Salomónba zokʼa jʉ̃drʉside Jeowaba widisi: «¿Kʼãrẽta diamarẽã kãgabʉ bʉara?». Salomónba jarasi: «Mʉ̃ra wabida warrara, nekʼãrẽ bia obe ẽ. Mʉ̃ bia okʼãrãpe kʼarebara mʉ̃ buru bia bʼaita, mawũã pʉwʉrʉ bia akʉita». Jeowaba panʉsi: «Bʉa mʉ̃aʼa buru bia widibʉ baera, mʉ̃a bʉra audre buru bia babiyi wuabemara ẽbẽrarãira, adewara diayi mejãcha platata akʉza bʉra poaga biobayi, bʉa mʉ̃ bedʼeata ũrĩra».

Salomónbara parã jʉ̃drʉsi templora. Maʉ̃ templo parãita zokʼasi platata, orota, mõgarata, adewara bakuru biata. Yumakẽrãra mejãchaʉba akʉza yuwẽrãra mejãchaʉba, templota kʼareba parãne wãsida. Templora mapãrasida 7 poaga babʉrʉde. Templo Jeowa diai ewarita zesi, maʉ̃ kʼarea altarde bʉesida oprendarata Jeowaita. Salomónʼra altar kĩrãbita sãkokodekʉbe kʼãrãpe yiwidʼisi: «Jeowa naʉ̃ templodera audre yi zroma ẽ mina, iduaribira daita bʉaʼa nama yiwidʼidamarẽã». Bʉmara, ¿Daizezebara maʉ̃ templora iyita odapeadara kãgasika? ¿Iya ũrĩsika Salomón yiwidʼira? Salomón yiwidʼi berabarida tẽã, ʉ̃tʉba tʉbʉ pʉreata u degue kʼãrãpe maʉ̃ oprendara jõma bawãsi. Jeowabara mawũã ũdubisi mejãcha kãgasita maʉ̃ oprendara. Israelitaraba maʉ̃ ũduside mejãcha sobiasida.

Israel pʉwʉrʉde akʉza pʉwʉrʉra jõmaʉ̃mae, kʼawuasida Salomónʼra buru biabasita. Ẽbẽrarãbara Salomónʼra akʉ wãpanasi ãyi bedʼea zromata ara omarẽã. Nokʼo wẽrã Sabadebemaba akʉ jʉ̃ẽsi Salomónʼra, bedʼea zarea widita. Iya bedʼea wididata Salomónba panʉside naʉ̃ bedʼeata jarasi: «Mʉ̃ara ĩjã ẽ basi mʉ̃aʼa jaradapeadara, mamina mʉ̃a kʼãwũã ũdubʉrʉba jipa wãrĩnu ũdubʉrʉ bʉra buru biata. Bʉ Daizezeba bʉaʼa nekʼãrẽ bia mejãcha diabʉ». Maʉ̃ ewaridera Israeldera nekʼãrẽra jõma biabasi akʉza ẽbẽrarãra jipa sobiapanasi. Mamina tẽã awuara bʼaibasi.

Salomón Daizezeʼa yiwidʼibasidera Israel pʉwʉrʉra aduʼabasi. Mamina Salomónʼra juwa jidasi wẽrãra awuru pʉwʉrʉdebemaraʉ̃me, maʉ̃ra wẽrãrãra daizeze zeri ẽã yiwidʼipanasida. Wiña wiñane Salomónba awuara owãsi baera, daizeze zeri ẽã yiwidʼi jʉ̃drʉsi. Jeowara Salomónʼʉ̃me kĩrʉsi, mõbe naʉ̃ bedʼeata jarasi: «Bʉ mebẽrã nokʼora jãrĩñi, mʉ̃ara nokʼo ũmene ʉ̃tʉ zebiyi. Maʉ̃nebema yi audre yi zromara diayi bʉ nezokʼa abaʉʼa, waya bʉ mebẽrãbara zokʼayi yi audre wikabʉta».

Jeowabara nekʼãrẽ osi mawũã ũdubita iya kʼãrẽ okĩrãbadata. Jeroboán Salomón nezokʼabasi, iya ũdusi ode propeta aba, maʉ̃ trʉ̃ra Ahíyabasi. Maʉ̃ne Ahíyabara iyi wuara 12 kõa deguebisi akʉza Jeroboánʼa jarasi: «Jeowabara Salomón mebẽrãneba jãrĩñi nokʼora, maʉ̃neba nokʼota ũme ʉ̃tʉ zebiyi. Mʉ̃a naʉ̃ wua kõananebemata jidara 10, bʉa 10 tribu ʉ̃rʉ zokʼai baera». Salomónba maʉ̃ ũrĩside Jeroboánʼra beakĩrãbasi baera Jeroboánʼra mĩrʉ wãsi Egiptoeda. Salomón beiside yi warra Rehoboamba zokʼa jʉ̃drʉsi. Maʉ̃ba Jeroboánʼra jẽda wãsi Israelʼeda.

Maʉ̃ tẽã Israeldebema zõrãrãba jarasi Rehoboamʼa: «Bʉa pʉwʉrʉta bia edara, mawũãra pʉwʉrʉrãra bʉme kʼẽrẽpabayi». Mamina iyi neũdukʼawuarata warrarabasi, maʉ̃rabara jarasida: «Bʉara bia eda ẽ baibara pʉwʉrʉrãra akʉza mejãcha trajabira». Rehoboamba ũrĩsi iyi neũdukʼawuaraba jaradara, maʉ̃ba bia eda ẽ basi pʉwʉrʉra. Maʉ̃ kʼarea pʉwʉrʉba Jeroboánta jidasida 10 tribura ʉ̃rʉ zokʼamarẽã. Maʉ̃ra 10 tribu bʉrãra trʉ̃gasida nokʼo Israeldebemata, waya tribu ũmenebemara trʉ̃gasida nokʼo Judádebemata, maʉ̃ra ẽbẽrarã Judádebemara kʼẽrẽpabasi Rehoboamʼʉ̃me. Mawũã Israel tribu 12debemata ũmene drasida.

Rehoboambara zokʼabasi Jerusalénta. Jeroboánbara kãga ẽ basi iyi pʉwʉrʉra wãmarẽã Jerusalénʼena Daizezeʼa yiwidʼita. ¿Bʉara kʼaubuka kʼãrẽa? Iyira perabasi nokʼodeba ãĩ bʉedai kʼarea akʉza Rehoboamʼare bʼai kʼarea. Maʉ̃ba osi paka zake oro omata maʉ̃ne pʉwʉrʉʼa jarasi: «Jerusalénʼra jĩgachu. Nama bʼaidua adewara naʉ̃ paka zake oma yiwidʼidua». Ẽbẽrarãbara ũrĩsi Jeroboánba jaradara, mawũã Daizezedeba jĩga wãsi.