SÃWŨÃ BIA ZOKʼASEABɄ EWARIRA

Nããrabemata: Bia kʼawuara kʼãrẽta okĩrãbʉta

Ora nãã nekʼãrẽ audre yibiata. Daizeze Bedʼeaba jarabʉ bia kʼawuaibarata kʼãrẽta audre yibiata (Filipenses 1:​10). Kuadernone bʉra kʼãrẽta oibarata, maʉ̃are jidara kʼãrẽta mesera oibarata akʉza kʼãrẽta audre yibiata. Kĩrãbera bʉta nekʼãrẽ audre yibia oita (yiko edaita). Mamina maʉ̃ra mesera oibara ẽ. Adewara bʉ nekʼãrẽ mesera oibarata (pelikula bʉa kãgabʉ akʉita), mamina maʉ̃ra audre yibia ẽ.a

Krĩchara kʼãrẽta berabariseabʉta. Eclesiastés 10:10​ba jarabʉ: «Zagara pewedeabʉta wua pewedea ẽ bʉrʉ, zarea mejãcha oibara. Mamina buru biaba kʼarebabʉ jõma bia wãmarẽã». Zagara zokʼai nãã erai kĩrãkʼa abarika oibara dayirã ewari zokʼabʉrʉde. Nãã bia krĩchaibara kʼãrẽta oibarata. Bʉ zareata akʉza bʉ ewarita nekʼãrẽ audre yibia ẽãba jãrĩbʉbʉrʉ, maʉ̃ta orãra. Bʉa nekʼãrẽ okĩrãbadata majõsibʉrʉ akʉza ewari erbʉbʉrʉ nekʼãrẽ awuara oita maʉ̃ta ora. Bʉa maʉ̃ta ora jari yumakẽrã iyi traja wãi naweda iyi zagara erabʉ kĩrãkʼabayi. Mawũã maoyi bʉa nekʼãrẽ oitabʉta.

Jidara kʼãrẽ oita. Jarada oẽã abarita dayi ewari jãrĩbibʉa akʉza dayi zareata. Bʉa jarara nekʼãrẽ mejãcha oita, maʉ̃bara krĩcha zroma oyi bʉra akʉza bʉ sobia bʼaita jãrĩseabʉ.

Yi ũmeta: Orãra bʉ ewari jãrĩbiseabʉta

Jararãra tẽã oita bʉa oibarata. Eclesiastés 11:4​ba jarabʉ: «Pʉãdrʉta akʉbʉbʉrʉ kʼãrẽ u ẽ akʉza yi bajã akʉbʉra ne u jʉrepe ẽ bayi». Yi ne ubariba jʉ̃ãbʉbʉrʉ ewarita bia bamarẽã ne uita, mawũãra aduaseabʉ iyi ewarita akʉza iyi zareata. Adewara nekʼãrẽsida u ẽ bayi. Maʉ̃ kĩrãkʼa dayirãta mejãcha krĩcha zroma obʉbʉrʉ kʼãrẽ berabari ʉ̃rʉ kʼãrẽsida obe ẽ bayi. Mawũã ẽ bʉrʉ krĩchapanʉbʉrʉ nekʼãrẽ oi nãã bia kʼawuabaibarata, mawũãra nekʼãrẽ oẽ bayi. Proverbios 14:15​ba jarabʉ yi buru biabara nãã bia akʉbʉ iyi wãmae. Maʉ̃ba jarakĩrãbʉ nekʼãrẽ jidai nãã bia krĩcha kʼawuaibarata. Mamina kĩrãbedaibara dayirãbara ʉ̃ra zeidera kʼawua ẽãta kʼãrẽ berabarita (Eclesiastés 11:6).

Krĩcharãra jõma aukʼara bia oibarata. Santiago 3:17​ba jarabʉ:«Baribʉrʉ, buru bia ʉ̃tʉbemanera [Daizezede] [...] daya krĩchabʉta oẽ». Bia oira yibia, mamina aukʼara biʼia oira maʉ̃bara sopʉabiseabʉ. Bari jaradaita, yi awuru bedʼea kʼawuabʉbara kʼawuabʉ aña jaraseabʉta edaʉde, akʉza maʉ̃neba kʼawuaseabʉ. Mamina yi aukʼara bia oita krĩchabʉbara perabʉ aña jaraita, maʉ̃ kʼarea bedʼea ẽ bayi, akʉza maʉ̃ bedʼeara bia kʼawua ẽ bayi. Yibia sainʉ oita kʼawuabʉbʉrʉ, Proverbios 11:2​ba jarabʉ kĩrãkʼa: «Buru biara bʉ sainʉ oita kʼawuabʉraʉ̃me». Yi ẽbẽra sainʉ oita kʼawuabʉbara, mejãcha krĩcha zroma oẽ iya aña obʉrʉde, awuarabʉrʉ maʉ̃ kʼarea ipidabʉ.

Yi ũbeata: Kʼawuara nekʼãrẽ obʉrʉde sainʉ oseabʉta

Kʼawuara bʉ trajode kãrẽãba oseabʉta akʉza bʉ baribidade nekʼãrẽ awuara obʉrʉde. «Audre yibia enaʉ̃ita mejãcha trajaira maʉ̃ra pʉãdrʉ pẽwãi kĩrãkʼabʉ baera» (Eclesiastés 4:6). Yi ẽbẽra mejãcha trajabʉra neẽbayi zareata, ewarita akʉza ũdu ẽ bayi nebiata iya obʉ kʼarea, mamina jari yi kʼãrẽ okĩrã ẽãra bari bakĩrãbʉ. Mamina Daizeze Bedʼeaba jarabʉ dayi trajabʉdera aukʼara maʉ̃ʼa yi edebi ẽ baibarata akʉza aukʼara kʼãrẽ oama ba ẽ baibarata, awuarabʉrʉ nebiata ũduibara daya nekʼãrẽ obʉ kʼarea (Eclesiastés 5:19).

Bia kʼãĩra. «Mʉ̃ taba babʉrʉdera aduʼa kʼãĩñi» (Salmo 4:8). Zõrãrãra 8 ora kʼãĩbara, mawũã ãyi zarea jẽda erbaita akʉza bia krĩchaita. Mawũã bia kʼãĩba kʼarebabʉ bia krĩchaita, nekʼãrẽ kĩrãdua ẽ baita akʉza kĩrãkita ũrĩta. Mamina bia kʼãĩ ẽ bʉrʉ bedʼea zromata ũduseabʉ, aña oseabʉ akʉza mesera kĩrʉseabʉ nekʼãrẽ wikaʉba.

Krĩchara bʉa wãrĩnu kʼãrẽ oseabʉta. «Audre yibia sobia bʼaita dayi ũdubʉ kʼarea, daya kãgabʉta pẽwãnʉbai kañabara» (Eclesiastés 6:9). Yi ẽbẽra buru biara iyi sodebʉa yi edebi ẽ. Maʉ̃ kʼarea telebisione, radiode, nekʼãrẽ badude jarabʉa, idu yi edebi ẽ nekʼãrẽ edai ʉ̃rʉ, awuarabʉrʉ zarea obʉ plata erbaita, mawũã iya nesidabʉ edaita.

Yi kimare: Nebia bʉ sodebʉa yi edebira

Akʉra bʉ sode kʼãrẽ nebiabʉta. Dayirã sode nebiabʉba kʼarebaseabʉ kʼawuaita kʼãrẽta audre yibiata. Dayirã bebʉra miazʉ kĩrãkʼabʉ, mamina dayirãba sode nebia erbʉra enedrʉma kĩrãkʼabʉ. Maʉ̃ra mawũã bʉ kʼawuabibʉ baera kʼãrẽta audre yibiata dayirã bebʉita akʉza kʼarebabʉ baera dayirãba sãwũã bia zokʼaita dayirã ewarita. Ẽbẽra mejãchaʉba Daizeze ũrãgʼata jʉrʉbʉ kʼawuapanʉ baera Daizeze Bedʼeabʉrʉ ũrãgʼa bia diabʉta (Proverbios 2:6, 7).

Audre bʉ bebʉde ũdubira kãgata. «Kãgaba, [...] jipa biʼia ãba babibʉ» (Colosenses 3:14). Kãgata neẽbʉrʉ zarea baseabʉ aduʼa bʼaita, bia bʼaita akʉza sobia bʼaita bʉ mebẽrãbawara. Yi ẽbẽra plata mejãcha jʉrʉbʉta akʉza trajo nãã mejãcha bʉebʉta, maʉ̃ra ewari berabari wãne sobia ẽ bayi. Daizeze Bedʼeara mejãcha bedʼeabʉ kãga ʉ̃rʉ akʉza jarabʉ audre yibiata dayirã sode kãgata erbaita (1 Corintios 13:1-3; 1 Juan 4:8).

Ewari jʉrʉda audre Daizeze kʼawa bʼaita. Yumakẽrã iyi trʉ̃ Geoffba erbasi kima biata, wũãwũãra biata, neũdukʼawua biata akʉza iyira medikobasi. Mamina maʉ̃ne iya ũdubasi ẽbẽrarã mejãcha zʉbʉriabʉta akʉza beibʉta. Iyikʉza naʉ̃ta widisi: «Dayi bebʉra, ¿kʼãwũã bʼaibasika?». Ewari aba karta Jeowa ʉ̃rʉ Kʼawuabipanʉrãba odata ũdusi iya. Mama ũdusi iya bedʼea widibadata.

Geoffbara iya maʉ̃ ũdudata jara ũrĩbisi yi kimaʼa, yi wũãwũãraʼa akʉza maʉ̃rabida kʼawuakĩrãbasi audre maʉ̃ ʉ̃rʉ. Mawũã jõma yi mebẽrãbawaraʉba Daizeze Bedʼeata akʉ jʉ̃drʉsi. Adewara mawũã odaba ãyi bebʉra audre bia wãsi. Akʉza mawũã ãyi ewarita biʼia zokʼa jʉ̃drʉsi akʉza kʼarebasi ʉ̃ra zeide ãyabida jʉ̃ã bʼaita ẽjũã kĩrãwãreãta (Revelación [Apocalipsis] 21:3, 4).

Geoffba jaradara wãrĩnu kĩrãbebibʉ Jesuba jaradara wãrĩnubasita: «Sobiapanʉ Daizezedebema audre kʼawuakĩrãpanʉta» (Mateo 5:3). ¿Bʉara ewari jʉrʉkĩrãbʉka audre Daizeze ʉ̃rʉ kʼawuaita? Nekʼãrẽ awuara jãpera neẽbayi bʉ kʼarebaseabʉra bʉ ewari bia zokʼaita.