YI 7

Bedʼea wãrĩnuta jaraita ĩjãnamarẽã

Lucas 1:3

JARAKĨRÃBɄ: Bedʼea wãrĩnunebemata zokʼara, ẽbẽrarãba wãrĩnu ĩjãnamarẽã.

Jʉrʉda bedʼeata daya wãrĩnu ĩjãseabʉta. Bʉ bedʼeabʉrʉza ũdubira Daizeze Bedʼeadeba bedʼeabʉta akʉza leseabʉbʉrʉ Daizeze bedʼeata lera. Bʉa internetʼnebʉta, telebisione ũdubipanʉta akʉza radiode jarapanʉta jara ũrĩbikĩrãbʉbʉrʉ, nããra biʼia akʉra maʉ̃ra bedʼeabara wãrĩnu jarabʉ kʼawuaita.
Bʉa bedʼea jʉrʉdara biʼia zokʼara. Testo jara ũrĩbinʉmʉne, jarada maʉ̃ kapitulodera kʼãrẽ ʉ̃rʉ bedʼeabʉta, adewara jaraseabʉ «yi nezokʼa» jipabʉba karta opanʉ ʉ̃rʉ akʉza Daizeze Nokʼo ʉ̃rʉ (Mat. 24:45). Bʉta awuru karta ʉ̃rʉ bedʼeakĩrãbʉbʉrʉ aña krĩchabirãra yi wuabemarata maʉ̃ karta bʉda ʉ̃rʉ.

Nekʼãrẽ berabarida ʉ̃rʉ bedʼeabʉrʉde akʉza nejʉachabari ʉ̃rʉ aña jarabeda ẽ. Jʉra kʼawuabara, «ẽbẽra jõma» jarai kaude jaraseabʉ «ʉ̃kʉrʉta», «ewari jõma» jarai kaude jaraseabʉ «ewari abaʉde», «mawũã berabarisi» jarai kaude jaraseabʉ «mawũã berabariseabasi».
Kʼarebara yi wuabemarata krĩchadamarẽã. Testo leda tẽã akʉza kartara leda tẽã, krĩchara kʼãrẽ bedʼea widiseabʉta mawũã ẽ bʉrʉ kʼãrẽ yizadeba jara ũrĩbiseabʉta mawũã ãyikʉzaʉba krĩchadamarẽã adewara aripe kʼawuadamarẽã.