YI 1

Jaradiabʉrʉdera biʼia bedʼea jʉ̃drʉita

Hechos 17:22

JARAKĨRÃBɄ: Wuabemaraba ũrĩne bedʼea jʉ̃drʉibara, biʼia jara ũrĩbira bʉa kʼãrẽ ʉ̃rʉ jaradiakĩrãbʉta akʉza jara ũrĩbira maʉ̃ra kʼãrẽa arigʉ yibiata ãya ũrĩnamarẽã.

SÃWŨÃ OSEABɄ

Jarada ẽbẽramabʉta. Bedʼea widita jʉrʉda, dayi kʼãwũãne berabaridata, bedʼea yiwidi wuabemaraba jarabaramʉ ʉ̃rʉ mawũã ẽ bʉrʉ awuru bedʼea ãya ũrĩkĩrãbʉ ʉ̃rʉ.

Maraba jaradiai naweda biʼia krĩchara wuabemaraba kʼãrẽta kãgabʉta akʉza kʼãrẽta kãga ẽãta, mawũã ẽ bʉrʉ ãyi kʼãrẽba krĩcha obibʉta; maʉ̃ nããra akʉ kʼãrãpe kʼawuabayi sãwũã bedʼea jʉ̃drʉita.
Biʼia jara ũrĩbira bʉa kʼãrẽ ʉ̃rʉ jaradiakĩrãbʉta. Biʼia krĩchara bedʼea jʉ̃drʉbʉrʉde sãwũã ũdubita kʼãrẽ ʉ̃rʉ bedʼeaita akʉza kʼãrẽa maʉ̃ ʉ̃rʉ jaradiakĩrãbʉta.
Ũdubira kʼãrẽa yibiata kaʉ̃ bedʼea bʉa jaradiabʉra. Ẽbẽraba nesidata jara ũrĩbida. Ãyara kʼawuaibara bʉa jaradiabʉbara aba abaka kʼarebaseabʉta.

Bʉa diskurso oita krĩchanʉmʉne, bʉyikʉza krĩchaseabʉ: «¿Mebẽrã mʉ̃ kongregasionera kʼãrẽ bedʼea zromata erpanʉ?». Maʉ̃ jõma krĩcha kʼãrãpe bʉseabʉ sãwũã bedʼea jʉ̃drʉita.