradaita bʉa bʉ mebẽrãta akʉza bʉ neũdukʼawuara Jeowa odebʉ ẽãta mejãcha kãgabʉbʉrʉ, perabayi maʉ̃ kʼarea buru kʼoe zeita, maʉ̃ kʼarea bʉa krĩchaseabʉ bʉta buru kʼoe zera, bʉ mebẽrãba kãga ẽ baita (Mat. 10:37). Mawũã ẽ bʉrʉ bʉa bʉ sode erbʉbaibara nekayirua Daizezeba kãga ẽãta akʉza maʉ̃ idubʉita zarebaibara (Sal. 97:10). Mawũã ẽ bʉrʉ bʉ dedara owãrisibaibara piesta religion zeri ẽãneba zebʉta akʉza obasibaibara piesta Jeowaba kãga ẽãta, maʉ̃ kʼarea bʉitara zarebaibara maʉ̃ amaeira (1 Cor. 10:20, 21). Bʉa bia krĩchabʉbaibara kʼãrẽta audre kãgata akʉza kʼaita.

KʼAITA AUDRE KÃGAIBARA

4. ¿Kʼãrẽa buru kʼoedaibara?

⁴ Bʉ nekʼãrẽ mejãcha bʉa kãgata akʉza okĩrãta, maʉ̃ra yibia mawũã oira. Bari jaradaita bʉ Jeowa ʉ̃rʉ Kʼawuabipanʉrãbawara Daizeze Bedʼea akʉi nãã, kãgabasibaibara Daizeze Bedʼeara akʉza Jesúsʼsida kãgabasibaibara. Akʉza bʉa kʼãwũã Jeowa ʉ̃rʉ Kʼawuabipanʉrãta ũdukʼawua zesi baera ãyibawara bakĩrãbʉkĩrã, mamina maʉ̃ba oẽbayi bʉ bebʉ Daizezeʼa diaita akʉza buru kʼoe zeita awuarabʉrʉ bʉra buru kʼoe zeibara Jeowata kãga zesi baera. Bʉa Jeowata kãga zesibʉrʉ nekʼãrẽ baduira, maʉ̃ba iduaribi ẽ bayi nekʼãrẽ badu zebʉrʉba Daizeze ode bʼaita, Jeowata kãgapanʉ baera buru kʼoeseabʉ akʉza kʼarebabʉ ewari jõmaʉ̃nẽ bʼaita Daizeze ode.

5. ¿Kʼãrẽta akʉdai naʉ̃ artikulodera?

⁵ Jesúsba jarabarisi Jeowara dayirãbara kãgaibarata dayirã soiduba, dayirã kakuaiduba, dayirã krĩchaiduba akʉza dayirã zareaiduba (Mar. 12:30). ¿Kʼãrẽta odaibara mawũã Jesúsba jarada kĩrãkʼa Daizezeʼa kãga ũdubita? Krĩchadaibara Jeowaba dayirã kʼãrẽaba kãgata (1 Juan 4:19). Naʉ̃ artikulode kʼawuadayi ũrãgʼa maʉ̃ ʉ̃rʉ bedʼeabʉta. Adewara akʉdayi sãwũã Daizezeʼa kãga ũdubita akʉza kʼawuadayi Jesúsba jarada kĩrãkʼa dayirãba Daizezeʼa kãga ũdubibʉrʉde kʼãrẽta odaita akʉza kʼãrẽ ʉ̃rʉ krĩchadaita.b

6. Romanos 1:​20⁠de jarabʉdebara, ¿sãwũã kʼawuaseabʉ Jeowa ʉ̃rʉra?

⁶ Jeowa ʉ̃rʉ kʼawuara iya parãna akʉbʉdeba (akʉra Romanos 1:20; Apoc. 4:11). Krĩchara Jeowa kʼãrẽaba buru biata nedʉwʉrʉ sãwũã parãnaneba, bakuruta akʉza jʉrʉda Jeowaba sãwũã ẽbẽrarã kakua bia parãna ʉ̃rʉ (Sal. 139:14). Akʉza krĩchara Jeowa kʼãrẽaba zarea barabʉta iya ũmadaʉ parãside akʉza chĩdaura mejãchabʉta (Is. 40:26).c Bʉa krĩchabʉbʉrʉ Jeowaba kʼãrẽ oda ʉ̃rʉ mawũãra audre wawiata ũdubi wañi Jeowaʼa. Dayirãba kʼawuabʉbʉrʉ Jeowa kʼãrẽaba buru biata akʉza kʼãrẽaba zarea barabʉta, maʉ̃ba kʼarebayi dayirãra audre yi neũdukʼawua bʼaita, mamina maʉ̃ awa oẽ baibara, awarabʉrʉ audre kʼawua wãibara iyi ʉ̃rʉ.

7. Jeowa soiduba kãga ũdubira, ¿kʼãrẽ ʉ̃rʉ wãrĩnu ĩjãnaibara?

⁷ Bʉara wãrĩnu ĩjãibara Jeowaba bʉra wãrĩnu krĩchabʉta. ¿Bʉitara zareka ĩjãita Nekʼãrẽ Parãnaba bʉ ʉ̃rʉ krĩchabʉta? Bʉa mawũã krĩchabʉbʉrʉ kĩrãbera «wãrĩnu iyira jĩgarabʉ ẽ dayirã aba abakaʉdebara» (Hech. 17:26-28). Davidba iyi warra Salomónʼa jarasi: «Jeowabara biʼia akʉbʉ baera dayi sode edabʉta». Iya jarabʉ kʼãrẽ dayirãba iyita jʉrʉra ũdudaita (1 Crón. 28:9). Bʉta Daizeze Bedʼea akʉbʉbʉrʉ maʉ̃ba jarakĩrãbʉ Jeowabara iyima wesita bʉra, Jeremías 31:3⁠ba jarabʉ kĩrãkʼa. Bʉa kʼawuabʉrʉde Jewaba kʼãrẽta obʉta bʉ kʼarea audre kãga wañi.

8. ¿Sãwũã biga diabʉta ũdubibʉ bʉa Jeowaba kãga ũdubibʉ kʼarea?

⁸ Dayirãbara Jeowara wãrĩnu kãga ũdubipanʉ iyaʼa yiwidʼipanʉne. Bʉa Jeowaʼa jarara bʉ kʼãrẽba krĩcha zroma obibʉta akʉza biga diabʉbʉrʉ iya kʼãrẽ nebia diabʉ kʼarea, mawũãra bʉ kãgara audre wari wãñi. Bʉara Jeowara audre kãgayi bʉa ũdubʉbʉrʉ iya sãwũã panʉbʉta bʉ yiwidʼira (Sal. 116:1). Wãrĩnu ĩjãñi Jeowaba kʼawuabʉta bʉ sãwũã sentibʉra. Bʉta audre Jeowa kʼawa bakĩrãbʉbʉrʉ kʼawuabaibara iyi sãwũã krĩchabʉta akʉza iya kʼãrẽta kãgabʉta bʉa omarẽã, maʉ̃ kʼawuaita iyi bedʼeata akʉibara.

9. ¿Sãwũã ũdubibʉ Daizeze Bedʼeara kãgabʉta?

⁹ Audre kãgata ũdubira Daizeze Bedʼea. Daizeze Bedʼeabʉrʉ erbʉ wãrĩnura Jeowa ʉ̃rʉ akʉza iya kʼãrẽta kãgabʉta bʉita. ¿Sãwũã ũdubibʉ Daizeze Bedʼea kãgabʉta? Daizeze Bedʼeara ewariza akʉbaibara, bʉidu jaradiai naweda estudiaibara akʉza maʉ̃ta oũdubibara (Sal. 119:97, 99; Juan 17:17). ¿Bʉara ewari jʉrʉbʉka Daizeze Bedʼea akʉita?

10. ¿Daizeze Bedʼeara kʼarea jipa yibia?

¹⁰ Daizeze Bedʼeabara jarabʉ ẽbẽrarã Jesús ũduda ʉ̃rʉ akʉza maʉ̃ ʉ̃rʉ bedʼeadata Daizeze Bedʼea maʉ̃ jarabʉra arigʉ yibia. Adewara Daizeze Bedʼeabara kĩrãkita jara ũrĩbibʉ Jesúsba bʉ kʼarea kʼãrẽ odata . Neẽ awuru libro maʉ̃ne kĩrãkʼa jara ũrĩbibʉra. Maʉ̃ kʼarea bʉa bia kʼawuara Jesúsba bʉ kʼarea kʼãrẽ odata akʉza kʼãrẽ jaradata audre iyi neũdukʼawuara bakĩrã zeyi.

11. ¿Kʼãrẽba kʼarebai audre Jeowa kãga zeita?

¹¹ Jesústa audre kãga wãra. Bʉa Jesústa audre kãga wãra mawũãra Jeowasida kãga wãñi. ¿Kʼãrẽa? Jesúsbara Jeowaba obʉta oũdubibasi baera (Juan 14:9). Maʉ̃ kʼarea bʉa Jesús ʉ̃rʉ audre kʼawuabʉbʉrʉ audre kʼawua zeyi Jeowa sãwũãbʉta, maʉ̃ba mejãcha kãga zeyi Jeowara. Krĩchara sãwũã Jesúsba so borekeabʉta ũdubisita ẽbẽrarã nekʼãrẽ neẽãbʉa, ẽbẽrarã kayabʉa akʉza zarea neẽbʉa. Adewara krĩchara Jesúsba bʉa ũrãgʼa diabʉ ʉ̃rʉ akʉza maʉ̃ ũrãgʼa ũrĩbʉba sãwũã audre bʉ bebʉra bia wãseabʉta (Mat. 5:1-11; 7:24-27).

12. Bʉa Jesús ʉ̃rʉ kʼawuabʉrʉde, ¿kʼãrẽta okĩrãbai?

¹² Bʉa Jesúsba kʼãrẽ oda ʉ̃rʉ krĩchabʉbʉrʉ akʉza iyi sãwũã beida ʉ̃rʉ dayirã nekayirua kʼarea, mawũãra bʉa iyi ʉ̃rʉ kãgabʉra audre wari wãñi (Mat. 20:28). Bʉa kʼawuabʉrʉde Jesús bʉ kʼarea beikĩrãbasita, mawũãra bʉara jʉrʉyi Jeowaba bʉ nekayiruata kĩrãduamarẽã akʉza wua okĩrã ẽ bayi bʉa nãã obada nekayiruara (Hech. 3:19, 20; 1 Juan 1:9). Bʉa Jeowa audre kãga wãne akʉza Jesústa, audre bakĩrãñi ẽbẽrarã bʉ kĩrãkʼa ãyi kãga ũdubibʉbawara.

13. ¿Jeowabara kʼãrẽta diabʉrʉ bʉara?

¹³ Kãga zera Jeowa mebẽrãrãra. Bʉ mebẽrãba akʉza bʉ neũdukʼawuaraba edaʉde kʼawua ẽ bayi bʉ kʼãrẽa bʉ bebʉra Jeowaʼa diakĩrãbʉta, maʉ̃ kʼarea ãyira bʉ ʉ̃rʉ baseapanʉ. Mamina Jeowabara bʉara diayi awuru mebẽrãta, maʉ̃ra mebẽrãba bʉra kʼarebayi akʉza so zarea diayi (Mar. 10:29, 30; Heb. 10:24, 25). Bʉ mebẽrãra Jeowa ode ba zeseabʉ, maʉ̃ra edaʉde berabariseabʉ akʉza Jeowaba kãgabʉde baseapanʉ (1 Ped. 2:12).

14. 1 Juan 5:3⁠ba jarabʉdebara, ¿bʉa Jeowaba jarabʉta ũrĩbʉbʉrʉ kʼãrẽ nebiata ũduseabʉ?

¹⁴ Kãga ũdubira Daizeze Bedʼeaba jarabʉra adewara ũrĩdua. Jeowa ũdu kʼawuai nããra, bʉara obasibaibara bʉ krĩcha amaebʉta, mamina bʉa maʉ̃ta tẽã kʼawuasi Jeowaba jarabʉtrʉ audre yibiata (Sal. 1:1-3; akʉra 1 Juan 5:3). Krĩchara Daizeze Bedʼeaba kʼãrẽ ũrãgʼa bia diabʉta juwa jidapanʉra, yibarira akʉza yi wũãwũãra (Efes. 5:22-6:4). ¿Bʉara ũdubʉka sãwũã bʉ bebʉdera bʉa Daizeze Bedʼea kãwũã ũrĩbʉdeba audre bia wãta? ¿Bʉara audre bia owãka, ũrĩbʉ baera Daizeze Bedʼeaba jarabʉta neũdukʼawuara jʉrʉi ʉ̃rʉ? ¿Bʉra audre sobiabʉka? (Prov. 13:20; 1 Cor. 15:33). Maʉ̃ta obʉbʉrʉ, wãrĩnu bia wã.

15. ¿Kʼãrẽta oseabʉ kʼarebata nesidabʉbʉrʉ Daizeze Bedʼeadebema oita?

¹⁵ Edaʉde bʉa kʼawua ẽ bayi sãwũã oũdubita Daizeze Bedʼeaba jarabʉra, mamina Jeowaba iyi organizasioneba dayirã jaradiabʉ kʼawuamarẽã kʼãrẽta biata akʉza kʼãrẽta bia ẽãta (Heb. 5:13, 14). Dayirãba akʉpanʉbʉrʉ organizasionba dayirã nekʼãre diabʉta maʉ̃ba kʼarebayi nekʼãrẽ jidabʉrʉde bia oita, maʉ̃ba kãgayi Jeowa organizasione eda bʼaita.

16. ¿Jeowaba kʼãrẽta obʉ iyi pʉwʉrʉ daucha erbaita?

¹⁶ Kãgara Jeowa organizasionʼra akʉza akʉra sãwũã kʼarebaseabʉta. Jeowabara iyi pʉwʉrʉra daucha zebibʉ kongregasion aba abakaʉde akʉza Jesúsʼra maʉ̃ra kongregasiora buru (Efes. 1:22; 5:23). Jesúsbara jidasi ʉ̃kʉrʉ yumakẽrãrata mawũã Jeowa organizasionba daucha erbamarẽã akʉza iya kãgabʉta omarẽã. Jesúsba maʉ̃ra ẽbẽrarã jidadara ʉ̃ta wãnañi, maʉ̃ra ẽbẽrarã trʉ̃ra naʉ̃: «Nezokʼa jipabʉra akʉza biʼia krĩchabʉra», ãyitara jipa yibia dayirã diaita yiko jauredebemata akʉza dayirã kʼarebaita audre Daizeze kʼawa bʼaita, maʉ̃ kĩrãkʼa bʉsida kʼarebaseapanʉ (Mat. 24:45-47). Maʉ̃ra nezokʼa jipabʉra akʉza bia krĩchabʉrabara diabʉ mebẽrã zõrãrãta kongregasione dayirãta bia akʉmarẽã (Is. 32:1, 2; Heb. 13:17; 1 Ped. 5:2, 3). Ãyira mejãcha zarea obʉ maraʼa so zarea diaita akʉza maraʼa kʼarebaita audre Daizeze kʼawa bamarẽã. Akʉza maʉ̃raba kʼarebakĩrãbʉ marata awurura jaradiamarẽã Daizeze Bedʼea ʉ̃rʉ (Efes. 4:11-13).

17. Romanos 10:10, 13, 14⁠ba jarabʉdebara, ¿kʼãrẽa bedʼeaibara ẽbẽrarã Jeowa ʉ̃rʉ?

¹⁷ Kʼarebara awururata Jeowa kãga zemarẽã. Jesúsba jaradiasi iyi kʼaidubemara jaradiamarẽã Daizeze ʉ̃rʉ (Mat. 28:19, 20). Bʉa maʉ̃ra oseabʉ oibara baera. Mamina bʉa Jeowata kãgabʉbʉrʉ krĩchayi Pedroba akʉza Juanba krĩchada kĩrãkʼa: «Daiba ũdudapeadata akʉza ũrĩnapeadata jara ẽãranʉma ẽ bayi» (Hech. 4: 20). Awurura jaradiabʉde Jeowa kãga zemarẽã, maʉ̃ba arigu sobiabibʉ. Felipera mejãcha sobiasi yumakẽrã Etiopíadebemara kʼarebaside Daizeze ʉ̃rʉ kʼawuamarẽã akʉza buru kʼoe zemarẽã. Abarika Felipeba oda kĩrãkʼa, Jesúsba jarabaridata jaradia wãmarẽã ũrĩbʉrʉdera, maʉ̃ba ũdubibʉ bʉra wãrĩnu Jeowa ʉ̃rʉ Kʼawuabipanʉrã bakĩrãbʉta (akʉra Romanos 10:10, 13, 14). Bʉa maʉ̃ta ora, abarika yumakẽrã Etiopíadebemaba bedʼea jarada kĩrãkʼa jarayi: «Kʼãrẽba be ẽbaipe mʉ buru kʼoeira» (Hech. 8:36).

18. ¿Wuarebema artikulodera kʼãrẽta kʼawuadai?

¹⁸ Bʉ buru kʼoebʉrʉdera bʉa maʉ̃ jidabʉrʉra audre yibiabayi. Maʉ̃ra jemene kĩrãkʼabʉ ẽ baera, maʉ̃ jidai nãã bia krĩchaibara kʼãrẽta oibarata maʉ̃ obʉrʉde. Mawũẽra, wuarebema artikulode naʉ̃ ʉ̃rʉ kʼawuadayi: ¿kʼãrẽta kʼawuaibara buru kʼoe ʉ̃rʉ? akʉza ¿kʼãrẽta oibara maʉ̃ oi nãã akʉza maʉ̃ tẽãbida?