¿Bʉara ũdubʉka Jeowaba sãwũã panʉbʉta?

Daizeze Bedʼeadera mejãchabʉ nebʉra sãwũã Jeowaba yiwidʼi panʉbʉ ʉ̃rʉ. Daizeze ode panʉrabara ũdusida sãwũã Jeowara ãyi bedʼea zroma kʼarea krĩchabʉta akʉza sãwũã kʼarebasita adewara so zarea diasita. Maʉ̃ kʼarea dayirãba Jeowaʼa jaradara kʼãrẽta kãgabʉta, biʼia akʉbaibara Jeowaba dayirãba wididara sãwũã panʉita. Mamina Jeowaba panʉseabʉta dayirãba widida awuara, mawũã ẽ bʉrʉ dayirãba wididaira audre diaseabʉ (2Co 12:7-9; Ef 3:20). Akʉdayi Jeowaba dayirã yiwidʼi sãwũã panʉbʉta.

• Jeowabara dayirãra bedʼea zroma awuantaita zarea diabʉ (Flp 4:13).

• Buru biata diabʉ bia jida kʼawuamarẽã (Snt 1:5).

• Zareata diabʉ dayirãba zokea odamarẽã (Flp 2:13).

• Aduʼa babibʉ dayirã mejãcha sopʉabʉdadera (Flp 4:6, 7).

• Wuabemaraneba kʼarebabʉ akʉza so zareata diabʉ (1Jn 3:17, 18).

• Dayirãba ẽbẽra abaʉta kʼarebamarẽã widibʉrʉdera iyara kʼarebabʉ (Hch 12:5, 11).

BIDEO JEOWARA «YIWIDʼIBɄ ŨRĨBARI» ŨDUBIDA TẼÃ, PANɄRA NAɄ̃ WIDITA:

• ¿Mebẽã Shimizu nebʉrabara sãwũã kʼarebabʉ mebẽrã kayapanʉrãra?

• ¿Sãwũã mebẽã Shimizude kĩrãkʼa oseapanʉ?