¿Kʼairaba bʉsida Jesu ʉ̃rʉ?

Akʉra ẽbẽrarã naʉ̃ dibujodebʉta, ãyi trʉ̃ra Mateo, Marko, Luka, Juan, Pedro, Santiago, Juda akʉza Pablo. Ãyi jõma Jesu ewaride panasi akʉza bʉsida Jesu ʉ̃rʉ. Ãya bedʼea bʉdara jõma Daizeze Bedʼeade bʉ ¿Audre kʼawuakĩrãbʉka maʉ̃ra ʉ̃rʉ?...

Maʉ̃ranebema ũbeara audre Jesu neũdukʼawuabasi akʉza iyiʉ̃me Daizeze Bedʼea jaradiapanasi. Maʉ̃rãra Mateobasi Juanbasi Pedrobasi ãyira Jesu kʼaidupanasi. ¿Jarada sãmachuta?... Mateobara libro aba bʉsi Jesu ʉ̃rʉ, adewara Juanba bʉsi libro Rebelasionta akʉza karta ũbea, maʉ̃ra trʉ̃ra naʉ̃, Yi nabema karta Juan, Yi ũme karta Juan, Yi ũbea karta Juan. Pedrobida karta ũmebʉsi naʉ̃rata, Yi nabema karta Pedrota akʉza Yi ũme karta Pedrota, yi karta ũmenera Pedrobara jarasi nebia berabarida ʉ̃rʉ. Iyara ũrĩsi Jeowa ʉ̃tʉba bedʼeabʉta Jesu ʉ̃rʉ, jarasi naʉ̃ra mʉ warra, mʉara mejãcha kãgabʉ akʉza iyi kʼãrẽa sobiabʉ.

Wuabema ẽbẽrarã dibujode bʉrabida bʉsida Jesu ʉ̃rʉ, maʉ̃ranebema abara Markobasi. Iyara ũdusibaibara sãwũã berabaridata Jesu jida edesidade. Ababemara Lukabasi, iyira medikobasi, iyira Jesu beida tẽã kristiano basikĩrã.

Jesu tẽãbemara ũmebida bʉsida iyi ʉ̃rʉ. ¿Kʼawuabʉka kʼairabasita?... Akʉra dibujode, ãyi trʉ̃ra Santiagobasi akʉza Judabasi. Naarãra ĩjãnaẽbasi Jesuba jaradiabadara. Krĩchasidabaera Jesura kĩrã kʼawuaẽnʉmʉta, mamina ãyara maʉ̃ tẽã ĩjãsida mawũã Jesu kʼaidubemabasida.

Atiara bedʼeadaya Pablo ʉ̃rʉ ¿Dibujode ũdubʉka? kristiano bainaẽnara iyi trʉ̃ra Saulobasi. Iyara jʉrabasi kristianorãra akʉza zʉbʉria obasi. ¿Kʼawua kĩrãbʉka sãwũã Jesu kʼaidubemabasita?... Ewari aba iyira ode wãbasi maʉ̃ne ũrĩsi ʉ̃tʉba bedʼeabʉrʉta. ¿Kʼaibasiba? maʉ̃ra Jesubasi, iya widisi naʉ̃ta. ¿Kʼãrẽa zʉbʉria onʉmʉ mʉ ĩjãbʉrãra? aramaʉ̃ta Pablobara kʼawuasi iya obadara bigaẽãta, maʉ̃ba kristianobasi. Maʉ̃neba yẽta katorse libro bʉsi Daizeze Bedʼea edabʉta Romanoneba Ebreo eda.

¿Bʉmabida Daizeze Bedʼeara nruemaza akʉpanʉe?... Daizeze Bedʼea akʉbʉdade dayirãbara nemejãcha kʼawuapanʉ Jesu ʉ̃rʉ. ¿Kʼawua kĩrãikʼa audre Jesu ʉ̃rʉ?...