Rebekabara mejãchade kãgabasi Jeowara. Akʉza yi kima Isaabida kãgabasi Jeowara. Naʉ̃ kartade kʼawuadaya sãwũã yi ũdukʼawuasidata ãyira, akʉza kʼawuadaya Jeowara kʼãrẽa sobiabasita Rebeka kʼãrẽa.

Isaa yibarirãra Abraanbasi akʉza Sarabasi. Abraanbara kãgabasi yi warrara juwa jidamarẽã ẽbẽra wũẽrã Jeowa kãgabʉme. Mamina ãyira panasi pʉwʉrʉ Kananmae, mamara mia abaʉ̃ ẽbẽraba odaẽbasi Jeowaba jarabʉra. Maʉ̃ kʼãrẽa zokʼabʉesi iyi nezokʼa Eliezerta wãmarẽã pʉwʉrʉ Aranma. ¿K’ãrẽma zokʼabʉesi? maʉ̃ pʉwʉrʉ Aranmaebasibaera Abraan mebẽrãta, mama Eliezerba kima biata jʉrʉmarẽã Isaaita.

Aramaʉ̃ta Eliezerra Abraan nezokʼarabawara wawara wãsida. Ãyara die kameyode edesida yikota akʉza nekʼãrẽ bia baridiaita. Mamina ¿Eliezerbara sãwũã ũduibasi Isaa kima biabaira? iyara kʼawuabasi ẽbẽra wũẽrãra maʉ̃ pʉwʉwrʉdebemara bania juede wãpanasita pozoidu. Maʉ̃ba ãyi pʉwʉrʉ Aranma jũẽbʉrʉdera, wãsida pozo nʉmʉma. Aramaʉ̃ta Jeowa yiwidʼisi, «mʉa widiya ẽbẽra wũẽrãba mʉa bania diamarẽã. Iya mʉa baniata diara akʉza mʉ kameyora, mawũãra mʉara kʼawuayi bʉa jidasita maʉ̃ ẽbẽra wũẽrãra».

Aramaʉ̃ne, pozoidu deguesi Rebekara. Daizeze Bedʼeabara jarabʉ Rebekara biʼia kĩrãsita. Aramaʉ̃ta Eliezerbara widisi baniata, aramaʉ̃ta iya panʉsi «mõbera bania diaya bʉa akʉza bʉ kameyora». Mamina kameyorãra bania mejãcha dobʉbaera, bania mejãcha jueibarabasi pozodeba. Akʉra yi dibujota ¿Kʼãrẽta onʉmʉ Rebekara?... Iya Rebeka mejãcha trajabʉ ũdubʉrʉba, krĩchasi Jeowaba panʉsita iya wididara.

Maʉ̃ kʼãrẽa Eliezerbara nekʼãrẽ biʼia kiruta diasi Rebekara, aramaʉ̃ta iyara iyideda edesi Eliezerta akʉza yi nezokʼarata, mamara iyira basi yi mebẽrãbawara. Aramaʉ̃ta Eliezerbara jarasi kʼãrẽa zokʼabʉesita Abraanba pʉwʉrʉ Aranma. Akʉza jarasi Jeowaba sãwũã panʉsita iya wididara. Maʉ̃ ũrĩbʉrʉde Rebeka mebẽrãra mejãcha sobiasida. Aramaʉ̃ta jarasida ãyitara kʼãrẽẽãta Isaaʉ̃me juwa jidaira.

¿Bʉmara Rebekara Isaaʉ̃mera juwa jidakĩrãbasika?... Yi mebẽrãba iya widisidadera, iyara jarasi juwa jidakĩrãbʉta. ¿Kʼãrẽa? Rebekabara kʼawuabasi Eliezerra zokʼabʉesita Jeowaba. Maʉ̃ba wãsi Kananma Eliezer kʼaidu, mama jũẽpe, iyira juwa jidasi Isaaʉ̃me.

Rebekabara ũrĩsi Jeowaba jarabʉta maʉ̃ba mejãchade kʼarebasi Jeowabara. Mamina maʉ̃awaẽbasi, akʉza Jesuta ʉ̃tʉ zebisi yi mebẽrãneba. Jeowabara bʉsida kʼarebayi Rebekadekĩrã ũrĩra iyi bedʼeata, mawũãra iyira bʉme sobiabayi.

Krĩchada pʉwʉrʉ Jerikodepanʉta, maʉ̃ra pʉwʉrʉ Kananne bʉ. Mamara ẽbẽrabara Jeowara ĩjãnaẽ. Mamina mamara bʉ yuwẽrã awuarabʉta wuabemarãraira, maʉ̃ trʉ̃ra Raa.

Iyi warraraenaʉ̃ba, Raabara ũrĩbasi Jeowaba kʼãrẽ obadata. Kʼawuasi Jeowaba sãwũã kʼarebasita iyi pʉwʉrʉ Israelta ãyi nejura makenaita. Mawũã berabarisi Jeowaba Moisedeba kʼareba ẽdrʉbiside iyi pʉwʉrʉ Israelitarãra Egitodeba. Puzara (mar Rojo) ẽzadra ewasi obabita iyi pʉwʉrʉ kĩrãbaridamarẽã. Mawũã nʉmʉne Raabara ũrĩsi pʉwʉrʉ Jeriko kʼaitabasita Israelitarãra iyi bʉmae.

Ewariaba diamasi eda jũẽsida Israeldebemata ũme Jeriko pʉwʉrʉ ordade. Ãyira Raa deda topʉesida. Aramaʉ̃ta Raabara jarasi iyideda pikiadamarẽã, maʉ̃ diamasi Jeriko nokʼobara kʼaʉbawasi ũme zesidata pʉwʉrʉ ordade, akʉza maʉ̃rãra Raa deda kʉpanʉta, maʉ̃ kʼãrẽa zokʼabʉesi iyi ne zokʼãrãta maʉ̃ra jʉrʉde. Aramaʉ̃ta ¿Kʼãrẽta osi Raabara? merasi iyi de ʉ̃tre maʉ̃ra zeina, aramaʉ̃ta nokʼora nezokʼa zebʉrʉdera jarasi, ordade zedapeadara jari topoa. Mamina kʼaidu wãnara pẽwãnaña. Mawũã kʼarebasi Raabara Israelitarãra. ¿Kʼawua kĩrãbʉka kʼãrẽa kʼarebasita?... Iya ĩjãbasibaera Jeowata. Akʉza kʼawuabasibaera Israelitarãra Jeowaba kʼarebaita pʉwʉrʉ Kanan diaita.

Raa dedaʉba wãina pʉwʉrʉ ordade zedarabara jarasida, Daizezeba makenabʉrʉde pʉwʉrʉ Jerikota. Bʉta bʉ mebẽrãbawarãra beiẽãsida. Mamina ¿Kʼãrẽta oibarabasi Raabara iyi beiẽbaira?... yi ordade zedarabara jarasida jũkara purruta wueda erbari jirabʉmarẽã, akʉza yi mebẽrãsida ãba jʉredamarẽã jarasi iyi deda. Maʉ̃raba jarada kĩrãkʼa osi Raabara. ¿Kãgaka jaradiamarẽã kʼãrẽta berabarisita maʉ̃ tẽã jʉneãra?...

Maʉ̃ tẽã jʉneã Israelitarãra pʉwʉrʉ Jeriko aʉdu bʉrra wãkʼawasida, ewari juwa kira ara aba (6) bayeda nruemaza kʼãrẽ jaraẽã, mamina ewari juwa kira ara ũme (7) babʉrʉdera, ãyira pʉwʉrʉ Jeriko aʉdu juwa kira ara ũmebayeda bʉrrasida, aramaʉ̃ta ãyira jõmaʉ̃ta mejãcha jʉʉrasida, maʉ̃ne Jeowaba osi Jerikode denʉmera jõma tegezoamarẽã. Mamina ¿Sãwũãsi Raa dera? jũkara purruta wueda erbari jirabasibaera tegezoaẽbasi. ¿Ũdubʉka dibujode jũkara purru erbari jirabʉra?... Mawũã beudaẽbasi Raara yi mebẽrãbawara.

¿Kʼãrẽta kʼawuaseabʉ Raadebara?... Iyara kʼawuabasi Daizezeba kʼarebaita, maʉ̃ kʼãrẽa soiduba ĩjãbasi Jeowara. Iya ũrĩbisidade Jeowaba nebia zroma obʉ ʉ̃rʉ maʉ̃ba kʼarebasi iya Jeowa audre ĩjãita. Bʉabida nemejãcha kʼawuanʉmʉ Jeowa ʉ̃rʉ. ¿Ũrĩka Jeowaba jarabʉra Raade kĩrãkʼa?... Ũrĩñi.