Nekʼãrẽ parãbʉdeba bʉ wũãwũãra Jeowa ʉ̃rʉ jaradiara

1. ¿Yibarirabara kʼãrẽta omarẽã kãgabʉ ãyi wũãwũãraba?

YIBARIRÃRA, kʼawuapanʉ marara zarea opanʉta mara wũãwũãra jaradiaita Jeowa kãgamarẽã. Mawũẽra Jeowara yãrãba ũduka. Mamina, ¿kʼãrẽta odaibara mara wũãwũãba Jeowata wãrĩnu chuta kʼawua bamarẽã akʉza iyita kãgamarẽã? (Sant. 4:8).

2. ¿Yibarirabara sãwũã jaradiaseabʉ ãyi wũãwũãra Jeowa sãwũãbʉ ʉ̃rʉ?

² Wũãwũãrata Jeowa kʼawa bamarẽã kãgabʉbʉrʉ Daizeze Bedʼeata jaradiaibara (2 Tim. 3:14-17). Mamina maʉ̃ awaʉba kʼawua ẽ Jeowa ʉ̃rʉra, Daizeze Bedʼeabara jarabʉ maʉ̃ awuarabʉta nekʼãrẽ Jeowa ʉ̃rʉ kʼawuaita. Proverbios librode jarabʉ zeze abaʉba yi warra jarasita kĩrãdua ẽ bamarẽã Jeowaba nekʼãrẽ bia ũdubibʉta iya nekʼãrẽ parãnaneba (Prov. 3:19-21). Kʼawuadaya sãwũã yibariraba ãyi wũãwũã jaradiaseabʉta Jeowa ʉ̃rʉ iya nekʼãrẽ parãnaneba.

¿SÃWŨÃ ZOKʼASEABɄ NEKʼÃRẼ PARÃNARA BɄ WŨÃWŨÃRA JARADIAITA?

3. ¿Sãwũã kʼarebaseabʉ yibarirabara ãyi wũãwũãra?

³ Daizeze Bedʼeaba jarabʉ Jeowa ʉ̃rʉ «nekʼãrẽ jõma iya parãnaneba, ũdubʉ iyi nebiata» (Rom. 1:20). Mara wũãwũãrabawara ode wãne akʉza ewaradepanʉne jaradiara nekʼãrẽ parãnaneba Jeowa sãwũãbʉ ʉ̃rʉ. Atia akʉdaya kʼãrẽta kʼawuaseabʉta yibarirabara Jesu yizadeba.

4. Mara wũãwũãra Daizeze ʉ̃rʉ jaradiabʉrʉdera, ¿sãwũã Jesude kĩrãkʼa oseapanʉ? (Lucas 12:24, 27-30).

⁴ Akʉra Jesuba sãwũã zokʼasita nekʼãrẽ parãnara wuabema nekʼãrẽ jaradiaita. Ewari aba Jesuba jarasi iyi kʼaidubemara akʉmarẽã semirata akʉza nepono liriorata (akʉra Lucas 12:24, 27-30). Jesura bedʼeaseabasi badu nedʉwʉrʉ ʉ̃rʉ akʉza badu nepono ʉ̃rʉ, mamina iyi kʼaidupanʉraba ũdukʼawuabʉ ʉ̃rʉ bedʼeasi. Jesu kʼaidubemarabara akʉpanasibaibara semira sãwũã wãbaribʉta akʉza neponora sãwũã ponobʉta. Krĩchara sãwũã Jesuba iyi bedʼeanʉmʉena juwa su jaradiabasita maʉ̃ra nedʉwʉrʉra ʉ̃rʉ akʉza nepono ʉ̃rʉ. Maʉ̃neba Jesubara jaradiasi iyi kʼaidubemara Jeowabara nekʼãrẽ diakĩrãta akʉza ẽbẽra biata: Jeowabara yiko diayi iyi ode kʼẽrẽpapanʉra semi nediabʉ kĩrãkʼa akʉza iyi ode panʉrãra wua jʉ̃biyi nepono kĩrãwãreãbʉ kĩrãkʼa. ¿Sãwũã zokʼasi Jesubara nekʼãrẽ parãnara iyi kʼaidubemara nekʼãrẽ jaradiaita?

5. ¿Kʼãrẽneba jaradiaseabʉ yibarirabara Jeowa ʉ̃rʉ jaradiaita?

⁵ Bʉra bedʼeaseabʉ bʉ wũãwũãʉ̃me Jeowaba nekʼãrẽ parãna bʉa kãgabʉ ʉ̃rʉ, bakuru ʉ̃rʉ, nepono ʉ̃rʉ akʉza nedʉwʉrʉ ʉ̃rʉ. Mawũã obʉrʉde zarea ora ũdubita naʉ̃ba sãwũã jaradiabʉta Jeowa sãwũãbʉ ʉ̃rʉ. Tẽã bʉ wũãwũã widiseabʉ iya kʼãrẽ nedʉwʉrʉta mawũã ẽ bʉrʉ kʼãrẽ neponota kãgata, mawũã ora audre ũrĩkĩrãñi Jeowaba kʼãrẽ nebia erbʉ ʉ̃rʉ.

6. ¿Kʼãrẽ yiza biata diabʉ Christopher papabara?

⁶ ¿Yibarirabara mejãcha estudiaibaraka nedʉwʉrʉ ʉ̃rʉ ãyi wũãwũãra jaradiai naweda? Mawũã mejãcha estudiaira nesida ẽ, Jesubara mejãcha jara ũrĩbi ẽ basi semira sãwũãbʉ ʉ̃rʉ, nepono liriora sãwũãbʉ ʉ̃rʉ. Edaʉde biga nekʼãrẽ parãna sãwũãbʉ ʉ̃rʉ bedʼeaita mamina audre bigabayi widita, mawũã ẽ bʉrʉ wiña bedʼeaita wũãwũãraba audre bia ũrĩmarẽã. Krĩchara Christopherba jaradata: «Mʉ̃ papa nekʼãrẽ parãna ʉ̃rʉ bedʼeabʉrʉdera, mejãcha bedʼea ba ẽ basi, iya jarabasi: ‹Akʉra jari katuma zromata, ¿kaʉ̃ra yi zroma ẽka? Jeowasida yi zromabaibara›, mawũã ẽ bʉrʉ pusa akʉbarabʉde jarabasi: ‹Kaʉ̃ pusa marazara kʼãrẽba zarea barabʉ, Jeowasida kʼãwũã zareabʉbaibara›». Christopherba jarabʉ: «Mʉ̃ papabara zokʼa ba ẽ basi yiza daya ũrĩta zareabʉta, naʉ̃ba kʼarebasi daiba Jeowa ʉ̃rʉ audre kʼawuaita».

7. ¿Sãwũã kʼarebaseabʉ mara wũãwũãraba krĩchadamarẽã Jeowaba nekʼãrẽ parãna ʉ̃rʉ?

⁷ Mara wũãwũãra wari wãbʉrʉza jaradiaseabʉ nekʼãrẽ parãnaneba kʼãrẽta jaradiabʉta Jeowa ʉ̃rʉ, adewara Jeowaba nekʼãrẽ jõma parãnanebemata aba jida kʼãrãpe widiseabʉ mara wũãwũã: «¿Kʼãrẽta jaradiabʉ naʉ̃bara Jeowa ʉ̃rʉ?». Mara wũãwũãba kʼawua panʉbʉrʉba marara sobia sentiseabʉ (Mat. 21:16).

¿SÕBEDA ZOKʼASEABɄ NEKʼÃRẼ PARÃNARA MARA WŨÃWŨÃRA JARADIAITA?

8. Israelitarabara ãyi ode wãnera, ¿sãwũã jaradiaseabasi ãyi wũãwũãra Jeowa ʉ̃rʉ?

⁸ Jeowaba jarasi israelitara ãyi wũãwũã jaradiamarẽã Jeowa ʉ̃rʉ ãyi ode wãne (Deut. 11:19). Israelitara ode wãnera ũduseapanasi ibanarata, neponorata, adewara nedʉwʉrʉrata, mawũẽra israelitara ode wãnera nekʼãrẽ mejãcha basi Jeowa ʉ̃rʉ jaradiaita ãyi wũãwũãra. Abarika mara yibarirabida nekʼãrẽ mejãcha erbʉ jaradiaita Jeowa ʉ̃rʉ mara wũãwũãra. Krĩchadaya ʉ̃kʉrʉ yibariraba sãwũã jaradiasidata ãyi wũãwũãra.

9. ¿Kʼãrẽta kʼawuapanʉ Punitha akʉza Katyadeba?

⁹ Mebẽã wẽrã aba yi trʉ̃ Punitha pʉwʉrʉ zroma Indiadebemaba jarabʉ: «Mʉ̃ mebẽrãbawara mea wãbʉrʉdera, mʉa jʉrʉbʉ Jeowaba nekʼãrẽ parãnaneba mʉ̃ wũãwũãra jaradiaita, mʉ̃ wũãwũãrabara audre ũrĩbʉ Jeowa ʉ̃rʉ ẽbẽraneba akʉza pʉwʉrʉdeba jĩgarabʉde, mamara neẽ baera nekʼãrẽ awuru ʉ̃rʉ krĩchaita». Mara wũãwũãraba kĩrãdua ẽ bayi ãyibawara bia berabaridara. Mebẽã wẽrã yi trʉ̃ Katya Moldaviadebemaba jarabʉ: «Mʉ̃a mejãcha kĩrãbebʉ mʉ̃ yibarirabara meabaside sãwũã bia berabaridata, mʉ̃ yibarira biga diabʉ ãya kʼarebasi baera akʉita Jeowaba kʼãrẽ parãnata, maʉ̃neba ũdubisida baera Jeowara wãrĩnubʉta».

10. ¿Kʼãrẽta oseabʉ yibariraita zareabʉbʉrʉ mea wãita? (Akʉra rekuadro «Kʼareba yibariraita»).

¹⁰ Mamina, mea wãbe ẽ bʉrʉ Jeowa ʉ̃rʉ jaradiaita mebẽã yi trʉ̃ Amol Indiadebemaba jarabʉ: «Mʉ̃ bʉmaera mejãcha trajaibara daiba nesidabʉ ũduita, maʉ̃ba mea wãira mejãcha zare platata neẽ baera, mamina parkeda wãseabasi, mama basi baera nekʼãrẽ Jeowaba parãnata adewara maʉ̃neba Jeowa ʉ̃rʉ bedʼeaseabasi». Maraba bia akʉdara mara kʼawuabʉta naʉ̃neba jaradiaseabʉ mara wũãwũãra (Sal. 104:24). Mawũã odara maraba ũduseabʉ ibanarata, neponorata, chiruarata akʉza nedʉwʉrʉrata. Karina Alemanianebemaba jarabʉ: «Mʉ̃ papabara kãga neponota, maʉ̃ba dai ode wãnera iya jarabasi saʉ̃ta nepono biʼia kiruta». Adewara marabara zokʼaseabʉ bideorata, kartarata Jeowaba nekʼãrẽ parãna ʉ̃rʉ bedʼeabʉta mara wũãwũãra jaradiaita, maʉ̃ra dayirã organizasionba oda baera. Kʼãrẽ ẽ mara samabʉta, kʼarebaseabʉ mara wũãwũãraba akʉdamarẽã Jeowaba kʼãrẽ nebiata parãna ʉ̃rʉ. Atia akʉdaya Jeowaba kʼãrẽ nebia erbʉ ʉ̃rʉ, maʉ̃ta bʉ wũãwũãra jaradiaseabʉta.

«NEKʼÃRẼ JÕMA IYA PARÃNANEBA ŨDUBIBɄ IYI NEBIATA»

11. ¿Yibarirabara sãwũã kʼarebaseabʉ wũãwũãraba ũrĩnamarẽã Jeowaba sãwũã kãgabʉta?

¹¹ Wũãwũãra jaradiaita Jeowaba kʼãrẽaba kãgabʉta, jaradiaseabʉ nedʉwʉrʉraba sãwũã bia akʉbʉta ãyi wũãwũãta (Mat. 23:37). Adewara bedʼeaseabʉ Jeowaba nekʼãrẽ kĩrãtana parãna ʉ̃rʉ. Karinaba jarabʉ: «Mʉ̃ papaʉ̃me ode wãne, mʉ̃ papaba jarabasi wiña piki bamarẽã akʉita nepono sãwũã biʼia parãbʉta akʉza neponora kĩrã awuara awuarakabʉta, adewara naʉ̃ba Jeowa kãga sãwũã ũdubibʉta, poaga bio berabarisidu mʉ̃a akʉbʉ nepono sãwũã biʼia parãbʉta akʉza kĩrãtanabʉta. Naʉ̃ba mʉ̃a kĩrãbebibʉ Jeowaba dayirã kʼãrẽaba kãgabʉta».

12. ¿Sãwũã kʼarebaseabʉ yibarirabara wũãwũãraba ũrĩmarẽãra Jeowara buru biata? (Salmo 139:14; akʉra potota).

¹² Jeowara buru bia dayirãira, maʉ̃ kʼarea kʼarebara mara wũãwũãba kʼawuamarẽã Jeowara buru biata (Rom. 11:33). Bari jaraita, jaradiaseabʉ sãwũã baniara ʉ̃ta jãrãrane wãbʉta, mawũã jãrãrane ya wãbʉta ʉ̃tʉra (Job 38:36, 37). Adewara jaradiaseabʉ dayi kakuara sãwũã biʼia parãbʉta (akʉra Salmo 139:14). Krĩchara kʼãrẽta osita mebẽã Vladimirba, iya jarabʉ: «Ewari aba mʉ̃ warra bisikletade wãbasi maʉ̃ta bae kʼãrãpe arrebarisi, mawũãnata ewari bio berabarida tẽã besi, maʉ̃ kʼarea mʉ̃a mʉ̃ kimaʉ̃meba mʉ̃ warraʼa jaradiasi Jeowabara dayi kakuara bia parãsita, dayi kakuara iyidoba ara be bamarẽã, mamina ẽbẽraba parãnara mawũã berabari ẽ. Bari jaraita, karruta ãrĩra maʉ̃ra iyidoba ara oẽ, naʉ̃ba kʼarebasi mʉ̃ warraba ũrĩmarẽã Jeowara buru biata».

13. ¿Sãwũã kʼarebaseabʉ yibarirabara wũãwũãraba ũrĩmarẽã Jeowara zarea barabʉta? (Isaías 40:26).

¹³ Jeowabara jarabʉ ʉ̃ta akʉdamarẽã sãwũã iyi zareaba chĩdaura biʼia erbʉta (akʉra Isaías 40:26). Bʉabida abarika oseabʉ, jaraseabʉ bʉ wũãwũãʼa chĩdauta ʉ̃ta akʉmarẽã, adewara maʉ̃ ʉ̃rʉ bia krĩchamarẽã. Krĩchara mebẽã wẽrã yi trʉ̃ Tingting Taiwánʼnebemaba jaradata: «Ewari aba mʉ̃ papabara edesi mʉ̃ra ewaranʉmʉmae kʼãĩta, mawũã chĩdau bia akʉita, mʉ̃ papaba mawũã edesidera mʉ̃ra kolegiodera bia berabarinʉma ẽ basi, adewara krĩchabasi mʉ̃ra Jeowaʉ̃me kʼẽrẽpa baseabʉ kʼawuaita. Mʉ̃ papabara maʉ̃neba mʉ̃aʼa so zarea diasi, kʼarebasi mʉ̃a kʼawuaita Jeowara kʼãrẽaba zarea barabʉta maʉ̃ chĩdaura parãkʉaita, adewara maʉ̃ zarea zokʼaseabʉta mʉ̃aʼa so zarea diaita mʉ̃ bedʼea zroma berabarinʉmʉ awuantamarẽã. Maʉ̃ mawũã berabarida tẽã mʉ̃ra zarea osi Jeowa ʉ̃rʉ audre kʼawuaita, adewara krĩchabisi Jeowaʉ̃me jipa kʼẽrẽpa bʼaita».

14. ¿Sãwũã zokʼaseabʉ yibarirabara nekʼãrẽ parãna wũãwũãra jaradiaita Jeowara sobiabʉta?

¹⁴ Jeowaba nekʼãrẽ parãnabara ũdubibʉ kãgabʉta wuabema ẽbẽrasida sobiapanamarẽã. Jeowara sobiabʉ baera sientipikorabara akʉbʉ sãwũã nedʉwʉrʉrãra ãyirainʉ jemenebʉta, ibanarata, bedarata (Job 40:20). ¿Ũdubarika mara wũãwũãra ipidabʉta nedʉwʉrʉ zakera jemenebʉ kʼarea? Ãya ũdubaribaibara chiwira zake jʉ̃karaba jemenebʉta akʉza usa zake ãyirainʉ jemenebʉta, ũdubʉdade mara wũãwũã nedʉwʉrʉ zakeba obʉ kʼarea ipidabʉta, ãyaʼa kĩrãbebira Jeowara sobiabʉta (1 Tim. 1:11).

SOBIA PANAIDUA BɄ MEBẼRÃBAWARA JEOWABA NEKʼÃRẼ PARÃNA AKɄBɄDE

15. ¿Kʼãrẽta odaibara yibarirabara wũãwũãraba sãwũã krĩchabʉta jaradamarẽã? (Proverbios 20:5; akʉra potota).

¹⁵ Edaʉde ʉ̃kʉrʉ wũãwũãraita zare yibarira jaraita ãyi sãwũã berabarinʉmʉta akʉza kʼãrẽa krĩcha zroma obʉta, bʉ wũãwũãta mawũã berabarinʉmʉbʉrʉ zarea ora kʼawuaita iya sãwũã krĩchabʉta (akʉra Proverbios 20:5). Ʉ̃kʉrʉ yibariraitara biga ãyi wũãwũãrabawara bedʼeaita mea wãbʉrʉde, ¿kʼãrẽa? Mama neẽ baera nekʼãrẽ awuru ʉ̃rʉ krĩchaita akʉza yibarita yi wũãwũãʉ̃me bia bedʼeadayi, adewara kʼarebaseabʉ mebẽã yi trʉ̃ Masahiko Taiwánʼnebemaba jaradaba: «Mʉ̃ta mʉ̃ wũãwũãrabawara ode wãne, katumane wãne akʉza ewarade wãnera mʉ̃ wũãwũãra mʉ̃me bedʼeakĩrãbʉ, ãyira aduʼapanʉ baera». Katyaba jarabʉ: «Mʉ̃ kolegiodeba ẽdrʉda tẽã mʉ̃ papabara mʉ̃ra parkeda edebasi, mama aduʼabʉ baera mʉ̃ sãwũã sentibʉta mʉ̃ papaʼa jõma jaraseabasi».

16. ¿Sãwũã ãba aduʼa baseapanʉ yi mebẽrãra akʉza sobia baseapanʉ Jeowaba parãna akʉpanʉne?

¹⁶ Jeowaba nekʼãrẽ parãnabara kʼarebaseabʉ mebẽrãra aduʼa bʼaita, sobiapanaita, adewara naʉ̃ba oseabʉ mebẽrãra audre ãbapanamarẽã. Daizeze Bedʼeabara jarabʉ: «Kʼãrẽ oira jõma ewari barabʉ» «ewari ipidaita» akʉza ewari bʉ pinadrʉita (Ecl. 3:1, 4, nota). Jeowaba nekʼãrẽ jõma parãnanebemara ʉ̃kʉrʉta kĩrãwãreã parãsi, dayirãta mama wã kʼãrãpe jemenepanamarẽã akʉza maʉ̃ akʉbʉdeba sobiapanamarẽã. Ʉ̃kʉrʉ mebẽrãra ãba wãkĩrã katumaena, ode ãba wãkĩrã, pusa akʉ wãkĩrã, mawũã ẽ bʉrʉ doeda wãkĩrã, ʉ̃kʉrʉ wũãwũãra parkeda wãkĩrã, ʉ̃kʉrʉba nedʉwʉrʉ zakerata akʉkĩrã, ʉ̃kʉrʉra doeda kuide wãkĩrã. Jeowaba parãnara kĩrãtanabʉ baera daya kãgabʉma wãseabʉ. Mama jʉ̃ẽ kʼãrãpe jemeneita akʉza akʉita Jeowaba sãwũã bia parãnata.

17. ¿Kʼãrẽa yibarirabara kʼarebaibara ãyi wũãwũãrãra sobiapanamarẽã Jeowaba nekʼãrẽ parãnaneba?

¹⁷ Ẽjũã kĩrãwãreãnẽra yibarirata yi wũãwũãrabawara ãba jemenepanañi nedʉwʉrʉrabawara, adewara maʉ̃ kʼarea perada ẽ bayi (Is. 11:6-9). Dayirãra ewari jõmaʉ̃nẽ panai baera ewari erbayi audre bia akʉdaita Jeowaba parãnara (Sal. 22:26). Mamina mara yibaribara jʉ̃ãna ẽ baibara maʉ̃ ẽjũã kĩrãwãreã zeyeda mara wũãwũãra nejaradiaita Jeowaba nekʼãrẽ parãnaneba. Mara wũãwũãra nekʼãrẽ parãnaneba Jeowa ʉ̃rʉ jaradiapanʉbʉrʉ, Davidba jarada kĩrãkʼa jaradayi: «Jeowa, neẽ bʉa parãna kĩrãkʼara» (Sal. 86:8).