¿Kʼai arkangel Miguelʼra?

Daizeze Bedʼeaba panʉbʉ

Jesús nama uda zei naenara ʉ̃tʉra trʉ̃gasida Miguel (ʉ̃kʉrʉ religionʼraba jarapanʉ «san Miguel»).a Daizeze Bedʼeaba jarabʉ Miguelʼra bedʼeakasita Diaruʉ̃me Moisés beida tẽã, adewara jarabʉ Miguelba kʼarebasita angel abaʉʼa bedʼeata jaramarẽã propeta Danielʼa (Daniel 10:13, 21; Judas 9). Miguelʼra Daizeze Nokʼoarebʉ akʉza yõbʉ Jeowa nejʉrarabawara. Maʉ̃ kʼarea yibia iya maʉ̃ trʉ̃ erbaira, naʉ̃ trʉ̃ba jarakĩrãbʉ: «¿Kʼaita Daizeze kĩrãkʼabʉ?» (Daniel 12:1; Revelación [Apocalipsis] 12:7).

Akʉra kʼarea jaraseapanʉta Jesúsʼra iyabaʉta Miguelta.

• Miguelʼra arkangel (Judas 9). Bedʼea arcángelba jarakĩrãbʉ angelera nokʼota akʉza naʉ̃ bedʼeara ũmepai ʉ̃tʉ zebʉ Daizeze Bedʼeadera. Naʉ̃ bedʼea arcángel jarabʉdera zokʼapanʉ bedʼeaita ẽbẽra abapai ʉ̃rʉ. Maʉ̃ba ũdubikĩrãbʉ angel abapaibʉrʉ zokʼaseabʉta maʉ̃ trʉ̃ra. Daizeze Bedʼeaba Jesús jẽda piradrʉda ʉ̃rʉ jarabʉde, naʉ̃ta jarabʉ: Señorʼra zeita ʉ̃tʉba arkangel nemine (1 Tesalonicenses 4:16). Naʉ̃ bersikuloba ũdubibʉ Jesúsba erbʉta arkangel nemita. Maʉ̃ba jaraseapanʉ Jesúsʼra iyabaʉta arkangel Miguelta.

• Miguelbara zokʼabʉ angelerata. Daizeze Bedʼeaba jarabʉ: «Miguelta iyi angelerabawara yõsida dama zromaʉ̃me», maʉ̃ dama zromara Diaru (Revelación 12:7). Iyara zokʼaseabʉ bajãne. Adewara Daizeze Bedʼeaba jarabʉ iyira principe audre yibiata (Daniel 10:13, 21; 12:1). Maʉ̃ trʉ̃ba ũdubibʉ iya zokʼabʉta gorogorora ʉ̃tʉbemata. Mawũã jarabʉ David Auneba, iyara mejãcha kʼawuabʉ Nuevo Testamento ʉ̃rʉ.

  Daizeze Bedʼeade angelera zokʼabʉ ʉ̃rʉ bedʼeabʉrʉdera zokʼabʉ awuru trʉ̃sida. Daizeze Bedʼeaba jarabʉ: «Kʼarebadayi aduʼa bʼaita dai kĩrãkʼa, Jesuta ʉ̃tʉba iyi angelera zarea barabʉbawara zebʉrʉde tʉbʉ eda» (2 Tesalonicenses 1:7, 8; Mateo 16:27). Adewara 1 Pedro 3:​21, 22ba naʉ̃ta jarabʉ Jesús ʉ̃rʉ: «Iyaʼa diasida zokʼamarẽã angelerata, nekʼãrẽ zokʼabʉrata akʉza zareata». Biga ẽ bakasi Jeowaba jidasibʉrʉ ẽbẽrarã ũme angelera zokʼaita (Jesús akʉza Miguel). Naʉ̃ba ũdubibʉ Jesústa Miguelʼʉmera iyabaʉ ẽbẽrata.

• Miguel piradrʉbʉrʉdera zʉbʉriata mejãcha bayi (Daniel 12:1). Daniel librode bedʼea «piradrʉyi» zokʼabʉra, zokʼapanʉ bedʼeaita nokʼo abaʉba nekʼãrẽ bia oi ʉ̃rʉ (Daniel 11:​2-4, 21). Jesúsʼra nokʼo baera makenañi Jeowa nejʉrarãra akʉza kʼarebayi Jeowa pʉwʉrʉta (Revelación 19:11-​16). Mawũã oyi zʉbʉria zromane, maʉ̃ ewaridera mejãcha zʉbʉriayi, naʉ̃ kĩrãkʼara ũdadaka baera (Mateo 24:21, 42).