NAɄ̃ DRɄA jõmaʉ̃nẽ drʉa awuara awuaraka akʉza religion awuara awuaraka ẽbẽrarã yiwidʼipanʉ. Ʉ̃kʉrʉta doba yiwidʼibʉ adewara ʉ̃kʉrʉta bio nʉmʉmae yiwidʼipanʉ, ʉ̃kʉrʉta yiwidʼipanʉ iglesiade, sinagogade akʉza templode. Akʉza ãyi yiwidʼibʉrʉdera yiwidʼipanʉ rosariodeba, kartaraneba akʉza nekʼãrẽ omaneba.

Dayirãra nedʉwʉrʉ kĩrãkʼa panʉ. Bari jaraita, nekopanʉ, bania dopanʉ, iñãbapanʉ, wũãwũã barapanʉ akʉza beipanʉ (Eclesiastés 3:19). Mamina dayirãra nedʉwʉrʉira awuara panʉ, dayirã ẽbẽrarã yiwidʼipanʉ. ¿Kʼãrẽa yiwidʼipanʉ ẽbẽrarã?

Yiwidʼita nesidapanʉ baera. Ãya mawũãtrʉ sentipanʉ Daizeze kʼawabʉta akʉza Daizezeʉ̃me bedʼeakĩrãbʉ baera. Daizeze Bedʼeabara ũdubibʉ, Daizezebara ẽbẽrarã mawũã parãsi, iyi kʼawa bʼaita akʉza iyi jʉrʉmarẽã (Eclesiastés 3:11). Jesuba mawũã jarasi: «Sobiapanʉ Daizezedebema audre kʼawuakĩrãpanʉta» (Mateo 5:3).

Jõmaʉ̃ta Daizeze neũdukʼawua bakĩrãpanʉ, maʉ̃ kʼarea ʉ̃kʉrʉba parãpanʉ iglesiarata akʉza nekʼãrẽ oma yiwidʼipanʉ, adewara yi Daizeze ĩjã ẽãbara ãyikʉza ĩjãpanʉ akʉza kʼareba widipanʉ awuru ẽbẽraʼa. Mamina ʉ̃kʉrʉ ẽbẽraba krĩchapanʉ Daizeze neũdukʼawua bʼaira nesida ẽãta, ¿wãrĩnuka maʉ̃ra? Dayirã ẽbẽrarã zarea neẽ baera, beibaritabʉ baera akʉza jõma ũrĩ ẽ baera nesidapanʉ dayirã audre zarea barabʉta, kikibarita, adewara audre buru biata dayirãta kʼarebamarẽã. Mamina, ¿kʼãrẽba yiwidʼibibʉ dayirãra?

Edaʉde ẽbẽrabara kʼareba nesidabari mamina neẽ kʼaiba panʉita, ¿mawũã berabaribarika bʉra? Bari jaraita bʉ mebẽrãnebema beibʉrʉdera, kʼãrẽ oi krĩchabʉrʉde adewara daya nekayirua zroma obʉrʉde, kʼareba diapanʉ akʉza ũrãgʼa diapanʉ, mamina mawũãsidu krĩchaseapanʉ audre kʼareba nesidabʉta, ¿mawũã berabaribarika bʉra?

Daizeze Bedʼeabara jarabʉ yiwidʼiba kʼarebabʉta dayirãra adewara jaradiabʉ sãwũã yiwidʼibarata akʉza kʼãrẽta jaraibarata. Akʉza jarabʉ sãwũã yiwidʼisidata yumãkẽrata, yuwẽrãta ãyi bedʼea zroma erpanaside. Ãyi yiwidʼibasidera widipanasi ãyaʼa ũrãgʼata diamarẽã, jaradiamarẽã, ãyi nemitiata kĩrãduamarẽã akʉza panʉmarẽã ãyi bedʼeata (Salmo 23:3; 71:21; Daniel 9:4, 5, 19; Habacuc 1:3).

Maʉ̃ra ẽbẽrarãbara kʼawuapanasi kʼaia yiwidʼibarata. Idi ewadera ʉ̃kʉrʉ ẽbẽrarãba, kʼawuada ẽ maʉ̃ra.

ẼBẼRA mejãchaʉba krĩchapanʉ ãyi yiwidʼira Daizezebara ũrĩbʉta. Adewara krĩchapanʉ religion jõma yibiata, maʉ̃ba kʼãrẽ ẽãta badu Daizezeʼa yiwidʼira. Mamina, ¿maʉ̃ra wãrĩnuka?

Daizeze Bedʼeabara jaradiabʉ ẽbẽra mejãchaʉta Daizezeara yiwidʼipanʉ ẽãta. Daizeze Bedʼea bʉsida ewaridera, ẽbẽrarãra yiwidʼipanasi nekʼãrẽ oma. Daizezebara jarada ʉ̃rʉ jarabasi iyi pʉwʉrʉʼa maʉ̃ra oda ẽ marẽã. Salmo 115:4-6 bayedara jarabʉ ne parãma ʉ̃rʉ «kʉwʉrʉ barapanʉ, mamina ũrĩna ẽ». Maʉ̃ba kʼãrẽa yiwidʼi nesida neẽ daizeze zeri ẽãra iyara ũrĩ ẽ baera dayi yiwidʼira.

Akʉdadrʉ Daizeze Bedʼeaba nebʉrabʉta Elías ʉ̃rʉ. Propeta Elíasbara Baal propetara jarasi ãyi daizezeʼa yiwidʼidamarẽã, mõbe iyisida Jeowa yiwidʼita. Elíasbara akʉza jarasi Daizeze yi yiwidʼi panʉbʉrʉtrʉ Daizezearata, aramaʉ̃ta Baal propetarabara ĩjãsida Elíasba jarada bedʼeara. Baal propetarãra diapedaʉba yiwidʼipanasi akʉza zarea yiwidʼipanasi ũrĩmarẽã, mamina Baalbara ũrĩ ẽ basi. Daizeze Bedʼeabara jarabʉ, mia kʼaiba panʉ ẽ basita ãyi yiwidʼira (1 Reyes 18:29). Mamina, ¿kʼãrẽta berabarisi Elías Daizezeʼa yiwidʼisidera?

Elías Jeowaʼa yiwidʼida tẽã, Daizeze Jeowabara tʉbʉta zebisi ʉ̃tʉba, iyi oprenda batotobita. Mawũẽra, ¿kʼãrẽne awuara basi? Dayirãba 1 Reyes 18:36, 37de akʉbʉrʉde ũdupanʉ, Elíasbara bedʼea mejãcha jara ẽ basita, awuara bʉrʉ Jeowa trʉ̃ta ũbeabayeda jarasi.

Baal trʉ̃bara jarakĩrãkʉ «yibarita». Baalʼra kananeora daizeze basi, mamina pʉwʉrʉ awuara awuarakade trʉ̃ awuara diapanasi. Mamina Jeowa trʉ̃ra mia awuru ẽbẽraba erbʉ ẽ, iyabʉrʉ erbʉ. Maʉ̃ kʼarea iya jarasi: «Mʉ̃ra Jeowa. Kaʉ̃ mʉ̃ trʉ̃ra; mʉ̃ zareara miõ dia ẽ» (Isaías 42:8).

¿Elías yiwidʼira akʉza Baal propeta yiwidʼira iyabaʉ daizezeba ũrĩsika? Mawũã ẽ. Baal kʼaidupanʉrabara mejãcha nekayiruata opanasi baera maʉ̃ba ãyara ẽbẽrata babʉepanasi Baal yiwidʼiya, adewara yumakẽrãra akʉza wẽrãrãra mia erkʼãĩpanasi Baal kĩrãbita akʉza nekʼãrẽ oma yiwidʼipanasi. Mamina Jeowabara kãgabasi iyi pʉwʉrʉba kayirua oda ẽ bamarẽã, awuarabʉrʉ neneẽã panamarẽã. Krĩchara naʉ̃ta, bʉa bʉ neũdukʼawua bia kartata dia bʉekĩrãbʉbʉrʉ, bʉa iyidu jʉ̃ẽbira iyi trʉ̃ne zokʼa bʉeibara, mamina bʉa awuru ẽbẽra trʉ̃ta bʉra akʉza maʉ̃ ʉ̃rʉ imitia jarabʉbʉrʉ maʉ̃mabʉrʉ jʉ̃ẽñi.

Bʉta Jeowa yiwidʼibʉbʉrʉ, Daizeze dayirã jõma parãna yiwidʼibʉ.a Propeta Isaías yiwidʼiside jarasi: «Jeowa bʉra dai Zeze» (Isaías 63:16). Adewara Jesubara Jeowa ʉ̃rʉ bedʼeaside jarasi iyi kʼaidupanʉraʼa: «‹Mʉ̃ra wãre zeyi mʉ̃ Zezema akʉza mara Zezema, mʉ̃ Daizezema akʉza mara Daizezema›» (Juan 20:17). Jesu Zezera Jeowa, Jesura yiwidʼisi Jeowaʼa adewara iyi kʼaidupanʉrãra jaradiasi Jeowaʼa yiwidʼidamarẽã (Mateo 6:9).

¿Daizeze Bedʼeabara jarabʉka dayirãra Jesuʼa yiwidʼibarata, mawũã ẽ bʉrʉ Maríaʼa akʉza santoraʼa, adewara angeleraʼa? Mawũã ẽ, dayirãbara Jeowabʉrʉ yiwidʼibara. Bedʼea ũme akʉdayi maʉ̃ ʉ̃rʉ jara ũrĩbibʉta. Yi nabemata, Daizeze Bedʼeabara jarabʉ Jeowa abaʉbʉrʉ yiwidʼidamarẽã. Dayi yiwidʼibʉba ũdubibʉ Jeowaba jarabʉ obʉta (Éxodo 20:5). Yi ũmeta, Daizeze Bedʼeabara jarabʉ Daizezera dayirã «Yiwidʼibʉ ũrĩbari» (Salmo 65:2). Jeowabara nekʼãrẽ oira ʉ̃kʉrʉra diabʉ kʼãrẽ, mamina dayirã yiwidʼi ũrĩbaira awuruaʼa dia ẽ basi, awuarabʉrʉ iyabʉrʉ ũrĩbʉ.

Bʉa kãgabʉbʉrʉ Daizezeba ũrĩmarẽã bʉ yiwidʼibʉta iyabʉrʉ yiwidʼibara, kĩrãbeibara naʉ̃ bedʼea Daizeze Bedʼeadebemata: «Ẽbẽra jõma Jeowa trʉ̃ jarabʉrʉra, bei ẽã ẽdrʉya» (Hechos 2:21). ¿Daizezebara jõma ũrĩbʉka dayirã yiwidʼibʉra? Mawũã ẽ bʉrʉ, ¿kʼãrẽta oibara iya ũrĩmarẽã dayirã yiwidʼibʉra?

RELIGIONʼRA mejãchaʉba audre akʉpanʉ dayirã sãwũã kʉaibarata yiwidʼibʉrʉdera akʉza kʼãrẽ bedʼea jaraibarata. Mamina Daizeze Bedʼeabara maʉ̃ ʉ̃rʉ mejãcha jara ẽ, awuarabʉrʉ bedʼeabʉ wuabemara nebia ʉ̃rʉ.

Daizeze Bedʼeadera jarabʉ Jeowa ode panʉra sãwũã yiwidʼisidata. Ʉ̃kʉrʉra yiwidʼisidadera ʉ̃ta akʉsida akʉza ʉ̃kʉrʉrabara eda akʉsida ãyi yiwidʼisidadera, adewara badumae yiwidʼisida. Ʉ̃kʉrʉra yiwidʼisida krĩchadeba akʉza ʉ̃kʉrʉra jĩgʉa bedʼeasida yiwidʼita, mamina ãyi yiwidʼisidadera nekʼãrẽ omara zokʼada ẽ basi, awuarabʉrʉ jarasida ãyi sode erbʉta. ¿Kʼãrẽa ũrĩsi Jeowaba ãyi yiwidʼira?

Ãyira Daizeze Jeowara yiwidʼisida baera. 1 Juan 5:14ba jarabʉ kĩrãkʼa waidide nesidapanʉ kʼãrẽ oita Jeowaba ũrĩmarẽã dayirã yiwidʼira: «Dayirãbara wãrĩnu ĩjãpanʉ iyi ʉ̃rʉ; dayirãba iya kãgabʉde wididara, iya wãrĩnu ũrĩta». Dayirã yiwidʼibʉrʉdera, yiwidʼibara Jeowaba kãgabʉde. ¿Kʼãrẽta jarakĩrãkʉ naʉ̃bara?

Jeowaba kãgabʉ kĩrãkʼa yiwidʼira, dayirãba badua akʉdaibara Daizeze Bedʼeata. Mamina Jeowabara jʉ̃ãbʉ ẽ dayirãba jõma kʼawuadamarẽã burude iyi Bedʼeadebʉta. Awuarabʉrʉ iyara kãgabʉ dayirãba kʼawuadamarẽã iya kʼãrẽta oita akʉza odamarẽã iya jarabʉta (Mateo 7:21-23). Dayirã Daizeze Bedʼeade kʼawua wãra ũdubibara Jeowaʼa dayi sãwũã yiwidʼibʉdeba.

Dayirãba audre kʼawua wãne Jeowaba kʼãrẽ kãgabʉta, maʉ̃ba kʼarebayi dayirãba ĩjãbʉra audre soiduba ĩjãita. Dayirãbara maʉ̃ta nesidapanʉ Jeowaba ũrĩmarẽã. Maʉ̃ kʼarea Jesubara jarasi: «Maraba jõma widibʉra yiwidʼibʉrʉde ũdudayi, soiduba ĩjãpanʉbʉrʉ» (Mateo 21:22). Ĩjãibara jarakĩrãbʉmina ĩjãita daya ũdu ẽ mina jarabʉ ẽ jõma ĩjãibarata, maʉ̃ kʼarea Jesubara jaradiasi dayirãbara kʼãrẽ ĩjãi naena nããra kʼawuaibarata wãrĩnu kʼawuaita (Hebreos 11:1). Dayirãba Jeowa ũdu ẽ mina, Daizeze Bedʼeabara ũdubibʉ nekʼãrẽ mejãchaʉdeba iyira wãrĩnubʉta, adewara dayirãbara iyira ĩjãseapanʉ akʉza ũdubibʉ iyara wãrĩnu panʉbʉta iyi ĩjãpanʉra bedʼeara. Dayirãba Daizezeʼa soiduba ĩjã bʼaita widira, iyara diayi (Lucas 17:5; Santiago 1:17).

Jesubara jarasi mia abaʉta iyi Zezeidura jʉ̃ẽbeda ẽãta iyideba oda ẽ bʉrʉ (Juan 14:6). Maʉ̃ra jarakĩrãkʉ Jesu trʉ̃neba yiwidʼidaibarata. Maʉ̃ kʼarea Jesubara iyi kʼaidupanʉra jaradiasi iyi trʉ̃neba yiwidʼidaibarata (Juan 14:13; 15:16). Jesu trʉ̃neba yiwidʼibaira jarakĩrãkʉ ẽ Jesuʼa yiwidʼibʉta, awuarabʉrʉ Jesu kʼarebadeba Jeowaʼa yiwidʼipanʉta.

Ewari aba Jesu kʼaidubema abaʉba mawũãsi: «Daia jaradedʼekarua zhiwidʼiita» (Lucas 11:1). ¿Ãyara kʼawua ẽ basika sãwũã yiwidʼira? Kʼawuapanasi, awuarabʉrʉ kʼawuakĩrãpanasi kʼãrẽ ʉ̃rʉ yiwidʼibarata.

RELIGION mejãchaʉta yiwidʼipanʉ mamina audre kʼawuapanʉ Jesuba jaradiada: padrenuestro. Mamina jõmaʉ̃ba biʼia kʼawuada ẽ naʉ̃bara kʼãrẽta jarakĩrãbʉta. Ẽbẽra mejãchaʉba ewariza naʉ̃ bedʼea badua yiwidʼipanʉ, mamina krĩchada ẽ naʉ̃ bedʼeabara kʼãrẽta jarakĩrãkʉta. Jesubara kãga ẽ basi maʉ̃ mawũã odaira. ¿Dayirãba kʼãrẽa mawũã kʼawuapanʉ?

Jesuba naʉ̃ padrenuestro jaradiai naweda naʉ̃ bedʼeata jarasi: «Yiwidʼibʉrʉde iyabaʉ bedʼeata jararãra» (Mateo 6:7). Jesuba jaradia ẽ basi kʼãwũã yiwidʼira burude kʼawuadamarẽã mia yiwidʼibʉrʉde iyabaʉ bedʼeata jarapanamarẽã. Awuarabʉrʉ Jesubara jaradiakĩrãbasi kʼãrẽ ʉ̃rʉ yiwidʼibarata. Maʉ̃ ʉ̃rʉ biʼia kʼawuadaita akʉdayi naʉ̃ bedʼea Jesuba jaradiadata (Mateo 6:9-13).

«Zeze ʉ̃tʉbema bʉ trʉ̃ra neneẽã baide bʉa.»

Jesubara jaradiasi yiwidʼi jʉ̃drʉbʉrʉdera yi Zezeʼa bʉrʉ yiwidʼidaibarata. ¿Kʼãrẽa tẽã jarasi Daizeze trʉ̃ra neneẽã baide bʉta?

Dããra wedaʉba Daizeze trʉ̃ ʉ̃rʉ mitia jarapanasi baera, adewara Diarubara Daizeze ʉ̃rʉra imitia bedʼeabʉ, jarabʉ Daizezebara dayirãra zokʼa ẽ baibarata akʉza dayirã nebiata dia amabʉta adewara sewa nebʉrʉ omiata (Génesis 3:1-6). Akʉza ẽbẽrarã maʉ̃ kĩrãkʼa krĩchapanʉrabara jarapanʉ Daizezera ẽbẽra kayiruata zʉbʉriabibʉta ẽbẽrarãta akʉza jarapanʉ Daizezeba parã ẽ basita naʉ̃ drʉade nʉmʉra. Ʉ̃kʉrʉba Daizeze trʉ̃ra Daizeze Bedʼeadebara ãĩ bʉesida akʉza kãgada ẽ Daizeze trʉ̃arara zokʼadamarẽã.

Daizeze Bedʼeaba jarabʉ Jeowabara maʉ̃ra jõbita (Ezequiel 39:7). Akʉza ẽbẽrarã zʉbʉriapanʉra maʉ̃sida jõbita, ¿sãwũã berabari maʉ̃ra? Jesuba jara ũrĩbibʉ.

«Zebira bʉ Nokʼota.»

Idira Daizeze Nokʼo ʉ̃rʉ bedʼeabʉdadera religionʼra nokʼorãra bedʼea abarika zepanʉ ẽ. Mamina Jesu ewaridera mawũã ba ẽ basi. Judiora nããra badarabara Daizeze Bedʼeadeba biʼia kʼawuapanasi Daizezebara ãyi ẽdrʉbibarita zokʼa bʉeibasita (Isaías 9:6,7; Daniel 2:44). Akʉza maʉ̃ ẽdrʉbibaribara Daizeze Nokʼota zokʼaibasita jõma ara oita. Maʉ̃ nokʼodeba Daizeze trʉ̃ra neneẽã babiyi. Akʉza ũdubiyi Diarura sewa nebʉrʉ obʉta. Mawũã Diaruba obʉra jõma jõbiyi adewara jõbiyi jarrabata, naʉ̃ drʉade yõbʉta, kayata akʉza ẽbẽrarã beibʉta (Salmo 46:9; 72:12-16; Isaías 25:8; 33:24). Daizezeʼa iyi Nokʼo wemarẽã widibʉrʉ za, widipanʉ jõma omarẽã iya jaradara.

«Bʉa krĩñata odaide bʉa ʉ̃tre obe kĩrãkʼa, mawũã odaide bʉa drʉadebida.»

Naʉ̃ba ũdubibʉ Daizezeba kãgabʉra nama berabarita ʉ̃tʉ berabarida kĩrãkʼa Daizeze bʉmae, maʉ̃ra aripe berabarisi Jesuba Diaru ʉ̃tʉba jʉretaside (Apocalipsis 12:9-12). Naʉ̃ba akʉza nããrabema ũme wididaba krĩchabibʉ Daizezeba kãgabʉra audre yibiata dayirãba kãgabʉira. Daizezeba kãgabʉra audre yibia iya jõbi baera zʉbʉria naʉ̃ drʉade bʉra. Jesubida Daizezeba warra basimina iya widisi: «Aribʼaerãrũã mʉã krĩñata, awuarabʉrʉ aribʼaedua bʉzha krĩñata» (Lucas 22:42).

«Idibema yikota daiʼa diara.»

Jesubara jaradiasi dayirãba widiseabʉta widira kayirua ẽãta, mawũã opanʉne ũdubibʉ dayirãba ĩjãbʉta naʉ̃ bedʼeata: «Izhabʉrʉ jõmaʉ̃ã dia bʼʉa zokʼai bʼaita, ĩñabata, aramaʉ̃ne ne jõma dia bʼʉa» (Hechos 17:25). Daizeze Bedʼeabara ũdubibʉ Daizezera zeze bia kĩrãkʼa bʉta dayirã diabʉ baera dayirãba nesidapanʉta. Mamina iyara dia ẽ dayirã zʉbʉriabiseabʉra.

«Kĩrãduara daiba nekayirua obʉta.»

¿Kʼãrẽ nemitiata Jeowaba kĩrãduamarẽã nesidapanʉ dayirãbara? Dayirãra nemitia omia baera maʉ̃neba bedʼea zroma ũdupanʉ adewara maʉ̃neba beipanʉ. Dayirãra nemitia omia baera Daizeze nãã nekayiruata opanʉ. Maʉ̃ba sopʉabipanʉ iyita. Dayirãta ewari jõmaʉ̃nẽ bakĩrãpanʉbʉrʉ nesidapanʉ Daizezeʼa widita maʉ̃ nekayirua kĩrãduamarẽã (Romanos 3:23; 5:12; 6:23). Daizeze Bedʼeabara jarabʉ Daizezera ẽbẽra biata akʉza dayirã nemitiara kĩrãduakĩrãbʉta (Salmo 86:5).

«Ẽdrʉbira Diaru juwadeba.»

Dayirã ẽbẽrarãbara nesidapanʉ Diaru juwadeba ẽdrʉbimarẽã. Ʉ̃kʉrʉba krĩchapanʉ Diarura neẽãta, mamina Jesubara jarasi Diarura wãrĩnubʉta iya jaraside Diaruba zokʼabʉta naʉ̃ drʉara (Juan 12:31; 16:11). Diarubara bedʼea zromata ũdubibʉ naʉ̃ drʉa jõmaʉ̃nẽ, mamina iyara kãgabʉ aba abakaʉba nekayiruata odamarẽã akʉza mawũã Jeowa neũdukʼawua ba ẽ baita (1 Pedro 5:8). Mamina dayirãra maʉ̃ kʼarea pera ẽ baibara, Jeowara audre zarea barabʉ baera akʉza iyara kʼarebakĩrãbʉ iyi kãgabʉrãra.

Dayirãbara nebio widiseapanʉ 1 Juan 5:14de jarabʉ kĩrãkʼa: «Dayirãba iya kãgabʉde wididara, iya wãrĩnu ũrĩñi». Maʉ̃bara jarakĩrãbʉ dayirãbara jõma jaraseapanʉta Jeowaʼa, iya dayirãba widibʉra kʼãrẽ ẽ kĩrãkʼa akʉ ẽ bayi (1 Pedro 5:7).

¿Kʼãrẽta jarabʉ Daizeze Bedʼeabara sama yiwidʼi ʉ̃rʉ akʉza sõbede? Maʉ̃ bedʼeara panʉnañi wuarebema artikulode.

RELIGIONʼRa bioba jarapanʉ sama yiwidʼita akʉza kʼãrẽ ʉ̃madaʉde yiwidʼita. ¿Daizeze Bedʼeabara mawũã jarabʉka?

Daizeze Bedʼeabara jarabʉ kʼãrẽ ewaride yiwidʼibarata. Bari jaraita, Jesura yiwidʼisi iyi nekoi naena (Lucas 22:17). Jesu kʼaidubʉrabida ãba yi jʉrepanaside Jeowa ʉ̃rʉ kʼawuaita nããra yiwidʼipanasi, maʉ̃ra opanasi naenaʉ̃ba Jerusalén templode. Maʉ̃ templora Daizezebara erbasi ẽbẽra jõmaʉ̃ta yiwidʼide jʉ̃ẽnamarẽã iyaʼa (Marcos 11:17).

Daizezebara kãgabʉ iyi kʼaidupanʉrãra ãba yi jʉredamarẽã akʉza ãba yiwidʼidamarẽã wãrĩnu Daizeze Bedʼearadebemaba jarabʉ kĩrãkʼa. Dayirã yiwidʼibʉrʉde jarabʉrʉba obiseabʉ Jeowaʼa iya kʼãrẽ oẽ baibarata (Hebreos 13:18, 19). Maʉ̃ba Jeowa ʉ̃rʉ Kʼawuabipanʉrãra yiwidʼipanʉ ãba yi jʉrebʉrʉza. Ũrĩkĩrãbʉbʉrʉ Jeowa ʉ̃rʉ Kʼawuabipanʉrã yiwidʼita wãra Daizeze nokʼo ʉ̃rʉ bedʼeabari dema bʉde kʼaita bʉma.

Daizeze Bedʼeabara jara ẽ kʼãrẽ ũmadaʉde yiwidʼita akʉza sama yiwidʼita. Daizeze Bedʼeabara jarabʉ iyi kʼaidupananara yiwidʼipanasita badu ewaride akʉza badumae. Jesuba jarasi: «Bʉ yiwidʼibʉrʉdera bʉ kuartode eda wã kʼãrãpe, serrara yi puertara, mõbe yiwidʼira bʉ Zeze kʼaiba kʼawuada ẽ mae bʉʼa, mawũãra bʉ Zeze kʼaiba kʼawuada ẽ maeba akʉbʉba jẽda diayi nebiata» (Mateo 6:6).

Bʉmabida maʉ̃ra mejãchade yibia Daizezebara dayirã yiwidʼira ũrĩbʉ baera badumae akʉza badu ewaride. Maʉ̃ba Jesubara jʉrʉbasi iyi sama abapai bʼaita yiwidʼita. Ewari aba iya kʼãrẽ oi naena ʉ̃nadrʉyeda yiwidʼisi (Lucas 6:12, 13).

Basi yuwẽrãrata akʉza yumakẽrãrata, maʉ̃rãra Daizezeʼa yiwidʼipanasi ãyi bedʼea zroma kʼarea Daizezeba kʼarebamarẽã,nããra ãya kʼãrẽ oi naena. Ãyitara audre yibia basi soiduba yiwidʼita, maʉ̃ba ãyira yiwidʼisi ãyi doba akʉza jõmaʉ̃ra deidʉ adewara chupea akʉza bedʼea jĩgʉa. Jeowaba jarabʉ: «Yiwidʼidua badua» (1 Tesalonicenses 5:17). ¿Yibia ẽka bʉitara Daizezeba ũrĩkĩrãbʉ baera dayirã yiwidʼira?

Jeowabara jarabʉ dayirã yiwidʼira ũrĩkĩrãbʉta dayirã yiwidʼibʉrʉza. Idi ewadera ʉ̃kʉrʉ ẽbẽrarãbara jarapanʉ yiwidʼira yibia ẽãta. ¿Bʉsida mawũã krĩchabarika?

ẼBẼRA mejãchaʉba krĩchapanʉ yiwidʼibara kʼareba ẽãta dayirãra, mamina Daizeze Bedʼeabara jarabʉ wãrĩnu kʼarebabʉta (Lucas 22:40; Santiago 5:13). Yiwidʼibara kʼarebabʉ dayirãra Daizeze neũdukʼawua bʼaita akʉza bia sentita, maʉ̃ awuara kaya ẽ baita. ¿Sãwũã kʼarebai maʉ̃bara?

Bari jaraita, wũãwũãra ne bari diabʉdadera, ¿kʼãrẽta jaramarẽã jarapanʉ yibarirãbara? Yibarirãbara jaradiapanʉ bari krĩcha ẽ baita biga diaita, awuarabʉrʉ jara ũrĩbimarẽã. Daya biga diabʉrʉdera, maʉ̃ra audre dayi soidʉ zebʉ. Mawũã abarikabʉ dayirã Daizezeʼa yiwidʼibʉrʉdera. Dayi yiwidʼira kĩrã biobʉ. Akʉdaya maʉ̃nebemata aba abaka dayirã sãwũã kʼarebabʉta.

Yiwidʼi biga diaita. Jeowaba dayirã nebiata diabʉ baera iyaʼa bigata diapanʉ. Maʉ̃ba kʼarebabʉ nebia krĩchaita dayirãra, sobiapanaita adewara audre biga diapanaita (Filipenses 4:6).

Bari jaraita: Jesubara biga diasi yi Zezeʼa iyi bedʼea ũrĩna kʼarea (Juan 11:41).

Yiwidʼi Jeowaba kĩrãduamarẽã dayirã nemitiata. Dayirã nemitia obʉrʉdera mejãchade sopʉabʉ, mamina Jeowaʼa yiwidʼibʉrʉde dayirã nemitiata kĩrãduamarẽã, maʉ̃ba audre bia sentibibʉ. Maʉ̃ba krĩchabibʉ dayirãba nemitia odara yi zromabasita akʉza wua nekayirua oẽ baita.

Bari jaraita: Davidʼra Jeowaʼa yiwidʼisi mejãcha sopʉabasi baera iya nemitia oda kʼarea (Salmo 51).

Yiwidʼi kʼareba widita akʉza buru bia erbaita. Naʉ̃bara kʼarebabʉ dayirãra eda bʼaita jõma kʼawuapanʉ ẽ baera akʉza kʼarebabʉ Jeowa audre ĩjãita mawũã dayirãkʉza ĩjã ẽ baita (Proverbios 3:5, 6).

Bari jaraita: Yiwidʼi Salomónba odata Jeowaba buru bia diamarẽã akʉza kʼarebata diamarẽã, iya sãwũã zokʼaita pʉwʉrʉ Israelta (1 Reyes 3:5-12).

Yiwidʼi sopʉa zroma erbʉde. Dayirãra mejãchade kʼarebabʉ dayirã sopʉa zroma Jeowaʼa jõma jarabʉrʉde, maʉ̃ba ũdubibʉ dayirã kʼarebara Jeowadeba zebʉta (Salmo 62:8).

Bari jaraita: Nokʼo Asára yiwidʼisi Jeowaʼa iya ũduside iyi nejʉrara iyi kĩrãbita (2 Crónicas 14:11).

Yiwidʼi yi kʼareba nesidabʉita. Mawũã ãĩ bʉe wãnañi dayitrʉ krĩchada ẽ baita adewara mawũãtrʉ wuabemara ʉ̃rʉ krĩchadayi akʉza so zʉbʉria akʉdayi.

Bari jaraita: Jesura yiwidʼisi iyi kaidubʉrabari (Juan 17:9-17).

Yiwidʼi Jeowaʼa ibiade bedʼeaita. Dayirã Jeowa nebia ʉ̃rʉ bedʼeabʉrʉdera akʉza iya kʼãrẽ oda ʉ̃rʉ, maʉ̃ba wari wã dayirãba kãgabʉra akʉza wawiabʉra. Mawũã yiwidʼibʉba dayirãra maʉ̃ba audre iyi kʼaita baseabʉ.

Bari jaraita: Davidʼra ibia bedʼeasi Jeowaba kʼãrẽ oda ʉ̃rʉ naʉ̃ drʉade (Salmo 8).

Mamina, naʉ̃ nebiara maʉ̃ awa ẽ, awuarabʉrʉ audre ũdudayi nebiara. Bari jaraita, dayirã yiwidʼibʉrʉdera erpanañi Daizeze krĩcha neneẽãbʉta (Filipenses 4:7). Maʉ̃ba idi ewadera mejãchade yibia dayirã krĩcha neneẽã erbaita akʉza kʼarebabʉ kaya ẽ baita (Proverbios 14:30). Mamina, ¿sãwũã erpanai Daizeze krĩcha neneẽãbʉra? ¿Dayirãkʉzaʉba erpanaika?

MAɄ̃ ʉ̃rʉra ẽbẽra mejãchaʉba kʼawuakĩrãpanʉ. Dayirãba kʼawuatabeda Jeowaba dayirãra yiwidʼira ũrĩbʉta, mamina jõma ũrĩ ẽ yiwidʼira. ¿Ũrĩbʉka dayirã yiwidʼibʉra? Maʉ̃ra dayidechu.

Jesu ewaridera basi religion nokʼora Daizezeʼa yiwidʼipanʉta, ãyara opanasi maʉ̃ra ẽbẽrarãba akʉdamarẽã akʉza krĩchadamarẽã Daizeze ode panasita. Mamina, Jesubara maʉ̃ra kãga ẽ basi akʉza jarasi Daizezebara ãyara wuara nebia dia ẽ baibasita akʉza ãyi yiwidʼira ũrĩ ẽ baibasita (Mateo 6:5). Idibida ʉ̃kʉrʉ ẽbẽrarã yiwidʼibʉrʉdera yiwidʼibʉ ãya kãgabʉ kĩrãkʼa, mawũã yiwidʼida ẽ Jeowaba kãgabʉ kĩrãkʼa. Atiara kʼawuasida Daizeze Bedʼeade sãwũã yiwidʼi ʉ̃rʉ, mamina ẽbẽrabara oda ẽ maʉ̃ra. Maʉ̃ kʼarea Jeowabara panʉ ẽ ãyi yiwidʼibʉra.

¿Sãwũã akʉbʉ Daizezebara bʉra? Daizezebara akʉ ẽ dayi samaʉ̃ba zebʉra, dayi plata erbʉ kʼawuaita, nebia barabʉ kʼawuaita, dayi yiwidʼi iya ũrĩra. Iyi Bedʼeaba jarabu: «Daizezebara jõma ẽbẽrarãra awuara [akʉ ẽ] awuarabʉrʉ kãga iyi wawiabʉra akʉza nebia opanʉrata, krĩcha ẽ samabema pʉwʉrʉta» (Hechos 10:34, 35). Ẽbẽra Daizeze wawiabʉbara kayirua okĩrã ẽ Jeowaba kãga ẽãra, ẽbẽra nebia obʉbara jʉrʉbʉ Jeowaba kãgabʉ oita. Mawũã iya kãga bʉ o ẽ baita akʉza awuruba obʉ kĩrãkʼa o ẽ baita. Jeowaba ũrĩmarẽã kãgabʉbʉrʉ oibara iyi bedʼeaba jarabʉ kĩrãkʼa.a

Ẽbẽra mejãchaʉba jʉ̃ãpanʉ Daizezeba panʉmarẽã ãyi yiwidʼira miõba okadeba. Daizeze Bedʼeabara jarabʉ edaʉde berabaribasita miõba okata, mamina maʉ̃ra jõi basi Jesu apostolera beida tẽã (1 Corintios 13:8-10). Mamina maʉ̃bara jarabʉ ẽ Daizezebara panʉ ẽãta dayirã yiwidʼira. Akʉdaya Daizezeba sãwũã panʉbʉta dayirã yiwidʼira idi ewade.

Buru biata diabʉ. Jeowara buru bia yibari baera, iyara diabʉ iyi buru biara iyi kʼareba jʉrʉbʉraʼa akʉza iya jarabʉ opanʉraʼa (Santiago 1:5).

Iyi jaure zareata diabʉ. Daizeze jaure zarea kĩrãkʼara ne ẽ. Maʉ̃ba kʼarebabʉ dayirãra aduʼa babita, krĩcha neneẽã erbaita, bedʼea zroma awantaita akʉza nebia oita (Gálatas 5:22-23). Jesuba jarasi Jeowaba diaita dayirãba nesidabʉrʉza iyi jaure zareara (Lucas 11:13).

Wãrĩnuta jaradiabʉ wãrĩnu jʉrʉpanʉraʼa. Hechos 17:26, 27ba jarabʉ kĩrãkʼa, ẽbẽra bia mejãchaʉba jʉrʉpanʉ Daizezeta, kʼawuakĩrãpanʉ iyi trʉ̃ta, iya nekʼãrẽ oita naʉ̃ drʉaita akʉza ẽbẽrarãita adewara iyi neũdukʼawuabadamarẽã (Santiago 4:8). Jeowa ʉ̃rʉ Kʼawuabipanʉrãra ẽbẽra maʉ̃ ʉ̃rʉ kʼawuakĩrãbʉ ũdubʉrʉdera jaradiakĩrã jaradiapanʉ Daizeze Bedʼeadeba.

¿Bʉa bida maʉ̃ kʼarea jidasika naʉ̃ kartara? ¿Bʉara jʉrʉbʉka Daizezera? Mawũãbʉrʉ Daizezeba panʉsibaibara bʉa iyaʼa widibadara.