Yuwẽrãba wãrĩnu bʼaiarata ũdusi
Daizeze Nokʼo ʉ̃rʉ jarakabʉba jarabʉ
JESÚSBA jarabʉ ũdukʼawuabʉta iyi obejarãra (Juan 10:14). Ẽbẽra abaʉta sobiabʉbʉrʉ, maʉ̃ba kãgabʉbʉrʉ aduʼa bʼaita akʉza aripe oita kãgabʉrʉ, mawũãra Jesús kʼaidubemabawara ãba bakĩrãbʉ iyisida. Kʼawuayi iyi bebʉde kʼãrẽ okĩrãita ẽbẽra wẽrã Bélgicadebema berabarida kĩrãkʼa. Naʉ̃ta yi nebʉra:
«Jeowa ʉ̃rʉ Kʼawuabipanʉrãba mʉ̃ akʉ zeside mʉ̃ra mejãcha sopʉabʉba beikĩrãbasi. Mʉ̃ara kãgasi ãya jaraside naʉ̃ bedʼea zroma naʉ̃ drʉadebʉra jõita, mamina kãga ẽ basi ãya jaraside naʉ̃ bedʼea zroma Daizezeba jõbita. Naenara mʉ̃ra wãbasi iglesiaeda, mamina mʉ̃ara kãga ẽ basi ãya oẽbasi baera ãya jarabadata, mawũã badara 8 poaga berabarisi. Mamina mʉ̃a kʼawuasi Jeowa ʉ̃rʉ Kʼawuabipanʉrãbara wãrĩnuta jaradiapanasita, adewara ũdusi wãrĩnu jʉrʉibarata Daizeze kʼarebara.
»Ãya akʉ jʉ̃ẽpanasimina tẽã wua ãyi ʉ̃rʉ kʼawua ẽãsi. Mʉ̃ra akʉza jẽda bia ba ẽ basi. Sigarriyota mejãcha do jʉ̃drʉsi ewaride akʉza chirua kayirua bʉratʉmata. Mʉ̃ zezona beidaʉ̃me bedʼeakĩrãbasi baera, jaibanata jʉrʉsi. Maʉ̃ oiba wuabʉrʉ ũdusi bedʼea zromata, bari jaradaita, diamasi mʉ̃ dobabaside bẽwãraba audu purrabasi, jedeko biobayeda mawũã berabarisi. Maʉ̃ kʼarea diamasi mʉ̃yidoba bʼaira perabasi.
»Ewari aba mʉ̃ ode wãne, awuru ota jidasi, maʉ̃ ode ũdusi ẽbẽrarã mejãchaʉba de zromata obarabʉta. Mʉ̃a ãyi orraside kʼawuasi ãyira Jeowa ʉ̃rʉ Kʼawuabipanʉrãta, mamara opanasi ãba yi jʉrebari deta. Jẽda kĩrãbesi ãya mʉ̃ akʉ jʉ̃ẽpananata, adewara krĩchasi naʉ̃ drʉara biga bʼaita ẽbẽra jõmaʉ̃ta Jeowa ʉ̃rʉ Kʼawuabipanʉrã kĩrãkʼabʉbʉrʉ.
»Mʉ̃a kãgabasi baera mʉ̃ jẽda akʉ jʉ̃ẽmarẽã, bedʼeasi mama trajabadarabawara. Mʉ̃ra mejãcha yiwidʼisi Daizezeʼa. Maʉ̃ berabarida tẽã ẽbẽra mʉ̃ nãã akʉ zebadata zesi. Iya jarasi jẽda Daizeze Bedʼea akʉita akʉza ãba yi jʉrebarima jʉ̃ẽ jarasi, mʉ̃ara ĩjãsi maʉ̃ bedʼeara. Mʉ̃a maʉ̃ ewaride ũdudara jipa ũdukabasi jãpera. Mʉ̃a dããrabade ẽbẽrarã jʉrʉbada kĩrãkʼabʉta ũdusi, sobiapanʉta akʉza yiya kãgapanʉta.
»Maʉ̃ ewaride jʉ̃ẽbaridata iduaribi ẽ bʉ, ãba yi jʉrebarima jʉ̃ẽira. 3 semana berabarida tẽã iduaribisi sigarriyo doira. Jõma balbʉesi trãbi jai ʉ̃rʉ trãbadata akʉza yi librorasida, maʉ̃ne bẽwãraba mʉ̃ audu purrabʉta sentibadara, wua senti ẽã wãsi. Mʉ̃ara Jeowaba kãgabʉ kĩrãkʼa osi baera, 3 jedeko berabarida tẽã jaradia jʉ̃drʉsi. Maʉ̃ne 6 jedeko babʉrʉde buru kʼoesi, ewari ũme berabarita tẽã yi nãã edebari 30 ora ozesi.
»Mʉ̃a mʉ̃ kʼarea kʼãrẽ obʉrʉ kʼarea, Jeowaʼa mejãcha biga diabʉ. Idibʉrʉ wãrĩnu ũdubʉrʉ bebʉ arata. Jeowa trʉ̃ra torre zareabʉ kĩrãkʼabʉ, mʉ̃a ũdubʉrʉ Jeowaba mʉ̃ sãwũã kʼarebabʉrʉta (Proverbios 18:10). Salmo 84:10ba jarabada kĩrãkʼabʉ mʉ̃ra, mama jarabʉ audre yibiata Jeowa oda bʼaita nekayirua obʉira».
Naʉ̃ yuwẽrãbara wãrĩnu bebʉ arata ũdusi. Akʉza badu ẽbẽrarãba Daizezeta soiduba jʉrʉra maʉ̃ kĩrãkʼa berabariyi.