Ʉ̃kʉrʉitara zare Daizeze kãgabʉ ũdubi zeira, krĩchapanʉ baera iyi ũdukʼawuaira zareata, ẽbẽra kayirua baera akʉza jĩgarabʉ baera. Akʉra ʉ̃kʉrʉba kʼãrẽta jarabʉta:

• «Mʉ̃a Daizezeʼa yiwidʼibasimina krĩchabasi iyira mʉ̃neba jĩgarabʉta. Krĩchabasi neẽãta akʉza kãga ũdubi ẽãta» (Marco, Italia.)

• «Mʉ̃a okĩrãbasi Daizezeba jarabʉta, mamina mʉ̃a krĩchabasi iya jarabʉra zareata oira. Krĩchabasi Daizezera jipa ẽbẽra kayiruata akʉza ẽbẽrarãta zʉbʉriabibʉta. Mʉ̃a krĩcha ẽ basi iya nebia erbʉra» (Rosa, Guatemala.)

• «Wũãwũãrainʉba krĩchasi Daizezebara dayirã nemitiatrʉ akʉbʉta dayirã zʉbʉria oita. Tẽã krĩcha jʉ̃drʉsi iyira jĩgarabʉta dayirãneba, adewara krĩchasi iyira jari nokʼo ẽbẽrarã krĩcha ẽ kĩrãkʼabʉta» (Raimunda, Canadá.)

¿Bʉara abarika krĩchabʉka? ¿Zareka Daizeze kʼawa bʼaira? Mejãchaʉba abarika krĩcha zebʉda Daizeze ʉ̃rʉ. Edad Mediade ẽbẽrarã mejãchaʉba Daizezeʼara yiwidʼida ẽ basi ¿kʼãrẽa? Perapanasi baera. Ẽbẽra nebʉrabari Will Durantba naʉ̃ta jarasi: «Ẽbẽra abaʉta jipa nekayirua omiabasibʉrʉ, ¿sãwũã yiwidʼiseabasi Daizeze kayiruara akʉza jĩgarabasibʉrʉ?».

¿Kʼãrẽa ẽbẽrarãra mawũã krĩchapanʉ Daizeze ʉ̃rʉra? ¿Kʼãrẽta jarabʉ Daizeze Bedʼeabara? ¿Zare ẽ baika kãga ũdubita Daizezeʼa iyi ʉ̃rʉ wãrĩnuta ũdukʼawuabʉrʉbʉrʉ?

Ʉ̃KɄRɄBA KRĨCHAPANɄTA

«Daira wabida bedʼea abarika ze ẽ jaraseabʉ kʼawuaita wãrĩnu Daizezera trʉ̃barabʉta. Mawũẽra, ¿wãrĩnu Daizezeta trʉ̃barabasibʉrʉ kʼawuada ẽ iyi trʉ̃ra kʼaisida?» (Propesor David Cunningham, iyi libro Theological Studies).

DAIZEZE BEDʼEABA PANɄBɄ

Daizezeba jarasi: «Mʉ̃ra Jeowa. Kaʉ̃ mʉ̃ trʉ̃ra» (Isaías 42:⁠8). Jeowa trʉ̃ra ebreo bedʼeadeba zebʉ, maʉ̃ba jarakĩrãbʉ «Mʉ̃a jidabʉ mʉ̃a okĩrãbʉta» (Génesis 2:​4, nota).

Jeowabara kãgabʉ iyi trʉ̃ta zokʼadamarẽã. Daizeze Bedʼeaba jarabʉ: «Jeowaʼa biga diaidua, jaraidua iyi trʉ̃ta, ũdukʼawuabidua iya kʼãrẽ ozebʉrʉta pʉwʉrʉra. Jarakaidua iyi trʉ̃ kʼãrẽaba yi zromata» (Isaías 12:⁠4).

Jesubara zokʼasi Daizeze trʉ̃ta akʉza Jesubara jaradiasi iyi kʼaidupanʉra. Maʉ̃ne ewari aba yi Zezeʼa yiwidʼisi, naʉ̃ bedʼeata jarasi: «Mʉ̃a ũdukʼawuabisi bʉ trʉ̃ra». ¿Kʼãrẽa mawũã osi? Iya akʉza naʉ̃ bedʼeata jarasi: «Bʉa mʉ̃ kãgada kĩrãkʼa kãgamarẽã ãyisida mʉ̃ra mawũã ãyibawara baya» (Juan 17:⁠26).

KʼÃRẼA YIBIA NAɄ̃ Ʉ̃RɄ KʼAWUAIRA

Teologo Walter Lowrieba bʉsi: «Yumakẽrã abaʉba Daizeze trʉ̃ta ũduaduabʉrʉ, wãrĩnu bʼaira Daizezesida ũduka [...] mõbemata kãga zebe ẽ wãrĩnu ẽbẽra kĩrãkʼa ũdu kʼawua ze ẽ bʉrʉ».

Ẽbẽra aba iyi trʉ̃ Victorʼta semanaza wãbasi iglesiaeda, mamina jipa kʼawua ẽ basi Daizeze ʉ̃rʉra. Iya jarasi: «Mʉ̃a kʼawuaside Daizeze trʉ̃ra Jeowata sentisi mʉ̃a ẽbẽra daya ʉ̃rabʉrʉ ũdukʼawuabʉrʉ kĩrãkʼa. Mʉ̃a iyi ʉ̃rʉ bedʼeapanʉta mejãcha ũrĩbarisi, maʉ̃ta idibʉrʉ ũdukʼawuasi. Idibʉrʉ ũdubʉrʉ Daizezera mʉ̃itara wãrĩnubʉta, maʉ̃neba yẽta mʉ̃ neũdukʼawua ba zesi».

Iyi trʉ̃ ʉ̃rʉ bia krĩchapanʉra kʼawuabʉ Jeowara. Adewara Jeowaba jarabʉ: «Mʉ̃a so zʉbʉria akʉyi, zezeba yi wũãwũã so zʉbʉria akʉbʉ kĩrãkʼa» (Malaquías 3:​16, 17). Daizezebara nebiata diabʉ iyi trʉ̃ jarabʉara. Daizeze Bedʼeaba jarabʉ: «Jõma Jeowa trʉ̃ jarabʉrʉra, bei ẽã ẽdrʉya» (Romanos 10:13).

Ʉ̃KɄRɄBA KRĨCHAPANɄTA

El Diccionario Akal crítico de Teología libroba jarabʉ: «Daizezera Trinidad, maʉ̃ba jarakĩrãbʉ Daizeze abaʉdeba ũbea zebʉta, yi zezeta, yi warrata akʉza jaure zareata». Akʉza Diccionario abreviado del cristianismo libroba eda jarabʉ: «Katolikoraba, ortodosoraba, anglikanoraba akʉza protestanteraba maʉ̃rata ĩjãpanʉ».

DAIZEZE BEDʼEABA PANɄBɄ

Jesu Daizeze warraba jipa jarakabasi iyira yi Daizeze kĩrãkʼabʉta, awuarabʉ jarasi: «Mʉ̃ta mʉ̃ Zezema wãi kʼarea, mʉ̃ Zezera yi zroma baera mʉ̃ira» (Juan 14:28). Adewara iyi kʼaidupanʉra abaʉʼa naʉ̃ta jarasi: «Mʉ̃ra wãzeyi mʉ̃ Zezema akʉza mara Zezema, mʉ̃ Daizezema akʉza mara Daizezema» (Juan 20:17).

Daizeze jaure zareara mawũã ẽbẽra ẽ. Daizeze Bedʼeaba naʉ̃ta jarabʉ: «Daizeze jaure zareara ãyi jõma ʉ̃rʉ zesi [kristianora nããbema ʉ̃rʉ]». Jeowabida jarasi: «Ewari jõĩta nʉmebʉrʉdʼera mʉ Jawurebiara mʉãrã diaya zhãrã jõmaʉ̃ã» (Hechos 2:1-4, 17). Daizeze jaure zareara mawũã Daizeze ũbeabʉ ẽ, awuarabʉrʉ iyira Daizeze zarea, iya maʉ̃ra zokʼabʉ nekʼãrẽ oita.

KʼÃRẼA YIBIA NAɄ̃ Ʉ̃RɄ KʼAWUAIRA

Karl Rahner akʉza Herbert Vorgrimlerʉ̃meba naʉ̃ta jarabʉ Daizeze ũbeabʉ ʉ̃rʉ: «Naʉ̃ ʉ̃rʉra kʼawuada ẽ bakasi naena jarada ẽ basibʉrʉ, mamina maʉ̃ta jara ũrĩbisidabʉrʉ, jõma ũrĩna ẽ bakasi». ¿Ẽbẽrata daya ũdukabʉrʉ kãga zeseabʉka? Kãga ze ẽ. Maʉ̃ kʼarea dayirãba ĩjãbʉbʉrʉ Daizeze ũbeabʉta kãga ze ẽ bayi Daizezera.

Marcoba jarasi zareata Daizeze kʼawa bʼaita ĩjãbʉbʉrʉ Daizeze ũbeabʉ ʉ̃rʉ. Iya jarabʉ: «Krĩchabasi Daizezeba iyi sãwũãbʉra jarakĩrã ẽãta, maʉ̃ kʼarea Daizeze kʼawa bʼaira jipa zareata». «Daizezera mawũã Daizeze kʼawua ẽã bʉ ẽ» (1 Corintios 14:33). Iyara mera ẽ iyi sãwũãbʉra, awuarabʉrʉ jõmaʉ̃ra kʼawuabibʉ. Jesuba jarasi: «Daibara Daizezera ibia jara bʼea izhidʼebema sãwũãta kʼawua bʼeta» (Juan 4:22).

Akʉza Marcoba jarabʉ: «Mʉ̃a kʼawuaside Daizezera ẽbẽra ũbeabʉ ẽãta, mʉ̃itara zare ẽ basi iyi neũdukʼawua bʼaira». Dayirãba Jeowata biʼia ũdukʼawuapanʉbʉrʉ, zare ẽ bayi iyi kãga zeira. Daizeze Bedʼeaba jarabʉ: «Yi kãga neẽãra Daizeze ũduka, Daizezera kãga baera» (1 Juan 4:8).

Ʉ̃KɄRɄBA KRĨCHAPANɄTA

«Ẽbẽra kayiruata beira maʉ̃ra wãñi tʉbʉ pʉreaeda akʉza mama ewari jõmaʉ̃nẽ zʉbʉriayi iya nekayirua oda kʼarea». (Catecismo de la Iglesia Católica.) Nokʼo religionʼraba jarabʉ ẽbẽrarãta tʉbʉ pʉreaeda wãbʉrʉdera jipa jĩgara bʼaita Daizezedeba.

DAIZEZE BEDʼEABA PANɄBɄ

«Ẽbẽra nemitia obʉra, iyikʉza beiyi». (Ezequiel 18:4.) «Beidabara mia kʼãrẽsida krĩcha ẽ» (Eclesiastés 9:5). Mawũẽra ẽbẽrata beira akʉza beidaba mia kʼãrẽsi krĩcha ẽ bʉrʉ, ¿sãwũã zʉbʉriai tʉbʉ pʉreadera ewari jõmaʉ̃nẽ?

Bedʼea «infiernora» ebreode akʉza griegode jarakĩrãbʉ bẽwara de. Bari jaradaita Job mejãcha kayabasidera, iya Daizezeʼa jarasi: «Bʉa mʉ̃ta merabaribʉrʉ bẽwara deda» (Job 14:13). Awuru Daizeze Bedʼeara yi trʉ̃ La Sagrada Biblia, Guillermo Jünemannba bʉdaba, bedʼea «bẽwara deda» zokʼai kaude zokʼabʉ bedʼea «infierno». Jobʼra mawũã tʉbʉ pʉreade eda banʉmakĩrã ẽ basi akʉza Daizezedeba jĩga bakĩrã ẽ basi, awuarabʉrʉ iyira enaʉ̃kĩrãbasi bẽwara deda.

KʼÃRẼA YIBIA NAɄ̃ Ʉ̃RɄ KʼAWUAIRA

Dayirãba krĩchabʉbʉrʉ Daizezera kayiruata iyideba jĩga bakĩrãñi. Rocío Méxicodebemaba jarabʉ: «Mʉ̃ wikabʉeda jaradiasida tʉbʉ pʉreara wãrĩnubʉta. Mʉ̃ra Daizeze kʼareara mejãcha perabasi, maʉ̃ba krĩchakabasi iya nebia erbʉta. Krĩchabasi iyira ewari jõmaʉ̃nẽ kĩrʉbʉta akʉza ẽbẽra kayiruata».

Rocíora kʼarebasi awuara krĩchaita iya kʼawuaside beidara sãwũãbʉta. Iya jarabʉ: «Mʉ̃ra wua mejãcha krĩcha zroma oẽ basi maʉ̃ ʉ̃rʉ kʼawuaside, maʉ̃ba aduʼa besi. Adewara kʼawuasi Jeowabara kãgabʉta dayirã bia bamarẽã akʉza mʉ̃a kãga zemarẽã. Atiara mʉ̃ara iyira akʉbʉ zeze abaʉba yi wũãwũã akʉbʉ kĩrãkʼa» (Isaías 41:13).

Mejãcha ẽbẽrarãta edabʉ religionʼrane perabʉ baera tʉbʉ pʉreade eda ba wãi kʼarea, mamina Daizezebara kãga ẽ iyi ode bamarẽãra perabʉ kʼarea. Jesuba jarasi: «Kãgaibara bʉ Zeze Jeowara» (Marcos 12:29, 30). Kʼawuabʉdade Daizezebara nekayirua oẽãta, maʉ̃ba ĩjãbʉ ʉ̃ra zeide ewari jõmaʉ̃nẽ nebia oita. Elihúba ĩjãna kĩrãkʼa naʉ̃ ʉ̃rʉ ĩjãseabʉ: «Krĩcharaidua Daizeze wãrĩnuarabara nekayirua obʉta» (Job 34:10).

Ewari aba Jesu Jerusalén pʉwʉrʉdebaside, yi Zeze Jeowa ʉ̃rʉ bedʼeasi, adewara jarasi nokʼo religionebʉrabara sewidata jaradiabʉta (Juan 8:12-30). Jesuba mawũã jaradiabʉdeba dayirã jaradiabʉ sãwũã akʉibarata ẽbẽrarãba krĩchabʉta Daizeze ʉ̃rʉ. Jesuba jarasi: «Mʉ̃a jaradiabʉde panʉbʉrʉ mawũãra marara mʉ̃ kʼaidubemara, wãrĩnuta kʼawuadaya, maʉ̃ wãrĩnuba ẽdrʉbigayi» (Juan 8:31, 32).

Jesuba bedʼea «Mʉ̃a jaradiabʉde panʉbʉrʉ» jaraside, jara ũrĩbikĩrãbasi sãwũã kʼawuaita saʉ̃ta wãrĩnuta akʉza saʉ̃ta sewidata. Mara nekʼãrẽ jarabʉdade Daizeze ʉ̃rʉ naʉ̃ta wididua: «¿Maʉ̃ra Jesuba jaradaʉ̃me abarikabʉka?». Abarika ora ẽbẽrarã apostol Pablo bedʼea ũrĩna kĩrãkʼa: biʼia akʉra Daizeze Bedʼeata, ẽbẽrarãba jaradiabʉra wãrĩnu kʼawuaita (Hechos 17:11).

Marcoba, Rosaba akʉza Raimundaba Daizeze Bedʼea kʼawua jʉ̃drʉsi Jeowa ʉ̃rʉ Kʼawuabipanʉrãbawara. ¿Kʼãrẽta kʼawuasida?

Marco: «Jeowa ʉ̃rʉ Kʼawuabipanʉrã abaʉba Daizeze Bedʼea daiʼa kʼawuabi jʉ̃drʉsidera, Daizeze Bedʼeata zokʼasi mawũã panʉita bedʼea daiba widibʉra. Maʉ̃ba daibara wiña wiñane kãga wãsi Daizezera akʉza mʉ̃ra audre bia wãsi mʉ̃ kimaʉ̃me».

Rosa: «Mʉ̃a krĩchabasi Daizeze Bedʼeara ẽbẽrarãba osita, mawũã ũdubita Daizezera sãwũãbʉta. Mamina wiña wiñane mʉ̃a bedʼea widibadara panʉ wãsida. Idibʉrʉ mʉ̃a kʼawuabʉ Jeowara wãrĩnubʉta akʉza iyi ʉ̃rʉ ĩjãseabʉta».

Raimunda: «Mʉ̃a widisi Daizezeʼa iyita ũdukʼawuabimarẽã. Tẽã mʉ̃ kimaʉ̃meba Daizeze Bedʼeata kʼawua jʉ̃drʉsi. Idibʉrʉ wãrĩnuta kʼawuasi Daizeze ʉ̃rʉ. Daira sobiabasi kʼawuasi baera kʼaita Daizezera».

Daizeze Bedʼeaba ũdubibʉ Daizeze ʉ̃rʉ jarapanʉra sewidata, adewara ũdubibʉ iyi sãwũãbʉta akʉza kʼawuabibʉrʉ Daizezeba kʼãrẽ nebia diadata (1 Corintios 2:12). Kʼawuara Daizeze Bedʼeaba kʼãrẽta jaradiabʉta Daizeze ʉ̃rʉ, iya kʼãrẽ oita krĩchabʉ ʉ̃rʉ akʉza ʉ̃ra zeide kʼãrẽ berabari ʉ̃rʉ. Eda internetʼne jʉrʉseabʉ www.jw.org/cto akʉza eda wãra «Daizeze Bedʼeadeba jaradiabʉta > Daizeze Bedʼea ʉ̃rʉ widipanʉta». Nama widiseabʉ bʉaʼa jaradiadamarẽã Daizeze Bedʼea ʉ̃rʉ. Bʉa maʉ̃ta ora kʼawuayi wãrĩnu Daizezera kãga zeseabʉta.