Perada ẽ baibara naʉ̃ drʉa jõbodo kʼareara

Aranʉ Jeowaba jõma jõbiyi naʉ̃ drʉadebʉra. Mawũã berabaribʉrʉdera religion zeri ẽãra neẽbayi, nokʼora ãba zebʉba pẽwãnañi Daizeze pʉwʉrʉra akʉza Jeowaba ẽbẽrarã kayiruara Armagedónʼne jõma makenañi. Dayirã jõmaʉ̃ba mawũã berabarimarẽã jʉ̃ãpanʉ.

Maminabʉ nekʼãrẽ dayirãba bia kʼawua ẽãta zʉbʉria zroma ʉ̃rʉ. Bari jaraita kʼawuada ẽ sõbede jʉ̃drʉita maʉ̃ zʉbʉria zromara. Kʼawuada ẽ kʼãrẽ kʼarea nokʼoraba jõbita religionʼrãra. ¿Ewari sõbebayeda pẽwãnai Daizeze pʉwʉrʉra akʉza sãwũã odai maʉ̃ra? ¿Jeowabara kʼãrẽta oi ẽbẽra kayiruara Armagedónʼne makenaita? Maʉ̃ra kʼawuada ẽ.

Dayirãra pera ẽ baibara ʉ̃rabʉrʉ kʼãrẽ berabari kʼareara, Daizeze Bedʼeaba dayirã jaradiabʉ kʼãrẽta nesidabʉta aduʼa bʼaita. Bari jaraita, dayirãbara kʼawuapanʉ naʉ̃ drʉa jõbodoare panʉta (2Ti 3:1). Dayirãba kʼawuapanʉ religion zeri ẽãra jõbibʉrʉdera ewari bio berabari ẽ baita, mawũã religion wãrĩnuarasida jõ ẽ marẽã (Mt 24:22). Akʉza kʼawuapanʉ Jeowabara iyi pʉwʉrʉra wãrĩnu ẽdrʉbita (2Pe 2:9). Kʼawuapanʉ Jeowabara jʉrʉsita ẽbẽra aba aripe obʉta akʉza zarea mejãcha barabʉta, maʉ̃ba ẽbẽra kayiruarãra jõma makenañi adewara ẽbẽrarã mejãcha ẽdrʉbiyi Armagedónʼne (Ap 19:11, 15, 16).

Maʉ̃ mawũã berabaribʉrʉba ẽbẽrarã perabiba kʼawua ẽã totoyi. Mamina dayirãra perada ẽ bayi, ledara akʉza krĩchadara Jeowaba naena iyi pʉwʉrʉ sãwũã kʼarebada ʉ̃rʉ adewara Jeowaba ʉ̃rabʉrʉ kʼãrẽ berabari ʉ̃rʉ jarabʉta, mawũã odara sentidayi Daizeze Bedʼeaba jarabʉ kĩrãkʼa: «Mawũã berabʼari bʉsadʼewadʼera wãniguaudua, mobebaira marã ẽdrʉira kʼaita basia» (Lu 21:26, 28).