YI 14

Bedʼea audre yibiata jaraita

Hebreos 8:1

JARAKĨRÃBɄ: Kʼarebara yi ũrĩpanʉrabara bʉ diskursora jõma biʼia ũrĩnamarẽã. Biʼia jaradia amaera bedʼea audre yibiata akʉza kʼãrẽ ʉ̃rʉ bedʼeabʉta. Akʉza kʼãrẽne abarikabʉta maʉ̃ra bedʼeara.

SÃWŨÃ OSEABɄ

Nããra biʼia krĩchara bʉa kʼãrẽa jarakĩrãbʉta maʉ̃ bedʼeata. Biʼia krĩchara, bʉ diskursobara kʼãrẽta jaradiakĩrãbʉta: ¿bari kʼawuabikĩrãbʉka? mawũã ẽ bʉrʉ, ¿wãrĩnu ĩjãnamarẽã kãgabʉka? mawũã ẽ bʉrʉ, ¿wãrĩnu odamarẽã kãgabʉka? Biʼia akʉra bedʼea audre yibiata yi ũrĩpanʉraba kʼawuadamarẽã bʉa jaradiakĩrãbʉta.

Krĩchara: «¿Ẽbẽrarãbara kʼãrẽ widita oseapanʉta mʉ̃a jaradiabʉ ʉ̃rʉra?». Mõbe krĩchara sãwũã panʉita ẽbẽrarãba widibʉta, mawũã obʉbʉrʉ ẽbẽrarãbara biʼia kʼawuadayi akʉza ĩjãnañi.
Jarada kʼãrẽ ʉ̃rʉ bedʼeaita. Bʉa diskurso jaranʉmʉnera jẽda jara ũrĩbiedanʉmada kʼãrẽ ʉ̃rʉ bedʼeabʉta, iyabaʉ bedʼeata jaraseabʉ mawũã ẽ bʉrʉ iyabaʉ bedʼeata awuru bedʼeade jara ũrĩbiseabʉ.
Biʼia jara ũrĩbira bedʼea audre yibiara akʉza jara ũrĩbira ẽbẽrarãba ũrĩne. Jʉrʉda bedʼea audre yibiata kʼãrẽ ʉ̃rʉ bedʼeabʉme abarikabʉta akʉza maʉ̃ba ewarita berabaribi ẽ marẽã. Bedʼea audre yibiara wiña jʉrʉda, mawũã biʼia jaradiaita. Bedʼea audre yibiata jaradiai naweda chupeatotora.

Bʉ diskurso jʉ̃drʉi naweda, bʉara jaraseabʉ bedʼea audre yibia ʉ̃rʉ, mawũã odara yi ũrĩpanʉrabara kʼawuadayi kʼãrẽ ʉ̃rʉ bedʼeaita. Adewara jõbodoare akʉza jẽda jarada ãya kĩrãduada ẽ marẽã.