Krĩchada pʉwʉrʉ Jerikodepanʉta, maʉ̃ra pʉwʉrʉ Kananne bʉ. Mamara ẽbẽrabara Jeowara ĩjãnaẽ. Mamina mamara bʉ yuwẽrã awuarabʉta wuabemarãraira, maʉ̃ trʉ̃ra Raa.

Iyi warraraenaʉ̃ba, Raabara ũrĩbasi Jeowaba kʼãrẽ obadata. Kʼawuasi Jeowaba sãwũã kʼarebasita iyi pʉwʉrʉ Israelta ãyi nejura makenaita. Mawũã berabarisi Jeowaba Moisedeba kʼareba ẽdrʉbiside iyi pʉwʉrʉ Israelitarãra Egitodeba. Puzara (mar Rojo) ẽzadra ewasi obabita iyi pʉwʉrʉ kĩrãbaridamarẽã. Mawũã nʉmʉne Raabara ũrĩsi pʉwʉrʉ Jeriko kʼaitabasita Israelitarãra iyi bʉmae.

Ewariaba diamasi eda jũẽsida Israeldebemata ũme Jeriko pʉwʉrʉ ordade. Ãyira Raa deda topʉesida. Aramaʉ̃ta Raabara jarasi iyideda pikiadamarẽã, maʉ̃ diamasi Jeriko nokʼobara kʼaʉbawasi ũme zesidata pʉwʉrʉ ordade, akʉza maʉ̃rãra Raa deda kʉpanʉta, maʉ̃ kʼãrẽa zokʼabʉesi iyi ne zokʼãrãta maʉ̃ra jʉrʉde. Aramaʉ̃ta ¿Kʼãrẽta osi Raabara? merasi iyi de ʉ̃tre maʉ̃ra zeina, aramaʉ̃ta nokʼora nezokʼa zebʉrʉdera jarasi, ordade zedapeadara jari topoa. Mamina kʼaidu wãnara pẽwãnaña. Mawũã kʼarebasi Raabara Israelitarãra. ¿Kʼawua kĩrãbʉka kʼãrẽa kʼarebasita?... Iya ĩjãbasibaera Jeowata. Akʉza kʼawuabasibaera Israelitarãra Jeowaba kʼarebaita pʉwʉrʉ Kanan diaita.

Raa dedaʉba wãina pʉwʉrʉ ordade zedarabara jarasida, Daizezeba makenabʉrʉde pʉwʉrʉ Jerikota. Bʉta bʉ mebẽrãbawarãra beiẽãsida. Mamina ¿Kʼãrẽta oibarabasi Raabara iyi beiẽbaira?... yi ordade zedarabara jarasida jũkara purruta wueda erbari jirabʉmarẽã, akʉza yi mebẽrãsida ãba jʉredamarẽã jarasi iyi deda. Maʉ̃raba jarada kĩrãkʼa osi Raabara. ¿Kãgaka jaradiamarẽã kʼãrẽta berabarisita maʉ̃ tẽã jʉneãra?...

Maʉ̃ tẽã jʉneã Israelitarãra pʉwʉrʉ Jeriko aʉdu bʉrra wãkʼawasida, ewari juwa kira ara aba (6) bayeda nruemaza kʼãrẽ jaraẽã, mamina ewari juwa kira ara ũme (7) babʉrʉdera, ãyira pʉwʉrʉ Jeriko aʉdu juwa kira ara ũmebayeda bʉrrasida, aramaʉ̃ta ãyira jõmaʉ̃ta mejãcha jʉʉrasida, maʉ̃ne Jeowaba osi Jerikode denʉmera jõma tegezoamarẽã. Mamina ¿Sãwũãsi Raa dera? jũkara purruta wueda erbari jirabasibaera tegezoaẽbasi. ¿Ũdubʉka dibujode jũkara purru erbari jirabʉra?... Mawũã beudaẽbasi Raara yi mebẽrãbawara.

¿Kʼãrẽta kʼawuaseabʉ Raadebara?... Iyara kʼawuabasi Daizezeba kʼarebaita, maʉ̃ kʼãrẽa soiduba ĩjãbasi Jeowara. Iya ũrĩbisidade Jeowaba nebia zroma obʉ ʉ̃rʉ maʉ̃ba kʼarebasi iya Jeowa audre ĩjãita. Bʉabida nemejãcha kʼawuanʉmʉ Jeowa ʉ̃rʉ. ¿Ũrĩka Jeowaba jarabʉra Raade kĩrãkʼa?... Ũrĩñi.

¿Kʼawuabʉka bʉara kʼaita naʉ̃ dibujode ẽbẽra wũẽrãzake ũdubʉra?... Daizeze Bedʼeabara jaraẽ yi trʉ̃ra, mamina jarabʉ yi zeze trʉ̃ra Jetebasita. Jeowata Jeteʉ̃mera mejãcha sobiasida iya oda kʼãrẽa ¿Kʼawua kĩrãbʉka Jete ʉ̃rʉ akʉza yi kaʉ ʉ̃rʉ?

Jetera ẽbẽra biabasi. Adewara ewari mejãcha berabaribasi yi kaʉʉ̃me Jeowa ʉ̃rʉ jaradiaita. Akʉza iyira buru biabasi maʉ̃ daʉcha kʼawuabasi sãwũã zokʼaita pʉwʉrʉra, maʉ̃ kʼãrẽa Israelitarabara jarasida ¿Dai nokʼobaika dai kʼareba yõedaita?

Maʉ̃ kʼãrẽa Jetebara widisi Jeowa kʼarebamarẽã ãyi yõbʉrʉde aduaẽbaita. Iya jarasi Jeowa daita aduabiẽbʉrʉ, naʉ̃ta oita. Mʉ deda jĩruya jũẽbʉrʉde, yi naara orrabʉrʉta Jeowa diaita. Mawũẽrã yi naa orrazedabara ¿Kʼãrẽta oibarabasi? maʉ̃ ẽbẽrarã tabernakulode baibasi akʉza ewari jõmaʉ̃nẽ trajabaibasi Daizezeita. Maʉ̃ tabernakulo edara ẽbẽrarã wãpanasi Jeowaita trajaita. ¿Jetera aduebasika ãyi yõsidera? aduẽbasi. Iyi jĩruya iyi deda zesidera ¿Kʼawuabʉka kʼaiba naara orrasita?...

Yi kaʉ abapaikirʉba, mawũẽra Jetebara dia bʉeibarabasi tabernakulode bamarẽã. Maʉ̃ba mejãcha krĩchabisi, mamina iya yi jaramabasi Jeowa diaita ¿Kĩrãbebʉka? maʉ̃ba yi kaʉbara jarasi, zeze bʉa Jeowa jaradara oibara.

Yi kaʉsida naarãra krĩchasi osi ¿Kʼãrẽa? tabernakulodera juwa jidabeẽbasibaera akʉza wũãwũã erbabeẽbasibaera. Mamina iyara okĩrãbasi yi zezeba Jeowa jaradata, akʉza Jeowata iyime sobiabamarẽã kãgabasi. Maʉ̃ta audre yibiabasi iyitara wũãwũã erbaibadabara akʉza juwajidaibadabara. Maʉ̃ba wãsi tabernakulo eda mama ewari jõmaʉ̃nẽbasi iyi beiyeda.

¿Bu mara Jeowata Jeteʉ̃mera sobiapanaẽbasika iyi kʼãrẽara?... Sobiapanasi, bʉabida Jete kaʉde kĩrãkʼa oseabʉ, bʉa ũrĩbʉbʉrʉ akʉza Jeowata kãgabʉbʉrʉ, maʉ̃ba iyira bʉ kʼãrẽa sobiabayi. Akʉza bʉ yibarirasida sobiapanañi.