Daizeze bedʼeabara ãyi bebʉra awuara babisi

«Atiara mʉ̃ra kima bia» (RIGOBERT HOUETO)

• TOSIDA: 1941

• DRɄA: BENÍN

• IYI Ʉ̃RɄ JARABɄTA: IYARA KIMA BIO ERBASI AKɄZADE JɄRABASI JEOWA Ʉ̃RɄ KʼAWUABIPANɄRÃRA

MɄ̃ NEBURATA:

Mʉ̃ra tosida Cotonoune Benín drʉade. Mʉ̃ mebẽrãra katolikorabasi baera mʉ̃sida maʉ̃ne warisi, mamina misa eda wã ẽ basi mʉ̃ra. Katolikora bioʉba kima bio erpanasi, maʉ̃ ewaridera maʉ̃ra kʼãrẽ ẽ kĩrãkʼa basi. Mʉ̃abida kima kimare erbasi.

1970dera Benín drʉadera ẽbẽrarãbara minga zromata osida. Mʉ̃a krĩchasi maʉ̃ mingara mʉ̃ pʉwʉrʉitara bigabasita. Maʉ̃ba mʉ̃sida eda wãsi politikade. Minga opanʉrabara bia akʉda ẽ basi Jeowa ʉ̃rʉ Kʼawuabipanʉrãra politikare ba ẽ basi baera, maʉ̃ba ẽbẽrarãbara ãyira pẽwãsida, mʉ̃abida eda kʼareba pẽwãsi maʉ̃rãra. Maʉ̃ ewade 1976de misionerora maʉ̃ drʉade pananara maʉ̃ drʉadebara jʉretasida, maʉ̃neba ʉ̃ta mʉ̃a krĩchasi ãyira wua jẽda ze ẽ baita.

SÃWŨÃ AWUARA BABISI DAIZEZE BEDʼEABARA MɄ BEBɄRA:

Poaga1990de jõsi ãya minga ojʉ̃drʉdara. Mʉ̃a ĩjã ẽ basi, Jeowa ʉ̃rʉ Kʼawuabipanʉrã misionerora akʉza jẽda zesita maʉ̃ ewaride. Mʉ̃a mamaʉ̃ba ĩjã jʉ̃drʉsi Daizezera ãyibawarabasita. Maʉ̃ ewaridera mʉ̃a awuru trabajota erbasi. Dai trajapanʉradebema abaʉta Jeowa ʉ̃rʉ Kʼawuabipanʉrãbasi, maʉ̃ba mʉ̃aʼa jaradiasi Daizeze Bedʼea ʉ̃rʉ. Iyara Daizeze Bedʼeadeba testota kĩrã bio ũdubisi, mama ũdusi Jeowabara nekʼãrẽra aripe obʉta akʉza Jeowabara kãgata (Deuteronomio 32:4; 1 Juan 4:8). Maʉ̃ kʼawuadaba Daizeze Bedʼeata audre kʼawuakĩrãsi. Maʉ̃ba ĩjãsi Daizeze Bedʼea kʼawua jʉ̃drʉita.

Ãyi ãba yi jʉrebʉma mʉ̃ jʉ̃ẽsidera ũdusi ãyira sãwũã yiya kãgapanʉta akʉza ãyara akʉda ẽãta dayi yi paimata yi torrota, awuarabʉrʉ jõma abarika akʉpanʉnasita. Mʉ̃ ãyibawara audre ãbabʉde, maʉ̃ne kʼawuasi ãyira wãrĩnu Jesús kʼaidubasita (Juan 13:35).

Mʉ̃a kʼawuasi mʉ̃ta Jeowa ʉ̃rʉ Kʼawuabipanʉrã bakĩrãbʉbʉrʉ, iduaribibarabasita mʉ̃ religion katolikadebemara. Maʉ̃ra mʉ̃itara mejãchade zarebasi, mʉ̃a krĩchabasi baera wuabemaraba mʉ̃ ʉ̃rʉ kʼãrẽta krĩchaita. Jeowaba mʉ̃aʼa zarea diasi mʉ̃a maʉ̃ religion katolika amaeita.

Maʉ̃ amaeira ewari bio berabarisi, mamina wabidade mʉ̃ara nekʼãrẽ awuara oibarabasi. Daizeze Bedʼeabara jarabʉ kima bio erba ẽ baibarata (Génesis 2:​18-​24; Mateo 19:​4-6). Mʉ̃ kima nããbematrʉ jidaibarabasi Jeowaba kãgabʉde oira. Maʉ̃ba mʉ̃ kima nããbemaʉ̃me juwa jidasi mʉ̃ra. Mõbe jaraibarabasi mʉ̃ kima wuabemara, mʉ̃ dedaʉba ãyira wãibarabasita, mamina mʉ̃a ãya nekʼãrẽ nesidabʉra jõma diasi, ewari berabari wãne maʉ̃ra wẽrãra ũmedebemata Jeowa ʉ̃rʉ Kʼawuabipanʉrãbasi.

MɄ̃A NEBIATA ŨDɄZEBɄRɄ:

Mʉ̃ kimara religion katolika waididebʉmina, iya wawia akʉbʉ mʉ̃ religionʼra akʉza jarabʉ mʉ̃ra kima biata.

Nããra mʉ̃ara krĩchabasi mʉ̃ta politikade edabasibʉrʉ, maʉ̃ba kʼarebaita mʉ̃ drʉadebema ẽbẽrarãra, mamina mawũã berabari ẽ basi. Atiara mʉ̃ara kʼaubʉ Daizeze Nokʼobʉrʉ jõma ara oita naʉ̃ drʉade bedʼea zromabʉra (Mateo 6:9, 10). Mejãcha biga diabʉ Jeowaʼa, mʉ̃ta kʼãwũã wãrĩnu kʼarebasi baera sobia bʼaita.

«Mʉ̃a nãã obadara idubʉira zarebasi» (ALEX LEMOS SILVA)

• TOSIDA: 1977

• DRɄA: BRASIL

• IYI Ʉ̃RɄ JARABɄTA: PASTOR PENTEKOSTAL

MɄ̃ NEBURATA:

Mʉ̃ra warisi Itu pʉwʉrʉ zakede, São Paulo drʉade. Mʉ̃ waridamaera ẽbẽrarãra nekʼãrẽ neẽbasi akʉza bedʼea zromata mejãchabasi.

Mʉ̃ara badu yuwẽrãta erkʼãĩbasi akʉzade yõmiabasi, adewara chirua kayirua bʉratumata nẽdobasi. Mamina mʉ̃a kʼawuasi mʉ̃a maʉ̃ta obasibʉrʉ mʉ̃ra karselda bʉedaita, mawũã ẽ bʉrʉ beita. Maʉ̃ba mʉ̃a maʉ̃ obadara iduaribisi, maʉ̃ba iglesia petenkostalde eda wãsi mʉ̃ra maʉ̃are mʉ̃ra pastorbasi.

Mʉ̃a krĩchasi mʉ̃ religion eda wãbʉrʉba ẽbẽrarã kʼarebaita, maʉ̃ba radiodeba jaradia jʉ̃drʉsi. Mamina mʉ̃a tẽã kʼawuasi naʉ̃ iglesiabara ẽbẽrarãra kʼarebakĩrã ẽãta, awuarabʉrʉ platata kãgabasi, maʉ̃ kʼarea mʉ̃a naʉ̃ iglesiata iduaribisi.

SÃWŨÃ AWUARA BABISI DAIZEZE BEDʼEABARA MɄ BEBɄRA:

Mʉ̃ Jeowa ʉ̃rʉ Kʼawuabipanʉrãbawara Daizeze Bedʼea kʼawua jʉ̃drʉside, mama kʼawuasi mʉ̃a ãyira awuru religionʼraira awuarabasita. Mʉ̃a ũdusi Jeowa ʉ̃rʉ Kʼawuabipanʉrãbara jaradiapanʉta sãwũã Daizezeta kãgaibarata akʉza ẽbẽrarãta, mamina ãya maʉ̃ra bari mawũã jarapanʉ ẽ awuarabʉrʉ ãya maʉ̃ra wãrĩnu oũdubipanʉ, adewara mʉ̃a ũdusi ãyira politikade eda wã ẽãta akʉza yõena wãna ẽãta (Isaías 2:4). Maʉ̃neba mʉ̃a kʼawuasi ãyira religionʼarata, mawũẽra mʉ̃a ãyira ũdusi jari o zake dayi ewari jõmaʉ̃nẽ babibʉta (Mateo 7:13, 14).

Kʼawuasi mʉ̃a nekʼãrẽ awuara oibarabasita. Bari jaradaita edabʉta ũdubibarabasi akʉza mʉ̃ mebẽrãbawara audre ãba bʼaibarabasi. Mʉ̃itara mejãchade zarebasi mawũã oira, mamina Jeowaba kʼarebasi maʉ̃ oita. Mʉ̃ kimabara Jeowa ʉ̃rʉ kʼawua jʉ̃drʉsibasi, mamina iya mʉ̃ ũdubʉrʉde mʉ̃a ojʉ̃drʉdata, Jeowabara kʼarebasi audre oita iyi ʉ̃rʉ. Tẽã junea dai ũmena abarika buru kʼoesida iyabaʉ ewaride.

MɄ̃A NEBIATA ŨDUZEBɄRɄ:

Daibara wũãwũã ũbea erpanʉ, mʉ̃a mʉ̃ kimaʉ̃meba kʼarebabʉ dai wũãwũãba audre ũdukʼawuadamarẽã Jeowata maʉ̃ba sobiabibʉ. Daira mejãcha sobiapanʉ. Mʉ̃a mejãcha biga diabʉ Jeowa kʼãwũã kʼarebasi baera kʼawuaita iyi bedʼea ʉ̃rʉ. Daizeze Bedʼeabara kʼarebabʉ ẽbẽrarã nekʼãrẽ awuara oita, maʉ̃nebema abara mʉ̃ta iyi.

«Mʉ̃ra neneẽãbʉ, aduʼabʉ, akʉza sobiabʉ» (VICTORIA TONG)

• TOSIDA: 1957

• DRɄA: AUSTRALIA

• IYI Ʉ̃RɄ JARABɄTA: MEJÃCHA ZUBURIASI MɄ̃ WARRAENA

MɄ̃ NEBURATA:

Mʉ̃ra warisi Newcastle pʉwʉrʉde, mebẽrã siete erbʉ, maʉ̃ranebemata mʉ̃ra yi nããbema. Mʉ̃ zezera yõmiabasi akʉza itua domiabasi. Mʉ̃ papasida yõmiabasi akʉza imitia bedʼeabasi, adewara mʉ̃ta mejãchade pobasi. Ewariza mʉ̃ papaba jarabasi mʉ̃ra ẽbẽra kayiruata akʉza mʉ̃ra tʉbʉde eda bawaita. Iya mʉ̃a mawũã jarabʉba mʉ̃ra mejãcha daʉperabasi.

Mʉ̃ papabara mʉ̃ra mejãcha ubasi, maʉ̃ba edaʉde wãbe ẽ basi mʉ̃ra kolegio edara. Mʉ̃ 11 poagabʉde nokʼoba mʉ̃ra mʉ̃ yibarira juwadeba jãrĩsida. Maʉ̃are ãya mʉ̃ra konbento eda bʉesida (maʉ̃ra jarakĩrãbʉ katolikora kolegiota mama warrara edepanʉra mamaʉ̃bara atia ẽdrʉ ẽ). Mʉ̃ra mamaʉ̃ba mĩrʉ ẽdrʉsi mʉ̃ 14 poagabʉde, mʉ̃ra jẽda deda wãkĩrãbasi baera, mʉ̃ra wãsi barrio Kings Crosseda, mawũã odebemabasi mʉ̃ra.

Mʉ̃ odebʉde chirua kayirua bʉratumata do jʉ̃drʉsi, itua domiabasi, ẽbẽra ãkadabeta akʉbasi akʉza mʉ̃ra odebema wẽrãrabasi. Ewari aba kantina yibari dedabasi. Ewari aba diamasi zesida yumakẽrãta ũme maʉ̃ kantina yibariʉ̃me bedʼeaita. Kantina yibariba mʉ̃aʼa jarasi mʉ̃ra ãĩ wãmarẽã, mamina mʉ̃a ũrĩsi ãyi kʼãrẽ bedʼeabarabadara. Naʉ̃ra yumakẽrãra zedarabara mʉ̃ra edakĩrãpanasi, mawũã edeita barkode Japónʼena, mama kantinane trajaita. Mʉ̃ra mejãcha perasi, maʉ̃ba dedaʉba ãĩ pinãdrʉ wãsi akʉza wẽba wãsi, mʉ̃ra kʼarebata jʉrʉ wãsi.

Yumakẽrãta aba ũdusi mʉ̃a, mõbe nebʉrasi mʉ̃ kʼãrẽba sãwũã berabarinʉmʉta, mʉ̃aʼa platata diamarẽã. Mamina maʉ̃ ẽbẽraba mʉ̃aʼa plata diai kaude, jarasi mʉ̃a iyi kʼãĩchuidu jʉ̃ẽmarẽã, mama mʉ̃ kui kʼãrãpe nekomarẽã jarasi. Akʉza mamaʉ̃bara aña wã ẽ basi. Poaga aba berabaribʉrʉde mʉ̃ra iyiʉ̃me juwa jidasi.

SÃWŨÃ AWUARA BABISI DAIZEZE BEDʼEABARA MɄ BEBɄRA:

Mʉ̃a Daizeze Bedʼeaba kʼawua jʉ̃drʉbʉrʉde nekʼãrẽ kĩrã bio kʼawuasi. Mʉ̃ra mejãcha kĩrʉsi mʉ̃a kʼawuabʉrʉde jõma nekayirua berabarinʉmʉra Diaruba onʉmʉta, mʉ̃ara jarapanasi dayirã kayirua berabaribʉra Daizezeba obʉta. Mʉ̃ra warraraenara mejãcha perabasi mʉ̃aʼa jarapanasi baera dayirã tʉbʉde eda bawaita. Mamina mʉ̃a maʉ̃ ʉ̃rʉ kʼawuabʉrʉdera mʉ̃ra aduʼa besi.

Mʉ̃a kãgabasi sãwũã Jeowa ʉ̃rʉ Kʼawuabipanʉrãbara bari i awaʉba jarapanʉ ẽãta, awuarabʉrʉ wãrĩnu oũdubipanʉta. Mʉ̃a nekʼãrẽ oira ĩjãkĩrã ẽ basi, mamina mawũãsidu ãya mʉ̃ara ibiade jaradiapanasi.

Mʉ̃itara jipade zarebasi mawũã aña krĩchabʉ idubʉira. Mʉ̃ara krĩchabasi mʉ̃ra kʼãrẽita zeri ẽãta akʉza mʉ̃yikʉza jʉrabasi. Mʉ̃ buru kʼoeda tẽãbida mawũã krĩchabʉ idubʉira zarebasi. Mʉ̃ara Jeowara mejãcha kãgabasi, mamina krĩchabasi ẽbẽra mʉ̃ kĩrãkʼa chura Jeowabara kãga ze ẽãta.

Mamina mʉ̃ mawũã krĩchabʉra awuara krĩcha besi mʉ̃ bʉrʉ kʼoedata 15 poaga berabarida tẽã. Ãba yi jʉrebarimae Jeowa ʉ̃rʉ Kʼawuabipanʉrã abaʉba jarasi Santiago 1:​23, 24ba jarabʉta ledamarẽã, naʉ̃ne jarabasi Daizeze Bedʼeara espejo kĩrãkʼabʉta, maʉ̃ba ũdubibʉ baera Jeowaba dayirã sãwũã akʉbʉta. Maʉ̃ba krĩcha zesi mʉ̃yikʉza sãwũã akʉbʉta, Jeowaba akʉbʉ kĩrãkʼabʉ kʼawuaita. Mʉ̃itara jipade zarebasi maʉ̃ ʉ̃rʉ ĩjãira mʉ̃yikʉza krĩchabasi baera Jeowaba mʉ̃ra kʼãrẽa kãgaira neẽãta.

Maʉ̃ audre ẽãne, mʉ̃a Daizeze Bedʼeade nei lesi. Naʉ̃ba mʉ̃ra jipa awuara krĩchabisi, maʉ̃ testora Isaías 1:18 basi, nama jarabʉ: «Zera dayi bedʼea ara odaita. Mara nemitiara purru eskarlata kĩrãkʼabʉmina, torro bayi niewe kĩrãkʼa; wua karmesi kĩrãkʼa purrubʉmina lana kĩrãkʼa bayi». Mʉ̃a naʉ̃ testo leside Jeowata mʉ̃aʼa bedʼeabʉ kĩrãkʼa akʉsi, Jeowaba mʉ̃a jarabʉ kĩrãkʼabasi: «Vicky, zera dayi bedʼea ara odaita, mʉ̃a bʉra ũdukʼawuabʉ. Mʉ̃a kʼawuabʉ saʉ̃ta bʉ nemitiara, mʉ̃a kʼawuabʉ bʉ sode kʼãrẽtabʉta, mawũãsidu mʉ̃ara bʉra mejãcha kãga».

Maʉ̃ diamasi mʉ̃ra kʼãĩbe ẽ nʉmasi. Mʉ̃a waidide krĩchanʉmasi baera Jeowabara mʉ̃ra kãga ze ẽãta, mamina krĩchasi Jesús beida ʉ̃rʉ. Maʉ̃ne mʉ̃a kʼawuasi Jeowara mʉ̃mera mesera kĩrʉ ẽ basita, awuarabʉrʉ jʉ̃ã kʼawuabʉta ũdubisita. Iya nekʼãrẽ biodeba ũdubisi mʉ̃ra wãrĩnu kãgabʉta. Maʉ̃ne mʉ̃a kʼawuasi mʉ̃a Jeowa jarabʉ kĩrãkʼabʉta: «Bʉ kãgara yi zroma ẽ mʉ̃ kãga zeira. Bʉ warra mʉ̃ kʼãrẽa beisimina maʉ̃bara kĩrãdua ze ẽ mʉ̃a kʼãrẽ kayirua jõma odara». Naʉ̃neba mʉ̃a ũdubibʉ kĩrãkʼabasi Jeowa yi warra mʉ̃ kʼarea beidara kʼãrẽ ẽ basita. Mamina maʉ̃neba ʉ̃ta mʉ̃a kʼawuasi Jeowaba yi warra mʉ̃ kʼarea beibidara jipade nebia zromabasita, maʉ̃ neba ʉ̃ta ũdusi Jeowabara mʉ̃ra mejãcha kãgata.

MɄ̃A NEBIATA ŨDUZEBɄRɄ:

Mʉ̃ra atiara kʼãrẽ kayirua neẽ kĩrãkʼa sentibʉ aduʼabʉ, mʉ̃ kimaʉ̃mebida audre biapanʉ akʉza mejãcha sobiabʉ mʉ̃ nebʉraba awuruta kʼarebaseabʉ baera, adewara mʉ̃ra audre Jeowa kʼawabʉta sentibʉ.

«Mʉ̃ yiwidʼida kĩrãkʼa berabarisi» (SERGEY BOTANKIN)

• TOSIDA: 1974

• DRɄA: RUSIA

• IYI Ʉ̃RɄ JARABɄTA: MEJÃCHA ŨRĨKĨRÃBASI HEAVY-METAL

MɄ̃ NEBURATA:

Mʉ̃ra tosida Vótkinsk Rusiade, mʉ̃ mebẽrãra jipa kʼãrẽ neẽbasi. Mʉ̃ zezera ẽbẽra biabasi, mamina jipa itua domiabasi, maʉ̃ba dedara bedʼea zromata ũdupanasi.

Mʉ̃ra kolegiodera bia wã ẽ basi akʉza ewari berabari wãne krĩchasi mʉ̃ra jipa zeri ẽãta kʼãrẽ oita. Akʉza mʉ̃ara wuabemara ʉ̃rʉ ĩjãira mejãcha zarebasi. Maʉ̃ba kolegio eda wãira jipa zarebasi. Mʉ̃yidoba basidera mʉ̃ra bia bedʼeabasi wuabemarabawara. Mamina mʉ̃ kopaerora nãã mʉ̃ bedʼeaita totosidera, bedʼeabe ẽ totochuasi. Ewari aba kolegiode boletin diaibasidera mama eda bʉbasi mʉ̃ra bia bedʼeabe ẽãta, akʉza mʉ̃a krĩchabʉra bia jara au ẽãta. Maʉ̃ba mʉ̃ra mejãcha sopʉabisi akʉza mʉ̃ra krĩchabisi nekʼãrẽ oisida zeri ẽãta. Maʉ̃ba krĩcha zesi kʼarea bʉta dayirãra naʉ̃ drʉadera.

Mʉ̃ra warrainʉba itua do jʉ̃drʉsi, maʉ̃ba mʉ̃ra sobiabasi. Mamina tẽã sobia ẽã basi. Akʉza krĩchasi kʼãrẽa mejãcha sopʉapanʉta, aña wã ẽ ewari bio basi deda, akʉza mʉ̃yikʉza beita krĩchasi.

Mʉ̃ 20 poaga babʉrʉde, trãbi heavy metaldebemata ũrĩsi. Mʉ̃a maʉ̃ trãbi ũrĩ buruba mʉ̃ra sobiabibasi. Maʉ̃ba jipa ũrĩkĩrãbasi, maʉ̃ kʼarea mʉ̃ra yi maʉ̃ra trãbi ũrĩbʉbawara wã jʉ̃drʉsi, adewara ãyi kĩrãkʼa yo jʉ̃drʉsi, akʉza mʉ̃ kʉwʉrʉra mejãcha uyasi akʉza mʉ̃ bʉdara idu waribisi, mʉ̃ neũdukʼawuarabida jõma maʉ̃ trãbirata ũrĩpanasi. Mʉ̃ra mʉ̃yi nãã badaira awuarasi.

Akʉza mʉ̃a krĩchabasi maʉ̃ obʉba sobiabʉta, mamina wãrĩnu bʼaira mʉ̃ra sobia ẽ basi, adewara mʉ̃a kʼawuaside maʉ̃ra ẽbẽrarã maʉ̃ trãbi okʉabadara jipa nekayiruata opanasita maʉ̃ba mʉ̃ra sopʉabisi. Mʉ̃ara krĩcha zesi beita. Mamina mʉ̃ara oẽbasi mʉ̃ papa kʼarea, mʉ̃a kʼawuabasi baera mʉ̃ papaba mʉ̃ra mejãcha kãgata.

Mʉ̃ beikĩrã basimina beibe ẽ basi, ewari aba mʉ̃a librota lekĩrã jʉ̃drʉsi. Mʉ̃a maʉ̃ akʉburude eda bedʼeachuasi yumakẽrã aba iglesiadebema ʉ̃rʉ. Maʉ̃ba mʉ̃a krĩchabisi ẽbẽrarã kʼarea nekʼãrẽ oita akʉzade Daizeze kʼarea. Mʉ̃ra jipa Daizezeara yiwidʼikabasi, mamina mʉ̃ yiwidʼibʉrʉdera soiduba yiwidi jʉ̃drʉsi Daizezeʼa. Mʉ̃ra Daizezeʼa yiwidʼisi, akʉza jarasi ũdubimarẽã mʉ̃a kʼãrẽta oseabʉta mawũã jarabʉrʉba mʉ̃ sora aduʼa besi. ũmadaʉ ũme berabarida tẽã zesi aba Jeowa ʉ̃rʉ Kʼawuabipanʉrãta, iya mʉ̃aʼa jarasi Daizeze Bedʼeata jaradiakĩrãbʉta. Mʉ̃a yiwidʼida kĩrãkʼa aripe berabarisi, maʉ̃neba ʉ̃ta mʉ̃ra mejãcha sobia besi.

SÃWŨÃ AWUARA BABISI DAIZEZE BEDʼEABARA MɄ BEBɄRA:

Jipa mʉ̃ita zarebasimina, mʉ̃ara balbʉesi nekʼãrẽ jõma heavy metalde nekʼãrẽ erbadara. Mawũãsidu maʉ̃ra trãbiba jarabadara wabida mʉ̃ara krĩcha zebasi. Mʉ̃ berabaribaside maʉ̃ trãbira zabʉare, mʉ̃ krĩchadera mejãcha zebasi nekayiruata. Mʉ̃ara wuara maʉ̃ ʉ̃rʉra krĩchamabasi, maʉ̃ kʼarea maʉ̃ trãbi ũrĩpanʉarera wua berabari ẽãsi, adewara mʉ̃ krĩchade zebaside maʉ̃ra nekayiruata Jeowa mejãcha yiwidʼibasi. Mawũã Jeowabara mʉ̃ra kʼarebasi mʉ̃ so aduʼa babita (Filipenses 4:7).

Mʉ̃a Daizeze Bedʼea kʼawua wãne, kʼawuasi daya kʼawuabʉrʉta wuabemara ẽbẽrarãbida jaradiaibarata (Mateo 28:​19, 20). Mʉ̃ra mejãcha sobiabasi mʉ̃a nekʼãrẽ kʼawua wã ʉ̃rʉ, mamina krĩchabasi awururãra jaradiabe ẽãta. Mʉ̃ara kʼawuabasi wuabemara ẽbẽrarãbida kʼawuaibarabasita, mʉ̃a kʼawua wã kĩrãkʼa wãrĩnu ʉ̃rʉ. Maʉ̃ba mʉ̃ perabasimina awuru ẽbẽrarã jaradia wãsi mʉ̃a kʼawuabada ʉ̃rʉ. Mʉ̃a krĩchabisi mʉ̃ara oseabʉta nekʼãrẽra biata, adewara mʉ̃ara soiduba ĩjãsi mʉ̃a kʼawuanʉmʉra wãrĩnubasita.

MɄ̃A NEBIATA ŨDUZEBɄRɄ:

Mʉ̃ra atiara juwa jidasi akʉza mʉ̃ara ẽbẽrarã mejãchaʉta kʼareba zebʉrʉ Daizeze ʉ̃rʉ kʼawuaita, bari jaradaita maʉ̃ne mʉ̃ mebẽãta, mʉ̃ papaʉ̃me. Maʉ̃ba mʉ̃ra mejãcha sobiabibʉ kʼãwũã Daizeze odebʉ baera akʉza ẽbẽrarã jaradiabʉ baera.