Reperensia Karta nekʼawuabari Bʼaita Kristianora kĩrãkʼa akʉza Trajaita Daizezeita
7-13 DICIEMBREBAYEDA
BEDʼEA BIA DAIZEZE BEDʼEADE ŨDUDATA | LEVÍTICO 10, 11
«Jeowa audre kãgabʉta ũdubibara dayirã mebẽrãira»
(Levítico 10:1, 2) Maʉ̃ tẽã, Nadabʼba Abihúʉ̃meba (Aarón wũãwũãra) jidasida epedeko zaketa, maʉ̃ ʉ̃rʉ bʉesida tʉbʉ pʉreata akʉza insiensota, maʉ̃ tʉbʉ pʉreara Jeowa nãã ũdubisida, iya zokʼada ẽãta. 2 Aramaʉ̃ta Jeowadeba tʉbʉ pʉrea zedaba ãyira bawãsi, maʉ̃ba bawã kʼãrãpe Jeowa nãã beisi.
it-1 1200 parr. 4
Zokʼada ẽãta
Tʉbʉ pʉreata akʉza insienso zokʼadapeada ẽãta. Levítico 10:1ne, bedʼea ebrea zar (za·ráh; jipa jarakĩrãbʉ, «awuarabʉta») maʉ̃ bedʼea zokʼabʉbara kĩrãbebibʉ sãwũã Jeowaba Aarón wũãwũãra, Nadabta akʉza Abihúʉ̃me tʉbʉ pʉreaba beadata, ãya Jeowa nãã ũdubisi baera tʉbʉ pʉrea, Jeowaba «zokʼada ẽãta» (Le 10:2; Nú 3:4; 26:61). Maʉ̃are Jeowaba jarasi Aarónʼa: «Bʉa mia bʉ wũãwũãrabida dobe ẽ binota mia ituata karpa de ãba yi jʉrebari eda wãbʉrʉde, mawũã bei ẽ baita. Naʉ̃ra ewari jõmaʉ̃nẽ omarẽã zokʼabʉ ʉ̃rabʉrʉ zeiraitabida. Mawũã kʼawuadai baera saʉ̃ta neneẽãbʉta akʉza saʉ̃ta Daizezedeba ze ẽãta, jaigʉa ẽãbʉta akʉza jaigʉabʉta akʉza jaradiara israelitara jõma Jeowaba Moisésdeba jaradata» (Le 10:8-11). Naʉ̃ba ũdubibʉ bʼaibara Nadabta Abihúʉ̃me kĩrã pʉrrasita, maʉ̃ba ãyira zowaĩnĩgʉa kʼãrãpe Jeowaʼa diasida tʉbʉ pʉrea ãya zokʼadapeada ẽãta. Ãya maʉ̃ tʉbʉ pʉrea diadara Jeowabara bia akʉ ẽ basi, bia diada ẽ basi baera mawũã ẽ bʉrʉ ãya diasi baera insiensota Jeowaba Éxodo 30:34, 35ba jarabʉ awuara. Ãyi kĩrã pʉrrabʉde obasimina Jeowaba kĩrãdua ẽ basi maʉ̃ nekayirua odara.
(Levítico 10:4, 5) Moisésbara trʉ̃si Misaelta akʉza Elzafánʼʉ̃me, Uziel wũãwũãrata, Aarón yãbata, mõbe jarasi: «Zeidua nainʉ. Ãĩ bʉeidua mara mebẽrãra namaʉ̃ba neneẽãbʉdeba mõbe pʉwʉrʉdeba ãĩ edeidua». 5 Mõbe ãyira jʉ̃ẽ kʼãrãpe edesida beida kakuata yi wua eda, mamaʉ̃ba pʉwʉrʉ ãĩ, Moisésba jarada kĩrãkʼa.
(Levítico 10:6, 7) Maʉ̃are Moisésba jarasi Aarónʼa adewara yi wũãwũãra ũmebidara, Eleazarʼa akʉza Itamarʼa: «Maʉ̃ kʼarea wuata kõẽtarãra akʉza burusearãra, mawũã bei ẽ marẽã adewara Daizezeta pʉwʉrʉrabawara kĩrʉ ẽ marẽã. Mara mebẽrã jõma Israel dedabʉrãra jẽgayi Jeowaba tʉbʉ pʉreaba beada kʼarea. 7 Karpa de ãba yi jʉrebari eda wãbarideba jĩga wãraidua. Mawũã ẽ bʉrʉ marara beiyi, aseite neneẽãbʉ jidabarita Jeowadeta mara ʉ̃rʉbʉ baera». Mawũã ãyara Moisésba jarada kĩrãkʼa osida.
w11 15/7 31 parr. 16
¿Bʉara erbʉka Daizezeba dayirã aduʼa bʼaita diabʉra?
16 Aarón, Moisés mebẽãta abarika berabarisi, yi wũãwũãra ũme kʼarea, Nadab akʉza Abihú. Jeowabara maʉ̃rãra beasi, diasida baera insienso ãyaʼa zokʼadapeada ẽãta. Aarónʼra sopʉabasibaibara yi wũãwũãrata wua ũdu ẽ baibasi baera. Maʉ̃ awuara Aarónʼa zokʼasida akʉza yi wũãwũãra ũmebidara ãyi sopʉabʉta ũdubi ẽ bamarẽã: «Maʉ̃ kʼarea wuata kõẽtarãra akʉza burusearãra, mawũã bei ẽ marẽã adewara Daizezeta pʉwʉrʉrabawara kĩrʉ ẽ marẽã» (Lev. 10:1-6). Naʉ̃ kʼãwũã berabaridadeba dayirã nekʼãrẽ kʼawuabibʉ: Jeowa audre kãgabʉta ũdubibara dayirã mebẽrãira, audre ãya nekayirua odata idubʉ ẽ bʉrʉ.
Jʉrʉda nekʼãrẽ biʼiabʉta Daizezedebemata
(Levítico 10:8-11) Maʉ̃are Jeowaba jarasi Aarónʼa: 9 «Bʉa mia bʉ wũãwũãrabida dobe ẽ binota mia ituata karpa de ãba yi jʉrebari eda wãbʉrʉde, mawũã bei ẽ baita. Naʉ̃ra ewari jõmaʉ̃nẽ omarẽã zokʼabʉ ʉ̃rabʉrʉ zeiraitabida. 10 Mawũã kʼawuadai baera saʉ̃ta neneẽãbʉta akʉza saʉ̃ta Daizezedeba ze ẽãta, jaigʉa ẽãbʉta akʉza jaigʉabʉta 11 akʉza jaradiara israelitara jõma Jeowaba Moisésdeba jaradata».
w14 15/11 17 parr. 18
Nekʼãrẽ jõma obʉdeba dayi bebʉra neneẽã erbaibara
18 Jeowaba dayirã bia akʉmarẽãra iyi Bedʼeata bia akʉ kʼawuaibara akʉza oibara jõma iya jarabʉta. Akʉdaya Nadab akʉza Abihú yizata, maʉ̃rãra Jeowabara beasi, tʉbʉ pʉreata Jeowa nãã ũdubisi baera «iya zokʼada ẽãta», maʉ̃ osidadera ãyira kĩrã pʉrramasi (Lev. 10:1, 2). Akʉdaya Jeowaba kʼãrẽta omarẽã zokʼasita Aarónʼa, maʉ̃ berabariside (akʉra Levítico 10:8-11). ¿Naʉ̃ba jarakĩrãbʉka itua dobe ẽãta ãba yi jʉrebari eda wãi naena? Krĩchadaibara naʉ̃ra ʉ̃rʉ. Idi ewade dayirãbara Leyba jarabʉra ũrĩbe ẽ baibara (Rom. 10:4). Ʉ̃kʉrʉ pʉwʉrʉdera mebẽrãbara ituata wiña dobʉ nekobʉrʉde, ãba yi jʉrebari eda wãi naena. Paskua opanaside kopa bino kimare dopanasi. Jesuba iyi beida jẽda kĩrãbedamarẽã zokʼa jʉ̃drʉsidera, jarasi iyi kʼaidupanʉra binota domarẽã, maʉ̃ba jarakĩrãbasi baera iyi wata (Mat. 26:27). Daizeze Bedʼeabara jarabʉ aukʼara doita akʉza kĩrã pʉrra doita biga ẽãta (1 Cor. 6:10; 1 Tim. 3:8). Ʉ̃kʉrʉ mebẽrãta ãyi krĩchaba iduaribi ẽ baera, wikabida itua do ẽ nekʼãrẽ Daizezedebema omʉ ẽ nãã, mamina pʉwʉrʉ jõmaʉ̃nẽ abarika opanʉ ẽ, maʉ̃ kʼarea audre yibia kʼawuaita «saʉ̃ta neneẽãbʉta akʉza saʉ̃ta Daizezedeba ze ẽãta» mawũã Daizezeba bia akʉmarẽã akʉza nekʼãrẽ jõma obʉdeba dayi bebʉra neneẽã erbaseabʉ.
(Levítico 11:8) Maʉ̃ chichira mia kʼãrẽsida kobe ẽ akʉza tãbe ẽ maʉ̃ beidara. Maʉ̃ra jaigʉabʉ baera maraita.
it-1 142 parr. 4
Nedʉwʉrʉra
Jeowaba jarasi israelitara Moisésʼa ley zokʼadadeba kʼãrẽta koibarabasita akʉza kʼãrẽta ko ẽ baibarabasita, Levítico 11:8ba jarabʉ: «Maʉ̃ra jaigʉabʉ baera maraita». Maʉ̃ Ley Jeowaba Moisésʼa zokʼadara taʉsi Jesu beiside dayirãbari, maʉ̃ba ẽbẽrarãbara koseabasi jẽda nedʉwʉrãra Jeowaba kue zroma berabarida tẽã jarada kĩrãkʼa (Col 2:13-17; Gé 9:3, 4).
Daizeze Bedʼea leita
(Levítico 10:1-12) Maʉ̃ tẽã, Nadabʼba Abihúʉ̃meba (Aarón wũãwũãra) jidasida epedeko zaketa, maʉ̃ ʉ̃rʉ bʉesida tʉbʉ pʉreata akʉza insiensota, maʉ̃ tʉbʉ pʉreara Jeowa nãã ũdubisida, iya zokʼada ẽãta. 2 Aramaʉ̃ta Jeowadeba tʉbʉ pʉrea zedaba ãyira bawãsi, maʉ̃ba bawã kʼãrãpe Jeowa nãã beisi. 3 Moisésba jarasi Aarónʼa: «Naʉ̃ta Jeowaba jarabʉrʉa: Yi mʉ̃ kʼawa panʉra ũdubiyi neneẽãbʉta akʉza pʉwʉrʉra jõma ũdubiyi mʉ̃ zareata». Aarónʼra kʼãrẽ jara ẽ basi. 4 Moisésbara trʉ̃si Misaelta akʉza Elzafánʼʉ̃me, Uziel wũãwũãrata, Aarón yãbata mõbe jarasi: «Zeidua nainʉ. Ãĩ bʉeidua mara mebẽrãra namaʉ̃ba neneẽãbʉdeba mõbe pʉwʉrʉdeba ãĩ edeidua». 5 Mõbe ãyira jʉ̃ẽ kʼãrãpe edesida beida kakuata yi wua eda mamaʉ̃ba pʉwʉrʉ ãĩ, Moisésba jarada kĩrãkʼa. 6 Maʉ̃are Moisésba jarasi Aarónʼa adewara yi wũãwũãra ũmebidara, Eleazarʼa akʉza Itamarʼa: «Maʉ̃ kʼarea wuata kõẽtarãra akʉza burusearãra, mawũã bei ẽ marẽã adewara Daizezeta pʉwʉrʉrabawara kĩrʉ ẽ marẽã. Mara mebẽrã jõma Israel dedabʉrãra jẽgayi Jeowaba tʉbʉ pʉreaba beada kʼarea. 7 Karpa de ãba yi jʉrebari eda wãbarideba jĩga wãraidua. Mawũã ẽ bʉrʉ marara beiyi, aseite neneẽãbʉ jidabarita Jeowadeta mara ʉ̃rʉbʉ baera». Mawũã ãyara Moisésba jarada kĩrãkʼa osida. 8 Maʉ̃are Jeowaba jarasi Aarónʼa: 9 «Bʉa mia bʉ wũãwũãrabida dobe ẽ binota mia ituata karpa de ãba yi jʉrebari eda wãbʉrʉde, mawũã bei ẽ baita. Naʉ̃ra ewari jõmaʉ̃nẽ omarẽã zokʼabʉ ʉ̃rabʉrʉ zeiraitabida. 10 Mawũã kʼawuadai baera saʉ̃ta neneẽãbʉta akʉza saʉ̃ta Daizezedeba ze ẽãta, jaigʉa ẽãbʉta akʉza jaigʉabʉta 11 akʉza jaradiara israelitara jõma Jeowaba Moisésdeba jaradata». 12 Aramaʉ̃ta Moisésba jarasi Aarónʼa, Eleazarʼa akʉza Itamarʼa, yi wũãwũãra ũmebidara: «Jiradaidua oprenda netadebema eda chubidata Jeowaʼa tʉbʉde diadapeadata, maʉ̃ra pan ne oreguea neẽãbʉ kĩrãkʼa koibara altar kʼawa, neneẽãbʉ baera.
14-20 DICIEMBREBAYEDA
BEDʼEA BIA DAIZEZE BEDʼEADE ŨDUDATA | LEVÍTICO 12, 13
«¿Kʼãrẽta kʼawuapanʉ Jeowaba Moisésʼa Ley aida ʉ̃rʉ zokʼadadebara?»
(Levítico 13:4, 5) Mamina, maʉ̃ badaya torroabʉta jogoa ẽ bʉrʉ akʉza yi budata torroa ẽ bʉrʉ, saserdotebara yi maʉ̃ ẽbẽra kayabʉta ewari 7 bayeda jãpe bʉeibara. 5 Ewari 7 babʉrʉdera saserdotebara akʉ wãibara maʉ̃ ẽbẽrarã. Maʉ̃ kayata taʉbʉbʉrʉ akʉza yara jõmaʉ̃nẽ eaba wã ẽ bʉrʉ, mõbemata saserdotebara jĩga bʉeibara akʉza ewari 7 bayeda.
wp18.1 7, rekuadro
¿Ba kikibarika, mawũã ẽ bʉrʉ maʉ̃ ewaridebʉrʉ mawũã nãã basika?
• Kayabera ara jĩga bʉeita.
Jeowaba Moisésʼa Ley zokʼadabara jarabasi aidaba kayaberata yi kaya ẽ bʉbawara jĩga bʼaita. Maʉ̃ zokʼadapeadara idibasidu yibia, mamina ʉ̃kʉrʉ ẽbẽrarãbara maʉ̃ra ĩjãna ẽ basi, awuarabʉrʉ ãyara ĩjãsi kaya mejãchabidadebʉrʉ Edad Media (nejʉacha zroma 13 akʉza 14 Levíticode).
(Levítico 13:45, 46) Maʉ̃ ẽbẽra aidaba kayabʉ wuara kõẽtaibara akʉza burusea bʼaibara. Adewara yi itaera ana erbaibara mõbe jʉraibara: Jaigʉabʉ, jaigʉabʉ. 46 Iyira mawũã jaigʉabayi iyi kaya taʉyeda. Iyira jaigʉabʉ baera, jĩgara bʼaibara. Pʉwʉrʉdebara ãĩ bʼaibara.
¿Kʼawuabasika?
Judiora zõrãra wedabadabara mejãcha wawiabasi aidadebemata aba. Maʉ̃ kayara arigʉ kayiruabasi dayi kakua jõma ãrĩseabasi baera. Maʉ̃ ewaribaside neẽbasi baera kʼãrẽba bebita, kayabera ara jĩga bʉepanasi, yi maʉ̃ kaya erbadabara jaraibarabasi iyira kayabʉta (Levítico 13:45, 46).
(Levítico 13:52) Iyara ba bʉeibara wuara, ilo lanaba kadata mawũã ẽ bʉrʉ linoba akʉza nekʼãrẽ edebema maʉ̃ kaya erbʉra, maʉ̃ra aida kayirua baera. Ba bʉedaibara tʉbʉde.
(Levítico 13:57) Mamina, jaigʉabʉde maʉ̃ wuata jaigʉa wãra, ilo kadamae akʉza nekʼãrẽ badu edebemane, mawũãra maʉ̃ra eaba wã. Ba bʉeibara nekʼãrẽ badu jaigʉabʉta tʉbʉde.
it-2 210 parr. 5
Aidata
Deta akʉza wuata. Aidabara ãrĩseabasi wua lino omata mawũã ẽ bʉrʉ lana omata akʉza badu nekʼãrẽ e omata. Maʉ̃ sʉgʉbʉde ãĩ wãbasi, maʉ̃are jĩga bʉepanasi. Mamina maʉ̃ aidata pãwãrabasibʉrʉ akʉza kuarabasibʉrʉ maʉ̃ra kaya kayiruabasi maʉ̃ kʼarea maʉ̃ nekʼãrẽra jõma ba bʉedaibarabasi (Le 13:47-59). Maʉ̃ deda aidata ʉ̃tʉ zebasibʉrʉ pãwãraba mawũã ẽ bʉrʉ yi kuaraba, saserdotebara jaraibarabasi maʉ̃neba jĩga bamarẽã. Ãĩ bʉeibarabasi mõgara ãrĩbʉra akʉza de eda wẽibarabasi maʉ̃are maʉ̃ jõma badaibarabasi pʉwʉrʉ ãĩ jaigʉabʉmae. Aidata maʉ̃ deda jẽda ʉ̃tʉ zebasibʉrʉ mõbemata jaraseapanasi maʉ̃ dera jaigʉabʉta, maʉ̃ kʼarea maʉ̃ dera jõma ãrĩnaibarabasi, maʉ̃ tẽã jaigʉabʉidu bʉepanasi. Mamina maʉ̃ deta aidaba jaigʉabʉta jarada ẽ basibʉrʉ jõma sʉgʉibarabasi maʉ̃ dera Leyba jarabʉ kĩrãkʼa (Le 14:33-57). Ʉ̃kʉrʉba krĩchapanʉ aidaba deta akʉza wua ãrĩbʉra iyaba kaporsabasita, mamina maʉ̃ra jaraʉda ẽ wãrĩnu kʼawuaita.
Jʉrʉda nekʼãrẽ biʼiabʉta Daizezedebemata
(Levítico 12:2) «Jarada israelitara: Yuwẽrã aba biogobʉbʉrʉ akʉza yumakẽrãta tora, iyira jaigʉabayi ewari 7 bayeda, abarika jaigʉabʉ kĩrãkʼa iyi ewaridebʉde.
(Levítico 12:5) »Yuwẽrã zaketa tora, mawũãra jaigʉabayi ewari 14 bayeda, abarika jaigʉabʉ kĩrãkʼa iyi ewaridebʉde. Iyara jare bʼaibara iyi wa kʼarea ewari 66 bayeda.
w04 15/5 23 parr. 1
Bedʼea audre yibiata Levíticodebemata
12:2, 5. ¿Kʼãrẽa yuwẽrãra «jaigʉabasi» tobʉrʉdera? Yumakẽrãta yuwẽrãʉ̃mera parãsida wũãwũãra nekʼayirua okata tokʉamarẽã. Mamina nekayirua kʼarea, wũãwũãra todara jõma nekayiruabara ʉ̃tʉ zesi. Wẽrã iyi ewari berabarida tẽã jaigʉabedata akʉza toda tẽã, kĩrãbebibasi iyira nekayirua omiata (Levítico 15:16-24; Salmo 51:5; Romanos 5:12). Jeowaba Israelitara ley diadarata sʉgʉ bʼai ʉ̃rʉ maʉ̃ba kʼawuabikĩrãbasi ãyara nesidabasita ãyi nekayiruadeba ẽdrʉbidamarẽã akʉza jẽda nekayirua oka bʼaita. Maʉ̃ kʼarea «Leyʼra dayirã akʉbaribasi maʉ̃ba Kristoma edesi» (Gálatas 3:24).
(Levítico 12:3) Ewari 8de wũãwũã zake yumakẽrãra sirkunsidaibara.
wp18.1 7, rekuadro
¿Ba kikibarika, mawũã ẽ bʉrʉ maʉ̃ ewaridebʉrʉ mawũã nãã basika?
• Sirkunsidabʉrʉde.
Ley Daizezeba zokʼadabara jarabasi yumakẽrã zakera ewari 8 toda tẽãra sirkunsidaibarata (Levítico 12:3). Semana aba wũãwũã zake toda tẽã ãyi wara mesera kaulabasi. Medikoraba nekʼãrẽ kayabera audre bebikʉai ũdui nãã, Daizeze Bedʼeaba jarabasi audre yibiabasita jʉ̃ãita semana audre wũãwũã zake yumakẽrã sirkunsidaita.
Daizeze Bedʼea leita
(Levítico 13:9-23) Yumakẽrã abaʉta aidaba kayara, mawũãra edeibara saserdote nãã, 10 saserdotebara akʉyi iyira. Iyi yarade badaya torroabʉbʉrʉ akʉza yi budata torroabʉbʉrʉ adewara yi yara ko wãta, 11 mawũãra aida kʼayiruata erbʉ iyi yarade, maʉ̃ba saserdotebara jarayi jaigʉabʉta. Jĩga bʉe ẽ baibara, iyira jaigʉabʉ baera. 12 Iyi kakuata jõma aidaba jidabʉbʉrʉ akʉza maʉ̃ta yi burudeba jĩrʉinʉbayeda jidabʉbʉrʉ, saserdoteba ũduseabʉidu 13 akʉza saserdoteba akʉbʉrʉde jõma maʉ̃ kakuata aidaba jidasibʉrʉ, mõbemata maʉ̃ ẽbẽrarã jaradayi jaigʉa ẽãbʉta. Jõma maʉ̃ta torroabʉbʉrʉ, iyira jaigʉa ẽãbʉ. 14 Mamina, iyi yarade ko wata ʉ̃tʉ zera, maʉ̃ra jaigʉabayi. 15 Saserdoteba akʉbʉrʉde maʉ̃ yara ko wãta, mawũãra jaraseabʉ jaigʉabʉta. Maʉ̃ra aida baera. 16 Mamina maʉ̃ yara ko wãta jẽda torroabʉbʉrʉ, saserdoteidu wãibara. 17 Saserdotebara akʉyi. Maʉ̃ kayata torroabʉbʉrʉ, mõbemata saserdotebara jaraibara maʉ̃ ẽbẽrarã jaigʉa ẽãbʉta. Maʉ̃ra jaigʉa ẽãbʉ. 18 »Yagata ʉ̃tʉ zera ẽbẽra kakuade akʉza maʉ̃ta jẽda bera 19 mamina maʉ̃ yagabʉmae torroa ʉ̃tʉ zera mawũã ẽ bʉrʉ kuara ʉ̃tʉ zera, mawũãra iyira saserdote nãã yi ũdubibara. 20 Saserdotebara akʉyi. Maʉ̃ta iyi yara audre jogoabʉbʉrʉ akʉza yi budata torroabʉbʉrʉ, saserdotebara jaraseabʉ jaigʉabʉta. Maʉ̃ra aida kaya yagade ʉ̃tʉ zebʉta. 21 Saserdoteba akʉbʉrʉde neẽbʉrʉ buda torroabʉta akʉza maʉ̃ta iyi yara audre jogoa ẽ bʉrʉ awuarabʉrʉ be wãta, mõbemata saserdotebara ewari 7 bayeda ãĩ bʉeibara. 22 Iyi kakuade eaba wãta ũdubʉbʉrʉ, mõbemata maʉ̃ saserdotebara maʉ̃ ẽbẽrarã jaraibara jaigʉabʉta. Maʉ̃ra kaya. 23 Mamina maʉ̃ badayabʉta eaba wã ẽ bʉrʉ, mawũãra maʉ̃ra yagata orobʉ, saserdotebara jarayi jaigʉa ẽãbʉta.
21-27 DICIEMBREBAYEDA
BEDʼEA BIA DAIZEZE BEDʼEADE ŨDUDATA | LEVÍTICO 14, 15
«Dayirã Daizezeʼa yiwidʼibʉrʉdera jaigʉa ẽãbʉta ũdubibara»
(Levítico 15:13-15) Yumakẽrã aba iyi kakuadeba kaibata ʉ̃tʉ zebʉbʉrʉ akʉza maʉ̃ta taʉra iyira jaigʉa ẽ bayi, aramaʉ̃ta ewari 7 bayeda jʉachaibara iyi mawũã jaigʉa ẽã baita, adewara iyi wuara tõibara akʉza kuibara do drʉjirabʉmae, mawũã jaigʉa ẽ bayi. 14 8 ewari berabarida tẽã edeibara tortola ũme mawũã ẽ bʉrʉ pũsĩra wũãwũãta ũme, maʉ̃ra ũdubibara Jeowa nãã karpa de ãba yi jʉrebari eda wãbaride akʉza saserdoteʼa diaibara. 15 Maʉ̃ saserdotebara diayi maʉ̃ra ibanara, aba diaibara oprenda nekayirua oda karea akʉza aba oprenda bama kĩrãkʼa. Akʉza saserdotebara maʉ̃ ẽbẽra kakuadeba kaiba ʉ̃tʉ zebadadebara jaigʉa ẽã babiyi Jeowa nãã.
it-1 282
Kui, kuita
Zokʼasi israelitarãra kuimarẽã nekʼãrẽ kĩrãtanabʉ kʼarea. Aida kayabʉta jẽda biabaside akʉpanasi «jaigʉabʉta» maʉ̃ba kuibarabasi, kaibata ʉ̃tʉ zebasibʉrʉ yumakẽrã kakuadeba, yuwẽrã iyi ewaride bada tẽã, mawũã ẽ bʉrʉ ãba kʼãĩnata (Le 14:8, 9; 15:4-27). Ẽbẽra abauba iyi karpa deda ẽbẽra beimata erbasibʉrʉ adewara maʉ̃ta tãsibʉrʉ jaigʉabakasi maʉ̃ba baniaba sʉgʉibarabasi. Ẽbẽra abaʉba maʉ̃ zokʼadapeadata ũrĩkĩrã ẽ basibʉrʉ, maʉ̃ pʉwʉrʉdebara beadaibarabasi, Jeowa templota jaigʉa obasi baera (Nú 19:20). Maʉ̃ba bedʼea «sʉgʉi» jarabʉbara jarakĩrãbʉ Jeowa nãã jaigʉa ẽãbʉta (Sl 26:6; 73:13; Isa 1:16; Eze 16:9). Daizeze Bedʼeara bania kĩrãkʼabʉ baera, dayirãta sʉgʉseabʉ (Ef 5:26).
(Levítico 15:28-30) Mamina, iyi ewaride wa ũdubʉta põasãdogobʉrʉ, jʉachaibara ewari 7 bayeda mawũã jaigʉa ẽã baita. 29 8 ewari berabarida tẽã edeibara tortola ũme mawũã ẽ bʉrʉ pũsĩra wũãwũãta ũme, saserdoteʼa diaibara karpa de ãba yi jʉrebari eda wãbaride. 30 Maʉ̃ saserdotebara ũdubiyi maʉ̃ra ibanara, aba diaibara oprenda nekayirua oda kʼarea akʉza aba oprenda bama kĩrãkʼa. Akʉza saserdotebara maʉ̃ yuwẽrã wa iyi ewaride ũdubʉdeba jaigʉa ẽã babiyi Jeowa nãã.
it-2 365
Yuwẽrã ewaridebʉta
Yuwẽrã abaʉta iyi ewaride wata iyi ũdubʉ audre ũdubasibʉrʉ, maʉ̃si jaraseapanasi jaigʉabʉta, maʉ̃ kʼarea iya tãbadamae, iyi kʼãĩbadamae akʉza iyi jewedabadamae jaigʉabasi. Iyara jʉachaibarabasi 7 ewaribayeda akʉza jaigʉa ẽã baita. Ewari 8dera edeibarabasi tortola ũme mawũã ẽ bʉrʉ pũsĩra wũãwũãta ũme saserdotema, mawũã maʉ̃ yuwẽrã nemitiata kĩrãduamarẽã akʉza saserdotebara maʉ̃ra ibanata ũdubibasi Jeowa nãã, aba diaibasi oprenda nekayirua oda kʼarea akʉza aba oprenda bama kĩrãkʼa (Le 15:19-30; akʉra LIMPIO, LIMPIEZA).
(Levítico 15:31) »Mawũã marabara israelitarãra jaigʉabʉdeba jĩga erbaibara, ãyira mawũãra bei ẽ bayi mʉ̃ tabernakulo jaigʉa oda kʼarea, ãyi ẽzadrabʉta.
it-2 256
Neneẽãbʉmae
2. Karpa de ãba yi jʉrebarita akʉza ewari berabari wãne templota. Jõma karpa de ãba yi jʉrebari edabʉta akʉza maʉ̃ ewaradebʉta neneẽãbasi, adewara templosida (Éx 38:24; 2Cr 29:5; Hch 21:28). Altar sakripisio oidebemata akʉza ponchera kobre omata audre yibiarabasi, maʉ̃rãra ewaradebasi. Maʉ̃rãra neneẽãbasi. Ẽbẽrarã tabernakulo ewarade wãbadarãra sʉgʉibarabasi Daizezeba zokʼada kĩrãkʼa; mawũã abarikabasi templo ewarade wãita. Ewaradera jaigʉabara wã ẽ baibarabasi. Bari jaradaita, yuwẽrãra jaigʉabʉrabara nekʼãrẽ neneẽãbʉra tãbe ẽ baibarabasi akʉza neneẽãbʉmae wã ẽ baibarabasi (Le 12:2-4). Israelitarata jaigʉabasibʉrʉ tabernakulosida jaigʉa oseabasi (Le 15:31). Ẽbẽra abaʉta aidaba kayadata biabasibʉrʉ ewara eda wãbarimapai edeibarabasi yi sakripisiota (Le 14:11). Badu ẽbẽrata jaigʉabasibʉrʉ dia ẽ baibarabasi sakripisio neneẽã erbaita tabernakulode mawũã ẽ bʉrʉ templode, maʉ̃ta obasibʉrʉ beiseabasi (Le 7:20, 21).
Jʉrʉda nekʼãrẽ biʼiabʉta Daizezedebemata
(Levítico 14:14) »Saserdotebara wiña jidayi wa oprenda nemitia oda kʼareadebemara akʉza maʉ̃ta bʉeyi kʉwʉrʉ uyabari juwarare yi ʉ̃rabʉrʉ jaigʉabʉdeba sʉgʉpanʉta, iyi juwarare juwa papade akʉza jĩrʉara papade.
(Levítico 14:17) Maʉ̃are saserdotebara juwade aseitebidabara zoayi kʉwʉrʉde uyabari juwarare yi ʉ̃rabʉrʉ jaigʉabʉdeba sʉgʉpanʉta, iyi juwarare juwa papade akʉza jĩrʉara papade, wa oprenda nemitia oda kʼareadebema nãã bʉeda ʉ̃rʉ.
(Levítico 14:25) Mawũãra beayi karnero warrarabʉta oprenda nemitia oda kʼareadebemata. Saserdotebara wiña jidayi wa oprenda nemitia oda kʼareadebemara akʉza maʉ̃ta bʉeyi kʉwʉrʉ uyabari juwarare yi ʉ̃rabʉrʉ jaigʉabʉdeba sʉgʉpanʉta, iyi juwarare juwa papade akʉza jĩrʉara papade.
(Levítico 14:28) Maʉ̃are saserdotebara juwade aseitebidabara zoayi kʉwʉrʉde uyabari juwarare yi ʉ̃rabʉrʉ jaigʉabʉdeba sʉgʉpanʉta, iyi juwarare juwa papade akʉza jĩrʉara papade, iyabaʉ wa oprenda nemitia oda kʼareadebema bʉekʉdamae.
it-2 528 parr. 2
Kʉwʉrʉ
Israelde saserdoteraba trajo ojʉ̃drʉsidadera, Moisésʼa zokʼasida wa karnerodebemata bʉemarẽã kʉwʉrʉ uyabari juwarare Aaróneta akʉza Aarón wũãwũãraneta, juwarare adewara jĩrʉarare, maʉ̃ba ũdubibasi ãya ũrĩbadaba akʉza ãya nekʼãrẽ obadaba, oibarabasita mama opanana kĩrãkʼa (Le 8:22-24). Maʉ̃ mawũã abarika ũdubida kʼarea leybara jarabasi aidaba kayabʉta jẽda biasibʉrʉ, saserdotebara karnero wa oprenda nemitia oda kʼareadebemata aseiteʉ̃meba jida kʼãrãpe zoaibarabasi yi kʉwʉrʉ uyabʉ juwararedebemare aidaba kayabʉta (Le 14:14, 17, 25, 28). Yi nezokʼarasida mawũã opanasi iyi nokʼoʉ̃me ewari jõmaʉ̃nẽ bakĩrãbasibʉrʉ. Maʉ̃ nezokʼara puertama ededa kʼãrãpe yi kʉwʉrʉta uyadaibarabasi. Mawũã kʉwʉrʉ uyabʉba ũdubibasi iyi nokʼoba jarabʉde bʼaita (Éx 21:5, 6).
(Levítico 14:43-45) Mamina, maʉ̃ mõgara ãĩ bʉeda tẽã akʉza de eda wẽna tẽã jẽda chiratʉsidera, maʉ̃ta jẽda jaigʉara, 44 aramaʉ̃ta saserdotebara eda wã kʼãrãpe akʉyi. Maʉ̃ jaigʉata maʉ̃ deda eaba wãsibʉrʉ, mõbemata maʉ̃ dera aida kayirua. Dera jaigʉabʉ. 45 Iyara oyi dera tega bʉedamarẽã (mõgararata, jõma bakuruba kʼãrẽ parãkʉadata akʉza mama tega bʉedasida) adewara maʉ̃ jõma pʉwʉrʉ ãĩ jaigʉabʉmae edeibarabasi.
g 1/06 14, rekuadro
Kaporsa: yibia akʉza yibia ẽ
¿NAɄ̃TA KAPORSABɄKA?
Daizeze Bedʼeabara jarabʉ dera aida kayiruaba basita (Levítico 14:34-48). Ʉ̃kʉrʉba krĩchapanʉ maʉ̃ aida kayiruara kaporsabʉta, mamina ãyara maʉ̃ ʉ̃rʉra bia kʼawuada ẽ. Sãwũãbada kʼawua ẽ mina, Daizezeba Ley zokʼabadaba jarabasi yi dedabemaba ãĩ bʉeibarabasi mõgara ãrĩbʉra akʉza de eda wẽibarabasi maʉ̃are maʉ̃ jõma ba bʉedaibarabasi «pʉwʉrʉ ãĩ jaigʉabʉmae». Maʉ̃ aida kayiruata jẽda zebasibʉrʉ ãyara dera tega bʉedaibarabasi akʉza balbʉedaibarabasi mama nekʼãrẽ jõma badara. Mawũã Jeowaba zokʼabadaba ũdubibasi iyi pʉwʉrʉra mejãcha kãgabasita akʉza kãgabasi bia wãmarẽã.
Daizeze Bedʼea leita
(Levítico 14:1-15) Jeowaba Moisesʼa jarabasi: 2 «Naʉ̃ta yi ley jari ẽbẽra aidaba kayabada jarabʉrʉde iyi jaigʉa ẽãbʉta, saserdote nãã edebʉdade. 3 Mõbemata saserdotebara iyi pʉwʉrʉ chuadamaeba ãĩ akʉ wãibara. Maʉ̃ ẽbẽrata aidaba jidadata jẽda biasibʉrʉ, 4 saserdotebara zokʼa bʉeyi ibana ũme neneẽãbʉta akʉza zokʼaibʉta wemarẽã, bakuru sedrodebemata, ilo purruta akʉza isopota iyi jareita. 5 Saserdotebara zokʼayi ibana ũmebʉdebemata, aba beamarẽã kʉgʉrʉ ʉ̃rʉ, maʉ̃ne eda bʼaibara bania doedabemata. 6 Mamina maʉ̃ ibana zokʼaibʉ jidabʉrʉdera naʉ̃rabawara jidaibara bakuru sedrodebemata, ilo purruta akʉza isopota, maʉ̃rãra ãba surruabibara ibana beada waba, maʉ̃ra bania doedabema juedaba beasi. 7 Aidaba jirbʉta 7 bayeda jĩzoabibara maʉ̃ waba akʉza mawũã iyira neneẽãbayi maʉ̃ne idu bʉedayi ibana zokʼaibʉta. 8 »Iyi mawũã jirbʉta iyi wuara sʉgʉibara, adewara jõma iyi budara wẽibara akʉza kuibara baniaba mawũã neneẽã baita. Maʉ̃are eda pʉwʉrʉde wãseabʉ mamina iyi karpa dedaʉba ãĩ bʼaibara ewari 7 bayeda. 9 Ewari 7 dera jõma iyi budara wẽibara, ikarata akʉza daukarata. Maʉ̃ buda jõma kõna tẽã, sʉgʉibara iyi wuata akʉza kuibara baniaba, mawũã neneẽã baita. 10 »Ewari 8de karnero warrarabʉta akʉza neneẽabʉta ũme jidaibara, kordera wũãwũã zake poaga ababʉta adewara 9 sãbʉ arinanebemata zebira 10, maʉ̃ 10debemata ũbea jidaibara, maʉ̃rata aseite eda ãba pueraibara akʉza maʉ̃ta diayi oprenda netadebema kĩrãkʼa adewara diayi aseiteta log aba. 11 Saserdoteba maʉ̃ ẽbẽra jaigʉadeba ãĩ bʉebʉta, Jeowa nãã yi ũdubiyi maʉ̃ ẽbẽrata yi oprendarabawara, karpa de ãba yi jʉrebari eda wãbaride. 12 Saserdotebara karnero warrarabʉ ũmebʉdebemata aba jidaibara mõbe ũdubibara oprenda nemitia oda kʼareadebema kĩrãkʼa log aseiteʉ̃me akʉza maʉ̃rata oreibara oprenda orebʉdebema kĩrãkʼa Jeowa nãã. 13 Maʉ̃are maʉ̃ karnero warrarabʉta beadayi oprenda nekayiruadebemata akʉza oprenda bama beadamae, neneẽãbʉmae, oprenda nemitia oda kʼareadebemata akʉza oprenda nekayirua oda kʼareadebemata saserdotede baera. Maʉ̃ra neneẽãbʉ. 14 »Saserdotebara wiña jidayi wa oprenda nemitia oda kʼareadebemara akʉza maʉ̃ta bʉeyi kʉwʉrʉ uyabari juwarare yi ʉ̃rabʉrʉ jaigʉabʉdeba sʉgʉpanʉta, iyi juwarare juwa papade akʉza jĩrʉara papade. 15 Maʉ̃are saserdotebara aseite logta wiña weayi iyi juwaʼãka jãne.
28 DICIEMBREDEBA-3 ENERO EDA
BEDʼEA BIA DAIZEZE BEDʼEADE ŨDUDATA | LEVÍTICO 16, 17
«¿Kʼãrẽta jarakĩrãbʉ dayirãitara Espiasion Ewaribara?»
(Levítico 16:12) Maʉ̃ tẽã jidayi epedeko zake tʉbʉ dabʉdebema altardebʉta Jeowa nãã akʉza juwa ũme insienso tũãpoabʉ naʉ̃zabadata, maʉ̃ra edeibara wua ãbudeare.
w19.11 21 parr. 4
Levítico libroba jaradiabʉta
4 (Akʉra Levítico 16:12, 13). Krĩchadaibara kʼãrẽ berabarinʉmʉta. Sumo saserdotera eda idogo tabernakulode. Iyi juwa abaʉde ede insienso tũãpoabʉta ababemanera erbʉ epedeko zaketa oro omata maʉ̃nebʉ tʉbʉ dabʉta. Iyi wãne edaʉnʉmina wuaba Santisimo anabʉ kĩrãbita. Maʉ̃ ewaridera ũbeabayeda eda wãibara, iyi nãã wãbʉrʉdera Arca Bedʼea abarika zeda kĩrãbita idogo. Jaraseapanʉ iyira Jeowa kĩrãbitabʉ kĩrãkʼabasita. Mõbe, insiensota tʉbʉ dabʉde bʉebʉ aramaʉ̃ta iyi chumaera chiwã tũãbʉsi. Maʉ̃ dããrane eda wãñi Santisimoinʉ akʉza edeyi wata oprendara nekayirua oda kʼareadebemata. Akʉidua naʉ̃ta: iyara wa oprendara nekayirua oda kʼareadebema diai naena ba bʉesi insiensota.
(Levítico 16:13) Iyara insiensota tʉbʉde Jeowa nãã bʉeibara akʉza insienso narĩba jõma anañi Arca tapara, Testimonio ʉ̃rʉbʉta, mawũã bei ẽ baita.
w19.11 21 parr. 5
Levítico libroba jaradiabʉta
5 ¿Kʼãrẽta kʼawuapanʉ insienso Espiasion Ewaride zokʼapanananeba? Daizeze Bedʼeabara jarabʉ Daizeze ode panʉrata yiwidʼibʉrʉde, maʉ̃ta Jeowaita insienso kĩrãkʼabʉ (Sal. 141:2; Apoc. 5:8). Kĩrãbedaibara sumo saserdoteba wawiata ũdubibasita insienso Jeowa nãã edebaside. Abarika idi ewadebida mawũã opanʉ, iyaʼa yiwidʼibʉdade wawiata ũdubipanʉ. Arigʉ sobiapanʉ Nekʼãrẽ jõma obʉba dayirãta iyita idu orrabiseabʉ baera, yi wũãwũãba iyi zeze orrai kĩrãkʼa (Sant. 4:8). Iyi neũdukʼawua kĩrãkʼa ĩjãbʉ (Sal. 25:14). Dayirãta iyi neũdukʼawua bakĩrãbʉ baera nemitia oda ẽ Jeowa sobiabita.
(Levítico 16:14, 15) »Iyi juwa jiwiniba jĩzoabikʉayi toro wata juwarare tapa kĩrãbita. Iyi juwa jiwiniba jĩzoabikʉayi maʉ̃ waba 7 bayeda tapa kĩrãbita. 15 »Maʉ̃ tẽã beayi kabrito oprendadebemata pʉwʉrʉba nekayirua oda kʼarea. Edeyi yi wata wua ãbʉdeare akʉza toro waba oda kĩrãkʼa iyaba oyi maʉ̃ waba. Jĩzoabikʉayi tapa ʉ̃rʉ akʉza tapa nãã.
w19.11 21 parr. 6
Levítico libroba jaradiabʉta
6 Kĩrãbeidua sumo saserdoteba oprendara nekayirua oda kʼareadebemata diai naena ba bʉeibarabasi insiensota. Mawũã iya kʼawuabasi Jeowabara iyira bia akʉbasita. ¿Maʉ̃neba kʼãrẽta kʼawuapanʉ? Jesu naʉ̃ Drʉade baside nekʼãrẽ audre yibiata oibarabasi iyi bebʉ diai naena, iya oibadara audre yibiabasi ẽbẽrarã ẽdrʉbibadaira. Jeowaba iyi beidata ĩjãmarẽãra ũrĩbarabasi iya jarabʉta akʉza kʼẽrẽpa bʼaibarabasi. Mawũã ũdubisi audre yibiata Jeowaba jarabʉrʉde bʼaita. Maʉ̃ba Jesuba ũdubisi Jeowaba nejõma zokʼabʉra aripebʉta akʉza iyira nokʼo biata.
Jʉrʉda nekʼãrẽ biʼiabʉta Daizezedebemata
(Levítico 16:10) Mamina kabrito Azazelʼita jidabʉra Jeowa nãã zokʼai edeibara mawũã maʉ̃neba nekayiruata kĩrãduamarẽã, mawũã Azazelʼita zokʼadaita drʉa ibʉawabʉidu.
it-1 261
Azazel
Pabloba jarada kĩrãkʼa Jesuta ẽbẽrarã nekʼayirua kʼarea beisi baera audre nebiata oũdubisi toro waira akʉza yumakẽrãra kabra waira (Heb 10:4, 11, 12). Maʉ̃ba, «iyira beisi dayirã nemitia kʼarea», «zʉbʉria osida dayirã kʼayirua kʼarea» akʉza «iyi yarama susida dayirã kayirua kʼarea» (Isa 53:4, 5; Mt 8:17; 1Pe 2:24). Iyara jõma edebʉ nekayirua ẽbẽrarãba obʉta, iyi beida ʉ̃rʉ wãrĩnu ĩjãpanʉraneta, mawũã Daizezebara ẽbẽraba nekayirua obʉra ewari jõmaʉ̃nẽ ãĩ bʉebʉ. Maʉ̃ kʼarea yumakẽrã kabra «Azazelʼita» diadaba ũdubibasi Jesu beidata.
(Levítico 17:10, 11) »Badu ẽbẽra Israel dedabemaba mawũã ẽ bʉrʉ jãpeba zedata marane edabʉbʉrʉ maʉ̃ta wata badudebemata kora, mʉ̃ra ãyi ʉ̃rʉ bayi akʉza ãyi pʉwʉrʉdebara beayi mʉ̃ara. 11 Dayi bebʉra wadebʉ baera, mʉ̃a maʉ̃ra altar ʉ̃rʉ bʉesi maraita, mara nekayirua odata kĩrãduamarẽã, wara bebʉ baera iyideba nekayiruata kĩrãduabʉ.
w14 15/11 10 parr. 10
Kʼãrẽa dayirãra neneẽã baibara
10 (Akʉra Levítico 17:10). Jeowaba zokʼasi israelitarãra wa «badudebemata» ko ẽ bamarẽã akʉza idibema kristianorabida zokʼapanʉ nedʉwʉrʉ wata ko ẽ bamarẽã, adewara ẽbẽra wa badudebemata dayide eda bʉe ẽ bamarẽã (Hech. 15:28, 29). Dayirã beibodonʉmʉmina, maʉ̃ bedʼea zokʼadara ũrĩkĩrãpanʉ, krĩcha ẽã badu ẽbẽrata Daizeze ode panʉ ẽãba dayirã wa bʉe jarapanʉmina. Ãya awuara krĩchabʉmina dayirãbara kãga Jeowara akʉza iya jarabʉta ũrĩpanʉ. Adewara kãgada ẽ Jeowaba iyi pʉwʉrʉdeba ãĩ bʉemarẽã (Jud. 17, 18). Mõbemata ¿kʼãrẽba kʼarebai wa ko ẽ baita akʉza dayi kẽgʉde eda bʉe ẽ baita? (Deut. 12:23).
Daizeze Bedʼea leita
(Levítico 16:1-16) Jeowara Moisésʼʉ̃me bedʼeasi Aarón wũãwũãra ũme beida tẽã, ãyira beisida Jeowata orrasida baera. 2 Jeowaba jarasi Moisésʼa: «Jarada bʉ mebẽã Aarónʼa badu ewaride eda wãbe ẽãta nekʼãrẽ neneẽãbʉ mae wua ãbʉdeare, tapa Arca kĩrãbita, mawũã bei ẽ marẽã, mʉ̃ra zei baera jãrãrane tapa ʉ̃rʉ. 3 »Naʉ̃ta Aarónba edeibara neneẽãbʉidu wãbʉrʉde: toro warrarabʉta oprenda nekʼayirua oda kʼareadebemata akʉza karnerota oprenda bama kĩrãkʼa. 4 Jʉ̃ĩbara wua neneẽãbʉ linonebemata, jõma anaibara iyi kakuara lino oma ãdiaba, lino oma kʉrrʉde jʉ̃barita akʉza lino oma burude nejʉ̃barita. Iyi wua jõma neneẽãbʉta. Iyi baniaba kuida tẽã iyi wuara jʉ̃ñi. 5 »Pʉwʉrʉ Israeldeba kabrito ũme jidayi oprenda nekayiruadebema kĩrãkʼa adewara karnero aba oprenda bama kĩrãkʼa. 6 »Aarónbida diaibara iyi nekayirua kʼarea toro aba, mawũã oyi iyi nekayiruata akʉza iyi dedabema nekayiruata kĩrãduamarẽã. 7 »Aramaʉ̃ta kabrito ũme jida kʼãrãpe Jeowa nãã bʉeyi karpa de ãba yi jʉrebari eda wãbarimae. 8 Aarónbara suerteta oyi maʉ̃ kabrito ũmepanʉra ʉ̃rʉ: abara Jeowaita bayi ababemara, Azazelʼita bayi. 9 Aarónbara ũdubiyi kabrito Jeowaita jidadapeadata maʉ̃ba oyi oprenda nekayiruadebemata. 10 Mamina kabrito Azazelʼita jidabʉra Jeowa nãã zokʼai edeibara mawũã maʉ̃neba nekayiruata kĩrãduamarẽã, mawũã Azazelʼita zokʼadaita drʉa ibʉawabʉidu. 11 »Aarónbara ũdubiyi karnerota oprendade iyi nekayirua kʼarea akʉza oyi iyi nekayiruata akʉza iyi dedabema nekayiruata kĩrãduamarẽã. Maʉ̃are beadayi torota oprendade iyi nekayiruara kʼarea. 12 »Maʉ̃ tẽã jidayi epedeko zake tʉbʉ dabʉdebema altardebʉta Jeowa nãã akʉza juwa ũme insienso tũãpoabʉ naʉ̃zabadata, maʉ̃ra edeibara wua ãbudeare. 13 Iyara insiensota tʉbʉde Jeowa nãã bʉeibara akʉza insienso narĩba jõma anañi Arca tapara, Testimonio ʉ̃rʉbʉta, mawũã bei ẽ baita. 14 »Iyi juwa jiwiniba jĩzoabikʉayi toro wata juwarare tapa kĩrãbita. Iyi juwa jiwiniba jĩzoabikʉayi maʉ̃ waba 7 bayeda tapa kĩrãbita. 15 »Maʉ̃ tẽã beayi kabrito oprendadebemata pʉwʉrʉba nekayirua oda kʼarea, edeyi yi wata wua ãbʉdeare akʉza toro waba oda kĩrãkʼa iyaba oyi maʉ̃ waba. Jĩzoabikʉayi tapa ʉ̃rʉ akʉza tapa nãã. 16 »Mawũã iyara maʉ̃ neneẽãbʉmaera jaigʉa ẽã oyi, israelitara jaigʉabʉdeba akʉza ãya kayirua obʉdeba. Maʉ̃ta oyi iyara karpa de ãba yi jʉrebari kʼarea, ãyi ẽzadrabʉta, ãya nekayirua obʉ ẽzadra.