Mʉ̃ bebʉra wuabʉrʉ mitia wãsi

MɄ̃ NEBɄRATA:

Mʉ̃ra tosida Los Angeles, Californiane, Estados Unidos pʉwʉrʉde. Mʉ̃ todamaera mejãchabasi ẽbẽrarã chirua kayirua bʉratʉma domiarata akʉza mejãcha ẽbẽrarã yõmiarata. Mʉ̃ papabara tosi warrarãra 6, maʉ̃nebemara mʉ̃ yi ũmenebemabasi.

Dai wikabʉeda dai papabara edebasi iglesia ebangelikaeda. Mʉ̃ma kʉ̃dra bachuidade mama iglesiade jarabarabʉra kʼãrẽ ẽ kĩrãkʼa akʉbesi. Mʉ̃ra domingodera maʉ̃ iglesiade trãbasi, mamina lunesdeba sabadobayeda wãbasi piestaeda, chirua kayirua bʉratʉmata dobasi akʉza wẽrãrabawara kʼãĩkʉabasi.

Mʉ̃ra jipa yõmiabasi maʉ̃ kʼarea mʉ̃ra nekʼãrẽ baduba kĩrʉ totobasi. Mʉ̃ara nekʼãrẽ baduta jidabasi mʉ̃ yõita. Mʉ̃a iglesiade kʼawuabadara mʉ̃ra kʼareba ẽ basi. Mʉ̃a maʉ̃ bedʼeata jarabasi: «Kʼawua oira Daizezede, mʉ̃ra iya jarabʉrʉde bayi». Poaga 60 jõbodoare, mʉ̃ 18 poaga bidade mʉ̃ra eda wãsi politikade akʉza Pantera Negrarebasi. Maʉ̃ grupobara jʉrʉbasi ẽbẽrarã sãwũã kʼarebaita. Maʉ̃ tẽã ãba wã jʉ̃drʉsi ẽbẽrarã estudiabʉbawara, maʉ̃rasida Pantera Negra krĩchabʉ kĩrãkʼa krĩchabasi. Mʉ̃ estudiabʉmae protestata ojʉ̃drʉsida baera wua estudiabida ẽ basi.

Mamina mʉ̃a maʉ̃ awa oẽbasi. Ẽbẽrarãta mejãcha jʉra baera audre nekayirua zromata osi. Mʉ̃ta mʉ̃ neũdukʼawuarabawara wãpanasi pelikula akʉde sãwũã yi torroraba yi paimarata zʉbʉria opanasita Estados Unidosde. Maʉ̃ta maʉ̃ pelikula jõna tẽã daira mejãcha kĩrʉ ẽdrʉsida, maʉ̃ kʼarea po jidasida ẽbẽrarã mama pelikula badara torrorasida. Maʉ̃ne jʉrʉ wãsi daibara ẽbẽrarã torro badarainʉ mawũã maʉ̃rasida poita.

Maʉ̃ ewari edara mʉ̃ta akʉza mʉ̃ mebẽrãta mejãcha bedʼea zromata ũdubasi jenenerabawara. Maʉ̃ ewaride mʉ̃ tẽãbʉ zakera edabasi ẽbẽrarã yõmiabawara mʉ̃sida edaʉde ãyibawara wãbasi. Mʉ̃ bebʉra ewariza audre mitia wãsi.

SÃWŨÃ AWUARA BABISI DAIZEZE BEDʼEABARA MɄ̃ BEBɄRA.

Mʉ̃ neũdukʼawua yibarirãra Jeowa ʉ̃rʉ Kʼawuabipanʉrãbasi. Maʉ̃raba mʉ̃aʼa jarasi jʉ̃ẽmarẽã ãba yi jʉrebarima. Jʉ̃ẽka jʉ̃ẽsidera mʉ̃a ũdusi maʉ̃ra ẽbẽrarã sãwũã jipa awuarabasita. Jõmaʉ̃ba erpanasi Daizeze Bedʼeara akʉza yi audre wiñabʉbida diskursota diabasi. Mʉ̃ra mejãcha kĩrãmigasi kʼawuasi baera Daizeze trʉ̃ra Jeowata akʉza ãya maʉ̃ta mejãcha zokʼabasi baera (Salmo 83:18). Pʉwʉrʉra awuara awuarakadebema basimina ãyirai mitia akʉda ẽ basi.

Nããrãra mʉ̃a kãga ẽ basi mʉ̃a Daizeze Bedʼea jaradiamarẽãra mamina wãkĩrãbasi ãba yi jʉrebari edara. Ewari aba mʉ̃ ãba yi jʉrebarimae edabʉde mʉ̃ neũdukʼawuarãra wãsi piesta bade. Mama ãyara ẽbẽra aba wua kʼarea mejãcha posida, mõbe beasida. Maʉ̃ nrʉema ãyira mejãcha sobiabasi ãya oda kʼarea akʉza juez nãã jʉ̃ẽsidera, ãyara kʼãrẽ ẽ kĩrãkʼa akʉpanasi ãya odara. Maʉ̃ranebema mejãchaʉta eda ibalbʉesida ãyi mama beiyeda, mamina mʉ̃ra mejãcha sobiabasi maʉ̃ ewaride ãyibawara ba ẽ basi baera. Aramaʉ̃ta mʉ̃a meserabai jarasi Daizeze Bedʼea jaradiadamarẽã.

Mʉ̃ara kãga ẽ basi ẽbẽrarã torrorãra, maʉ̃ kʼarea mejãcha kĩrãmigasi Jeowa ʉ̃rʉ Kʼawuabipanʉrãba kʼãrẽ obadaba. Ewari aba Jeowa ʉ̃rʉ Kʼawuabipanʉrã torrota wãbasi awuru pʉwʉrʉeda, mamina maʉ̃raba jarasi mebẽrã paisosobʉa ãyi wũãwũãta akʉmarẽã akʉza Jeowa ʉ̃rʉ Kʼawuabipanʉrã torroraba jarasi wũãwũã paisosobʉa ãyibawara bamarẽã. Maʉ̃ba mʉ̃aʼa ĩjãbisi Jeowa ʉ̃rʉ Kʼawuabipanʉrãbara wãrĩnu opanʉta Jesúsba jarabʉ kĩrãkʼa. Juan 13:35​dera jarabʉ: «Mawũãtrʉ jõmaʉ̃ba kʼawuadayi marara mʉ̃ kʼaidubemarata, mayirainʉ yiya kãgapanʉbʉrʉ». Idibʉrʉ kʼawuasi ũdubʉrʉta wãrĩnu mebẽãrata.

Mʉ̃a kʼãwũa Daizeze Bedʼeata akʉbasi baera kʼawuasi mʉ̃ bebʉra awuara babibarata. Mʉ̃ara bari ʉ̃rʉbʉrʉ ũdubi ẽ baibarasi kĩrʉ ẽãta, awuarabʉrʉ sodebida ũdubibarabasi (Romanos 12:2). Mʉ̃ra wiña wiñane awuara wãsi. Maʉ̃ta buru kʼoesi 1974 de Jeowa ʉ̃rʉ Kʼawuabipanʉrã bʼaita.

Mʉ̃ buru kʼoeda tẽãra zarea oibarabasi mesera kĩrʉ ẽ baita, bari jaraita ewari aba mʉ̃a Daizeze Bedʼea jaradianʉmʉena, nezrʉgamiaba mʉ̃ karru radiota erkã totosi. Mʉ̃ra kʼawabasi baera kʼaidu pẽwã wãsi nezrʉgamiata, mʉ̃ta iyi kʼawa babʉrʉde bae totosi radiota, nezrʉgamiara wẽba wãsi. Mʉ̃a maʉ̃ta wuabema mebẽrã jara ũrĩbiside, zõrãrã abaʉba mʉ̃aʼa widisi: ‹Stephen, ¿bʉa kʼãrẽta okasi maʉ̃ nezrʉgamiata jidasibʉrʉ?›. Mebẽãba mʉ̃a maʉ̃ wididaba, mʉ̃a krĩchabisi jʉrʉita wuabemabawara aduʼa bʼaita.

Octubre 1974 de Daizeze Bedʼeata jaradiabasi 100 ora jedekoza, maʉ̃ta bari obasi. Mʉ̃aʼa jarasida wãmarẽã Betelʼeda Brooklyn, Nueva Yorkde. Maʉ̃ne 1978de mʉ̃ra jẽda wãibarabasi Angelesʼeda mʉ̃ papa akʉde. Maʉ̃ta poaga ũme berabarida tẽã mʉ̃ra juwa jidasi Aarhondaʉ̃me. Maʉ̃ba mejãcha kʼarebasi mʉ̃ papa akʉita iyi beiyeda. Tẽã daira trʉ̃sida jʉ̃ẽmarẽã eskuela Galaadʼeda. Dai mamaʉ̃ba ẽdrʉda tẽã daiʼa jarasida wãnamarẽã Panamáena misionera kĩrãkʼa, atiara daira mamabʉ.

Mʉ̃ buru kʼoedadeba ʉ̃ta ũdu zebʉrʉ, nekʼãrẽ mʉ̃ kĩrʉbiseabʉta, mʉ̃a kʼawuasi sãwũã jĩga bʼaibarata ẽbẽrarã mʉ̃ kĩrʉbibʉdeba akʉza nekʼãrẽ awuruta okʼawuasi, mawũã mʉ̃ mejãcha kĩrʉ ẽ baita. Awuru ẽbẽrarãta akʉza mʉ̃ kimata, ibia bedʼeabʉ mʉ̃ kʼãwũã zarea obʉ kʼarea mesera kĩrʉ ẽ baita, mʉ̃ara krĩcha ẽ mʉ̃yidobaʉba jõma bia owãta, awuarabʉrʉ krĩchabʉ Daizeze Bedʼeaba kʼarebasita mawũã jipa awuara oita (Hebreos 4:​12).

MɄ̃A NEBIATA ŨDUZEBɄRɄ.

Daizeze Bedʼeabara mʉ̃aʼa ũdubibʉrʉ bebʉ arata akʉza aduʼa bʼaita. Atiara mʉ̃ara miõta po ẽ, awuarabʉrʉ kʼarebabʉ ẽbẽrarã Daizezeta ũdukʼawuadamarẽã. Maʉ̃ne mʉ̃ara jaradiasi ẽbẽra abaʉʼa, maʉ̃ ẽbẽrarã nããra daira yi jʉrabasi kolegiode. Daira ãbapanasi ewari biobayeda, atiara daira jipa neũdukʼawua biara. Daiba naʉ̃ ewaribayeda ẽbẽrarãta mejãcha kʼareba zebʉda 80 audre Daizezeta ũdukʼawua zedamarẽã.

Mʉ̃ara Jeowaʼa biga diakĩrãbʉ mʉ̃aʼa kʼãwũã diasi baera wãrĩnu bebʉ arata akʉza aduʼa baita neũdukʼawua biabawara.