Odadrʉ Jesude kĩrãkʼa

SO BOREKEABɄTA ŨDUBIDAIBARA

Jesura nekayirua okabasi baera wuabemara ẽbẽrarãba krĩcha zroma erbʉta akʉza bedʼea zroma ũdubʉra ũdukabasi. Mawũãsidu Jesubara zarea osi wuabemara ẽbẽrarã so borekeabʉ ũdubita akʉza ãyi kʼarebaita. Bari so borekeabʉta ũdubi ẽ basi awuarabʉrʉ maʉ̃ne ʉ̃ta osi ãyi kʼarebabʉde. Audre ũduseabʉ yizarata naʉ̃ra kapitulorane 32, 37, 57 akʉza 99.

ŨDUBIRA ẼBẼRARÃ BɄME BEDʼEASEABɄTA

Ẽbẽrarã pʉwʉrʉ jõmaʉ̃nẽbemata krĩcha ẽã kʼãrẽ poagababʉta Jesuta orrakĩrãbasi, Jesuba ũdubibasi baera ʉ̃ta krĩchabʉ ẽãta. Wuabemara ʉ̃rʉ krĩchabʉta ũdubibasi baera, maʉ̃ba ãyira Jesu kʼawa bakĩrãbasi. Audre kʼawuaita Jesuba naʉ̃ nebia sãwũã ũdubisita akʉra naʉ̃ kapitulota 25, 27 akʉza 95.

BADUA YIWIDʼI BAIBARA

Jesura ewari jõmaʉ̃nẽ badua yiwidʼibasi soiduba wuabemara daidu akʉza dobabida iyira badua yiwidʼibasi. Bari nekʼoidebʉrʉ oẽbasi. Jesuba badua yiwidʼibasidera nãã biga diabasi, jarabasi Jeowaba nekʼãrẽ nebia erbʉ ʉ̃rʉ akʉza iya nekʼãrẽ oi nãã kʼarebata widibasi Jeowaʼa. Maʉ̃ ʉ̃rʉ audre kʼawuadaita akʉdrʉ kapitulorata 24, 34, 91, 122 akʉza 123.

WUABEMARA Ʉ̃RɄ KRĨCHADRɄ

Edaʉde Jesu aduʼa bakĩrãbasimina akʉza enaʉ̃kĩrãbasimina wuabemara kʼarebaita, maʉ̃ta oẽ basi. Iyidoba krĩchabʉtrʉ ũdubi ẽ basi. Mama ũdubisi dayirã yiza biata. Audre kʼawuadaita Jesuba maʉ̃ sãwũã osita akʉdaya kapitulora 19, 41 akʉza 52.

WUABEMARABA NEKAYIRUA OBɄTA KĨRÃDUA KʼAWUAIBARA.

Jesubara bari ũdubi ẽ basi wuabemaraba nekayirua odadrʉ kĩrãduaita, awuarabʉrʉ amaesi yiza biata iyi kʼaidupanʉra. Akʉdaya iya maʉ̃ sãwũã oũdubisita kapitulora 26, 40, 64, 85 akʉza 131.

SOIDUBA OIBARA JEOWABA KÃGABɄTA

Propesiarãra audrera bedʼeabasi judiorabara Jesura kĩrã mitia akʉdaita akʉza iyi nejʉrarabara beadaita. Jesubara maʉ̃ kʼarea krĩchaseabasi ãyi kʼareba ẽ baita, mamina maʉ̃ta oẽ basi, zarea osi Jeowaba kãgabʉta oita. Mama Jesubara dayirã yiza biata amaesi Jeowaʉ̃me kʼẽrẽpa bʼaita dayirã pẽwãnaimina akʉza zʉbʉria oimina. Krĩchaidua naʉ̃ra kapitulora ʉ̃rʉ 16, 72 akʉza 103.

EDA KRĨCHABɄTA ŨDUBIBARA

Jesura audre yi zromabasi wuabemara ẽbẽrarãira, bari jaraita, iyira buru biabasi baera akʉza audre kʼawuabasi baera. Jesura jipa nekayiruata okabasi baera mia abaʉba iyide kĩrãkʼa okadebasi. Mawũãsidu edabʉta oũdubisi akʉza wuabemarata kʼarebasi. Dayirãbara kʼawuaseapanʉ Jesu yiza ʉ̃rʉ naʉ̃ra kapitulora akʉbʉde 10, 62, 66, 94 akʉza 116.

JɄ̃Ã KʼAWUABɄTA ŨDUBIDAIBARA

Iyi kʼaidupanʉraba akʉza wuabemara ẽbẽrarãba iya jarabʉta ũrĩna ẽ bai jʉ̃ã kʼawuabʉta ũdubibasi. Jaradiada ʉ̃rʉ jaradiabasi ãyaʼa kʼãrẽta oibarata Daizeze kʼawa bʼaita. Akʉdaya naʉ̃ra kapitulorane sãwũã Jesuba jʉ̃ã kʼawuabʉta ũdubisita 74, 98, 118 akʉza 135.