Reperensia Karta nekʼawuabari Bʼaita Kristianora kĩrãkʼa akʉza Trajaita Daizezeita
© 2023 Watch Tower Bible and Tract Society of Pennsylvania
1-7 ENEROBAYEDA
BEDʼEA BIA DAIZEZE BEDʼEADE ŨDUDATA | JOB 32, 33
Bʉara kʼarebaseabʉ yi ẽbẽrarã krĩcha zroma opanʉrãra
it-1 796
Elihú
Elihúbara Jobʼra bia edasi akʉza krĩña ibia jara ẽ basi mawũã Jobʼta bia sentimarẽã. Jobde kĩrãkʼa kʼawuabasi iyira egoro omata akʉza Daizezeba jõma parãsita. Iyara Jobʼra daʉperamabasi akʉza akʉsi Jobʼra iyi neũdukʼawua kĩrãkʼa. Akʉza iyi Jobʼa bedʼeabʉrʉdera Job trʉ̃ta jarabasi. Elifazba, Bildadba akʉza Zofarbara oẽbasi maʉ̃ra (Job 32:21, 22; 33:1, 6).
w14 15/6 25 parr. 8-10
Ẽbẽrarã zarea neẽpanʉrãra, ¿Jeowaba akʉbʉ kĩrãkʼa akʉbʉka?
8 Dayirãbara mebẽrãra so zʉbʉria akʉseabʉ kĩrãbedara ãyira zarea neẽãpanʉta, ãyi zõna babʉ baera, kayabʉ baera, sopʉabʉ baera, mawũã ẽ bʉrʉ ãyi mebẽrãnebemata Jeowa ode bʉ ẽ baera. Badu ewaride dayirãsida maʉ̃ra kĩrãkʼa berabariseabʉ. Israelitara Jeowaba ẽjũã bia diaya adama jʉ̃ẽi nãã, Jeowaba kĩrãbebisi ãyaʼa ãyira Egiptodera mamabemara nezokʼabasita akʉza nekʼãrẽ mejãcha erba ẽ basita. Maʉ̃ba ãyidebemata abaʉta zʉbʉria berabaribʉbʉrʉ kʼarebamarẽã jarasi. Jeowabara kãgabasi israelitaraba kʼarebamarẽã yi kʼãrẽ neẽãkiderata akʉza zarea neẽpanʉrata (Deut. 15:7, 11; Lev. 25:35-38).
9 Mebẽrãnebemarata zʉbʉria berabaribʉrʉdera dayirãra ãyi ʉ̃rʉ imitia bedʼeai kaude, kʼarebaibara ãyita akʉza so zarea diaibara (Job 33:6, 7; Mat. 7:1). Bia ũrĩta krĩchadaya naʉ̃ yiza ʉ̃rʉ, yumakẽrã aba motode asidentadata ospitalʼidu jʉ̃ẽra, medikorabara iyara widi ẽ kʼaiba mawũã osita, mawũã ẽ bʉrʉ iya kʼãrẽa mawũã osita, awuarabʉrʉ jʉrʉpanʉ iyi sãwũã kʼarebaita. Abarika mebẽrãnebemata zarea neẽãbʉbʉrʉ iyi deda bedʼea zromata erbʉ baera, dayirãbara jʉrʉibara ãyaʼa sãwũã so zarea diaita akʉza mawũã Jeowa kʼawa bamarẽã (akʉra 1 Tesalonicenses 5:14).
10 Dayirãba biʼia krĩchadara mebẽrãra kʼãrẽ berabarinʉmʉ ʉ̃rʉ, dayirãba nãã akʉbadaira awuara akʉdayi. Bari jaradaita mebẽã wẽrã aba, iyi mebẽrã Jeowa odebʉ ẽ baera zʉbʉriabipanʉ. Naʉ̃ ʉ̃rʉ krĩchabʉrʉdera krĩchaseapanʉ naʉ̃ mebẽãra zarea neẽbʉta, mamina maʉ̃ra mawũã ẽ. Iyira zarea barabʉ iyi mawũã opanʉta awuanta zebʉrʉ baera. Mawũã ẽ bʉrʉ ũdupanʉ mebẽã wẽrã abaʉba iyi wũãwũãta edebʉta semanaza ãba yi jʉrebarieda. Iyara ũdubibʉ mejãcha ĩjãbʉta. Mawũã ẽ bʉrʉ, bʉ warrara Jeowa ode kʼẽrẽpapanʉta ãyi kolegiode mejãcha zʉbʉria opanʉmina. Naʉ̃neba dayirãba ũdutabeda mebẽrã zarea neẽpanʉrãra wãrĩnu bʼaira zarea erpanʉta, ãyira Jeowa ode kʼẽrẽpapanʉ baera (Sant. 2:5).
w20.03 23 parr. 17, 18
¿Sõbede bedʼeaibara?
17 Elihúra Job mebẽrãnebemabasi, iya akʉ jʉ̃ẽsi Jobʼta. Jobʼta akʉza wuabemarata bedʼeabarʉdera Elihúbara kĩrãkita ũrĩbasi. Maʉ̃ba ãyi bedʼea berabarida tẽãra Elihúbara ũrãgʼa biata diasi Jobʼa akʉza kʼarebasi Jobʼba awuara krĩchamarẽã (Job 33:1, 6, 17). Elihúbara audrera kãgabasi Jeowa ʉ̃rʉ ibia bedʼeaita, mawũã krĩcha ẽ basi iyi ʉ̃rʉ ibia bedʼeaita, mawũã ẽ bʉrʉ wuabemara ʉ̃rʉ (Job 32:21, 22; 37:23, 24). Elihú yizaba ũdubibʉ bʉta ewari dayi chupea bʼaita mawũã biʼia ũrĩta (Sant. 1:19). Abarika dayirãba mebẽrã ũrãgʼa diabʉrʉdera jʉrʉibara Jeowa ʉ̃rʉ ibia bedʼeaita, mawũã dayirã ʉ̃rʉ bedʼea ẽ baibara.
18 Jeowaba dayirã diasi bedʼeaita, maʉ̃ kʼarea biga diabʉta ũdubipanʉ dayirã bia bedʼeabʉde Daizeze Bedʼeaba jarabʉ kĩrãkʼa. Nokʼo Salomónba jarasi: «Manzana oro omata epedeko plata oma ʉ̃rʉbʉ kĩrãkʼa, abarikabʉ bedʼea kĩrãwãreã nesidade jarabʉrʉde» (Prov. 25:11). Wuabemaraba kʼãrẽ jarabʉta dayirãba bia ũrĩpanʉbʉrʉ akʉza bedʼeai nãã biʼia krĩchabʉbʉrʉ, dayirãba bedʼea jarabʉra manzana oro oma kĩrãkʼabayi. Dayirã bedʼeabʉrʉdera jʉrʉibara mebẽrã sãwũã so zarea diaita dayirãba kʼãrẽ jarabʉdeba. Mawũã Jeowata sobiabidayi (Prov. 23:15; Efes. 4:29). Naʉ̃ kʼãwũã opanʉneba ũdubidayi Jeowaʼa biga diabʉta iya dayirãʼa nebia diada kʼarea.
Jʉrʉda nekʼãrẽ biʼiabʉta Daizezedebemata
w13 15/1 19 parr. 10
Audre Jeowa kʼawa bara
10 Aukʼara krĩcha zroma oẽbaibara dayi ʉ̃rʉ sãwũãbʉ kʼareara. Akʉza nekʼãrẽ okua ẽ baibara mawũã audre warrara ũdu bʼaita. Daizeze Bedʼeaba jarabʉ «Botorroara nebia kĩrãkʼabʉ burude, ne aripe obʉ ode bʉde» (Prov. 16:31). Jeowaitara audre yibia dayi sode dayi sãwũãbʉta, dayirãitabida abarikabaibara (akʉra 1 Pedro 3:3, 4). Mawũẽra, ¿yibiaka operasion oita mawũã audre biʼia ũdu bʼaita? Krĩcha ẽã dayirã zõrapanʉta, mawũã ẽ bʉrʉ warrarapanʉta, Jeowa sobiaba audre biʼia ũdubibʉ dayirãra (Neh. 8:10). Ẽjũã kĩrãwãreã zebʉrʉdebʉrʉ dayirãra kaya ẽãpanañi akʉza warrarapanañi (Job 33:25; Is. 33:24). Maʉ̃ zeyedara buru biaba akʉza dayirãba ĩjãbʉba kʼarebayi Jeowa kʼawa bʼaita, maʉ̃ena dayirãba oseabʉta opanaibara (1 Tim. 4:8).
8-14 ENEROBAYEDA
BEDʼEA BIA DAIZEZE BEDʼEADE ŨDUDATA | JOB 34, 35
Ẽbẽra biara nekayirua berabaribʉrʉdera, ¿kʼãrẽta kĩrãbedaibara?
¿Sãwũãbʉ Daizezera?
Daizezebara ewari jõmaʉ̃nẽ jõma aripe obʉ. Iyara nekayirua oita krĩchaka (Job 34:10). Iya kʼawua obʉrʉdera aripe obʉ (Salmo 67:4). Jeowabara kʼawuabʉ dayirã sode kʼãrẽtabʉra. Maʉ̃ba iyira mia abaʉʼa yi sewabi ẽ, awuarabʉrʉ iya nekʼãrẽ kʼawua obʉrʉdera aripe obʉ (1 Samuel 16:7). Jeowaba akʉbʉ idi ewade kʼãrẽ kayirua opanʉra, mõbe jarabʉ maʉ̃ra jõma jõbita (Proverbios 2:22).
w17.04 10 parr. 5
Daizeze Nokʼo zebʉrʉdera ¿kʼãrẽta neẽ bai?
5 ¿Kʼãrẽta oi Jeowabara? Idi ewadera, Jeowabara ewari dianʉmʉ ẽbẽrarãba ãya nekʼãrẽ aña obʉta idubʉmarẽã (Is. 55:7). Jeowabara jarasi nekayirua naʉ̃ drʉade bʉra jõma jõbita. Iyara jara ẽ basi ẽbẽra aba abaka jõbita. Zʉbʉria zroma zebʉrʉde ¿kʼãrẽba sãwũãi yi ẽbẽrarã Jeowarebʉ ẽãrãra awuarabʉrʉ naʉ̃ drʉade bʉrãra? Jeowaba jarabʉ ẽbẽra kayiruara jõmaʉ̃ta makenaita ewari jõmaʉ̃nẽbayeda (akʉra Salmo 37:10). Ẽbẽra mejãchaʉta ãya kayirua oidera mĩrʉpanʉ (Job 21:7, 9). Daizeze Bedʼeaba jarabʉ Jeowa dabʉbara jõma ũdubʉta. Akʉza mia abaʉ ẽbẽrata mĩrʉbe ẽãta kayirua oita, mawũã iya ũdu ẽ marẽã (Job 34:21, 22). Mia abaʉba sewabe ẽ Jeowara akʉza naʉ̃ drʉadera neẽ sama mĩrʉita iyideba. Armagedón berabarida tẽã, dayirãba ẽbẽra kayiruara jʉrʉbʉrʉdera mia abaʉmae ũduda ẽ bayi (Sal. 37:12-15).
Idabirarã nekʼãrẽ baduba ĩjãbi ẽ baita Jesude
19 ¿Idi ewade abarika berabaribʉka? Mawũã. Ẽbẽra mejãchaʉba kãga ẽ dayirãra politikarebʉ ẽ baera. Ẽbẽrarãbara krĩchapanʉ dayirãra politiko abaʉare botaibarata. Mamina dayirãba kʼawuapanʉ nokʼo nama egorodebemare botara, Jeowarebʉ ẽãta ũdubita (1 Sam. 8:4-7). Ãyara krĩchaseapanʉ dayirãbara eskuela parãibarata, mawũã ẽ bʉrʉ ospitalta mawũã ẽbẽrarã kʼarebaita. Maʉ̃ba ãyara dayirãra kãga ẽ naʉ̃ drʉade bedʼea zromabʉta ara oi kaude, bari Daizeze Bedʼeata jaradiapanʉ baera.
20 ¿Kʼãrẽba kʼarebai bae ẽ baita? (Akʉra Mateo 7:21-23). Kĩrãbera dayirãitara audre yibiata oita Jesuba zokʼadata (Mat. 28:19, 20). Ẽbẽrarãba naʉ̃ drʉadebemaba jarabʉ kʼarea yi sewabirãra. Dayirãitara audre yibia baera Daizeze Bedʼea jaradia wãita. Mejãcha krĩcha zroma orãra naʉ̃ drʉade kʼãrẽ berabaribʉ kʼarea. Jeowa ʉ̃rʉ Kʼawuabipanʉrãbara ẽbẽrarã mejãcha kãgapanʉ baera jaradiapanʉ Daizeze ʉ̃rʉ, mawũã ãyisida Jeowa kʼawapanamarẽã.
Jʉrʉda nekʼãrẽ biʼiabʉta Daizezedebemata
w17.04 29 parr. 3
Soiduba Jeowa ʉ̃rʉ ibia bedʼeaidua
3 Elihúba widiside «Bʉa jõma aripe obʉbʉrʉ, ¿kʼãrẽta diabʉ bʉa? ¿Kʼãrẽta jidabʉ bʉdeba?», Jeowara kĩrʉ ẽ basi (Job 35:7). Maʉ̃neba ¿Elihúbara jarakĩrãbasika dayirãba nekʼãrẽ jõma obʉidu Jeowara sobiabibe ẽãta? Mawũã ẽ. Awuarabʉrʉ iyara jarakĩrãbasi Jeowara bʉ ẽãta dayirãba iyi yiwidʼibʉ kʼarea. Dayirãbara Jeowara audre plata baribi ẽ bayi, mia audre zarea babi ẽ bayi. Iyara nekʼãrẽ jõma erbʉ. Awuarabʉrʉ Jeowabʉrʉ dayirã diabʉ nebiata akʉza zareata. Mõbe iya akʉbʉ dayirãba maʉ̃ jõma sãwũã zokʼabʉta.
15-21 ENEROBAYEDA
BEDʼEA BIA DAIZEZE BEDʼEADE ŨDUDATA | JOB 36, 37
¿Kʼãrẽa ĩjãseapanʉ ewari jõmaʉ̃nẽ bʼai jarabʉra?
w15 1/10 13 parr 1, 2
¿Dayirãbara Daizezera ũdukʼawuaseabʉka?
IYIRA EWARI JÕMAɄ̃NẼBɄ. Daizeze Bedʼeaba jarabʉ Daizezera «bakikibarisi akʉza bakikibariyi bʉra Daizeze» (Salmo 90:2). Daizeze Bedʼeaba jarabʉ iyira mia abaʉba parã ẽ basita akʉza ewari jõmaʉ̃nẽ bʼaita. Ẽbẽrarãbara Daizeze ʉ̃rʉra jõma kʼawua ẽ bayi akʉza iyi sõbe poagabʉsi kʼawua ẽ bayi (Job 36:26).
Kʼãrẽa yibia maʉ̃ ʉ̃rʉ kʼawuaira. Daizezeba jarabʉ dayirãba iyita bia ũdu kʼawuadara, ewari jõmaʉ̃nẽpanaita (Juan 17:3). ¿Jeowata ewari jõmaʉ̃nẽ babe ẽ basibʉrʉ iyara kʼãrẽa jaraibasi ẽbẽrarãra ewari jõmaʉ̃nẽ baita? Daizeze ewari jõmaʉ̃nẽ baseabʉbʉrʉ ewari jõmaʉ̃nẽ babiseabʉ dayirãra (1 Timoteo 1:17).
w20.05 22 parr. 6
¿Biga diapanʉka Daizezeba nekʼãrẽ nebia diada kʼarea?
6 Naʉ̃ drʉadera bʉ baniata dayirã ẽjũãra ariguide jĩgabʉ baera bisiadeba. Naʉ̃ ẽjũãta aukʼara bisia kʼawabasibʉrʉ, baniara neẽ bakasi, dora sekakasi. Mamina naʉ̃ ẽjũãta bisiadeba aukʼara jĩgabasibʉrʉ dora kongelakasi. Naʉ̃ drʉara bisiadeba ariguide jĩgabʉ baera, dayirãbara bania erpanʉ akʉza maʉ̃neba baseapanʉ dayirãra. ¿Sãwũã mawũã berabaribʉ maʉ̃ra? Bania pusade oʉ̃bʉra bisiaba jãrãra badogo. Maʉ̃ baniara jẽda zeyi pusama kuebade. Naʉ̃ba ũdubibʉ Jeowara buru biata akʉza mejãcha zarea barabʉta (Job 36:27, 28; Ecl. 1:7).
Dayirãba jʉ̃ãbʉra zarea erbaibara
16 Dayirãba ewari jõmaʉ̃nẽ bʼaita jʉ̃ãbʉra Daizezeba nebia diada. Dayirãba jʉ̃ãpanʉ nebia zeita akʉza ĩjãpanʉ maʉ̃ra aripe berabarita. Dayirãba nebia jʉ̃ãbʉra, nekʼãrẽ zʉgʉaba jãba aña wã ẽ baita kʼarebabʉ kĩrãkʼabʉ, so zarea diabʉ baera bedʼea zroma awuantaita, pẽwãbʉdade awuantaita akʉza beidebida. Adewara dayirãba nebia jʉ̃ãbʉra kasko kĩrãkʼabʉ, kʼarebabʉ baera dayirã krĩchata, mawũã krĩcha kayirua ãĩ bʉeita akʉza nebiata krĩchaita. Maʉ̃ nebia Daizeze Bedʼeadebʉba, kʼarebabʉ dayirã Daizeze kʼawa bʼaita akʉza kʼawuaita iya dayirãra mejãcha kãgata. Dayirãba nebia jʉ̃ãbʉ zarea ĩjãbʉba kʼarebayi nebia mejãcha ũduita.
Jʉrʉda nekʼãrẽ biʼiabʉta Daizezedebemata
it-1 519
Sãwũã yiya bedʼeaita
Nawedara awurume bedʼeaira nekʼãrẽ badudeba opanasi. Pʉwʉrʉ abaʉde kʼãrẽ berabaridata akʉza awuru pʉwʉrʉde kʼãrẽ berabarida kʼawuaira ẽbẽra abaʉba jarabasi. (2Sa 3:17, 19; Job 37:20.) Ẽbẽra aba ode wãta iyita yiko edaita pʉwʉrʉ abaʉmae jʉ̃ẽbʉrʉde mamabemara jara ũrĩbibasi kʼãrẽta berabarinʉmʉta iyi pʉwʉrʉ nãã badamae. Maʉ̃ba ẽbẽra abaʉba kʼawuakĩrãbasibʉrʉ awuru pʉwʉrʉde kʼãrẽ berabarinʉmʉta plazaidu wãibarabasi.
22-28 ENEROBAYEDA
BEDʼEA BIA DAIZEZE BEDʼEADE ŨDUDATA | JOB 38, 39
¿Ewari jʉrʉbʉka Jeowaba nekʼãrẽ parãna ʉ̃rʉ akʉita?
¿Jũãkʼawuapanaika Jeowaba kʼãrẽ oyieda?
7 Daizeze Bedʼeaba jarabʉ Jeowaba naʉ̃ ẽjũã parãsidera biʼia parãsita (Job 38:5, 6). Akʉza ewari jʉrʉsi iya nekʼãrẽ parãna ʉ̃rʉ krĩchaita (Gén. 1:10, 12). Angelerãra mejãcha sobiasibaibara ũdusidade Jeowaba nekʼãrẽ parã wãta (Job 38:7). ¿Kʼãrẽta kʼawuapanʉ naʉ̃neba? Jeowaba nekʼãrẽ naʉ̃ drʉadebʉ parãira ewari mejãcha berabarisi akʉza iya maʉ̃ jõma parãna tẽã akʉbʉrʉdera ũdusi jõma bigabasita (Gén. 1:31).
w20.08 14 parr. 2
Beidara jẽda piradrʉibara ũdubibʉ Jeowara kãga erbʉta, buru biata akʉza jʉ̃ã kʼawuabʉta
2 Jeowaba nããra parãsi Jesuta. Tẽã iyideba parãsi nekʼãrẽ naʉ̃ drʉadebʉ jõma angelerainʉ (Col. 1:16). Jesura sobiabasi yi zezeʉ̃me trajabasi baera (Prov. 8:30). Angelerasida sobiapanasi ũdusida baera Jeowaba Jesuʉ̃meba bajã sãwũã parãnata akʉza egoro sãwũã parãnata. Ãyira Jeowa ʉ̃rʉ ibia bedʼeasidabaibara iya nekʼãrẽ parãna kʼarea. Ãyira audre sobiasidabaibara Jeowaba ẽbẽrarã parãside (Job 38:7; Prov. 8:31). Nekʼãrẽ naʉ̃ drʉadebʉba ũdubibʉ Jeowa buru biata akʉza iyi kãgata (Sal. 104:24; Rom. 1:20).
Audre ũdukʼawuadadrʉ Jeowara akʉpanʉne iya parãnata
8 Jeowabara kãgabʉ iyi ʉ̃rʉ ĩjãnamarẽã. Jeowabara kʼarebasi Jobʼba iyi ʉ̃rʉ audre ĩjãmarẽã (Job 32:2; 40:6-8). Jeowa Jobʼʉ̃me bedʼeasidera jara ũrĩbisi chĩdau ʉ̃rʉ, bajã ʉ̃rʉ akʉza ba ʉ̃rʉ, adewara Jeowara bedʼeasi toro ʉ̃rʉ akʉza kabayo ʉ̃rʉ (Job 38:32-35; 39:9, 19, 20). Naʉ̃ nekʼãrẽ jõmaʉ̃ba ũdubisi Jeowara buru biata, kãga barabʉta akʉza zarea mejãcha erbʉta, mawũã bedʼeadaba Jobʼbara audre ĩjã zesi Jeowa ʉ̃rʉ (Job 42:1-6). Dayirãba bia krĩchadara Jeowaba nekʼãrẽ parãna ʉ̃rʉ, kʼawuadayi Jeowara buru biata akʉza zarea mejãcha erbʉta dayirãira. adewara iyara jõbiyi dayirã zʉbʉriapanʉra, maʉ̃ba kʼarebayi audre ĩjãita iyi ʉ̃rʉ.
Jʉrʉda nekʼãrẽ biʼiabʉta Daizezedebemata
it-2 199
Yi ley diabarita
Jeowaba diabʉ leyʼrãra. Jeowabʉrʉ diaseabʉ leyʼrãra. Iya diasi ley bakurura sãwũã bʼaibara ʉ̃rʉ (Job 38:4-38; Sl 104:5-19) adewara diasi ley nedʉwʉrʉra sãwũã bʼaibara ʉ̃rʉ (Job 39:1-30). Akʉza leyta diasi ẽbẽrarã sãwũã bʼaibara ʉ̃rʉ. Mamina Jeowaba ẽbẽrarã parãsidera krĩchamarẽã akʉza iyi kʼawa bamarẽã parãsi baera, diasi leyta jarabʉta kʼãrẽta bigabʉta akʉza kʼãrẽta biga ẽãta. (Ro 12:1; 1Co 2:14-16.) Adewara Jeowabara leyta diasi angeleraitabida (Sl 103:20; 2Pe 2:4, 11.)
Ley Jeowaba naʉ̃ drʉa sãwũã bʼai ʉ̃rʉ bʉedara jõma aripe oibara. (Jer 33:20, 21.) Jeowaba naʉ̃ drʉaita ley diadata dayirãba ũrĩ ẽ bʉrʉ, bedʼea zroma ũduseapanʉ. Adewara Jeowaba diasi ley ẽbẽrarã sãwũã bʼaibara ʉ̃rʉ. Maʉ̃ra dayirãbara ũrĩbara. Dayirãbara maʉ̃ta ũrĩ ẽ bʉrʉ bedʼea zroma ũduseabʉ. Daizeze Bedʼeaba jarabʉ: «Jʉra kʼawuabara, Daizezera mia kʼaia yi sewabi ẽ. Nekʼãrẽ yumakẽrãba ubʉra akʉza maʉ̃ta jẽda jʉrepeyi». (Gál 6:7; 1Ti 5:24.)
29 ENERODEBA-4 FEBRERO EDA
BEDʼEA BIA DAIZEZE BEDʼEADE ŨDUDATA | JOB 40-42
¿Kʼãrẽta jaradiabʉ Job nebʉraba?
w10 15/10 3, 4 parr. 4-6
¿Kʼaiba ũdu kʼawua zebʉrʉ Jeowara sãwũã krĩchabʉra?
4 Dayirãba Jeowaba kʼãrẽ obʉ ʉ̃rʉ krĩchabʉrʉdera akʉ ẽ baibara dayi ẽbẽraba sãwũã akʉbʉdeba, Jeowara awuarabʉ baera. Salmo 50:21ne Jeowaba jarasi dayi ẽbẽraba iya kʼãrẽ obʉta bia ũrĩ ẽãnera, iyi ʉ̃rʉ aña krĩchabʉta. Dããrabade ẽbẽra abaʉba jarasi: «Ẽbẽrarãbara ãyita leyba bʉebʉ akʉza kãgapanʉ Daizezebida ãya ley bʉedata ũrĩmarẽã. Akʉza krĩchapanʉ ãya ley bʉebʉra bigata, maʉ̃ba Daizezebida ũrĩbarata maʉ̃ leyba jarabʉta».
5 Jʉra kʼawuabaibara dayima nekʼãrẽ sãwũã oibara ʉ̃rʉ krĩchabʉde akʉza nekʼãrẽ sãwũã berabari ʉ̃rʉ krĩchabʉde. Naʉ̃ba aña krĩchabi ẽ marẽã Daizeze ʉ̃rʉ. ¿Kʼãrẽa yibia maʉ̃ra? Dayirãba Daizeze bedʼea akʉbʉrʉdera krĩchaseabʉ baera Jeowaba kʼãrẽ jarabʉra añabʉta dayirã krĩchamara, dayirãra kayirua omia baera akʉza Daizezedeaba krĩcha ẽ baera. Israelitarabara aña krĩcha zesida. Ãya krĩchasida Jeowaba ãyi sãwũã edabadara biga ẽ basita. Jeowaba Israelitara jarasi ãya sãwũã krĩchabʉra bigabʉ ẽãta, awuarabʉrʉ iya nekʼãrẽ ʉ̃rʉ sãwũã krĩchabʉtrʉ bigabʉta (Eze. 18:25).
6 Dayirãba Jeowa ʉ̃rʉ aña krĩcha ẽ baira, akʉ ẽ baibara Jeowaba nekʼãrẽ obʉra dayirãba akʉbʉ kĩrãkʼa. Kĩrãbedaibara dayirãbara Jeowadeaba krĩcha ẽãta akʉza edaʉde aña krĩchaseabʉta. Maʉ̃ta kʼawuasi Jobʼba. Jobʼba iya bedʼea zroma ũdusidera audre krĩchasi maʉ̃ bedʼea zroma ʉ̃rʉbʉrʉ. Maʉ̃ba krĩcha ẽ basi Jeowaba sãwũã krĩchabʉ ʉ̃rʉ. Mawũãsidu, Jeowabara kãgata ũdubisi Jobʼa, mõbe kʼarebasi iya jõma audre bia akʉmarẽã. Bedʼea mejãcha widisi, maʉ̃nebemara Jobʼbara jõma panʉau ẽ basi. Naʉ̃neba Jeowaba iyaʼa ũdubisi iyi sãwũã krĩchabʉra Jeowadeaba bʉ ẽãta. Jobʼba eda krĩchabʉta ũdubisi, mõbe jẽda krĩchasi iya kʼãrẽ jarada ʉ̃rʉ (akʉra Job 42:1-6).
w17.06 25 parr. 12
Kĩrãdua ẽ baibara Daizezeba zokʼamarẽã bʉra
12 Job zʉbʉria berabarida tẽã Jeowa iyiʉ̃me bedʼeasidera ibiade bedʼeasi, mawũã kʼẽã ẽ basi. Maʉ̃ mawũã berabarida tẽã Jobʼbara jõma audre bia ũrĩ wãsi. Maʉ̃ kʼarea iya jarasi jẽda krĩchabʉta iya kʼãrẽ jarada kʼareara. Naʉ̃ba ũdubibʉ Jeowaba bedʼea jaradabara kʼarebasita Jobʼta akʉza so zarea diasita (Job 42:1-6). Naenabida Elihúba jarasi Jobʼa iyi sãwũã krĩchabadara añabasita (Job 32:5-10). Jeowabara bia akʉsi Jobʼba kʼãrẽ odara, Jobʼbara ũrĩsi iya kʼãrẽ jaradapeadara (Job 42:7, 8).
«Jʉ̃ãra Jeowata»
17 Job abapaibʉrʉ zowaĩnĩgʉabʉta ũdubi ẽ basi bedʼea zroma ũdusidera. Pabloba jarasi kristianora ebreora mebẽrã mejãchaʉbida zowaĩnĩgʉa ũdubisidata (Heb. 12:1). Jõmaʉ̃ta bedʼea zroma ũdusimina kʼẽrẽpapanʉne beisida (Heb. 11:36-40). ¿Ãya awuantada kʼarea nebia ũdusidaka? Mawũã, Jeowaba ãya jaradara jõma ũduda ẽ basimina aduada ẽ basi Jeowa jʉ̃ãpanʉta. Ãya kʼawuapanasi Jeowaba ãyira biʼia akʉbʉta. Maʉ̃ba ĩjãpanasi Jeowaba nebia diaya adara ãyabida ũduibasita (Heb. 11:4, 5). Ãyi yiza ʉ̃rʉ krĩchaiba kʼarebabʉ dayirãbida ĩjãita Jeowaba nebia weyi abʉra.
18 Naʉ̃ drʉara wuabʉrʉ mitia wã (2 Tim. 3:13). Akʉza Diarubara jʉrʉbʉ sãwũã kayirua obita Daizeze ode panʉrãra. Ʉ̃ra zeide kʼãrẽ kayiruata ũduita kʼawua ẽ mina, opanadrʉ Jeowaba zokʼabʉta soiduba akʉza iyita ĩjãpanaera (1 Tim. 4:10). Job nebʉraba ũdubibʉ «Jeowaba nebia diadata adewara ũdusida Jeowaba so borekea akʉbʉta akʉza so zʉbʉria akʉbʉta» (Sant. 5:11). Job kĩrãkʼa ewari jõmaʉ̃nẽ kʼẽrẽpapanaibara akʉza ĩjãibara Jeowaba «iyi jʉrʉbʉara nebiata diabʉta» (akʉra Hebreos 11:6).
Jʉrʉda nekʼãrẽ biʼiabʉta Daizezedebemata
it-1 377 parr. 5
Awuru kʼarea ipidabʉta
Ẽbẽrarã Job kʼarea ipidasida. Mawũãsidu iyira kʼẽrẽpabasi. Mamina Jobʼbara iyi sãwũã krĩchabʉra aña krĩchabasi, maʉ̃ kʼarea iyara awuara krĩchaibarabasi. Elihúba jarasi neẽãta ẽbẽra Job kĩrãkʼara. Jobʼbara idu iyi ʉ̃rʉ imitia bedʼeabisi baera. (Job 34:7.) Jobʼra aukʼara krĩcha zroma obasi wuabemaraba akʉdamarẽã iyita ẽbẽra biata Daizezeira. (Job 35:2; 36:24.) Jobʼbara krĩchabasi iyi neũdukʼawuara apanʉraba bedʼea jarabadara iyaʼa jarapanʉta mawũã Daizezeʼa jaranʉma ẽ basita. Maʉ̃ba ũdubibasi Jobʼra ẽbẽra aba obisiabʉba bania dobʉrʉde aduʼa sentibari kĩrãkʼabasita. Iyara iduaribibasi wuabemarata iyi kʼarea ipidamarẽã. Maʉ̃ba sobiabʉ kĩrãkʼabasi. Tẽã Daizezeba jara ũrĩbisi wãrĩnu bʼaira, naʉ̃ra ẽbẽrarãra Iyi kʼareabʉrʉ ipidapanasita. (Job 42:7.) Abarika berabarisi israelitaraba nokʼo aba widisidade, Jeowaba propeta Samuelʼa jarasi israelitarabara jarada ẽ basita Samuelba ãyita zokʼamarẽã kãga ẽãta, awuarabʉrʉ jarasidata Jeowaba ãyi zokʼamarẽã kãga ẽãta. (1Sa 8:7.) Adewara Jesuba ãyi kʼaidubemara jarasi: «Marara pewãnaña akʉza beadaya, adewara pʉwʉrʉ jõmaʉ̃nẽbemaba marara jʉradaya mʉ̃ kʼarea». (Mt 24:9.) Naʉ̃ ʉ̃rʉ krĩchaiba kʼarebayi kristianorata ãyi kʼarea ipidabʉdade awuantaita akʉza ãyi kʼẽrẽpabʉdeba nebiata ũdudayi. (Lu 6:22, 23.)
5-11 FEBREROBAYEDA
BEDʼEA BIA DAIZEZE BEDʼEADE ŨDUDATA | SALMO 1-4
Daizeze Nokʼoare bara
«Ʉreyi pʉwʉrʉ naʉ̃ drʉade bʉta»
8 ¿Sãwũã akʉpanʉ ẽbẽrarãbara dayirãba jaradiabʉ ʉ̃rʉra? Ẽbẽrarã mejãchaʉba ũrĩkĩrãde ẽ (akʉra Salmo 2:1-3). Pʉwʉrʉra mejãchaʉba kãgada ẽ Jeowaba Nokʼo jʉrʉdara. Adewara dayirãba jarakabʉra bedʼea bia Daizeze Nokʼo ʉ̃rʉ, ãyara akʉda ẽ bedʼea bia kĩrãkʼa. Adewara nokʼora mejãchaʉba Daizeze ʉ̃rʉ ĩjãbʉa apanʉmina, kãgada ẽ dayirãba Daizeze Nokʼo ʉ̃rʉ jaradiadaira, ãyabʉrʉ zokʼakĩrãbʉ baera. Jesu ewaride bada kĩrãkʼa idibida ẽbẽrarã kayiruarabara kãgada ẽ Jeowaba Nokʼo jʉrʉdara, mawũã ũdubipanʉ ãya pẽwãpanʉ baera iyi odepanʉrata (Hech. 4:25-28).
w16.04 29 parr. 11
Naʉ̃ drʉadera ũdubidaibara kʼaiarebʉ ẽãta
11 Jʉrʉita nekʼãrẽ bia erbaita. Dayirãba aukʼara jʉrʉpanʉbʉrʉ nekʼãrẽ bia erbaita, bedʼea zroma zebʉrʉdera zarebayi ũdubita kʼaiare panʉ ẽãta. Ruthba maʉ̃ta ũdusi Malauide. Poagara setentade, iya ũdusi ʉ̃kʉrʉ mebẽrãba kʼãrẽta osidata ãyi pẽwãsidade. Iya jarabʉ: «Ãyitara zarebasi ãya nebia erbada idubʉira. Ãyira daibawara mĩrʉ wãsi awuru drʉaeda, mamina tẽã politikarane eda wãsi, mawũã akʉza jẽda wãita ãyi deda. Ãyara maʉ̃ta osida ãyi badamae biapana ẽ basi baera». Mamina Jeowa odepanʉra mejãchaʉba ũdubi zebʉda ãyira kʼaiare panʉ ẽãta bedʼea zroma ũdupanʉmina plata neẽ kʼarea, mawũã ẽ bʉrʉ ãya nekʼãrẽ bia erbada idubʉibaramina (Heb. 10:34).
Jʉrʉda nekʼãrẽ biʼiabʉta Daizezedebemata
it-2 1085
Tamo
Daya sebadata, arrota mawũã ẽ bʉrʉ trigo tẽĩbʉrʉdera yi jota ʉ̃tʉ zebʉ, maʉ̃ta jarakĩrãbʉ tamo. Naʉ̃ yi jora mia abaʉ ẽbẽraba koe, zeri ẽ baera. Maʉ̃ kʼarea Daizeze Bedʼeade bedʼea tamo jarabʉrʉdera jarakĩrãbʉ nekʼãrẽ badu zeri ẽãta.
Yi jo ãĩ bʉeira arro tẽĩna tẽãra bentiabʉ, mawũã pʉãdrʉba edemarẽã yi jota. (Akʉra AVENTAR.) Naʉ̃ba ũdubibʉ Jeowaba sãwũã ãĩ bʉebʉta apostatarata iyi pʉwʉrʉdeba akʉza sãwũã jõbita iyi nejʉrarata, adewara iyi odepanʉra pẽwãpanʉrata. (Job 21:18; Sl 1:4; 35:5; Isa 17:13; 29:5; 41:15; Os 13:3.) Daizeze Nokʼoba makenañi iyi nejʉrarãra pʉãdrʉba arro jo edebari kĩrãkʼa. (Da 2:35.)
Arro jo zeri ẽãra ãba jʉrepepe babʉepanasi mawũã jẽda ze ẽ marẽã pʉãdrʉba. Abarika Juan Bautistaba jarasi Jesubara iyi nejʉrarãra jipa makenaita. (Mt 3:7-12; Lu 3:17; akʉra TRILLAR.)
12-18 FEBREROBAYEDA
BEDʼEA BIA DAIZEZE BEDʼEADE ŨDUDATA | SALMO 5-7
Jeoware kʼẽrẽpa bara wuabemaraba kʼãrẽ obʉ krĩcha ẽã
Daizeze Bedʼea lebʉrʉdera sãwũã zowaĩnĩgʉa baseabʉ
7 ¿Bʉ neũdukʼawuadebema abaʉba, mawũã ẽ bʉrʉ bʉ mebẽrãnebema abaʉba sewabarika bʉra? Maʉ̃ta mawũã berabaribaribʉrʉ naʉ̃ nebʉra ʉ̃rʉ krĩchaiba kʼarebayi. Nokʼo David warra yi trʉ̃ Absalónba yi zezeta sewasi akʉza iyi nokʼota jãrĩkĩrãbasi (2 Sam. 15:5-14, 31; 18:6-14).
8 1) Yiwidʼira. Naʉ̃ nebʉrade kʼawuadadebara Jeowaʼa jara ũrĩbibara dayi sãwũã sentibʉta awururaba zʉbʉriabibʉdade (Sal. 6:6-9). Tẽã Jeowaʼa wididaibara kʼarebamarẽã ũduita saʉ̃ Daizeze Bedʼeadebemaba kʼarebaita dayirãba kʼawuadamarẽã kʼãrẽta oibarata maʉ̃ne.
w20.07 8, 9 parr. 3, 4
Sãwũã kʼawuapanʉ dayirãbara wãrĩnuta erpanʉta
3 Dayirãba ĩjãbʉra zarea erba ẽ bayi bari kristianoraba ãyirai kãga ũdubibʉba. ¿Kʼãrẽa? Krĩchadaya naʉ̃ ʉ̃rʉ. Mebẽã abaʉba, zõrãrã abaʉba, mawũã ẽ bʉrʉ yi nãã edebari abaʉba kayirua zromata ora dayita sopʉabira, mawũã ẽ bʉrʉ apostatabara akʉza dayaʼa jarara dayirãbara wãrĩnuta erpanʉ ẽãta, ¿kʼãrẽta oi maʉ̃nera bʉara? ¿Idubʉika Jeowa odebʉta maʉ̃ kʼarea? Naʉ̃ba jaradiabʉ daya ĩjãbʉ zarea erbaira Jeowa neũdukʼawua bia bʼaibarata, mawũã wuabemaraba kʼãrẽ obʉ kʼarea, ĩjãibara ẽ. Dayirãba ĩjãbʉra de kĩrãkʼabʉ. Daya de parãbʉrʉdera nekʼãrẽ teiteachʉba parãbʉ. Abarika dayirãba ĩjãbʉ zarea erbaira bari ʉ̃rʉba jara ẽ baibara ĩjãbʉta, awuarabʉrʉ daya nekʼãrẽ obʉdeba ũdubibara ĩjãbʉta akʉza kʼawuabaibara daya kʼãrẽa ĩjãbʉta maʉ̃ ʉ̃rʉ. Dayidobaʉba kʼawuaibara Daizeze Bedʼeaba Jeowa ʉ̃rʉ jarabʉra wãrĩnuta (Rom. 12:2).
4 Jesuba jarasi ʉ̃kʉrʉraba sobiade ĩjãibasita wãrĩnu ʉ̃rʉ. Mamina ãya bedʼea zroma ũdubʉrʉdera ãya ĩjãbʉra aduaibasita (akʉra Mateo 13:3-6, 20, 21). Ʉ̃kʉrʉba bia ũrĩ ẽ baibara dayi Jesu kʼaidubema babʉrʉdera bedʼea zroma ũduita (Mat. 16:24). Mawũã ẽ bʉrʉ krĩchapanʉbaibara dayi kristiano babʉrʉdera nebia mejãcha ũduita. Mamina dayirãra naʉ̃ drʉa mitiadebʉ baera bedʼea zromara ũduyi. Atiaʉde nekʼãrẽ berabaribʉba aduabiseabʉ dayi sobiabʉra (Sal. 6:6; Ecl. 9:11).
Jʉrʉda nekʼãrẽ biʼiabʉta Daizezedebemata
it-2 1005
Bewãrã de
Romanos 3:13 de apostol Pabloba jarasi bedʼea Salmo 5:9de eda bedʼeabʉta, ẽbẽrarã kayiruara ochirura, bewãrã de ewabʉ kĩrãkʼabʉta. Bewãrã dede edabʉ ẽbẽrarã beidarata, mawũã ẽ bʉrʉ nekʼãrẽ mitiata. Abarika ẽbẽrarã kayirua yedaʉba ʉ̃tʉ zebʉ bedʼea mitiata. (Naʉ̃ testoʉ̃me akʉra Mt 15:18-20.)
19-25 FEBREROBAYEDA
BEDʼEA BIA DAIZEZE BEDʼEADE ŨDUDATA | SALMO 8-10
«Bʉ ʉ̃rʉ ibia bedʼeayi Jeowa»
w21.08-S 3 parr. 6
Sobiapanadrʉ Jeowa mebẽrãnebʉ baera
6 Jeowaba ẽjũã biata diasi dayirã. Adán parãi nãã Jeowaba naʉ̃ drʉara parãsi ẽbẽrarãta panamarẽã (Job 38:4-6; Jer. 10:12). Iyira ẽbẽra bia baera akʉza iya nekʼãrẽ dia kʼawuabʉ baera nekʼãrẽ mejãcha osi dayirãta sobia panamarẽã (Sal. 104:14, 15, 24). Edaʉde ewari jʉrʉbasi krĩchaita iya nekʼãrẽ parãna ʉ̃rʉ akʉza iyitara maʉ̃ jõma yibiabasi (Gén. 1:10, 12, 31). Jeowaba ẽbẽrarã ʉ̃rʉ ĩjãbʉta ũdubisi nekʼãrẽ naʉ̃ drʉadebʉta jõma ãya zokʼamarẽã idubiside (Sal. 8:6). Daizezebara kãgabʉ ẽbẽrarã kayirua okarata sobia panamarẽã iya naʉ̃ drʉade nekʼãrẽ parãna akʉbʉ kʼarea. ¿Dayirãbara Jeowaʼa badua biga diapanʉka iya nekʼãrẽ diaya abʉ kʼarea?
w20.05 23 parr. 10
¿Biga diapanʉka Daizezeba nekʼãrẽ nebia diada kʼarea?
10 Jeowaba dayirã diasi bedʼeamarẽãra. Maʉ̃ kʼarea biga diabʉ ũdubira, zokʼaibara naʉ̃ta yi ẽbẽrarã naʉ̃ drʉadebʉra iyidoba zesita ĩjãbʉra, jara ũrĩbita kʼãrẽa dayirãbara ĩjãpanʉta nekʼãrẽ naʉ̃ drʉadebʉra Daizezeba parãsita (Sal. 9:1; 1 Ped. 3:15). Yi ẽbẽrarã naʉ̃ drʉadebʉra iyidoba zeda ĩjãbʉrabara kãgapanʉ dayirãbida ĩjãmarẽã nekʼãrẽ naʉ̃ drʉadebʉra iyidoba ʉ̃tʉ zesita. Dayirãba zokʼaseapanʉ Daizeze Bedʼeata akʉza ʉ̃kʉrʉ bedʼeara naʉ̃ artikulodebʉta Daizezeare bedʼeaita. Adewara jara ũrĩbiseapanʉ yi ẽbẽrarã ũrĩkĩrãpanʉra kʼãrẽa ĩjãpanʉta bajãnebʉta akʉza nama egorodebʉta Jeowaba parãsita (Sal. 102:25; Is. 40:25, 26).
¿Bʉ bedʼeabʉdeba yiza biata diabʉka?
13 Sobiade trãnadrʉ. Dayirãra ãba yi jʉrebʉrʉde trãbʉrʉdera audre yibia Jeowa ʉ̃rʉ ibia bedʼeaita. Mebẽã aba yi trʉ̃ Saraʼba krĩchabasi iyira bia trã ẽãta, mawũãsidu Jeowaʼa sobiabikĩrãbasi iyi trãbʉdeba, maʉ̃ kʼarea ãba yi jʉrebarima wãi naena deda iyi doba trãbʉ, mawũã ãba yi jʉrebarimae biʼia trãita. Adewara iyi dedabʉde bia akʉbʉ trãbide eda jarabʉra kʼãrẽne abarika bʉta ãba yi jʉrebarimae jara ũrĩbidaimae. Iya jarabʉ: «Naʉ̃ba mʉ̃ra kʼarebabʉ krĩcha ẽ baita mʉ̃ sãwũã trãbʉta, awuarabʉrʉ krĩchaita yi trãbiba kʼãrẽ bedʼea jarabʉta».
Jʉrʉda nekʼãrẽ biʼiabʉta Daizezedebemata
it-1 649
Juwa jiwini, 1
Edaʉde Daizeze Bedʼeadera juwa jiwinira zokʼapanʉ nekʼãrẽ bio jaraita. Bari jaraita jarabʉ Daizezebara iyi juwa jĩwĩniba bʉsita mõgara ʉ̃rʉ 10 bedʼea israelitaraba nekʼãrẽ omarẽã (Éx 31:18; Dt 9:10) akʉza miõba okata osi (Éx 8:18, 19), adewara iyi juwa jiwiniba parãsi bajãta (Sl 8:3). Génesisde nekʼãrẽ naʉ̃ drʉadebʉ ʉ̃rʉ nebʉrabʉdeba kʼawuaseapanʉ bedʼea juwa jiwinibara jarakĩrãbʉta Daizeze jaure zareata. Nama jarabʉ baera «Daizeze jaure zareara jõmaʉ̃mae wãbasi jõma bania ʉ̃rʉ». (Gé 1:2.) Mateode jara ũrĩbibʉ Jesubara angelera zeri ẽãrãra ãĩ bʉesita Daizeze jaure zareadeba. Adewara Lucasde jarabʉ Daizeze juwa jiwiniba osita. (Mt 12:28; Lu 11:20.)
26 FEBRERODEBA-3 MARZO EDA
BEDʼEA BIA DAIZEZE BEDʼEADE ŨDUDATA | SALMO 11-15
Krĩchara bʉra Daizezeba ẽjũã bia weya adade aduʼabʉta
w06 15/5 18 parr. 3
Bedʼea audre yibiata Salmosdebemata (yi nããrabemata)
11:3. ¿Sãwũã wã naʉ̃ drʉara? Ẽbẽrarãba nekʼãrẽ obʉra, opanʉ ley erbʉdeba, nekãrẽ jõma daucha erbʉdeba akʉza kʼawuabʉdeba saʉ̃ta bigata saʉ̃ta biga ẽãta. Naʉ̃ra leydebemata aripe oda ẽ bʉrʉ nekʼãrẽ naʉ̃ drʉadebʉra jõma daucha erba ẽ bayi akʉza yi kayirua awa bayi. Maʉ̃ta mawũã berabarira yi kʼẽrẽpabʉbara Daizeze ʉ̃rʉ ĩjãibara (Salmo 11:4-7).
wp16.4 11
¿Kayirua naʉ̃ drʉadebʉra jõika?
Daizeze Bedʼeaba jarabʉ aranʉbai Daizezebara naʉ̃ ẽjũãnẽ kayiruabʉra jõma ãĩ bʉeita. Dayirãba kʼawuapanʉ naʉ̃ drʉade kayiruabʉbara jʉ̃ãbʉta Daizezeba kʼawua oi ewari zeita akʉza ẽbẽrarã kayirua makenai ewari zeita (2 Pedro 3:5-7). Ẽbẽrarãba zʉbʉria ũdubʉra wuara neẽbayi. Mamina, ¿sãwũã kʼawuapanʉ dayirãba Daizezeba wãrĩnu jõbikĩrãbʉta yi kayiruara?
Daizeze Bedʼeaba jarabʉ Jeowabara jʉrata jõma zʉbʉria oita kãgabʉra (Salmo 11:5). Dayirã parãnabara kãga aduʼa bʼaita akʉza jõma aripe oita (Salmo 33:5; 37:28). Naʉ̃ba ũdubibʉ Daizezebara yi kayiruara jõbita.
w17.08 7 parr. 15
¿Dayirãbara jʉ̃ãkĩrãpanʉka?
15 ¿Davidbara kʼãrẽa ũdubisi jʉ̃ãkĩrãbʉta? Iya maʉ̃ panʉnara ũdupanʉ Salmo 13de. Nama iya Jeowaʼa widida kimare widisi iya bedʼea zroma erbʉra ewari sõbebayeda mawũãbʉta. Akʉza jarasi iyara ĩjãbʉta Jeowa kãga jõka ʉ̃rʉ akʉza sobiabʉta kʼawuabʉ baera iyira Jeowaba bia akʉita. Adewara Jeowaba iyaʼa nebia diaita jʉ̃ãbʉ kʼarea (Sal. 13:5, 6, nota). Davidbara ĩjãbasi Jeowa kãga jõka ʉ̃rʉ. Akʉza iya sobia jʉ̃ãbasi yi kayirua jõbi ewari zeita. Adewara, krĩchabasi Jeowaba iyi sãwũã kʼareba zebʉrʉ ʉ̃rʉ. Maʉ̃ba kʼawuabisi iya jʉ̃ãra, tẽã nebia ũduita.
Daizeze nokʼobara aripe berabaribiyi Daizezeba naʉ̃ ẽjũãita kʼãrẽ oi kãgabʉta
16 Aduʼa bʼaita. Isaías 11:6-9 bayeda jarabʉra aripe berabariyi. Yumakẽrãrata, yuwẽrãrata akʉza wũãwũãrata aduʼapanañi ãyi wãmae. Nedʉwʉrabara ẽbẽrarã neida oẽ bayi, mia ẽbẽrarãba nedʉwʉrãrata neida oẽ bayi. Maʉ̃ aripe berabaribʉrʉdera bʉra bʉyi wãmae bia sentibayi bʉ dedabʉ kĩrãkʼa. Do zromane kuibʉrʉdebida neida berabari ẽ bayi, adewara ode wãnebida neida berabari ẽ bayi akʉza bʉ diamasi ode wãnera kʼãrẽ kʼarea peraira neẽbayi. Ezequiel 34:25ba jarabʉra aripe berabariyi, Daizeze ode panʉrãra drʉa ibʉawabʉde wãbʉrʉdera aduʼapanañi akʉza ãyi oide kʼãĩbʉrʉdebida pera ẽ bayi.
Jʉrʉda nekʼãrẽ biʼiabʉta Daizezedebemata
w13 15/9 19 parr. 12
¿Dayirãba sãwũã krĩchabʉra awuarabʉka?
12 Idi ewadera ẽbẽrarã Pabloba jarada kĩrãkʼa panʉ. Ʉ̃kʉrʉba krĩchapanʉ ãyara nesida ẽãta jaradamarẽã kʼãrẽta oibarata. Nejaradiabari mejãchaʉba akʉza yibari mejãchaʉba iduaribipanʉ ãyi wũãwũãraba odamarẽã ãya kãgata. Adewara ʉ̃kʉrʉ Daizeze ĩjãbʉ apanʉrabida jarapanʉ ãyara oseabʉta ãya kãgata, Daizeze Bedʼeaba jarabʉra kʼãrẽa ũrĩra nesida ẽãta (Sal. 14:1). Mawũã krĩchaira dayirãitara biga ẽ bayi. Dayirãta jʉra kʼawuabʉ ẽ bʉrʉ Daizeze organizasionba nekʼãrẽ omarẽã jarabʉta okĩrã ẽ bayi. Mawũã ẽ bʉrʉ dayirã Daizeze bedʼeadeba ũrãgʼa diabʉdade sãwũã jemenei ʉ̃rʉ, internet sãwũã zokʼai ʉ̃rʉ, mawũã ẽ bʉrʉ unibersida wãi ʉ̃rʉ, maʉ̃ne krĩchaseapanʉ maʉ̃ra ¿wãrĩnu mawũãka?