YI 11

Sobiade bedʼeaita

Romanos 12:11

JARAKĨRÃBɄ: Soiduba bedʼeara, ẽbẽrarãba ũrĩkĩrãnamarẽã akʉza okĩrãnamarẽã.

Soiduba akʉra sãwũã jaradiaita. Bʉa maʉ̃ akʉnʉmʉne pikãga krĩchara maʉ̃ bedʼeaba sãwũã kʼarebaseabʉta yi wuabemarata. Biʼia akʉra maʉ̃ bedʼea kʼãrẽ ʉ̃rʉ bedʼeabʉta, mawũã obʉbʉrʉ wãrĩnu bedʼeabʉta ũdubidayi.
Krĩchara yi ũrĩpanʉne. Krĩchara bʉa jaradiaibara sãwũã ãyira kʼarebaita. Krĩchara bʉa bedʼea jaradiaita sãwũã jaraita, ẽbẽrarãba kʼawuadamarẽã bʉa jaradiakĩrãbʉta akʉza kĩrãduada ẽ marẽã.
Biʼia bedʼeara yi ũrĩpanʉrata sẽna ẽ marẽã. Soiduba bedʼeara. Bʉ kĩrã akʉza bʉ juwa sãwũã obʉdeba ũdubira bʉ sãwũã sentibʉta akʉza wãrĩnu bedʼedabʉta.

Jʉra kʼawua ora, iyabaʉ kĩrãta akʉza iyabaʉ juwata oẽ baita. Bʉa kĩrã akʉza juwa sãwũã obʉta abarika bʼaibara bedʼea audre yibiaʉ̃mera. Sobiade bedʼeara bedʼea audre yibiata jarabʉrʉde akʉza kãgabʉbʉrʉ yi ũrĩpanʉraba bʉa jaradiabʉta omarẽã. Mamina aukʼara sobiade bedʼearãra, yi ũrĩpanʉrãra sẽseapanʉ baera.