Reperensia Karta nekʼawuabari Bʼaita Kristianora kĩrãkʼa akʉza Trajaita Daizezeita
© 2023 Watch Tower Bible and Tract Society of Pennsylvania
6-12 NOVIEMBREBAYEDA
BEDʼEA BIA DAIZEZE BEDʼEADE ŨDUDATA | JOB 13, 14
«Ẽbẽra abaʉta beira, ¿jẽda piradrʉseabʉka?»
w99-S 15/10 3 parr. 1-3
Jʉrʉnʉmʉ sãwũã ewari jõmaʉ̃nẽ bʼaita
DÃÃRABA naʉ̃ bedʼea jaradapeadara dayirã bebʉra dããraba ẽãta, ẽbẽra mejãchaʉba mawũã krĩchapanʉ. Ẽbẽrarãra zõna bakĩrã ẽ, mia beikĩrã ẽ. Maʉ̃ba mejãchaʉdeba jʉrʉ zebʉda sãwũã ãyi beika bʼaita.
Nawedara ẽbẽrarãbara nei kopanasi akʉza nei opanasi doita, mawũã ewari jõmaʉ̃nẽ warrara bʼaita, mawũã ẽ bʉrʉ beika bʼaita. Akʉza chinora nawedabemarabara krĩchapanasi ãyi beika bʼaira nekʼãrẽ ʉ̃rʉ biʼia krĩchaibarabasita, ejersisio oibarabarabasita bia iñabaita akʉza bia nekoibarabasita.
Juan Ponce de León Españanebemata, ẽbẽrarãba ũdukaʉde sãwũã ewari jõmaʉ̃nẽ warrara bʼaita jʉrʉbasi baera. Mamina iya mawũã nekʼãrẽ obadadebara ũdu ẽ basi ewari jõmaʉ̃nẽ bʼaita.
w15-S 15/4 32 parr. 1, 2
¿Bakuru tʉdapeadara jẽda pawãraseabʉka?
BAKURU olibora bania neẽmaebida baseabʉ. Bʉ olibo bakuru 1.000 poaga audrebʉta. Naʉ̃ bakurura tʉbʉepanʉmina jẽda pawãraseabʉ karra zromachu baera. Yi karrata bei ẽ bʉrʉ iyira jẽda pawãraseabʉ.
Jobʼba kʼawuabasi iyita beira jẽda piradrʉita (Job 14:13-15). Iya bakuru olibo ʉ̃rʉ krĩchasibaibara naʉ̃ bedʼea jaraside: «Bakurubida nebiata jʉ̃ãbʉ. Iyira tʉbʉedaimina jẽda pawãraseabʉ». Poaga zeda tẽã kue zebʉrʉdera olibo bakuru tʉbʉedara jẽda pawãraseabʉ, iyi karradeba juwa jiwinirata pawãrabʉ baera (Job 14:7-9).
w11-S 1/3 22 parr. 5
«Bʉa odara mejãcha kãgayi»
Naʉ̃ba nebiata jaradiabʉ dayirã: Jeowaba mejãcha kãga ẽbẽrarã Jobʼde kĩrãkʼa, iyaʼa yi jaradiabipanʉrata, mawũã ẽbẽra bia bʼaita (Isaías 64:8). Iyara mejãcha kãga ẽbẽrarã iyi ode kʼẽrẽpapanʉrãra akʉza iyi ode kʼẽrẽpapanʉ beidarasida arigʉ kãga. Naʉ̃ testode ũdubʉ bedʼea ebreodeba zebʉta: «Mejãcha kãgayi», yumakẽrã abaʉba maʉ̃ ʉ̃rʉ naʉ̃ta jara ũrĩbibʉ: «Naʉ̃ bedʼeabara ũdubibʉ dayi sopʉabʉde kĩrãbebʉta nei aduadata akʉza maʉ̃ta jẽda ũdukĩrãbʉta». Abarika Jeowabara bari jẽda kĩrãbebʉ ẽ iyi ode kʼẽrẽpabʉ beidarãra, awuarabʉrʉ iyira sopʉabʉ akʉza kãgabʉ maʉ̃ra ẽbẽrarã jẽda zokʼai ũduita.
Jʉrʉda nekʼãrẽ biʼiabʉta Daizezedebemata
it-1-S 461
Itarra
Edaʉde bedʼea itarrara zokʼapanasi ũdubita nekʼãrẽ zeri ẽãta. Abrahánbara kʼawuasi iyira Jeowa nããra egoro akʉza itarra oma kĩrãkʼabʉta (Gé 18:27; adewara akʉra Isa 44:20; Job 30:19), Jobʼba jarasi iyi neũdukʼawuara apanʉraba bedʼea jarabʉra itarra kĩrãkʼabʉta (Job 13:12.)
13-19 NOVIEMBREBAYEDA
BEDʼEA BIA DAIZEZE BEDʼEADE ŨDUDATA | JOB 15-17
«Elifaz yizaba ũdubibʉ kʼãrẽta oẽ baibarata awurua so zarea diabʉrʉde»
w05-S 15/9 26 parr. 4, 5
Zarea odadrʉ ãña krĩcha ẽ baita
Elifazba iya bedʼea ũbea jaradade ũdubisi Daizezeitara iyi odepanʉraba nekʼãrẽ obʉra kʼãrẽ ẽãta. «Akʉra, iyara ĩjã ẽ iyi nezokʼara ʉ̃rʉ akʉza jarabʉ iyi angelerabara kayirua obʉta» (Job 4:18, nota; Job 15:15; Job 22:3). Bildadba abarika krĩchabasi (Job 25:5).
Dayirãra jʉra kʼawuapanaibara mawũã krĩcha ẽ baita, naʉ̃ba oseabʉ baera daya krĩchamarẽã Daizeze sobiabira nekʼãrẽ mejãcha oibarata. Maʉ̃bara dayi Jeowaʉ̃me yi neũdukʼawuabʉta ãrĩbiseabʉ baera. Adewara dayirãta maʉ̃ kĩrãkʼa krĩchabʉbʉrʉ, dayirãʼa ũrãgʼa diabʉrʉdera ¿kʼãrẽta oi? Dayirãʼa ũrãgʼa diabʉdata soiduba ũrĩ kaude, dayirã sode kĩrʉ baseabʉ Jeowaʉ̃me akʉza iyi ʉ̃rʉ aña krĩchaseabʉ (Proverbios 19:3). Maʉ̃ba tẽã Jeowadeba jĩga wãseabʉ.
w15-S 15/2 9 parr. 16
Edabʉta akʉza so zʉbʉria akʉbʉta ũdubidadrʉ Jesude kĩrãkʼa
16 Dayirã sãwũã bedʼeabʉta. Dayirãba wuabemara so zʉbʉria akʉbʉba kʼarebayi so zarea diaita yi krĩcha opanʉra (1 Tes. 5:14). ¿Sãwũã so zarea diaseapanʉ yi sopʉapanʉrãra? Ãyaʼa jaraseapanʉ kʼãrẽaba krĩchapanʉta ãyi ʉ̃rʉ akʉza biga diaseapanʉ nekʼãrẽ bia ãya opanʉ kʼarea, adewara kĩrãbebiseapanʉ Jeowabara ãyira mejãcha kãgata, iya yi warrata idu yi orrabibʉ baera (Juan 6:44). Adewara ãyaʼa kʼawuabidaibara Jeowabara krĩchabʉta yi sopʉapanʉrãra akʉza yi kʼãrẽ ẽ kĩrãkʼa krĩchapanʉrãra (Sal. 34:18). Dayirãba bedʼea bia jarabʉba so zarea diabʉ yi ẽbẽrarã sopʉapanʉrata (Prov. 16:24).
Jʉrʉda nekʼãrẽ biʼiabʉta Daizezedebemata
w06-S 15/3 14 parr. 11
Bedʼea audre yibiata Jobdebemata
7:9, 10; 10:21; 16:22. ¿Naʉ̃ra bedʼeaba jarakĩrãbasika Jobʼbara ẽbẽrarã jẽda piradrʉi ʉ̃rʉra ĩjã ẽ basita? Naʉ̃ra bedʼeabara ũdubikĩrãbʉ Jobta beisibʉrʉ, maʉ̃ ewaride kʼãrẽta berabaribasita. ¿Kãrẽta jarakĩrãbasi naʉ̃ba? Iyara jarakĩrãbasibaibara iyita beira ẽbẽrarã iyi ewaridebemabara wua ũdu ẽ baibasita. Akʉza ãyimara iyira wua jẽda ze ẽ baibasita. Mawũã ẽ bʉrʉ Jobʼba jara ũrĩbikĩrãbasibaibara bewãrã dedebara, iyira iyidobara jẽda zebe ẽãta. Job 14:13-15 bayeda ũdubibʉ Jobʼbara wãrĩnu ĩjãbasita ẽbẽrarã ʉ̃ra zeide jẽda piradrʉi ʉ̃rʉra.
20-26 NOVIEMBREBAYEDA
BEDʼEA BIA DAIZEZE BEDʼEADE ŨDUDATA | JOB 18, 19
«Mebẽrã kongregasionebemata doba amaerãra»
Kʼãrẽta kʼawuapanʉ Jesu jẽgadadeba
9 Bʉa kʼarebaseabʉ yi mebẽrã beida kʼarea zʉbʉriabʉra. Jesura mawũã bari jẽga ẽ basi María akʉza Martaʉ̃me, awuarabʉrʉ biʼia ũrĩsi adewara bedʼea biata jarasi ãyaʼa so zarea diaita. Dayirãbida abarika kʼarebaseabʉ yi mebẽã beida kʼarea zʉbʉriabʉta. Mebẽã Dan, Australiadebemaba naʉ̃ta jarasi: «Mʉ̃ kima beisidera, mebẽrã kongregasionebemaba mʉ̃ta akʉsida, mʉ̃ jẽgabasidera ãya mitia akʉ ẽ basi, awarabʉrʉ bedʼea biata jarasida mʉ̃a so zarea diaita. Adewara mʉ̃ kʼãrẽ oamabʉde mebẽrãba kʼarebabasi, mʉ̃ karro zʉgʉita, ne edaita akʉza neoita. Adewara mʉ̃me ãba yiwidʼipanasi, ãyira mʉ̃ zʉbʉriabʉde mʉ̃ mebẽãara kĩrãkʼabasi» (Prov. 17:17).
Dayirã mebẽrãnebemaba Jeowa o idubʉbʉrʉde
16 Dayirãbara badua kʼarebapanaibara mebẽrã ãyidebemata Jeowa ode ãĩ erbʉra. Ãyara idira audre nesidanʉmʉ baera bʉa kʼarebamarẽã akʉza kãgata ũdubimarẽã (Heb. 10:24, 25). Edaʉde, ʉ̃kʉrʉ mebẽrã ãyidebemata Jeowa odeba ãĩdogodera, krĩchapanʉ wuabemarabida ãyira abarika akʉdogota, ãyisida abarika ãĩ wãna kĩrãkʼa Jeowa odeba. Dayirãbara kãgada ẽ ãya mawũã krĩchadaira. So zarea diadaibara warrara ãyi yibarira Jeowa odeba ãĩ wãnarãra. María kimabara amaesi iyita, wũãwũãrata akʉza Jeowasida, iya jarabʉ: «Ʉ̃kʉrʉ mʉ̃ neũdukʼawuarãra zesi mʉ̃ deidu, kʼareba neoita akʉza ãba Daizeze Bedʼea kʼawuadaita. Ãyisida sopʉasi mʉ̃ sopʉabʉ kĩrãkʼa. Mʉ̃ ʉ̃rʉ imitia bedʼeasidadera ãyira mʉ̃are bedʼeasi. Ãya mejãcha so zarea diasida mʉ̃ra» (Rom. 12:13, 15).
w90-S 1/9 22 parr. 20
¿Bʉa jʉrʉbʉka Jeowaita audre trajaita?
20 Zõrãrãba kʼawuaibara mebẽãta wua zõrãrã ẽ bʉrʉ akʉza zõrãrã kʼarebabari ẽ bʉrʉ, maʉ̃ra kʼareba nesidabʉta krĩcha obʉ baera. Maʉ̃ mebẽãta pribilegio aduasibʉrʉ mamina Jeowa odeba ãĩ wã ẽ basibʉrʉ, akʉza maʉ̃ta zõrãrãba kʼawuadara krĩcha obʉta, maʉ̃ mebẽã kãgaba zõrãrãbara so zarea diadaibara. (1 Tesalonicenses 5:14.) Zõrãrãba jara ũrĩbidaibara kongregasionba nesidabʉta iyira. Maʉ̃ mebẽãta ũrãgasidabʉsida iyita eda krĩchabʉbʉrʉ, ewari dããrã berabari ẽ mina jẽda pribilegio baraseabʉ.
Jʉrʉda nekʼãrẽ biʼiabʉta Daizezedebemata
w94-S 1/10 32
Ibiade bedʼeabʉra jipa yibia
Job zʉbʉriabasidera iyi neũdukʼawuara apanʉrabara bedʼea biata jarada ẽ basi, awuarabʉrʉ jarasida Jobʼra zʉbʉria berabarinʉmʉta iya nemitiata osi baera. (Job 4:8.) Iyi neũdukʼawuara apanʉraba jarabada kʼarea Job mejãcha krĩcha osi baera, maʉ̃ kʼarea Jobʼba ãyaʼa jarasi sõbeda maraba mara bedʼeaba zʉbʉria obara bʼai mʉ̃ra. (Job 19:2.)
Jʉra kʼawuabaibara dayirã mebẽrã ʉ̃rʉ imitia bedʼea ẽ baita. Mawũã dayi mebẽrãta sopʉa yiwidʼi ẽ marẽã Jeowaʼa daya jarada kʼarea. (Naʉ̃ testoʉ̃me akʉra Deuteronomio 24:15). Daizeze Bedʼeaba jarabʉ: «Daya nekʼãrẽ jarabʉdeba beibibʉ, mawũã ẽ bʉrʉ babibʉ. Yi iyi bedʼea bia zokʼabʉra nebiata ũduyi» (Proverbios 18:21).
27 NOVIEMBREDEBA- 3 DICIEMBRE EDA
BEDʼEA BIA DAIZEZE BEDʼEADE ŨDUDATA | JOB 20, 21
«Plata mejãcha erbʉba jarakĩrãbʉ ẽ jõma aripe obʉta»
w07-S 1/8 29 parr. 12
¿Dayirãbara Daizeze dabʉ nããra nemejãcha erbʉka?
12 Jesuba iyi nebʉra jõbodode jarasi nemejãcha erbaita Daizeze dabʉ daidu, mawũã ẽ bʉrʉ nemejãcha erbaita dayita. Iya jarakĩrãbasi dayirã mejãcha krĩchada ẽ marẽã daya nebia erbai ʉ̃rʉbʉrʉ. Awuarabʉrʉ, dayirãba nekʼãrẽ erbʉra zokʼaibara Jeowa kʼawa bʼaita. Maʉ̃ta obʉbʉrʉ Jeowa dabʉ nãã nemejãcha barabʉ kĩrãkʼabayi. ¿Kʼãrẽã? Mawũã obʉbʉrʉ Jeowaba dayirã diayi nebiata. Daizeze Bedʼeaba jarabʉ: «Daizeze nebiaba mejãcha nekʼãrẽ nebiata ũdubibʉ akʉza iyideba nekʼãrẽ pʉara we ẽ» (Proverbios 10:22).
Jʉrʉda nekʼãrẽ biʼiabʉta Daizezedebemata
w95-S 1/1 9 parr. 19
Yi edebirãra Diaruaʼa akʉza iya nekʼãrẽ obʉa
19 Diaruba zokʼasi Zofarta akʉza Elifazta bedʼea mitiata jaramarẽã Jobʼa. Jobʼra mejãcha zarea osi maʉ̃ bedʼea mitia yi edebi ẽ baita. (Job 4:13-18; 20:2, 3.) Maʉ̃neba, Jobʼra mejãcha krĩcha obasi akʉza aña bedʼeasi. (Job 6:2-4; 30:15, 16.) Elihúba chupea ũrĩsi iyi bedʼeara akʉza kʼarebasi pikãga krĩchamarẽã Jeowaba sãwũã krĩchabʉta. Maʉ̃ kĩrãkʼa zõrãrãba kĩrãkita ũrĩbara yi krĩcha onʉmʉ bedʼeara, mawũã awuru bedʼeata jara ẽ baibara iyi aʉdre krĩcha oẽ bamarẽã. Mawũã, Elihúde kĩrãkʼa pikãga ũrĩbʉ akʉza zarea diabʉ Daizeze Bedʼeadeba (Job 33:1-3, 7; Santiago 5:13-15.) Maʉ̃ba mebẽãta krĩcha zroma ozebʉrʉ, iya bedʼea zroma ũdubʉ kʼarea, kʼareba ũduseabʉ Daizeze Bedʼeade akʉza kongregasione. (Job 7:14; Santiago 4:7.)
4-10 DICIEMBREBAYEDA
BEDʼEA BIA DAIZEZE BEDʼEADE ŨDUDATA | JOB 22-24
«¿Yumakẽrã Daizezeitara iya kʼawuaita yibiaka?»
w05-S 15/9 27 parr. 1-3
Zarea odrʉ nemitia krĩcha ẽ baita
Mejãchaʉba krĩchapanʉ Daizezeba jarabʉra zareta. Maʉ̃ba krĩchapanʉ dayirãra zeri ẽãta Daizezeitara. Elifazba widisi yumakẽrãra yibia kʼawuaita Daizezeitara (Job 22:2). Bildadbida abarika krĩchabasi, iya jarasi mia abaʉta biga ẽãta Daizeze dabʉ daidura (Job 25:4). Mawũẽra, ãya mawũã jaradapeadadeba Jobsida ẽbẽra baera krĩchasi Jeowaitara iyisida zeri ẽãta.
Idi ewade ẽbẽra mejãchaʉba krĩchapanʉ ãyira zeri ẽãta. Mawũã krĩchabʉbaibara iyi sãwũã dapʉẽnapeadadeba, mawũã ẽ bʉrʉ iyi bebʉde kʼãrẽ berabaribʉdeba, mawũã ẽ bʉrʉ iyi samabema jarapanʉneba. Mamina krĩchaibara Diaruba akʉza iyi kaidubemaraba kãgabʉta ẽbẽrarãba krĩchadamarẽã ãyira zeri ẽãta. Diaruba ẽbẽrarãta krĩchabira Daizezeita zeri ẽãta, maʉ̃ba Daizezedeba jĩga babiseabʉ (Hebreos 2:1; 3:12).
Zõnãbasi baera akʉza kayabʉ baera krĩchaseabʉ zeri ẽãta, daya warraraenaʉba obada kĩrãkʼa obʉ ẽ baera. Diaruba kãgabʉ dayirã mawũã krĩchadamarẽã. Mamina zarea oibara maʉ̃ krĩcha yi edebi ẽ baita.
w95-S 15/2 27 parr. 6
Yiza bedʼea zroma sãwũã ara oita
Job neũdukʼawua apanʉrabara Jobʼra zʉbʉriabisida, jarasida baera ãyi krĩchadeba Daizeze Bedʼeadeba jarai kaude. Elifazba jarasi Jeowaba ĩjã ẽãta iyi nezokʼara ʉ̃rʉ akʉza krĩcha ẽãta Jobʼra ẽbẽra biata, mawũã ẽ bʉrʉ ẽbẽra bia ẽãta. (Job 4:18; 22:2, 3.) Maʉ̃ bedʼeara jipa sewidabasi. Maʉ̃ kʼarea Jeowaba kẽãsi Elifazta akʉza iyibawara pananata, iyi ʉ̃rʉ sewidata jarasi baera. Jeowaba jarasi: «Marabara mʉ̃ ʉ̃rʉ wãrĩnuta jara ẽ basi» (Job 42:7).
w03-S 15/4 14, 15 parr. 10-12
Warrara Jeowa so sobiabibʉta
10 Daizeze Bedʼeaba jarabʉdebara, Diarubara maʉ̃ra Job abapaiabʉrʉ mawũã jara ẽ basi, awuarabʉrʉ jarasi ẽbẽrarã naʉ̃ drʉadebema Daizezeare kʼẽrẽpa babe ẽãta. Iya naʉ̃ta jarasi ẽbẽrarã jõmaʉ̃ ʉ̃rʉ: «Yumakẽrãba jõma erbʉra iyi bebʉbari diayi» (Job 2:4). ¿Bʉa kʼawuabʉka kʼãrẽa yibiata kʼẽrẽpa bʼaita? Proverbios 27:11ba jarabʉ buru bia bamarẽã, mawũã Jeowaba erbamarẽã iyi ʉ̃rʉ imitia bedʼeabʉrʉde sãwũã panʉita. Jeowaba trʉ̃bʉ kʼarebamarẽã Diaru bedʼea panʉita, maʉ̃ oira jipade yibia. ¿Oseabʉka Jeowaba bʉaʼa omarẽã jarabʉra? Oseabʉ, Jobʼba osi akʉza Jesubida osi akʉza Daizeze ode kʼẽrẽpapanʉra bioʉba mawũã ozebʉda (Job 2:9, 10; Filipenses 2:8; Revelación 6:9). Mamina yi sewabirãra: kĩrãbera bʉa kʼãrẽ obʉdeba ũdubiyi kʼaiarebʉta, Diaruare mawũã ẽ bʉrʉ Jeoware, ¿saʉ̃ta jidai bʉara?
Jeowabara krĩchabʉ bʉ ʉ̃rʉ
11 ¿Wãrĩnu akʉbʉka Jeowaba bʉa kʼãrẽ oita jidabʉra? Ewari mejãcha berabaribʉrʉde ẽbẽrarãba ũdubi zebʉda Jeoware kʼẽrẽpapanʉta. Mawũã ũdubibʉ Diarura sewidata. Mamina, Jeowaba kãgabʉ iyiare panamarẽã, iyara dayirã krĩchabʉ baera. Jesuba jarasi: «Aramaʉ̃ kĩrãkʼa marã Zeze ʉ̃tre bʼʉbara krĩña ẽã iabʼa aduaira za wĩka kedʼeta» (Mateo 18:14).
12 Bʉa nekʼãrẽ jidabʉra Jeowaba akʉbʉ. Maʉ̃neba iyita sobiabibʉ baera, mawũã ẽ bʉrʉ so kayiruabibʉ baera. Daizeze Bedʼeaba jarabʉ israelitarabara nemitia oda ʉ̃rʉ obasita, maʉ̃ba Jeowara sopʉabasi (Salmo 78:40, 41). Jeowaba kue zroma naʉ̃ drʉa jõmaʉ̃nẽ wei nãã: «Jeowabara ũdusi naʉ̃ drʉara ẽbẽrã kayiruaraba wuabʉrʉ bira wãta, [...]. Maʉ̃ kʼarea sopʉabasi» (Génesis 6:5, 6). Krĩchara naʉ̃ta, bʉa nemitiata ora, Jeowata sopʉabiseabʉ. Maʉ̃ba jarakĩrãbʉ ẽ Jeowara zowaĩnĩgʉa ẽãta, awuarabʉrʉ ũdubikĩrãbʉ iya dayirãra kãgata akʉza dayirã ʉ̃rʉ krĩchabʉta. Dayirãba nebia obʉrʉdera Jeowara sobiabʉ. Iyira sobiabʉ erbʉ baera Diaruʼa sãwũã panʉita, adewara sobiabʉ dayirãba nebia obʉ kʼarea nebiata diakĩrãbʉ baera (Hebreos 11:6). Jeowara jipade zeze bia.
Jʉrʉda nekʼãrẽ biʼiabʉta Daizezedebemata
w04-S 15/7 21 parr. 7, 8
Krĩchara Jeowaita kʼãrẽta audre oseabʉta mawũã iyi ʉ̃rʉ ibia bedʼeabita
Jeowaba naʉ̃ drʉa parãside akʉza nekʼãrẽ naʉ̃ drʉadebʉ jõma parãside, iya kãgabʉ kĩrãkʼa, maʉ̃ne naʉ̃ta jarasi: «Zesi kewaradebemata akʉza diapedadebemata» (Génesis 1:5, 8, 13, 19, 23, 31). Iya nekʼãrẽ ojʉ̃drʉi nããra biʼia kʼawuabasi kʼãrẽta oita. Mõbe maʉ̃ra jõma aripe obasi (Revelación [Apocalipsis] 4:11). Jobʼba jarasi Jeowaba nekʼãrẽ oita krĩchabʉra jõma obʉta (Job 23:13). Jeowaba ũduside iya nekʼãrẽ jõma odata mejãcha sobiasi ũdusi baera maʉ̃ra yibiabasita (Génesis 1:31).
Dayirãba nekʼãrẽta oita krĩchabʉbʉrʉ, maʉ̃ra okĩrã oibara. ¿Kʼãrẽba kʼarebai nekʼãrẽ okĩrã oita? Naʉ̃ ẽjũã Jeowaba parãi nããra, kʼãrẽ neẽbasi akʉza bia ba ẽ basi. Mawũãsidu Jeowabara ũdubasi iya parãbʉrʉde sãwũã biʼia ũdu bʼaibasita akʉza naʉ̃ba iyi ʉ̃rʉ sãwũã ibia bedʼeabibasita. Abarika dayirãba nei oita krĩchabʉta okĩrã oira, biʼia krĩchaibara kʼãrẽ nebiata oita naʉ̃ jõma obʉrʉde. Abarika berabarisi Tonyta, iyira 19 poagabʉ. Iya Betel Europadebemata akʉ jʉ̃ẽsi, maʉ̃ ewaride iya nekʼãrẽ ũdudara kĩrãdua ẽ basi. Akʉza iyikʉza widibasi sãwũã bʼaita dayita mama edabʉbʉrʉ. Maʉ̃ kʼarea zarea osi iyisida mainʉ jʉ̃ẽita. Maʉ̃ba mejãcha sobiasi poaga berabarida tẽã iyi Betel wãita trʉ̃sidade.
11-17 DICIEMBREBAYEDA
BEDʼEA BIA DAIZEZE BEDʼEADE ŨDUDATA | JOB 25-27
«Kʼẽrẽpa bʼaiba jarakĩrãbʉ ẽ kayirua okata»
it-1-S 1243 parr. 4
Kʼẽrẽpa bʼaita
Job. Jobʼra Moisés ewaridebasibaibara, iyira kʼẽrẽpabasi, dauchabasi akʉza Jeowaʉ̃me kʼẽrẽpabasi. (Job 1:1; véase JOB.) Jeowara iyi angelerabawara ãba yi jʉrebasi, maʉ̃ne Diaruta jʉ̃ẽsi mainʉ, maʉ̃ne Jeowaba Diaruʼa wididaba ũdubisi Jeowaitara yibiata ẽbẽrarã iyiare kʼẽrẽpa bʼaira. Diaruba jarabʉ baera dayirãra kʼẽrẽpa babe ẽãta Jeoware. Diarubara jarasi Jobʼra Daizezeare kʼẽrẽpabʉta Daizezeba iyaʼa nebiata diabʉ baera, maʉ̃neba ũdubikĩrãbasi Jobʼra soiduba kʼẽrẽpa ba ẽ basita. Jeowaba iduaribisimina Diaruba Job wũãwũãrata akʉza iya nekʼãrẽ jõma erbʉta jãrĩmarẽã, naʉ̃ba oẽbasi Job Jeoware kʼẽrẽpabʉta idubʉmarẽã. (Job 1:6-2:3.) Diaruba jarasi Jobʼra Jeowaʉ̃me kʼẽrẽpa bʼaita iya nekʼãrẽ aduasimina akʉza iyi wũãwũãrasida aduasimina, mamina iyita zʉbʉria odara Jobʼra kʼẽrẽpa ba ẽ baita. (Job 2:4, 5.) Maʉ̃neba ʉ̃ta, Jobʼra mejãcha kayasi, akʉza yi kimabida iyaʼa jarasi wua kʼẽrẽpa ba ẽ marẽã. Adewara iyi neũdukʼawuara apanʉrabida iyi ʉ̃rʉ imitia bedʼeapanasi (Job 2:6-13; 22:1, 5-11.) Jobʼba jarasi iyi bei ẽ nããra, Jeowaʉ̃me kʼẽrẽpa bʼaita akʉza iya kʼẽrẽpa bʼaita jidasi baera maʉ̃ta idubʉ ẽ baita (Job 27:5, 6.) Job mawũã kʼẽrẽpabʉba ũdubisi Diarura sewa nebʉrʉ omiata.
w19.02-S 2, 3 parr. 3-5
Kʼẽrẽpapanadrʉ
3 Kʼẽrẽpabaibara jarakĩrãbʉ Jeowata kãgaita akʉza iya kãgabʉta oita. Daizeze Bedʼeade kʼẽrẽpa bʼai jarabʉbara jarakĩrãbʉ nekʼãrẽ jõma dauchabʉta kʼãrẽ kayirua neẽãbʉta. Bari jaraita, israelitara ewaribaside leyba jarabasi ãya nẽdʉwʉrʉta sakripisiode diaibʉrʉ, maʉ̃ra neneẽã baibarabasita (Lev. 22:21, 22). Ãya nẽdʉwʉrʉ sakripisio diabʉrʉdera naʉ̃ nẽdʉwʉrʉra nekʼãrẽ wae ẽ baibarabasi, mia jĩrʉta, mia kʉwʉrʉta, mia dabʉta, mawũã ẽ bʉrʉ kaya ba ẽ baibarabasi. Jeowaitara jipade yibiabasi naʉ̃ra nẽdʉwʉrʉra neneẽã baira (Mal. 1:6-9). ¿Kʼãrẽa kãgabʉ Jeowaba dayirãba iyaʼa nekʼãrẽ diabʉra neneẽã bamarẽã? Maʉ̃ biʼia ũrĩta krĩchadaya naʉ̃ yizata. Dayirãba neta aba edabʉrʉdera, kãgapanʉ naʉ̃ netara neneẽã bamarẽã, mia berawachua ẽ marẽã jʉ̃zabare, mia zobe zobekachua ẽ marẽã. Abarikabʉ dayirãba sãwũã kãgabʉta akʉza iyiare sãwũã kʼẽrẽpabʉta, iyara kãgabʉ jõma neneẽã omarẽã.
4 Dayirãba kʼawuapanʉ dayirãra kayirua omiata akʉza nekʼãrẽ aña opanʉta. Maʉ̃ba dayirãkʉza widiseabʉ: «Daizezeare kʼẽrẽpa bʼaira ¿kayirua okabaibaraka?». Mawũã ẽ. Akʉdaya bedʼea ũme. Nããra, Jeowabara dayirãba kʼãrẽ kayirua obʉ awa akʉbʉ ẽ. Iyi Bedʼeaba jarabʉ: «Nekayirua owãta bʉa bʉ wãra, Jeowa, ¿kʼaitrʉ piradrʉ baipe?» (Sal. 130:3). Iyara kʼawuabʉ dayirãra kayirua omiarata, maʉ̃ba kĩrãduabʉ dayirã kayiruara (Sal. 86:5). Yi ũmeta, Jeowabara kʼawuabʉ dayirãba nekʼãrẽ sainʉ oseabʉta akʉza iya jʉ̃ã ẽ dayirãba oseabʉde wueta omarẽãra (akʉra Salmo 103:12-14). Mawũẽra, ¿kʼãrẽta odaibara Jeowa dabʉ nãã neneẽã baita?
5 Dayirã neneẽã baira kãgata ũdubibara. Dayirãba bedʼea zroma mejãcha ũdubʉmina Jeowata idubʉda ẽ bʉrʉ, naʉ̃ba ũdubibʉ iyiare kʼẽrẽpapanʉta (1 Crón. 28:9; Mat. 22:37). Krĩchadaya naʉ̃ra yizara ũbea ʉ̃rʉ. Wẽrã zake aba kolegiode masekĩrã ẽ. Kʉ̃ra abaʉba Daizeze bedʼea jaradiabʉta pera ẽã okĩrãbʉ. Zeze abaʉba iyi trajota aduakĩrã ẽ, mawũãsidu, ¿kʼãrẽã opanʉ ãya maʉ̃ra? Kʼawuapanʉ baera nekʼãrẽ Jeowaba zokʼabʉra aripebʉta akʉza Jeowata sobiabikĩrãpanʉ baera. Ãya Jeowata kãgapanʉ baera nekʼãrẽ oi nãã krĩchapanʉ Jeowaba kʼãrẽta kãgabʉ ʉ̃rʉ. Mawũã ũdubipanʉ Jeoware kʼẽrẽpapanʉta.
Jʉrʉda nekʼãrẽ biʼiabʉta Daizezedebemata
w16.11-S 9 parr. 3
Dayirãra dauchapanʉ Daizeze Bedʼeaba jarabʉta opanʉ baera
3 Nekʼãrẽ naʉ̃ drʉadebʉba ũdubibʉ Jeowabara jõma daucha obʉta akʉza iya naʉ̃ drʉa oside ũdubisi buru bia erbʉta (Prov. 3:19). Daizeze Bedʼeaba jarabʉdera, dayirãbara wiña kʼawuapanʉ Jeowaba nekʼãrẽ parãna ʉ̃rʉra (Job 26:14). Mamina dayirãba Jeowaba nekʼãrẽ parãna ʉ̃rʉ wiña kʼawuapanʉmina, naʉ̃neba ũduseapanʉ Jeowabara nekʼãrẽra jõma daucha erbʉta (Sal. 8:3, 4). Ʉ̃tʉ bajãne bʉ mejãcha chĩdaurata, ãyira jõma dauchabʉ. Chĩdaura kʼãwũã dauchabʉba, ũdubibʉ Jeowa ʉ̃rʉ ibia bedʼeaibarata, iyaʼa yiwidʼibarata akʉza iyiare kʼẽrẽpabaibarata (Sal. 136:1, 5-9).
18-24 DICIEMBREBAYEDA
BEDʼEA BIA DAIZEZE BEDʼEADE ŨDUDATA | JOB 28, 29
«¿Ẽbẽrarãba Job ʉ̃rʉ bia krĩchapanana kĩrãkʼa bia krĩchapanʉka bʉ ʉ̃rʉbida?»
w02-S 15/5 22 parr. 19
Kãga jõkata ũdubidaibara yi kʼãrẽ neẽãpanʉra
19 Nebʉrara Daizeze Bedʼeadebʉba ũdubibʉ kãga jõkara ũdubipanʉta ẽbẽrarã kʼareba nesidabʉra. Abrahánbara Betuel kʼarebata nesidabasi wũãwũãra erbaira. Jacobʼbida José kʼarebata nesidabasi iyi bʉwʉrʉra Canaánʼena ededamarẽã, akʉza Noemíba Rut kʼarebata nesidabasi iyideba zebʉ wũãwũãta erbaita. Mia Abrahánba, mia Jacobʼba, mia Noemíba, ãya kãgabʉra erba ẽ baibasi, awururaba kʼarebada ẽ basibʉrʉ. Abarika berabaribʉ idi ewade, kãga jõkara ũdubipanʉ yi ẽbẽrarã kʼareba nesidapanʉra (Proverbios 19:17). Jobʼbara yi ẽbẽrarã kʼareba nesipanʉrãra kʼarebabasi, abarika dayirãbida iyide kĩrãkʼa kʼarebaibara ẽbẽrarã yi kʼareba nesidapanʉrata (Job 29:12-15).
it-1-S 1225 parr. 10
Wua jʉ̃ĩta
Daizeze Bedʼeaba mejãcha jara ũrĩbibʉ sãwũã wua jʉ̃ĩbara ʉ̃rʉ. Ẽbẽrarãba uniporme jʉ̃bʉba ũdubibʉ ãyi sama estudiabʉta, mawũã ẽ bʉrʉ kʼãrẽne trajabʉta. Edaʉde Daizeze Bedʼeade wua ʉ̃rʉ bedʼeabʉrʉdera jarakĩrãbʉ ẽbẽrarãta kʼaiarebʉta, mawũã ẽ bʉrʉ ãyi sãwũãbʉta. Bari jaraita, Jesuba nei jara ũrĩbita zokʼasi wua juwa jidaidebemata. (Mt 22:11, 12; akʉra PRENDA PARA LA CABEZA; SANDALIA.) Maʉ̃ kʼarea Apocalipsis 16:14, 15de, Jesuba jarasi ʉrʉmabaibarata, mawũã Daizeze ewari zebʉrʉde bei ẽ baita.
w09-S 1/2 15 parr. 3, 4
¿Saʉ̃ bʉ trʉ̃ra?
Dayirã todai nawedara mia abaʉba jida ẽ kʼãrẽ trʉ̃ta erbakĩrãbʉta. Mamina wari wãne jidapanʉ wuabemaraba sãwũã akʉmarẽã kãgapanʉta (Proverbios 20:11). Maʉ̃ kʼarea dayikʉza widibara: «Jesuba mawũã ẽ bʉrʉ iyi kʼaidubemaraba mʉ̃ita trʉ̃ta jʉrʉra ¿saʉ̃ta jʉrʉiba? ¿Saʉ̃ trʉ̃ba ũdubibʉ mʉ̃ wãrĩnu sãwũãbʉta?».
Maʉ̃ ʉ̃rʉ krĩchaira jipade yibia. Nokʼo Salomónba jarasi audre yibiata dayi ʉ̃rʉ ibia bedʼeadamarẽã plata mejãcha erbaira (Proverbios 22:1). Adewara audre yibia Jeowaba dayirã biʼia akʉita, mawũã ewari jõmaʉ̃nẽ nebiata erpanai baera. Jeowaba jarabʉ librode bʉita ẽbẽrarã kʼẽrẽpapanʉra trʉ̃ta, mawũã ãyita kĩrãbeita akʉza ewari jõmaʉ̃nẽ bʼaita diaita (Malaquías 3:16; Apocalipsis 3:5; 20:12-15).
Jʉrʉda nekʼãrẽ biʼiabʉta Daizezedebemata
g00-S 8/7 11 parr. 3
Ipidara, mawũã biabayi
¿Wãrĩnu yibiaka dayi ipidaira? ¿Bʉa kĩrãbebʉka ẽbẽra aba bʉa ipidabʉba bʉ sobiabisita, mawũã ẽ bʉrʉ ẽbẽra aba bʉa ipida ẽ basi baera sopʉabisita? Ipidabʉba kʼarebabʉ yi ipidabʉta akʉza yi ipidabʉ ũdubʉta. Jobʼba iyi nejʉrara ʉ̃rʉ jarabasi, iyi ipidabasidera naʉ̃rabara ĩjã ẽ basita (Job 29:24). Mawũãsidu Jobʼbara iyi ipidabʉra idubʉ ẽ basi.
25-31 DICIEMBREBAYEDA
BEDʼEA BIA DAIZEZE BEDʼEADE ŨDUDATA | JOB 30, 31
«Kʼãrẽta osi Jobʼba nekayirua oẽ baita»
w10-S 15/4 21 parr. 8
Nekayiruata akʉ ẽ baibara
8 Daizeze ode bʉba jarakĩrãbʉ ẽ nekayirua oka bʼaita. Maʉ̃ kʼarea, Daizeze Bedʼeaba jarabʉ jʉra kʼawuabaibarata nekʼãrẽ daya kãgabʉ kʼarea akʉza akʉbʉ kʼarea (1 Cor. 9:25, 27; akʉra 1 Juan 2:15-17). Jobʼba biʼia kʼawuabasi kʼãrẽa yibiata jʉra kʼawua bʼaita nekʼãrẽ daya akʉbʉ kʼarea akʉza kãgabʉ kʼarea (Job 31:1). Jobʼbara kãga ẽ basi awuru yuwẽrã akʉira akʉza mia kʼãrẽsi krĩcha ẽ basi maʉ̃ ʉ̃rʉra. Poaga bio berabarida tẽã, Jesuba jara ũrĩbisi kʼãrẽa yibiata yi kayirua ʉ̃rʉ krĩchabʉ ãĩ bʉeita. Iya jarasi: «Mawũãmina mʉã marãã jaraya, bariduba wũẽrãta erukʼãĩ krĩña akʉra, izhi sodʼe maʉ̃ wũẽrã ũme kʼazhiruata obʉrʉa» (Mat. 5:28).
w08-S 1/9 11 parr. 4
Bia krĩchara bʉa nekʼãrẽ oita jidabʉdeba kʼãrẽta berabariseabʉta
Bʉa nekʼãrẽ oita jidai nãã, naʉ̃ta krĩchaibara: «¿Kʼãrẽta berabari mʉ̃a naʉ̃ta oita jidara?». Edaʉde daya nekʼãrẽ oita jidai nããra biʼia krĩchaibara maʉ̃ obʉrʉba kʼãrẽta berabariseabʉta, mawũã obʉba kʼarebayi zʉbʉria berabari ẽ baita. Yi nekʼãrẽ oi nãã bia krĩcha ẽãbara bedʼea zromata ũduseabʉ, bari jaraita kayaseabʉ sidaba, biogo amabadata biogoseabʉ, wũãwũã urabʉeseabʉ, ãyi mebẽrãʉ̃me aduaʼabadata aduaseabʉ, mawũã ẽ bʉrʉ krĩcha aduʼa ba ẽ bayi. Apostol Pabloba jarasi, ẽbẽrarã ãyi kakua neida obʉrãra Daizeze ẽjũã kĩrãwãreãnẽra eda ba ẽ baita (1 Corintios 6:9, 10).
w10-S 15/11 5, 6 parr. 15, 16
Warrara Daizeze Bedʼea idu yi jaradiabidʉa
15 ¿Bʉitara sõbede zarea baseabʉ Jeowaba zokʼabʉ aripe oira? ¿Bʉ dobabʉde, mawũã ẽ bʉrʉ wuabemarabawara ãbabʉde? Bʉ kolegiodebʉde, mawũã ẽ bʉrʉ trajodebʉdera, jʉra kʼawuabʉ nekʼãrẽ aña oẽ baita. Mamina bʉ aduʼabʉdera jʉra kʼawuaba ẽ bayi nekʼãrẽ aña oẽ baira.
16 Bʉ dobabʉdera, ¿kʼãrẽba kʼarebai ewari jõmaʉ̃nẽ oita Jeowaba zokʼabʉta? Kĩrãbeibara daya nekʼãrẽ obʉba Jeowara sobiabibʉta, mawũã ẽ bʉrʉ sopʉabibʉta (Gén. 6:5, 6; Pro. 27:11). Jeowaba dayirãra mejãcha kãgabʉ, maʉ̃ba dayirãba nekʼãrẽ obʉdeba iyira sobiaseabʉ mawũã ẽ bʉrʉ sopʉa baseabʉ (1 Ped. 5:7). Iyara kãgabʉ iyi bedʼeata ũrĩmarẽã, mawũã bia wãmarẽã (Isa. 48:17, 18). Israelitaraba Jeowaba zokʼadata ũrĩ ẽ basi baera, mejãcha sopʉabisida iyira (Sal. 78:40, 41). Mamina kʼawuapanʉ Jeowara mejãcha sobiabasita propeta Daniel kʼareara, angel abaʉdeba jarasi baera naʉ̃ yumakẽrãra jipade yibiata (Dan. 10:11). ¿Kʼãrẽa mejãcha kãgabasi? Danielʼra ẽbẽra biobawarabaside kʼẽrẽpabasi baera akʉza iyidobabʉdebida kʼẽrẽpabasi baera (akʉra Daniel 6:10).
Jʉrʉda nekʼãrẽ biʼiabʉta Daizezedebemata
w05-S 15/11 11 parr. 3
Wuabemaraba jarabʉ ũrĩbʉdeba ũdubira kãgata
Job neũdukʼawuara apanʉraba ũrĩpanasimina Jobʼba bedʼea jarabʉra, Jobʼba jarasi kãgabasita ẽbẽra abaʉba iyi bedʼeata ũrĩmarẽã (Job 31:35). ¿Jobʼbara kʼãrẽã maʉ̃ta jarasi? Iyi neũdukʼawua apanʉrabara bari ũrĩpanasi baera iyi bedʼeara, mawũã so zarea diada ẽ basi. Ãya krĩcha ẽ basi Job sãwũã sentibʉ ʉ̃rʉra. Apostol Pedroba naʉ̃ ũrãgata diasi: «Mawũẽra mara jõma so abarikapanaidua akʉza krĩchade, yiya nebʉraidua neũdukʼawua kĩrãkʼa, mebẽrã kĩrãkʼa yiya kãgaidua, so borekea bʼaidua, adewara edabʉta krĩchaidua» (1 Pedro 3:8). ¿Sãwũã yiya kãgabʉta ũdubiseapanʉ mebẽrã kongregasionebemara? Ãyi ʉ̃rʉ krĩchabʉta ũdubibara akʉza dayirãba jarabʉdebida ũdubibara wãrĩnu krĩchapanʉta ãyi ʉ̃rʉ. Ãyaʼa jaraseapanʉ naʉ̃ta: «Zarebasibaibara bʉ mawũã berabaridara». Adewara iyaʼa jẽda ũrĩbiseabʉ iya jaradata, mawũã iya bia ũdumarẽã dayirãba kĩrãkita ũrĩbasita iya jarabadara. Dayirãba mebẽrã kãga ũdubira bari ũrĩbara ẽ ãya kʼãrẽ jarabʉta, awuarabʉrʉ kʼawuaibara ãyi sãwũã sentibʉta.