Jeowa ʉ̃rʉ jaradiabʉdade, ʉ̃kʉrʉ ẽbẽrarã kĩrubʉ akʉza ipidabʉ dai kʼãrẽa. Maʉ̃bara daira bia sentibiẽ, maʉ̃ba ewari abaʉde dayirãbara krĩchaseabʉ wuara Jeowa ʉ̃rʉ bedʼeaẽbaita. ¿Mawũã krĩcharika?... Daizeze Bedʼeadera jarabʉ yumakẽrã aba basita Jeowa soidu ĩjãbʉta, mamina Jeowa ʉ̃rʉ bedʼeabʉta idubʉ wãbasi. Maʉ̃ trʉ̃ra Jeremiabasi, akʉdaya sãwũã berabarisita.

Jeremia warrarabaside, Jeowaba jarasi jaramarẽã ẽbẽrarã idubʉdamarẽã nemitia obʉta. Maʉ̃ jaraira zarebasi Jeremiaitara, maʉ̃ba perasi. Maʉ̃ kʼãrẽa iyara jarasi Jeowaʼa. Mʉra wabida warrara maʉ̃ba kʼawuaẽ kʼãrẽ jaraisida. Mamina Jeowaba panʉsi, perarãra mʉa kʼarebaya.

Aramaʉ̃ta Jeremiabara pʉwʉrʉʼa jaraka jʉ̃drʉsi. Nemitia opanʉta idubʉdaẽbʉrʉ makiniñi asi. ¿Ãyara ũrĩsidaka?... Ũrĩnaẽbasi, ʉ̃kʉrʉra ipidasida iyi kʼãrẽa akʉza kĩrusida. Adewara beakĩrãsida maʉ̃ kʼãrẽara ¿Sãwũã sentisiba Jeremiara?... Iyira mejãcha perasi maʉ̃ kʼãrẽa jarasi, wuara jaradiaẽãta Jeowa ʉ̃rʉra. Mamina ¿Iyira wãrĩnu Jeowa ʉ̃rʉ bedʼeaẽbasika?... Mawũã oẽbasi. Jeremiabara Jeowa mejãcha kãgabasibaera idubʉẽbasi Jeowa ʉ̃rʉ jaradiaita. Bedʼea zroma erbasimina, maʉ̃ba Jeowabara kʼarebasi iyi nejurãraneba.

Ewariaba Jeremiara ẽbẽra kayiruaraba eibalbʉesida pozode. Maʉ̃ pozora egorobabasi Jeremiara mama eda tawãbasi maʉ̃ daʉcha bania doẽbasi akʉza yiko koẽbasi. Maʉ̃ra ẽbẽrabara kãgapanasi beimarẽã. Mamina ¿Beisika Jeremiara? beiẽbasi Jeowaba kʼarebasibaera ẽdrʉbimarẽã pozodeba.

Naʉ̃ kartade kʼawuabʉda, Jeremia edaʉde perabasimina idubʉẽbasi Jeowa ʉ̃rʉ bedʼeaira. ¿Kʼãrẽta kʼawuaseabʉ Jeremianebara?... Ewari abaʉde ʉ̃kʉrʉ ẽbẽrarã bʉ kʼãrẽa ipidadaita akʉza kĩrunaita Daizeze ʉ̃rʉ jaradiabʉrʉde, maʉ̃ba peraseabʉ. Mamina idubʉrãra Jeowa ʉ̃rʉ bedʼeaita, akʉza kĩrãbera iyara kʼarebaita Jeremia kʼarebada kĩrãkʼa.

¿Zareẽka ewari jõmaʉ̃nẽ dayi yibariraba jarabʉ ũrĩra?... Edaʉde zare, ¿Mawũãẽka? mamina ¿Kʼawuabʉka kʼãrẽba kʼarebaita ãyi bedʼea ũrĩta? akʉra Jesuba obadata. ¿Kʼawuabʉka iya ewari jõmaʉ̃nẽ ũrĩnara Jeowa bedʼeara akʉza yibarira bedʼeara?... Kʼawuadaya audre Jesu sãwũãbada ʉ̃rʉ.

Naʉ̃ egoro eda zeinaẽnara, Jesura ʉ̃tʉbasi yi zeze Jeowaʉ̃me. Mamina nama egorodebaside, iyira yibaribarabasi. Maʉ̃ra trʉ̃ra Josebasi akʉza Mariabasi. ¿Kʼawuakĩrãbʉka sãwũã Jesu yibaribasita maʉ̃rãra?...

Jesu ʉ̃tʉbada nama egorode tomarẽãra, Jeowaba Maria biteda zebisi. Mariabara jedeko nuewebayeda biogo abasi, badu wũãwũã tobari kĩrãkʼa maʉ̃are tosi. Mawũã tosi Mariabara Jesura, iya yi kimaʉ̃meba dapũẽsida.

Jesu poaga dosebaside ũdubisi yi zeze Jeowa mejãcha kãgabʉta. Maʉ̃ra berabarisi Jesu yimebẽrãbawara wãside Jerusalenna. Jẽda deda wãne Joseba Mariaʉ̃mebara kʼawuasida Jesura ãyi kʼawa neẽbasita. Ãya jʉrʉsidamina ũdudaẽbasi badumae, mawũẽra ¿Kʼãrẽta osidaba Joseba Mariaʉ̃mebara?....

Ãyira mesera wãsida Jerusalenma, mama jũẽ karãpe jʉrʉsida ewari ũbeabayeda jõmaʉ̃mae. Maʉ̃ kʼãrẽa ãyira mejãcha krĩcha opanasi, mamina maʉ̃ tẽã ũdusida. ¿Kʼawuabʉka sãma ũdusidata?... Templode yirasi. ¿Kʼãrẽa mamabasi? mamara audre nemejãcha kʼawuaibasibaera Jeowa ʉ̃rʉ. Jesubara yi zeze mejãcha kãgabasibaera okĩrãbasi yi zezeba kãgabʉtrʉ. Jesubara yi zromabasidu ũrĩbasi Jeowa bedʼeara. Iyara ewari jõmaʉ̃nẽ ũrĩbasi, mamina edaʉde zarebasi ũrĩra, basibaera ẽbẽrarã iyi zʉbʉria opanʉta. Bʉmara ¿Jesubara ũrĩsika Jose bedʼeara akʉza Maria bedʼeara?... Daizeze Bedʼeabara jarabʉ iyara ũrĩbasita.

¿Kʼãrẽta kʼawuaseabʉ Jesudebara?... Kʼawuapanʉ ũrĩbarata dayi yibariba jarabʉra, zaremina ¿Ũrĩka bʉara?...