Dayirã mebẽrãnebemaba Jeowa o idubʉbʉrʉde

1. ¿Mejãchaʉta sãwũã sentipanʉ ãyi mebẽãdebemata wua Jeowa ʉ̃rʉ Kʼawuabibari ẽã badogodera?

DAYIRÃ mebẽrãnebemata wua Jeowa ʉ̃rʉ Kʼawuabibari ẽ bʉrʉ, maʉ̃ra mejãcha pʉ. Mebẽã Hildabab jarasi: «Mʉ̃ kima beiside dai jʉwa jidapanʉta 41 poagabayeda mʉ̃a krĩchasi, mʉ̃a pʉa sentibʉra maʉ̃neba ʉ̃ta pʉachura neẽãta wuara. Mamina mʉ̃ wũãwũãba kongregasion amaeside akʉza iyi kimata adewara iyi wũãwũãrata, mʉ̃itara maʉ̃trʉ audre pʉbasi jipa».

2, 3. Salmo 78:40, 41neba jarabʉdebara, ¿sãwũã sentibʉ Jeowara iyi ota amaebʉdadera?

² Krĩchara Jeowa sãwũã sopʉasita ʉ̃kʉrʉ angeleraba iyi idubʉsidadera (Jud. 6). Krĩchara Jeowa sãwũã sopʉasita iyi pʉwʉrʉ israelitaraba iyi bedʼea kriña ũrĩna ẽ baside (akʉra Salmo 78:40, 41). Kʼawuabara Jeowara sopʉabʉta bʉ mebẽrãnebemaba iyi o amaebʉrʉdera. Iyara kʼawuabʉ dayirãita kʼãrẽaba pʉachuta, maʉ̃ kʼarea so zarea diabʉ akʉza kʼarebabʉ dayirãba nesidabʉde.

³ Naʉ̃ artikulodera akʉdayi, kʼãrẽta odaibarata Jeowa kʼareba ũdudaita dayirã mebẽrãnebemaba Jeowa o amaebʉdade. Akʉza dayirã mebẽrã kongregasionebemarata maʉ̃ne berabaribʉbʉrʉ sãwũã kʼarebaita. Mamina nããra akʉdayi dayirãitara kʼãrẽta biga ẽãta krĩchaira.

BɄ KʼAREA MAWŨÃ BERABARISI Ẽ

4. ¿Sãwũã sentipanʉ ʉ̃kʉrʉ yibarirãra ãyi wũãwũãba Jeowa o idubʉbʉrʉdera?

⁴ Yibarirabara krĩchaseapanʉ, ãya kʼãrẽta oseabasita ãyi wũãwũãba Jeowa o idubʉ ẽ bamarẽã. Iyi wũãwũã Jeowa odeba ãĩ wãside, mebẽã Lukeba jarasi: «Mʉ̃ara krĩchabasi mʉ̃yi kʼarea mawũã berabarisita akʉza diamasira mejãcha zʉbʉriabasi maʉ̃ krĩchadeba, mʉ̃ra mejãcha jẽgabasi akʉza mʉ̃ sora mejãcha pʉanʉmasi». Adewara mebẽã Elizabethba jarasi: «¿Mʉ̃ara kʼãrẽta aña osipe? Mʉ̃a krĩchasi mʉ̃a nejõma oẽ basita mʉ̃ wũãwũãba soiduba kãgamarẽã Jeowata».

5. ¿Ẽbẽra abaʉba Jeowa ota idubʉra kʼaide yi bedʼeara?

⁵ Jeowabara dayirã aba abakaʉʼa diasi dayirãba jidamarẽã kʼãrẽta oita, maʉ̃bara jarakĩrãkʉ iyi ode bʼaita jidaita mawũã ẽ bʉrʉ iyi ode ba ẽãta. Ʉ̃kʉrʉ warrarabara jidapanʉ Jeowaʉ̃me kʼẽrẽpa bʼaita yibarirãra mawũãbʉ ẽ mina akʉza ʉ̃kʉrʉ yibariraba nejõma osimina ãyi wũãwũãra kʼẽrẽpa bamarẽã, ãyi wũãwũãrabara jidasida Jeowaʉ̃me ba ẽ baita. Mõbera dayirã aba abakaʉba jidabʉ Jeowa ode bʼaita mawũã ẽ bʉrʉ iyi ode ba ẽ baita (Jos. 24:15). Mara wũãwũãraba Jeowa ota idubʉsidabʉrʉ mara yibarirabara krĩcha ẽ baibara mara kʼarea mawũã berabarisita.

6. ¿Warrarãra sãwũã sentipanʉ ãyi yibariraba Jeowa o amaebʉrʉdera?

⁶ Edaʉde yibarirabara amaebʉ Jeowa ora akʉza ãyi wũãwũãrainʉ (Sal. 27:10). Naʉ̃ra wũãwũãraitara mejãcha zare, ãya kãgabʉrʉ ãyi yibarita, wawia ũdubipanʉbʉrʉ akʉza yiza bia kĩrãkʼa akʉpanʉbʉrʉ. Esther zezebara amaesi Jeowara, mebẽã Estherba nebʉrabʉ: «Mʉ̃ra mejãcha jẽgasi, mʉ̃ zezeba bari idubʉ ẽ basi baera kongregasionʼra awuarabʉrʉ Jeowasida jipa amaesi. Mʉ̃a soiduba kãga mʉ̃ zezera akʉza mʉ̃ara iyi ʉ̃rʉ krĩchabʉ, adewara edaʉde mejãcha so pera deguebasi».

7. ¿Sãwũã sentibʉ Jeowara warrara kʼareara ãyi yibarirata wua Jeowa ʉ̃rʉ Kʼawuabibari ẽ bʉrʉ?

⁷ Warrara, mara yibariraba Jeowa ota amaesi kʼarea sopʉapanʉbʉrʉ, daisida sopʉabʉ mara kʼarea. Kʼawuabara Jeowabara akʉbʉta bʉ sãwũã zʉbʉriabʉra akʉza akʉbʉta bʉ sãwũã kʼẽrẽpabʉta. Jeowabara kãga bʉra akʉza mebẽrã kongregasionebemarabida. Kĩrãbera Jeowabara dayirã diabʉ kʼãrẽta omarẽã, maʉ̃ kʼarea bʉ yibariraba Jeowa ota amaesidabʉrʉ, krĩcharãra bʉ kʼarea mawũã berabarisita. Jõma yi buru kʼoepanʉbara Jeowaʼa panʉñi ãya obʉrʉta (Gál. 6:5).

8. ¿Kʼãrẽta oseapanʉ yi mebẽrãbara ãyi mebẽãdebemata Jeowa odeba ãĩbʉta jʉ̃ãbʉedara? (Akʉra yi rekuadro «Jeowabara jẽda zemarẽã kãgabʉ»).

⁸ Ẽbẽra bʉa kãgabʉba Jeowa ota idubʉbʉrʉdera soiduba kãgabʉ jẽda zemarẽã. Maʉ̃enara, ¿bʉa kʼãrẽta oseabʉ? Zarea ora Jeowaʉ̃me kʼẽrẽpa bʼaita. Mawũãra yiza biabayi wuabemaraita akʉza Jeowa o idubʉraitabida. Akʉza zarea erbayi kʼawua bʼaita kʼãrẽta oita bʉ sopʉabʉdera. ¿Kʼãrẽta oseabʉ bʉara audre soiduba ĩjã bʼaita?

KʼÃRẼTA OSEAPANɄ JEOWA KʼAWA BʼAITA

9. ¿Kʼãrẽneba Jeowaba bʉa zarea diabʉ iyi ode takeraita? (Akʉra rekuadrota «Daizeze Bedʼeadebamaba so zarea diabʉta dayirã mebẽrãnebemaba Jeowa o amaebʉrʉde»).

⁹ Ne bio ora Jeowa kʼawa bʼaita. Zarea ora audre soiduba ĩjã bʼaita akʉza bʉ mebẽrãbida. ¿Sãwũã oseabʉ bʉa maʉ̃ra? Daizezebara kʼarebabʉ iyi bedʼea akʉbʉdeba akʉza maʉ̃ ʉ̃rʉ krĩchabʉdeba adewara ãba yi jʉrebarieda wãbʉde. Atia bedʼeadayi Joanna ʉ̃rʉ. Yi zezeba akʉza iyi mebẽãʉ̃meba amaesida Jeowa ora. Iya jarabʉ: «Mʉ̃ra krĩcha aduʼabʉ Abigaíl ʉ̃rʉ kʼawuabʉde, Ester ʉ̃rʉ, Job ʉ̃rʉ, José ʉ̃rʉ akʉza Jesu ʉ̃rʉ. Naʉ̃ra yiza biadeba mʉ̃a krĩcha biata diabʉ akʉza mʉ̃ sopʉabʉra taʉbare. Akʉza trãbira JW Broadcasting nebemarabara sobiabibʉ».

10. Salmo 32:6-8 bayeda jarabʉbara, ¿sãwũã kʼarebayi krĩcha onʉmʉne mawũã ẽ bʉrʉ sopʉabʉidu takeraita?

¹⁰ Bʉa bedʼea zroma erbʉdera nebʉrada Jeowa. Akʉza sopʉabʉdera iyaʼa yiwidʼira badua. Jarada soiduba Jeowa akʉbimarẽã bedʼea zromara iya akʉbʉ kĩrãkʼa akʉza jaradiamarẽã kʼãrẽta oibarata (akʉra Salmo 32:6-8). Edaʉde zarea baseabʉ bʉa Jeowa jaraita bʉ sãwũã sentibʉta. Mamina Jeowabara biʼia kʼawuabʉ bʉ sãwũã berabarinʉmʉra. Jeowabara kãgabʉ iyaʼa jaramarẽã sãwũã sentibʉta (Éx. 34:6; Sal. 62:7, 8).

11. Hebreos 12:11ba jarabʉdebara, ¿kʼãrẽa yibia Jeowaba kʼẽãira, ẽbẽra abaʉta wua Jeowa ʉ̃rʉ Kʼawuabibari ẽã abʉrʉba? (Akʉra rekuadro «Jeowa kãgara ũdupanʉ jarabʉrʉde ẽbẽra abaʉta wua Jeowa ʉ̃rʉ Kʼawuabibari ẽãta»).

¹¹ Mebẽrã zõrãrãare bara. Ẽbẽra abaʉta jaradara iya nemitia oda kʼarea wua Jeowa ʉ̃rʉ Kʼawuabibari ẽãta, maʉ̃ra Jeowaba mawũã zokʼabʉ kãga ũdubita yi nemitia odaʼa akʉza kongregasionʼa (akʉra Hebreos 12:11). Zõrãrãba jarara wua Jeowa ʉ̃rʉ Kʼawuabibari ẽãta mebẽã abaʉta, ʉ̃kʉrʉba jaraseapanʉ zõrãrãbara bia krĩcha ẽ basita. Kĩrãbedaibara zõrãrãbara kãga ẽãta maʉ̃ ẽbẽra ãĩ wãna zʉbʉriamarẽãra. Akʉza edaʉde daya jõma kʼauchu ẽãta maʉ̃ ʉ̃rʉra. Ĩjãnaibara zõrãrãbara Daizeze Bedʼeadeba mawũã jidasidata akʉza Jeowaita osidata (2 Crón. 19:6).

12. ¿Kʼãrẽ nebiata ũdubʉ yi Jeowarebʉra, iya kʼẽãbʉrʉde?

¹² Dayirãita zõrãrãare bʉdera ãya jidabʉrʉde dayirã mebẽrãnebemata wua Jeowa ʉ̃rʉ Kʼawuabibari ẽãta, maʉ̃ba kʼarebabʉ dayi mebẽãra jẽda zemarẽã Jeowa ode. Elizabeth, naweda jaradaba parrapo 4de, jarasi: «Mʉ̃itara jipa zarebasi mʉ̃ wũãwũãʉ̃me ãba ba ẽ baira. Mʉ̃ wũãwũã jẽda zesidera iyara jarasi bigabasita kʼãwũã kʼẽãnaira. Akʉza mejãcha nebiata kʼawuasita maʉ̃neba. Mʉ̃ara kʼawuasi Jeowaba dayi kʼẽãbʉrʉdera dayi biaita mawũã obʉta». Iyi kima Markba jarasi: «Mʉ̃ warraba jarasi iyira jẽda zekĩrãbasita ũdusi baera daiba aripe osidata. Daira sobiapanʉ Jeowaba kʼarebasi baera aripe odaita iya jarabʉta».

13. ¿Kʼãrẽta oseabʉ sopʉabʉbʉrʉ?

¹³ Ewari berabarira mebẽrã bʉ kʼarebaseabʉbawara, bʉaʼa krĩcha bia diaseabʉta akʉza kʼarebaseabʉta bʉ pae ẽ baita (Prov. 12:25; 17:17). Joanna, nããra bedʼeadabara parrapo 9de, jarabʉ: «Mʉ̃ra doba sentibasi, mamina neũdukʼawuara biabawara bedʼeabʉba kʼarebasi pae ẽ baita». Mamina mebẽrãba bʉaʼa jaradara bedʼea bʉ sopʉabibʉta, ¿kʼarẽta oseapanʉ?

14. ¿Kʼãrẽta odaibara dayirã nemitia yiya kĩrãduapanaita?

¹⁴ Edaʉde mebẽrãra daya kãgakʉde bedʼea ẽ. Adewara dayi kĩrʉbide bedʼeapanare, maʉ̃ kʼarea ñabasea kĩrʉ ẽ baibara (Sant. 3:2). Edaʉde dayirãra aña bedʼeabʉ, mawũã ẽ bʉrʉ kriña aña bedʼeabʉ nekayirua omia baera, maʉ̃ kʼarea wuabemarata sopʉabiseabʉ. Kĩrãbera apostol Pabloba ũrãgʼa diabʉta: «Yiya jʉ̃ãbeidua akʉza ibiade kĩrãduaidua bʉ ʉ̃rʉ nemitiata osidamina» (Col. 3:13). Mebẽã wẽrã abaʉba erbasi iyi mebẽãta Jeowa odeba ãĩ, iya jarabʉ: «Ʉ̃kʉrʉ mebẽrãba mʉ̃ra kʼarebakĩrãpanasi, mamina dayirãra nekayirua omia baera, ãyara mʉ̃ra sopʉabisida, mawũãsidu Jeowaba kʼarebabʉrʉ mʉ̃a maʉ̃ kĩrãduaita». Mebẽrã kongregasionebemarabara, ¿sãwũã kʼarebaseapanʉ mebẽrãba ãyidebemata Jeowa odeba ãĩ erbʉbʉrʉ?

KONGREGASIONBARA KʼAREBASEABɄ

15. ¿Dayirãba sãwũã kʼarebaseapanʉ mebẽrãba erpanʉbʉrʉ ãyidebemata Jeowa odeba ãĩ wãnata aranʉeda?

¹⁵ Bia bedʼea edara yi mebẽrã wabida Jeowa ode kʼẽrẽpapanʉrãra. Mebẽã Miriamba jarabʉ iyira krĩcha obasita ãba yi jʉrebari eda wãita iyi mebẽãra wua Jeowa ʉ̃rʉ Kʼawuabibari ẽ baera. Iya jarasi: «Perabasi wuabemaraba kaseadaideba. Mamina panasi mebẽrã mʉ̃ mebẽã berabarida kʼarea sopʉapanʉta, ãyira kĩrʉnʉma ẽ basi adewara imitia jarada ẽ basi mʉ̃ mebẽã ʉ̃rʉra. Maʉ̃ kʼarea mʉ̃ra doba senti ẽ basi». Adewara mebẽã wẽrã abaʉba jarasi: «Mʉ̃ wau Jeowa odeba ãĩ wãsidera, mʉ̃ neũdukʼawuarabara mʉ̃ra mejãcha so zarea diasida. Ʉ̃kʉrʉba jarapanasi ãyara kʼawua ẽ basita kʼãrẽ bedʼea jaraira. Mawũẽ edaʉde zokʼa bʉepanasi kartata mawũã e bʉrʉ ãyira mʉ̃me ãba jẽgapanasi. Ãya mawũã odaba mejãcha so zarea diasi mʉ̃ra».

16. Jarada mebẽrãba sãwũã kʼarebaseabʉta.

¹⁶ Dayirãbara badua kʼarebapanaibara mebẽrã ãyidebemata Jeowa ode ãĩ erbʉra. Ãyara idira audre nesidanʉmʉ baera bʉa kʼarebamarẽã akʉza kãgata ũdubimarẽã (Heb. 10:24, 25). Edaʉde, ʉ̃kʉrʉ mebẽrã ãyidebemata Jeowa odeba ãĩdogodera, krĩchapanʉ wuabemarabida ãyira abarika akʉdogota, ãyisida abarika ãĩ wãna kĩrãkʼa Jeowa odeba. Dayirãbara kãgada ẽ ãya mawũã krĩchadaira. So zarea diadaibara warrara ãyi yibarira Jeowa odeba ãĩ wãnarãra. María kimabara amaesi iyita, wũãwũãrata akʉza Jeowasida, iya jarabʉ: «Ʉ̃kʉrʉ mʉ̃ neũdukʼawuarãra zesi mʉ̃ deidu, kʼareba neoita akʉza ãba Daizeze Bedʼea kʼawuadaita. Ãyisida sopʉasi mʉ̃ sopʉabʉ kĩrãkʼa. Mʉ̃ ʉ̃rʉ imitia bedʼeasidadera ãyira mʉ̃are bedʼeasi. Ãya mejãcha so zarea diasida mʉ̃ra» (Rom. 12:13, 15).

17. ¿Kʼãrẽta oseapanʉ zõrãrãbara kʼarebaita yi zʉbʉriapanʉrãra?

¹⁷ Zõrãrã, marabara jʉrʉidua maʉ̃ra mebẽrã sãwũã so zarea diaita. Marabara kʼarebadaibara naʉ̃ra mebẽrã ãyidebemaba Jeowa o amaenara (1 Tes. 5:14). Ãyirabawara bedʼeara ãba yi jʉrei nãã akʉza tẽãbida. Ãyi deidu akʉ wãra akʉza badua yiwidʼibara ãyibawara. Ãyibawara jaradia wãra akʉza trʉ̃ra bʉ deda bʉ mebẽrãbawara ãba Daizeze Bedʼea ʉ̃rʉ kʼawuadaita. Zõrãrãbara so zarea diadaibara yi arigʉ zʉbʉriapanʉrãra. Kãgata ũdubibara akʉza ãyi ʉ̃rʉ krĩchabʉta, kʼarebaibara ãya nesidabʉdade (1 Tes. 2:7, 8).

PAERÃRA AKɄZA SOIBɄBA ĨJÃRA JEOWA Ʉ̃RɄ

18. 2 Pedro 3:9ba jarabʉdebara, ¿kʼãrẽta kãgabʉ Jeowabara iyi odeba ãĩ wãna ʉ̃rʉra?

¹⁸ Jeowabara «kãgaba jʉ̃ãbʉ maraba kayirua obʉta jẽda krĩchamarẽã mawũã bei ẽ baita» (akʉra 2 Pedro 3:9). Ẽbẽraba Jeowa nãã nekayirua osimina, Jeowabara akʉbʉ iyi bebʉra yibiata iyi neũdukʼawua ẽ mina. Jeowabara iyi warra audre kãgabʉta diasi dayirã aba abakaʉ kʼarea. Jeowabara kʼarebabʉ ẽbẽrarã iyi odeba ãĩbʉra jẽda zedamarẽã iyima iya kãgabʉ baera. Jeowabara kãgabʉ naʉ̃ra ẽbẽrabara krĩchadamarẽã iyima zeita jẽda. Jeowaba mawũã kãgabʉra ũduseapanʉ Jesuba warra plata gastada ʉ̃rʉ nebʉraside (Luc. 15:11-32). Ẽbẽra mejãchaʉta Jeowa odeba ãĩ wãnara, jẽda zesida iyi Zeze ʉ̃tʉbemama, adewara kongregasionʼra sobiabʉ ãyira jẽda zesi baera. Elizabethra, mejãcha sobiasi iyi wũãwũã jẽda Jeowa ode zesidera. Iya jarasi: «Mʉ̃ara mejãcha biga diabʉ mebẽrã mʉ̃ kʼarebadarãra, ãya kʼarebasi baera mʉ̃ pae ẽ baita».

19. ¿Kʼãrẽa idubʉ ẽ baibara Jeowa ʉ̃rʉ ĩjãpanʉra?

¹⁹ Ewari jõmaʉ̃nẽ ĩjãpanadrʉ Jeowa ʉ̃rʉ. Akʉza kʼawuapanadrʉ Jeowaba ũrãgʼa diabʉbara dayirãra zʉbʉriabika bʼaita. Jeowara zeze bia kĩrãkʼabʉ baera dayirãra so borekea akʉbʉ akʉza nebiasida ũdubibʉ iyi odepanʉrãra. Biʼia kʼawuabara Jeowabara bʉra amae ẽ baita bedʼea zroma erbʉde akʉza zʉbʉriade berabarinʉmʉnebida (Heb. 13:5, 6). Mark, nããra bedʼeadabara parrapo 12de, jarasi: «Jeowabara daira amae ẽ basi, Jeowara wawarabʉ ẽ dayirã bedʼea zroma erbʉdera». Daizezebara zarea diayi iyideba zebʉdebemata (2 Cor. 4:7). Dayirãra kʼẽrẽpa baseabʉ dayi mebẽrãnebema abaʉba Jeowa o amaebʉrʉdera.