¿Kristianorabara sãwũã akʉdaibara ituara?

Naʉ̃ drʉa jõmaʉ̃nẽ ẽbẽrarã mejãchaʉba awuara krĩchapanʉ itua doi ʉ̃rʉ. Ʉ̃kʉrʉba dopanʉ edaʉde iyi neũdukʼawuarabawaraʉba, ʉ̃kʉrʉba do ẽ ituara akʉza ʉ̃kʉrʉba kĩrã pʉrra beiyeda dobari. Mamina, ¿kʼãrẽta jarabʉ Daizeze Bedʼeabara itua doi ʉ̃rʉra?

1. ¿Itua doira nekayiruaka?

Daizeze Bedʼeabara jara ẽ itua doira nekayiruata, awuarabʉrʉ jarabʉ: «Binoba ẽbẽrarã so sobiabibʉta» (Salmo 104:14, 15). Maʉ̃ra Jeowaba diada nekʼãrẽ mejãcha bʉdebemata, adewara Daizeze Bedʼeabara jarabʉ yumakẽrãba akʉza yuwẽrã kʼẽrẽpabʉraba dopanasita ituara (1 Timoteo 5:23).

2. ¿Daizeze Bedʼeabara kʼãrẽ ũrãgʼa biata diabʉ itua doi ʉ̃rʉ krĩchabʉrãra?

Jeowabara kãga ẽ kĩrã pʉrra doira akʉza aukʼara itua doira (Gálatas 5:21). Daizeze Bedʼeaba jarabʉ: «Bino mejãcha do panʉrane eda bearaidua» (Proverbios 23:20). Abapaiba dobʉbʉrʉ mawũã ẽ bʉrʉ bʉ kopaerorabawaraʉba dobʉbʉrʉ, aukʼara do be ẽ baibara bʉa kʼawua ẽã nʉmeita akʉza krĩcha aduanʉme ẽã, adewara do ẽ baibara bʉ bebʉta kayabibʉbʉrʉ. Dayirãba itua dobʉde bia zokʼa kʼawua ẽ bʉrʉ, audre yibia bayi do ẽ baita.

3. ¿Sãwũã wawiata ũdubiseabʉ wuabemaraba jidabʉ kʼarea?

Ẽbẽra aba abakaʉba jidaibara itua doita mawũã ẽ bʉrʉ do ẽãta. Ẽbẽra abaʉba ituata dobʉbʉrʉ maʉ̃ kʼarea jaranʉma be ẽ akʉza ẽbẽra abaʉba do ẽ bʉrʉ, jara be ẽ domarẽã (Romanos 14:10). Ʉ̃kʉrʉ ẽbẽrarãba dayibawaraʉba do ẽ bʉrʉ dayirãbida do ẽ bayi ãyi baebi ẽ baita (akʉra Romanos 14:21). Maʉ̃ kʼarea dayi bia baikaude jʉrʉpanʉ awuru ẽbẽrarã biapanamarẽã (akʉra 1 Corintios 10:23, 24).

AUDRE BIʼIA KʼAWUADADRɄ

4. Jida kʼawuara itua doita mawũã ẽ bʉrʉ do ẽãta

¿Jesubara kʼãrẽta krĩchabasi itua doi ʉ̃rʉra? Maʉ̃ kʼawuadaita akʉdaya yi nãã miõba oka oside. Akʉra Juan 2:1-11, mõbe naʉ̃ta panʉidua:

• Nama jarabʉdera, ¿kʼãrẽta krĩchabasi Jesubara itua ʉ̃rʉra akʉza yi maʉ̃ dobada ʉ̃rʉra?

• Jesuba jara ẽ basi baera itua doira kayiruata, ¿kʼãrẽta krĩchaseabʉ kristianorabara wuabemara itua dobʉ kʼarea?

Kristianora itua doseabʉmina jʉra kʼawua baseabʉ sama doita akʉza kʼãrẽ ewaride doita. Akʉra Proverbios 22:3, mõbe bedʼeaidua yibia kʼawuaita itua doita mawũã ẽ bʉrʉ do ẽãta:

• Bʉa erateibayi motota, karruta mawũã ẽ bʉrʉ badu makinata.

• Wẽrã biogobʉbʉrʉ.

• Medikoba jarasibʉrʉ ituata do ẽ bamarẽã.

• Itua wĩka doita zareabʉ.

• Bʉ bʉmae nokʼorabara ituara dobida ẽ.

• Bʉtabʉbʉrʉ ẽbẽra itua dobadaʉ̃me mamina maʉ̃ ẽbẽrabara itua nãã dobadara amaesi.

¿Bʉ juwa jidabʉrʉdera dedekaseabʉka ituata mawũã ẽ bʉrʉ awurubawara ãbabarabidade? Kʼawaita kʼãrẽta oseabʉta, akʉra BIDEOTA.

BIDEO: ¿Ituata dedekaseabʉka? (2:41)

Akʉra Romanos 13:13 akʉza 1 Corintios 10:31, 32. Maʉ̃ akʉda tẽã bedʼeaidua maʉ̃ ʉ̃rʉ:

• ¿Daizeze Bedʼearadebemabara sãwũã kʼarebaseabʉ biʼia jida kʼawuaita mawũã Jeowa sobiabita?

5. Jida kʼawuara kʼãrẽaba doseabʉta

Jeowabara itua doira kayirua akʉ ẽ, mamina itua dobʉrʉde jʉra kʼawuabaibara aukʼara kĩrã pʉrra do ẽ baita, maʉ̃ra kayirua baera. ¿Kʼãrẽa? Akʉra Oseas 4:11, 18, mõbe naʉ̃ta panʉidua:

• ¿Kʼãrẽta berabariseabʉ jari ẽbẽra aukara itua dobʉra?

¿Kʼãrẽba kʼarebaseabʉ aukʼara itua do ẽ baita? Biʼia kʼawuapanaibara nãã kʼãrẽaba doseabʉta. Akʉra Proverbios 11:2, mõbe naʉ̃ta panʉidua:

• ¿Kʼãrẽa biga bʼai daya jaraita kʼãrẽaba doseabʉta maʉ̃neba wua do ẽ baita?

6. Itua doideba ẽdrʉbʉrʉta

BIDEO: «Kãga ẽ basi mʉ̃ sãwũãbadara» (6:32)

• ¿Dimitrira sãwũãbasi itua dobasidera?

• Nãã idubʉita krĩchasidera, ¿osika wãrĩnu?

• ¿Kʼãrẽta osi wua itua do ẽ baita?

Akʉra 1 Corintios 6:10, 11, mõbe naʉ̃ta panʉidua:

• ¿Ituaba bʼai nʉmeira jipa kayiruaka? ¿Kʼãrẽa?

• ¿Sãwũã kʼawuapanʉ ẽbẽra itua domiabadata itua do ẽã aduasebʉta?

Akʉra Mateo 5:30, mõbe naʉ̃ta panʉidua:

• Jesuba jaraside juwa tʉibara, jarakĩrã ẽ basi juwata tʉibarata, awuarabʉrʉ jaradiakĩrãbasi zarea oibarata Jeowaba kãgabʉ oita. Bʉta zarea obʉbʉrʉ wua itua do ẽ baita, ¿kʼãrẽta oseabʉ?a

Akʉra 1 Corintios 15:33, mõbe naʉ̃ta panʉidua:

• Bʉta ẽbẽra mejãcha itua dobʉbawara ãbabʉbʉrʉ, ¿kʼãrẽta berabariseabʉ?

KĨRÃBEITA

Ituara Jeowaba diada, mamina iyara kãga ẽ kĩrã pʉrra doita akʉza aukʼara doita.

Panʉnadrʉ

• ¿Kʼãrẽta jarabʉ Daizeze Bedʼeabara itua doi ʉ̃rʉra?

• ¿Kʼãrẽta berabariseabʉ aukʼara ituata dobʉbʉrʉ?

• ¿Sãwũã wawiata ũdubiseabʉ wuabemaraba itua doi ʉ̃rʉ jidabʉ kʼarea?

JɄRɄDA AUDRE KʼAWUAITA

¿Warrarabara itua doi nããena kʼãrẽta kʼawuaibara?

Bia krĩchara ituata dora sãwũãita (2:31)

Kʼawuara kʼãrẽta oseabʉta itua do jarabʉdade do ẽ baita.

«Kʼãrẽta oibara ariguide itua doita» (Jarakabʉ, 1ne enerode 2010de)

¿Yibiaka kristianoraba kopa yiya tʉbita?

«Lepanʉraba widipanʉta» (Jarakabʉ, 15de febrerode 2007de)

Kʼawuara yumakẽrã abaʉba sãwũã iduaribisita itua doita akʉra yi nebʉrata «mejãcha itua domiabasi».

«Daizeze Bedʼeabara mʉ̃ bebʉra awuarababibʉ» (Jarakabʉ, 1ne mayode 2012de)