BʼAITA KRISTIANORA KĨRÃKʼA
Biʼia kʼawuabara kʼãrẽta oita ospitalʼeda mesera wãibarabʉrʉ
¿Kʼãrẽa biʼia kʼawuaibara kʼãrẽta oita? Jõmaʉ̃ta kayaseapanʉ akʉza ospitalʼeda wãseabʉ daya kʼawua ẽãne. Maʉ̃ kʼarea medikoraba dayirãta bia akʉdamarẽã kãgapanʉbʉrʉ, nekʼãrẽ berabari nãã bia zokʼaibara dayirãʼa kʼareba diapanʉta. Mawũã opanʉba ũdubiyi dayi bebʉ kãgabʉta akʉza Jeowaba wa ʉ̃rʉ zokʼabʉta ũrĩkĩrãpanʉta (Hch 15:28, 29).
¿Kʼãrẽta oibara?
Bia krĩchada tẽã akʉza yiwidʼida tẽã birara karta wa ʉ̃rʉ bedʼeabʉta (DPA).a Mebẽrã yi buru kʼoemabʉrʉ, widiseabʉ mebẽã karta widibariʼa maʉ̃ karta wadebemata diamarẽã akʉza yibarirabara widiseabʉ Tarjeta de identidad (ic) yi wũãwũãraita.
Bʉta biogobʉbʉrʉ widida zõrãrã diamarẽã karta Información para mujeres embarazadas (S-401), naʉ̃ba kʼarebayi biʼia kʼawuaita kʼãrẽta oita medikoma wãibarabʉrʉ biogobʉde mawũã ẽ bʉrʉ tobodoare.
Bʉta medikoba akʉdaya adara akʉza maʉ̃ne jaradara kẽgʉde wa eda bʉedaita, mawũã ẽ bʉrʉ ospitalde beita, nãã bedʼeara zõrãrã kongregasionebemabawara akʉza jarada medikora bʉa iduaribita mebẽã abaʉba bʉ akʉ jʉ̃ẽ bamarẽã.
¿Zõrãrãbara sãwũã kʼarebaseabʉ? Ãyara kʼarebaseabʉ karta DPA biramarẽã, mamina ãya kʼawua jara ẽ bayi mebẽãba kʼãrẽ tratamiento jidai ʉ̃rʉ akʉza mebẽãba ãyidobaʉba krĩcha kʼãrãpe kʼawua jidaide eda kʼawua jarabe ẽ (Ro 14:12; Gál 6:5). Bʉaʼa medikoraba jaradara wata kẽgʉde eda bʉeibarata, aramaʉ̃ta bʉra bedʼeaibara bʉ kongregasion zõrãrãbawara, maʉ̃rata bedʼeamarẽã Mebẽrãra medikorabawara bedʼeapanʉbawara (CEH).
¿Sãwũã kʼarebaseabʉ Mebẽrãra medikorabawara bedʼeapanʉbara (CEH)? Mebẽrãra medikorabawara bedʼeapanʉʼara jaradiapanʉ sãwũã bedʼeaita medikorabawara akʉza juezʼrabawara, mawũã naʉ̃ra mebẽrãraba jara ũrĩbimarẽã sãwũã krĩchapanʉta dayirãba wa ʉ̃rʉ. Akʉza ãya medikoʼa jara ũrĩbiseabʉ kʼãrẽ tratamiento zokʼaseabʉta mawũã wa zokʼa ẽ baita. Adewara ãyara kʼarebaseabʉ jʉrʉita kʼai medikoba wa bʉe ẽã tratamiento oita.
BIDEO ¿WA Ʉ̃RɄ JARABɄDADERA SÃWŨÃ BIʼIA JIDA KʼAWUASEABɄ? ŨDUBIDA TẼÃ, PANɄRA NAɄ̃ WIDITA:
¿Kʼãrẽba kʼarebayi kʼawuaita kʼãrẽ oita medikoba jaradara wata kẽgʉde eda bʉeita?
a Libro Bʉra ewari jõmaʉ̃nẽ sobia baseabʉ yi 39ba kʼarebaseabʉ bʉa bia jida kʼawuaita wa zokʼai ʉ̃rʉ.