«Mʉ̃a atia ara okĩrã ẽ naʉ̃ drʉadebʉra»

MɄ̃ NEBɄRATA:

Mʉ̃ warraraenaʉ̃ba mejãcha kãgabasi nedʉwʉrʉrãra. Mʉ̃ mebẽrãbawara wãkĩrãbasi bakuru idabʉma akʉza do idabʉma, maʉ̃ra Jyväskylä kʼawabasi Finlandiade. Wũãwũãenaʉ̃ba kʼãgabasi mʉ̃a usata, michita akʉza ãyita bʉrakĩrãbasi mamina wari wãne mʉ̃a ũdubasi nedʉwʉrʉra sãwũã zʉbʉria opanʉta maʉ̃ kʼarea nedʉwʉrʉ are bedʼeapanʉ organizasione wãsi mʉ̃ra. Mama mʉ̃a ũdusi ẽbẽra mʉ̃ kĩrãkʼa krĩchabʉta.

Ode jõmaʉ̃ra jaraka wãsi nedʉwʉrʉra zʉbʉria oda ẽ marẽã. Daibara kartadeba ẽbẽrarã jarakapanasi akʉza ode jarakapanasi, tiendade akʉza laboratoriode nedʉwʉrʉrata zʉbʉria oda ẽ marẽã. Mawũã daibara osida organizasion nedʉwʉrʉ are bedʼeabarita. Daiba krĩchapanʉta ẽbẽra jõmaʉ̃ʼa jara ũrĩbikĩrãpanasi maʉ̃ kʼarea bedʼea zromata webasi jenenebawara adewara karselde bʉepanasi.

Adewara mʉ̃a kʼarebakĩrãbasi yi nekʼãrẽ neẽãbʉta akʉza jarrababa obʉta. Maʉ̃ kʼarea mʉ̃ra organizasion Greenpeace akʉza Amnistía Internacionalma wãsi, ewari jõmaʉ̃nẽ ãya arebasi.

Mawũãbʉde mʉ̃a kʼawuasi naʉ̃ drʉade bedʼea zromabʉra mʉ̃a ara obe ẽãta, edaʉde bedʼea zroma wiñabʉra ara opanasi mamina bedʼea zromara wuabʉrʉ wari wãsi. Naʉ̃ drʉa jõmaʉ̃ne ẽbẽra kayiruatabasi akʉza maʉ̃rabara mia kʼaita krĩcha ẽ basi. Mʉ̃a ara obe ẽ basi naʉ̃ bedʼea zromara.

¿SÃWŨÃ AWUARABABISI DAIZEZE BEDʼEABARA MɄ̃ BEBɄRA?:

Mʉ̃a ara obe ẽãta krĩchaiba mʉ̃ta sopʉabibasi, maʉ̃ kʼarea mʉ̃a krĩcha jʉ̃drʉsi Daizezeta akʉza iyi Bedʼeata. Mʉ̃ra nããra Jeowa ʉ̃rʉ Kʼawuabipanʉrãbawara Daizeze Bedʼeata kʼawuabasi mamina maʉ̃ ewaridera amae kĩrã ẽ basi mʉ̃a obʉta. Atiara mʉ̃ krĩchara awuarabʉ.

Aramaʉ̃ta jʉrʉsi Daizeze Bedʼeata akʉza maʉ̃ta le jʉ̃drʉsi. Maʉ̃ba so zarea diasi mʉ̃ra. Mʉ̃a ũdusi testo nedʉwʉrʉra bia erbaibara ʉ̃rʉ. Bari jaraita Proverbios 12:10ba jarabʉ: «Ẽbẽra biabara akʉbʉ iyi nedʉwʉrʉrãra». Mʉ̃a kʼawuabasi naʉ̃ drʉade zʉbʉriabʉra Daizezeba obʉ ẽãta awuarabʉrʉ dayirã jõmaʉ̃ta zʉbʉriapanʉta Jeowaba zokʼabʉta oda ẽ baera. Mʉ̃ra mejãcha sobiasi kʼawuasi baera Jeowaba kãgata ũdubibʉ baera akʉza jʉ̃ãbʉ baera ẽbẽrarãta (Salmo 103:8-14).

Maʉ̃ tẽã mʉ̃a ũdusi libro ¿Qué enseña realmente la Biblia? Mama mʉ̃a bʉsi mʉ̃ deda Daizeze Bedʼeata jaradiadamarẽã, maʉ̃ta diabʉesi korreode. Mawũã berabarida tẽã zesida Jeowa ʉ̃rʉ Kʼawuabipanʉrã juwa jidapanʉta ũme, ãya Daizeze Bedʼea jaradiaita. Aramaʉ̃ta mʉ̃a ĩjãsi ãya jaradiadamarẽã akʉza mʉ̃ra wãsi ãba yi jʉrebari Daizeze Nokʼo ʉ̃rʉ bedʼeabaridema. Wiña wiñane mʉ̃a ĩjã wãsi Daizeze Bedʼeaba jarabʉra maʉ̃ra mʉ̃ soidu jʉ̃ẽsi.

Daizeze Bedʼeaba mejãcha kʼarebasi. Mʉ̃a sigarriyo idubʉita, itua do ẽ baita, mʉ̃ wua bia jʉ̃ita akʉza bia bedʼeaita. Adewara jenenera wawia ũdubita (Romanos 13:1). Mʉ̃a nãã krĩchabasi nemitiara bedʼea neẽãta mamina atiara krĩchabʉ Daizezeba krĩchabʉ kĩrãkʼa.

Mʉ̃ara mejãcha kãgabasi mʉ̃a organizasion erbadara, mamina maʉ̃ idubʉira mʉ̃a pikãgade pikãgade idubʉ wãsi. Mʉ̃a kʼawuasi baera Daizeze Nokʼobʉrʉ maʉ̃ jõma ara oseabʉta, maʉ̃ kʼarea mʉ̃ra Daizeze Bedʼea jara jʉ̃drʉsi ẽbẽrarã jõmaʉ̃ba kʼawuadamarẽã (Mateo 6:33).

MɄ̃A NEBIATA ŨDU ZEBɄRɄ:

Mʉ̃ ewaribasidera, mʉ̃a krĩchabasi ẽbẽra kayiruarata akʉza ẽbẽra biarata panʉta, mʉ̃ra ẽbẽra kayirua ʉ̃rʉ basi. Mamina mʉ̃a Daizeze Bedʼeadeba kʼawuasi ẽbẽra jõmaʉ̃ta daucha kãgaibarata (Mateo 5:44). Maʉ̃ kãgaba mʉ̃a ũdubibʉ Daizeze Bedʼea jaradiabʉde. Adewara sobiabʉ Daizeze Bedʼea jaradiaiba kʼarebabʉ baera ẽbẽrarã aduʼa bʼaita akʉza mejãcha sobia bʼaita.

Mʉ̃ara jõma iduaribisi Jeowaba ara omarẽã maʉ̃ba aduʼabʉ. Kʼawuabʉ Jeowaba iyi Nokʼodeba nedʉwʉrʉrãra ẽbẽra zʉbʉriabi ẽ baita akʉza naʉ̃ drʉade zʉbʉriabʉra jõma jõita (Isaías 11:1-9). Adewara mejãcha sobiabʉ ẽbẽrarã jaradiabʉ baera Daizeze Bedʼeata, ãyabida audre ĩjãnamarẽã Jeowade. Mʉ̃a atia ara okĩrã ẽ naʉ̃ drʉadebʉra.