¿Krĩchabʉka Jeowaba jarabʉ oira zareẽãta?... Ẽbẽrarã mejãchaʉ̃ba jarapanʉ zareata. Mamina Daizeze Bedʼeaba jaradiabʉ mawũãẽãta. Jaradiabʉ Josia ʉ̃rʉ, iyara nekʼãrẽ jõma obasi Jeowaba jarabʉdebaita. Iyira kʼarebasi neũdukʼawua bia jʉrʉdaba. Kʼawuadaya Josia ʉ̃rʉ akʉza iyi neũdukʼawuara bia erbada ʉ̃rʉ.

Josia zeze trʉ̃ra Amonbasi akʉza iyira pʉwʉrʉ Juda nokʼobasi. Amonra ẽbẽra kayiruabasi akʉza yiwidʼibasi santora. Amon beibʉrʉde, Josiara pʉwʉrʉ Juda nokʼobasi. ¿Sõbe poagabasi Josiara nokʼobabisidadera? poaga ochobasi. ¿Yi zeze kĩrãkʼa ẽbẽra kayiruabasika?... Mawũãẽ ẽbẽra kayiruaẽbasi.

Wiña yiruiduba, Josiara Jeowaba jarabʉta okĩrãbasi. Maʉ̃ kʼãrẽa neũdukʼawua biata jʉrʉsi. Jʉrʉsi ẽbẽra Daizeze kãgapanʉta, akʉza maʉ̃raba kʼarebasida Jeowa bedʼea ũrĩta. ¿Kʼairabasi Josia neũdukʼawuarãra?

Maʉ̃ranebema abara propeta Soponiabasi. Iyara jaraibarabasi naʉ̃ta ẽbẽra Judadebemara, daizeze zeriẽã ũrĩẽã yiwidʼipanʉbʉrʉ bia wãẽbaita ¿Kʼãrẽta osi Josiabara? ¿Ũrĩsika propeta bedʼeara? ũrĩsi, maʉ̃ba Jeowaba jarabʉtrʉ osi, mawũã santo daizeze zeriẽãba jarabʉta oẽbasi.

Josia neũdukʼawua ababemara Jeremiabasi, ãyira poaga abʼarikapanasi, akʉza ãyi warrarabasidera de arakaitapanasi. Jeremiata Josiaʉ̃mera ãyirai yi kʼarebasida Jeowaba jarabʉ oita. Ãyira neũdukʼawua biabasi, maʉ̃ba Josia beisidera Jeremiabara trãbi bʉsi jaraita kʼãrẽãba krĩcha obʉta.

¿Bʉmabida nemejãcha kʼawuaseapanʉ Josiadeba?... Iyara wiña yiruiduba ũrĩkĩrãbasi Daizeze bedʼeara. Maʉ̃ oira nesidabasi neũdukʼawua biara jʉrʉita Jeowa kãgapanʉta. ¿Bʉmabi bʉabida okĩrãbʉ Jeowaba jarabʉra? maʉ̃ba yibia neũdukʼawua bʉ kãgadai jʉrʉita.

Jeowa ʉ̃rʉ jaradiabʉdade, ʉ̃kʉrʉ ẽbẽrarã kĩrubʉ akʉza ipidabʉ dai kʼãrẽa. Maʉ̃bara daira bia sentibiẽ, maʉ̃ba ewari abaʉde dayirãbara krĩchaseabʉ wuara Jeowa ʉ̃rʉ bedʼeaẽbaita. ¿Mawũã krĩcharika?... Daizeze Bedʼeadera jarabʉ yumakẽrã aba basita Jeowa soidu ĩjãbʉta, mamina Jeowa ʉ̃rʉ bedʼeabʉta idubʉ wãbasi. Maʉ̃ trʉ̃ra Jeremiabasi, akʉdaya sãwũã berabarisita.

Jeremia warrarabaside, Jeowaba jarasi jaramarẽã ẽbẽrarã idubʉdamarẽã nemitia obʉta. Maʉ̃ jaraira zarebasi Jeremiaitara, maʉ̃ba perasi. Maʉ̃ kʼãrẽa iyara jarasi Jeowaʼa. Mʉra wabida warrara maʉ̃ba kʼawuaẽ kʼãrẽ jaraisida. Mamina Jeowaba panʉsi, perarãra mʉa kʼarebaya.

Aramaʉ̃ta Jeremiabara pʉwʉrʉʼa jaraka jʉ̃drʉsi. Nemitia opanʉta idubʉdaẽbʉrʉ makiniñi asi. ¿Ãyara ũrĩsidaka?... Ũrĩnaẽbasi, ʉ̃kʉrʉra ipidasida iyi kʼãrẽa akʉza kĩrusida. Adewara beakĩrãsida maʉ̃ kʼãrẽara ¿Sãwũã sentisiba Jeremiara?... Iyira mejãcha perasi maʉ̃ kʼãrẽa jarasi, wuara jaradiaẽãta Jeowa ʉ̃rʉra. Mamina ¿Iyira wãrĩnu Jeowa ʉ̃rʉ bedʼeaẽbasika?... Mawũã oẽbasi. Jeremiabara Jeowa mejãcha kãgabasibaera idubʉẽbasi Jeowa ʉ̃rʉ jaradiaita. Bedʼea zroma erbasimina, maʉ̃ba Jeowabara kʼarebasi iyi nejurãraneba.

Ewariaba Jeremiara ẽbẽra kayiruaraba eibalbʉesida pozode. Maʉ̃ pozora egorobabasi Jeremiara mama eda tawãbasi maʉ̃ daʉcha bania doẽbasi akʉza yiko koẽbasi. Maʉ̃ra ẽbẽrabara kãgapanasi beimarẽã. Mamina ¿Beisika Jeremiara? beiẽbasi Jeowaba kʼarebasibaera ẽdrʉbimarẽã pozodeba.

Naʉ̃ kartade kʼawuabʉda, Jeremia edaʉde perabasimina idubʉẽbasi Jeowa ʉ̃rʉ bedʼeaira. ¿Kʼãrẽta kʼawuaseabʉ Jeremianebara?... Ewari abaʉde ʉ̃kʉrʉ ẽbẽrarã bʉ kʼãrẽa ipidadaita akʉza kĩrunaita Daizeze ʉ̃rʉ jaradiabʉrʉde, maʉ̃ba peraseabʉ. Mamina idubʉrãra Jeowa ʉ̃rʉ bedʼeaita, akʉza kĩrãbera iyara kʼarebaita Jeremia kʼarebada kĩrãkʼa.