Joséra Jacob warrabasi. Jacob warrara nããbemarabara ũdusida sãwũã ãyi zeze Jacobʼba audre kãgata Joséta. ¿Bʉmara kʼãrẽta krĩchasi Jacob warrara nããbemarabara? José mebẽrã nããbemarabara mejãcha jʉradebasi Joséra. Ewari aba Joséba nekʼãrẽta kʼãĩmokʼãrãsi. Mõbe maʉ̃ta yi mebẽrã jara ũrĩbisi. Ãya krĩchasida naʉ̃ kʼãĩmokʼãrãbara ãyira ʉ̃ra zeidera José nãã sãkokode bʼaibasita. Maʉ̃ kʼarea audre jʉrasida ãyara Joséra.

Ewari aba José mebẽrã nããbemarãra obejarata akʉbarabasi Siquem pʉwʉrʉ kʼaita. Jacobʼba zokʼa bʉesi yi warra Joséta akʉ wãmarẽã yi mebẽrã nããbemarata. Mamina José mebẽrãba iyi ũdusidade jarasida ãyikʉza: «Jari uru kʼãĩmokʼãrãbarira. ¡Beadadrʉ kʼaʉ̃ra!». Mõbe ãya jidada kʼãrãpe zobea zromane ibalbʉesida. Mamina Judá yi mebẽã ababemaba jarasi: «Bearaidua kʼaʉ̃ra, awuarabʉrʉ nẽdo bʉedadrʉ nezokʼa bamarẽã». Yi mebẽrã wuabemarabara Judába jaradata ũrĩsida. Maʉ̃ne berabari wãbasi ẽbẽrarã Egiptoeda wãta, maʉ̃ra ẽbẽrarã nẽdo bʉesida ãyara Joséra, 20 moneda plata omabari.

Maʉ̃ tẽã, José mebẽrãbara José wuata jidada kʼãrãpe kabra waba surrua jiradaeda kʼãrãpe edesida ãyi zeze Jacobma. Mõbe widisida: «¿Naʉ̃ wuara bʉ warra Joséde ẽka?». Jacobʼba krĩchasi oidebema nedʉwʉrʉba makosita Joséra. Maʉ̃ kʼarea mejãcha krĩcha zroma osi.

Egiptoeda jʉ̃ẽside, nokʼo Potifarba edasi Joséra iyi nezokʼa bamarẽã. Mamina Jeowara Joséʉ̃me basi. Potifarbara ũdusi Joséra bia trajabʉta akʉza ĩjã baseabasita José ʉ̃rʉ. Maʉ̃ kʼarea iya nekʼãrẽ erbʉta diasi Joséba zokʼamarẽã.

Potifar kimabara ũdusi Joséra kĩrãwãreãbʉta, maʉ̃ kʼarea badua jarabasi iyiʉ̃me ãba kʼãĩmarẽã. ¿Kʼãrẽta osi Josébara maʉ̃ kʼarea? Josébara maʉ̃ra ĩjã ẽ basi. Iya jarasi: «Mawũã ẽ mʉ̃a maʉ̃ra obe ẽ. Mʉ̃a maʉ̃ta ora, biga ẽ bayi maʉ̃ra bʉ kimaitara. Bʉ kimara mʉ̃ nokʼo akʉza iya mʉ̃ ʉ̃rʉ ĩjãbʉ, adewara Daizezebida maʉ̃ra bia akʉ ẽ bayi».

Potifar kimabara Joséra erkʼãĩkĩrãbasi ajuerzade. Maʉ̃ba José wãbʉrʉdera wuama jir totosi. Mamina Joséra wẽba wãsi. Potifar deda zebʉrʉdera Potifar kimabara sewa nebʉrata jarasi yi kimara. Jarasi Josébara iyira wawa oibasita. Maʉ̃ kʼarea Potifar mejãcha kĩrʉ kʼãrãpe Joséra karselde eda bʉesi. Mamina Jeowabara kĩrãdua ẽ basi Joséra.

José karselde baside Egipto nokʼora kʼãĩmokʼãrãsi. Mamina paraon kʼãĩmokʼãrãra miõba jarabeda ẽ basi. Maʉ̃ne paraon nezokʼaba jarasi ẽbẽra aba bʉta kʼãĩmokʼãrã aripe jaraseabʉta. Maʉ̃ kʼarea paraonbara jarasi iyidu erjʉ̃ẽnamarẽã Joséra.

Paraonba widisi: «¿Jara ũrĩbiseabʉka mʉ̃ kʼãĩmokʼãrãra?». Joséba jarasi: «Egiptodera mejãchabayi yikota 7 poagabayeda, maʉ̃ tẽã akʉza 7 poaga babʉrʉde jarrabata berabariyi. Maʉ̃ kʼarea jʉrʉda ẽbẽra buru biata maʉ̃ yiko biʼia wuagamarẽã. Mawũã bʉ pʉwʉrʉdebema ẽbẽrarãra jarrababa bei ẽ marẽã». Paraonba jarasi: «¡Mʉ̃a bʉta jʉrʉyi! Mʉ̃arera bʉta yi zromabayi Egiptodera». ¿Josébara sãwũã kʼawuabasi paraonba kʼãĩmokʼãrãda ʉ̃rʉ jaraira? Jeowaba kʼarebabasi baera.

Josébara yikora wuaga jʉ̃drʉsi 7 poagabayeda. Mawũã jarraba zebʉrʉdera yiko bamarẽã. Aramaʉ̃ta jarrabara zesi drʉa jõmaʉ̃nẽ. Ẽbẽrarã pʉwʉrʉ biodebemata wãpanasi Egiptoeda Joséidu yiko edade. Yi zeze Jacobʼbida kʼawuasi Egiptode yikobʉra. Aramaʉ̃ta zokʼasi yi warrara 10bʉta yiko edade wãmarẽã.

Jacob warrarãra wãsi José akʉde, aramaʉ̃ne Josébara waña ũdukʼawuaedasi iyi mebẽrãta. Mamina yi mebẽrãbara ũdukʼawuada ẽ basi Joséra. Iyi warrara baesieda kʼãĩmokʼãrãrada kĩrãkʼa, yi mebẽrãra sãkokode asi José nãã. Josébara kʼawuakĩrãbasi yi mebẽrãba iyira wabida jʉrabasi kʼawuaita. Maʉ̃ kʼarea jarasi: «Marara miaordamiara, naʉ̃ pʉwʉrʉ akʉde zesi zarea neẽbʉ kʼawuaita». Aramaʉ̃ta ãya jarasi: «¡Daira miaordamiara ẽ! Daira Canaánʼnebema. Daira nããrãra 12 mebẽrã panasi, mamina maʉ̃nebemata aba beisi. Dai tẽãbemara dai zezeʉ̃mebʉ». Joséba jarasi: «Weidua mara mebẽã tẽãbemata. Mawũãtrʉ ĩjãñi». Aramaʉ̃ta José mebẽrãra jẽda wãsida yi zeze bʉidʉ.

Akʉza Jacob deda pananarãra yiko jõsi. Maʉ̃ kʼarea Jacobʼbara yi warrarata zokʼasi akʉza wãmarẽã Egiptoeda yiko edade. Mamina naʉ̃nera edesida ãyi mebẽã Benjamínta, iyira ãtotobasi. Joséba kʼawuai baera yi mebẽrã nãã krĩchabadata awuara krĩchabʉ kʼawuaita, eda bʉesi Benjamín kostalde iyi kopa plata omata. Maʉ̃ne jarasi Benjamínba maʉ̃ra zrʉgasita. Maʉ̃ne José nezokʼaraba Benjamín kostalde maʉ̃ kopa ũdusidade yi mebẽrãbara ĩjãna ẽ basi. Maʉ̃ kʼarea ãya widida ʉ̃rʉ widisi ãyitrʉ zʉbʉria omarẽã, mawũã yi mebẽã Benjamínta zʉbʉria oẽ bamarẽã.

Mama ũdusi Josébara yi mebẽrãra ãyi nãã badaira jipa awuarabasita. Mawũã ũdubʉrʉ kʼarea jẽgasi iyira. Mõbe jarasi: «Mʉ̃ra José, mara mebẽã, ¿mʉ̃ zezera wabida zokʼaibʉka?». Maʉ̃ne yi mebẽrãra kĩrãmigasida. Mõbe Joséba jarasi: «Sopʉaraidua maraba mʉ̃ kʼãwũã oda kʼarea, Daizezeba kʼãwũã berabaribisi nainʉ zemarẽã, mawũã kʼarebaita marata beida ẽ bamarẽã. ¡Mesera! Jʉrʉ wãidua mʉ̃ zezeta mõbe nainʉ weidua».

Aramaʉ̃ta yi mebẽrãra mesera wãsi yi zeze bʉidʉ jaraita Egiptode kʼãrẽ berabaridata akʉza yi zeze edeita Egiptoeda. Maʉ̃ne poaga mejãcha berabarida tẽã José yi zezeʉ̃mera jẽda yi ũdusida.