Reperensia Karta nekʼawuabari Bʼaita Kristianora kĩrãkʼa akʉza Trajaita Daizezeita
© 2025 Watch Tower Bible and Tract Society of Pennsylvania
5-11 ENEROBAYEDA
BEDʼEA BIA DAIZEZE BEDʼEADE ŨDUDATA ISAÍAS 17-20
«Naʉ̃ta berabariyi yi dayirã zʉbʉriabibʉra»
w18.06-S 7 parr. 16
«Mʉ̃ra naʉ̃ ẽjũãne Reyta bʼaidʼebema ẽã»
16 Daizeze Bedʼeaba jarabʉ ẽbẽrarã Daizeze odebʉ ẽãra pusa saʉsaʉbari kĩrãkʼabʉta taʉ ẽãta (Is. 17:12; 57:20, 21; Rev. 13:1). Ẽbẽrarã Jeowa odebʉ ẽãra politikade edabʉba, yiya yi jʉrapanʉ akʉza yiya yõpanʉ, mamina Jeowa odebemarãra ãyirara ãba sobiapanʉ aduʼapanʉ. Jeowaba ũdubʉrʉde iyi odebemarata sãwũã ãba sobiapanʉta akʉza aduʼapanʉta arigʉ sobiabʉ, wuabemara kĩrãkʼa panʉ ẽ baera (akʉra Sofonías 3:17).
lff yi 59 punto 1
1. ¿Kʼãrẽa kĩrãmigada ẽ baibara dayirã pẽwãbʉdadera?
4 Daizeze Bedʼeabara jarabʉ: «Yi ẽbẽra jõma Jesukristo bedʼea ĩjãkĩrãbʉra, pẽwãnaña abʉ» (2 Timoteo 3:12). Jesúsʼra pẽwãsida naʉ̃ drʉadebemaba obʉta oẽ basi baera. Abarika dayirãsida naʉ̃ drʉaba obʉta oẽ baera kĩrãmigada ẽ nokʼoraba akʉza religion zeri ẽãraba pẽwãdaimina (Juan 15:18, 19).
ip-1-S 198 parr. 20
Jeowaba jarabʉ kʼãrẽta berabarita ẽbẽrarã
20 Ẽbẽrarã bioʉba bia edada ẽ akʉza wawiata ũdubida ẽ Jeowa odepanʉrãra. Ẽbẽra bioʉba krĩchapanʉ Jeowa odebemarãra awuru religion kĩrãkʼa krĩchapanʉ ẽ baera, maʉ̃ kʼarea ãya krĩchapanʉ zare ẽãta zʉbʉria oira. Mamina Jeowa odebemarabara ĩjãpanʉ aranʉ bai Jeowaba ẽdrʉbita.
Jʉrʉda nekʼãrẽ biʼiabʉta Daizezedebemata
w06-S 1/12 11 parr. 1
Bedʼea audre yibiata Isaíasdebemata (yi nããradebemata)
20:2-5. ¿Isaíasʼra ãkadabasika poaga ũbeabayeda? Nawedara wua ũme jʉ̃panasi aba ʉ̃rʉ, aba edre. Mamina naʉ̃nera jarakĩrãbʉbaibara Isaíasbara wua edrebemabʉrʉ jʉ̃sita, wua ʉ̃rʉbemara jʉ̃ ẽ basita (1 Samuel 19:24).
12-18 ENEROBAYEDA
BEDʼEA BIA DAIZEZE BEDʼEADE ŨDUDATA ISAÍAS 21-23
Sebná berabaridadeba kʼãrẽta kʼawuaseapanʉ
w18.03-S 25 parr. 7-9
Daizezeba kʼẽãbʉde arabʉba ũdubibʉ kʼãrẽaba kãgabʉta
7 Ezequías nokʼobaside yumakẽrã abaʉba iyi deta akʉbasi maʉ̃ yumakẽrã trʉ̃ra Sebnábasi (Is. 22:15). Ewari berabari wãne iyira ʉ̃tabʉta krĩcha wãsi, trajo biata erbʉ baera. Kãgabasi jõmaʉ̃raba iyitrʉ bia akʉdamarẽã. Ũdubibasi wuabemara iya netata jõma erbʉta akʉza osi iyi beibʉrʉde sama joudai biakiruta (Is. 22:16-18).
8 Jeowaba ũdusi baera Sebnáʼra ʉ̃ta krĩchabʉta, iya trajo erbadara diasi awuru yumakẽrã Eliaquimʼa (Is. 22:19-21). Maʉ̃ ewaride nokʼo Senaqueribʼbara zokʼasi yumakẽrãrata Jerusalénʼinʉ wãnamarẽã, mawũã daʉperaita ẽbẽrarã Jerusalénʼnebemata (2 Rey. 18:17-25). Maʉ̃ kʼarea nokʼo Ezequíasbara zokʼasi Eliaquimʼta akʉza Sebnáta bedʼeamarẽã yumakẽrãra Senaqueribʼba zokʼapeadaʉ̃me. Maʉ̃ ewaridera Sebnára nokʼo Ezequías sekretariobasi. Naweda trajo erbasidera audre nekʼãrẽ bio obasi, mamina naʉ̃nera trajo audre nekʼãrẽ wikabʉta obasi. Naʉ̃ba kʼawuabibʉ iyira are kĩrʉ kikibari ẽ basita, awuarabʉrʉ ũdubisita eda krĩchabʉta.
9 Sebnádeba kʼawuapanʉ dayirãta ʉ̃ta krĩchapanʉbʉrʉ, bia wã ẽ baita (Prov. 16:18). Kongregasione bʉa nekʼãrẽ bio obʉ kʼarea wuabemaraba bʉta bia akʉbarabʉbʉrʉ, bʉra zarea ora edabʉta krĩcha bʼaita akʉza biga diara Jeowaʼa diasi baera bʉa kongregasione obʉta (1 Cor. 4:7). Apóstol Pabloba naʉ̃ta bʉsi: «Miõta izhikusa krĩchaidʼe bʼʉ ẽã izhira audre zhi zromata, awuarabʉrʉ izhikusara krĩchaidʼe bʼʉa soidʼu kʼobʼʉba kʼãrẽ oira Daizezebara diasita abʼa abʼaʉa» (Rom. 12:3).
w18.03-S 25 parr. 10
Daizezeba kʼẽãbʉde arabʉba ũdubibʉ kʼãrẽaba kãgabʉta
10 Yi ũmeta, Sebná Jeowaba kʼẽãsidera Jeowabara krĩchasibaibara iyira wãrĩnu awuara ojʉ̃drʉseabʉta (Prov. 3:11, 12). Naʉ̃ra jipade yibia yi kongregasione pribilegio aduadaraita kĩrʉi kaude, awuarabʉrʉ audre krĩchaseabʉ kʼãrẽta oseabʉta Jeowa kʼarea ãya. Akʉza akʉibara Jeowaba ãyi kʼẽãbʉrʉdera mawũã kãga ũdubibʉta akʉza kĩrãbedaibara dayirãta kʼẽrẽpabʉbʉrʉ, Jeowabara nebiata ũdubita (akʉra 1 Pedro 5:6, 7). Jeowabara dayirã yi kʼarebabikĩrãpanʉ mawũã iya kãgabʉde panaita.
w18.03-S 26 parr. 11
Daizezeba kʼẽãbʉde arabʉba ũdubibʉ kʼãrẽaba kãgabʉta
11 Yi ũbeata, Jeowaba Sebná kʼẽãnaba nekʼãrẽ biata jaradiabʉ yibarira akʉza zõrãrã kongregasionebema. Jeowaba kʼẽãbʉba ũdubibʉmina iyara jʉrata kayiruara, bari maʉ̃ awa ũdubibʉ ẽ akʉza ũdubibʉ iyara kãgata ẽbẽrarã. Jeowabara akʉzade akʉbʉ ẽbẽrarãba nebia erbʉta. Mawũẽra daya kʼẽãibarabʉrʉ awuruta, dayikʉza krĩchaibara: Mʉ̃a wuabemara kʼẽãbʉrʉdera, ¿Jeowaba obʉ kĩrãkʼa obʉka? (Judas 22, 23).
Jʉrʉda nekʼãrẽ biʼiabʉta Daizezedebemata
w20.12-S 09 parr. 5
Pabloba jarasi mebẽrã ʉ̃kʉrʉra bia krĩchapanʉ ẽãta: beidarata jẽda piradrʉda ẽ bʉrʉ, «ne kodrʉ akʉza ne dodrʉ nrʉema bei baera». Naʉ̃ra dããra wedaʉba kʼãwũã jara zebʉda. Pabloba naʉ̃ra jarasibaibara Isaías 22:13de jarabʉta. Kaʉ̃ne jara ũrĩbibʉ israelitarabara ãya kãgata opanasita Daizeze kʼawa bʼaita audre jʉrʉi kaude, idi ẽbẽrarã panʉ kĩrãkʼa. Israelitarabara jarapanasi: sobia bʼaidua dayirã bebʉra drazo ẽ baera. Mamina dayirãba kʼawuapanʉ israelitarãra bia wã ẽ basita (2 Cró. 36:15-20).
19-25 ENEROBAYEDA
BEDʼEA BIA DAIZEZE BEDʼEADE ŨDUDATA ISAÍAS 24-27
Kʼaʉ̃ Daizezera
cl-S 15 parr. 21
Akʉidua kʼaʉ̃ Daizezera
21 ¿Bʉa ũdubarika wũãwũã abaʉba yi neũdukʼawuara jarabʉta kaʉ̃ra mʉ̃ zeze? Iyira ipidabʉ mejãchade sobiabʉ baera yi zeze kʼarea. Iyabaʉ Jeowa odepanʉrasida, mawũã sobiapanʉ. Daizeze Bedʼeade jarabʉ ewari zeita Jeowa ʉ̃rʉ Kʼawuabipanʉrãba jaraita: akʉidua kʼaʉ̃ Daizezera (Isaías 25:8, 9). Dayirãba audre ũdukʼawuabʉrʉde Jeowa nebia ʉ̃rʉ, audre sobiapanañi, dayirãbara zeze biata erpanʉ baera naʉ̃ drʉade.
w24.12 6 parr. 14
Kʼãrẽta kʼawuapanʉ Jesúsba panta diadadeba
14 Jesúsba jaradiasi dayirãra yiwidʼi bamarẽã nrʉemaza yikota dia bamarẽã, adewara jaradiasi yiwidʼimarẽã Daizezeba krĩchabʉta aripe berabarimarẽã ʉ̃tʉ akʉza nama egorode (Mat. 6:9-11). Daizeze Bedʼeabara jarabʉ drʉa biadera mejãcha bʼaita yikora. Bari jaraita, Isaías 25:6-8 bayeda jarabʉ yiko warrara mejãcha bʼaita ẽbẽrarãta sobia bamarẽã. Akʉza Salmo 72:16ba jarabʉ: «Bayi mejãcha netata naʉ̃ drʉade, katuma ʉ̃rʉra audre bayi». Adewara bʉa uba ubʉrʉba binota doyi, mawũẽra, ¿bʉara drʉa kĩrãwãreãnẽra kʼãrẽ yiko warrata wia kokĩrãbʉ? (Is. 65:21, 22). Maʉ̃ nebiara bʉa abapaiba ũdu ẽ bayi.
w25.01 28, 29 parr. 11, 12
¿Kʼãrẽ nebiata ũdupanʉ Jeowaba kãga ũdubibʉdeba?
11 Jipade yibiabayi ẽjũã kĩrãwãreãnẽ panaita, kayata akʉza beita neẽ bʼai baera (Is. 25:8; 33:24). Ẽjũã kĩrãwãreã zebʉrʉdera Jeowabara dayirãba oita krĩchabʉta obiyi, maʉ̃ba bʉyikʉza krĩchara kʼãrẽta okĩrãbʉta ẽjũã kĩrãwãreã zebʉrʉde, ¿nekʼãrẽ za kʼawuakĩrãbʉka? ¿Dibuja kʼawuakĩrãbʉka? Adewara ẽjũã kĩrãwãreãnẽra nesidayi ẽbẽrarã ne u kʼawuabʉrata, yiko okʼawuabʉrata, erramientara okʼawuabʉrata, de parã kʼawuabʉrata akʉza neponora u kʼawuabʉrata (Is. 35:1; 65:21). Ẽjũã kĩrãwãreã zebʉrʉdera bʉa ewari mejãcha erbayi bʉya kãga ʉ̃rʉ kʼawuaita.
12 Ẽjũã kĩrãwãreã zebʉrʉdera dayirãbara ẽbẽrarã beida jẽda piradrʉbʉrʉra bia edadayi (Hech. 24:15). Akʉza audre ũdukʼawuadayi Jeowata adewara iya nekʼãrẽ parãnata (Sal. 104:24; Is. 11:9). Adewara ẽjũã kĩrãwãreã zebʉrʉdera dayirãra nemitia okabayi, maʉ̃ba audre biʼia odayi Jeowaba zokʼabʉta akʉza kʼãrẽa dayirã nemitia kĩrãduamarẽã widira neẽbayi mawũẽra, ¿bʉmara yibia bʼaika mawũã ewari jõmaʉ̃nẽ sobia bʼaita aduaita bari atia sobia bʼai kʼarea? Mawũã ẽ (Heb. 11:25). Dayirãba nebia zei jʉ̃ãbʉra, aranʉ bʼai wãrĩnu berabariyi, wãrĩnu zeyi maʉ̃ nebiara, maʉ̃ba yibiabayi nekʼãrẽ jõma oita dayirãba maʉ̃ nebia ũduita. Dayirãbara maʉ̃ nebiara ũduseabʉ Jeowaba dayirãta mejãcha kãga baera akʉza yi Warrata dayirã bari beimarẽã zokʼasi baera.
Jʉrʉda nekʼãrẽ biʼiabʉta Daizezedebemata
w25.05 12 parr. 15
Jeowaba bʉaʼa so zarea diabʉ
Jeowabara judiora jarasi kʼãrẽta odaibarata maʉ̃ ewari zebʉrʉde. Isaías librode naʉ̃ta jarasi: «Eda wãidua mayi deda aramaʉ̃ta puertara serraidua. Mama eda mĩrʉ totoidua, naʉ̃ jõma berabariyeda» (Is. 26:20). Nokʼo Ciroba Babilonia iyi juwa edre baebiside, judiorabara naʉ̃ testoba jarabʉ kĩrãkʼa osidabaibara. Ẽbẽra griego nekʼãrẽ berabarida ʉ̃rʉ mejãcha kʼawuabʉba jarasi, Ciro Babiloniainʉ jʉ̃ẽsidera iyi gorogorora jarasita yi ẽbẽrarã ewarade ũdubʉrʉrãra beadamarẽã. Maʉ̃nera ẽbẽrarã Babilonianebemarãra mejãcha perapanasibaibara, mamina judiora mama pananara neida berabari ẽ basi Jeowaba jaradata ũrĩsida baera.
26 ENERODEBA–1 FEBRERO EDA
BEDʼEA BIA DAIZEZE BEDʼEADE ŨDUDATA ISAÍAS 28, 29
Bari jararãra Jeowa ʉ̃rʉ ĩjãbʉta awuarabʉrʉ wãrĩnu oũdubira
ip-1-S 299 parr. 23
Isaíasba jarasi kʼãrẽta oita Jeowaba nokʼora religionʼranebemata
23 Nokʼora religionebemarabara jarapanasi ãyira Daizeze kʼawabʉta, wãrĩnubaira mawũã ba ẽ basi. Ãyara ẽbẽrarã jaradiapanasi ãyima biga kĩrãkʼabʉtrʉ. Mia iduaribida ẽ basi Judádebema ẽbẽrarãta Daizeze kʼawa bamarẽã. Maʉ̃ kʼarea Jeowaba jarasi nokʼora religion Judádebemara kʼawua oita. Jeowaba jarabʉ: «Naʉ̃ pʉwʉrʉbara bari bedʼeaba mʉ̃ kʼawabʉta jarabʉ akʉza bari iba ibia bedʼeabʉ mʉ̃ ʉ̃rʉ mamina wãrĩnubaira ãyi sora mʉ̃mebʉ ẽ. Adewara ãyara mʉ̃aʼa wawia ũdubibʉ opanʉ baera ẽbẽraba zokʼabʉta, opanʉ baera ẽbẽraba jaradiabʉta» (Isaías 29:13, 14). Maʉ̃ kʼarea Jeowabara naʉ̃ra nokʼora religion Judádebemara makenamarẽã zokʼasi Babilonioraba. Siglo nããbemane Jeowabara iyabaʉ makenabisi religion zeri ẽãrãra. Aranʉ abarika jõbiyi religion zeri ẽã idibʉra (Mateo 15:8, 9; Romanos 11:8).
w21.05-S 9 parr. 7
Yi aripe opanʉrãra nekʼãrẽ badua yi baebi ẽ
7 Jesúsbara pera ẽã jarasi nokʼora religionebemarabara bia opanʉ ẽãta, ãyitara audre yibiabasita juwa sʉgʉita ãyi yibarira akʉi kaude. Jesús kʼaidubemarabara Jesúsʼa jarasida pariseorãra iyiʉ̃me kĩrʉsita, maʉ̃ kʼarea Jesúsba jarasi: «Mʉ Zeze ʉ̃trebemaba u ẽbadʼara izha ẽũkuaya». Akʉza jarasi: «Krĩcha oraidua ãyi kʼarea. Ãyira yi nãã edebari ũdu ẽã bʉ, maʉ̃ba yi ũdu ẽã bʉba edera abarika yi ũdu ẽã bʉta, eda zobeade baedayi» (Mat. 15:11-14). Nokʼora religionʼranebemara Jesúsʼʉ̃me kĩrʉsidamina, Jesúsbara mawũãsidu idubʉ ẽ basi wãrĩnu ʉ̃rʉ jaradiabʉra.
w24.06 10 parr. 8
Jeowa de karpade panadrʉ ewari jõmaʉ̃nẽ
8 Ẽbẽra abaʉba wuabemara kĩrãbitabʉde ũdubira iyira Daizezeba zokʼabʉdebʉta, mamina iyi dobabʉde Daizezeba zokʼabʉdebʉ ẽ bʉrʉ, maʉ̃ ẽbẽrabara soiduba wãrĩnuta jarabʉ ẽ (Is. 29:13). Iya obʉra kayirua, dayirãra maʉ̃ kĩrãkʼa bakĩrãpanʉ ẽ. Ẽbẽra abaʉba mawũã ora tẽã juneane krĩcha zeseabʉ Jeowaba nekʼãrẽ omarẽã zokʼabʉra bigabʉ ẽãta (Sant. 1:5-8). Maʉ̃ ẽbẽrabara nekʼãrẽ aña owãseabʉ wiña wiñane, iya mawũã nekʼãrẽ wiña aña oda tẽã ũdura iya kʼãrẽ bedʼea zroma ũdu ẽãta, tẽã juneanera audre kayirua zromata oseabʉ. Maʉ̃ ẽbẽrama iya Jeowaba kãgabʉta obʉ kĩrãkʼabʉmina, Jeowabara bia akʉ ẽ bayi iyira (Ecl. 8:11). Mamina dayirãbara nekʼãrẽ jõmaʉ̃nẽba ũdubikĩrãpanʉ soiduba jarapanʉta wãrĩnuta.
Jʉrʉda nekʼãrẽ biʼiabʉta Daizezedebemata
w23.12 15 parr. 3
Daizezeba krĩchabʉ kĩrãkʼa krĩchaidua itua doi ʉ̃rʉ
¿Mʉ̃ara ituara dobʉka wuabemara ũdubita mʉ̃ra jipa zareabʉta? Ʉ̃kʉrʉ kulturadera ituara mejãcha dopanʉ akʉza maʉ̃ra bia akʉpanʉ (1 Ped. 4:3). Mamina akʉra 1 Corintios 16:13ba jarabʉta: «Ʉrʉma bʼaidua, zarea ĩjãidua, zowaĩnĩgʉa bʼaidua, zarea bʼaidua». ¿Wãrĩnuka dayi itua doiba zarea baseabʉta? Mawũã ẽ, maʉ̃bara daya nekʼãrẽ jidabʉta aña jidabiseabʉ akʉza aña krĩchabiseabʉ. Dayirã itua dobʉrʉdera ũdubi ẽ zareabʉta. Isaías 28:7ba jarabʉ ẽbẽra mejãcha itua dobʉra maʉ̃ʼa yi edebibʉ kĩrãkʼabʉta akʉza tẽnedrʉbʉ kĩrãkʼabʉta.
2-8 FEBREROBAYEDA
BEDʼEA BIA DAIZEZE BEDʼEADE ŨDUDATA ISAÍAS 30-32
Kʼarebata jʉrʉdadrʉ Jeowade
w01-S 15/11 16 parr. 7
Jeowabʉrʉ wãrĩnu kʼarebabʉ
7 Salmo 91:4de ũdubibʉ Jeowabara sãwũã ibanaba yi wũãwũã iyi iba ara anabari kĩrãkʼa akʉbʉta dayirãra. Naʉ̃ testora jarabʉbara dayirãra mejãcha kʼarebabʉ, ibana wũãwũã yi papa i edre aduʼabʉ kĩrãkʼa dayirãsida abarika aduʼa sentipanʉ Jeowa organizasione panʉ baera (Rut 2:12; Salmo 5:1, 11).
w24.01 24 parr. 13
Bʉa bedʼea zroma ũdubʉrʉdera Jeowaba kʼarebayi
13 Dayirãba kʼãrẽta oibarata. Zarea oibara wuabemaraneba jĩga wã ẽ baita. Dayirã jĩga wãbʉrʉdera aukʼara krĩchabʉ dayi sãwũã berabarinʉmʉ ʉ̃rʉ akʉza mawũã krĩchaiba nekʼãrẽ jidaibarata aña jidabiseabʉ (Prov. 18:1). Dayirã sopʉabʉdera edaʉde nesidabʉ doba bʼaita, mamina dobabʉta ewari bio berabarira, mawũãra ũdu ẽ bayi Jeowaba bʉ sãwũã kʼarebakĩrãbʉta. Bʉ mejãcha sopʉabʉmina idu yi kʼarebabira bʉ mebẽrã, mebẽrã kongregasionebemara akʉza zõrãrã, ãyira Jeowaba bʉaʼa nebia diada (Prov. 17:17; Is. 32:1, 2).
w23.10 17 parr. 19
«Iya zarea babiyi» ¿sãwũã?
19 Bʉa nebia jʉ̃ãbʉ ʉ̃rʉ ĩjãbʉra, ¿sãwũã zarea erbaseabʉ? Bʉa jʉ̃ãbʉbʉrʉ nama egorode ewari jõmaʉ̃nẽ bʼaita, lera Daizeze Bedʼeade maʉ̃ ʉ̃rʉ akʉza krĩchara maʉ̃ ʉ̃rʉ (Is. 25:8; 32:16-18). Krĩchara bʉ mamabʉta, ¿kʼãrẽta ũrĩbʉ bʉa? ¿Sãwũã sentibʉ bʉra? ¿Kʼãrẽta ũdubʉ? Maʉ̃ sãwũãbʉ ʉ̃rʉ biʼia kʼawuaita akʉra dayirã kartarane potora ẽjũã bia ʉ̃rʉ ũdubibʉta, mawũã ẽ bʉrʉ akʉra bideo trãbira maʉ̃ ʉ̃rʉ bedʼeabʉta. Bari jaraita, Ẽjũã bia ũduyi, Mʉ̃a krĩchabʉ nebia zei ʉ̃rʉ akʉza Muy cerca. Dayirãba naʉ̃ nebia ʉ̃rʉ krĩchapanʉbʉrʉ dayirãba bedʼea zroma erbʉdera, krĩchadayi maʉ̃ra bari atiaeda mawũãbʉta akʉza aukʼara krĩcha zroma oẽ bayi (2 Cor. 4:17). Jeowaba bʉaʼa maʉ̃ra nebiara jʉ̃ãbibʉba zarea babiyi.
Jʉrʉda nekʼãrẽ biʼiabʉta Daizezedebemata
w23.03 10 parr. 11
¿Kʼãrẽta oibara buru kʼoeita?
Jeowaba jarabʉ iyira «bʉ Nejaradiabari [Biata]» (Is. 30:20, 21). Jeowara mesera kĩrʉ ẽ, ẽbẽra bia akʉza so borekea akʉbʉ, iyara akʉbʉ ẽbẽrarãba ãyi sode kʼãrẽ nebiata erbʉta (Sal. 130:3). Iyara widi ẽ dayirãba obe ẽãde wũẽta, kĩrãbera iya parãsita dayirã buru morrora (Sal. 139:14). Jeowaba dayirãra parãsi audre kʼawuakĩrã bamarẽã, Jeowaba kãgabʉ dayirãra sobiapanamarẽã dayirãba kʼawuapanʉneba, maʉ̃ kʼarea kãgabʉ dayirãba audre kʼawuakĩrãnamarẽã iyi Bedʼeata (1 Ped. 2:2). Maʉ̃ kʼarea ewari jʉrʉda Daizeze Bedʼea leita akʉza badua lebara bʉa jʉrʉda ewaride (Jos. 1:8). Jeowa kʼarebadeba audre lekĩrã wãñi Daizeze Bedʼeara akʉza audre kʼawuadayi iyi ʉ̃rʉ.
9-15 FEBREROBAYEDA
BEDʼEA BIA DAIZEZE BEDʼEADE ŨDUDATA ISAÍAS 33-35
Iyabʉrʉ kʼarebabʉ bʉra zarea bamarẽã
w24.01 22 parr. 7, 8
Bʉa bedʼea zroma ũdubʉrʉdera Jeowaba kʼarebayi
7 Yi bedʼea zromata. Dayirãba bedʼea zroma ũdubʉrʉdera, nãã sãwũã sentibada kĩrãkʼa mawũã ẽ bʉrʉ, nãã krĩchabada kĩrãkʼa ba ẽ bayi akʉza edaʉde sobia sentiseapanʉ, mamina atiaʉde sopʉa totoseabʉ. Ana Luis kimaba jarabʉ yi kima beida tẽãra, iyira mawũã sentisita. Iya jarabʉ: «Mʉ̃ra mejãcha sopʉa sentibasi akʉza doba sentibasi. Edaʉde mejãcha kĩrʉbasi iyita beisi baera». Akʉza Anara sopʉa sentibasi oibarabasi baera nekʼãrẽ Luisba obadata. ¿Dayirã aukʼara sopʉa sentibʉrʉdera sãwũã kʼarebabʉ Jeowabara?
8 Jeowaba sãwũã kʼarebaita. Jeowaba jarabʉ kʼarebaita dayirã zareapanaita (akʉra Isaías 33:6). Nãgʉ zroma zebʉrʉdera jãba zromara bʉrʉwa bʉrʉwanʉma kʼawa, maʉ̃ kʼarea jãba zromarabara nei erbʉ, mawũã bʉrʉwa bʉrʉwa ẽ baita, mamina maʉ̃ nekʼãrẽbara audre kʼarebaseabʉ yi jãbata abibʉrʉ. Abarika maʉ̃ kĩrãkʼa dayirãba bedʼea zroma ũdubʉrʉdera Jeowaba kʼarebayi zarea bʼaita, mamina audre kʼarebayi dayirãba nekʼãrẽ opanʉbʉrʉ iyi kʼawa bʼaita.
w21.02-S 29 parr. 10, 11
Sãwũã sobiapanai bedʼea zroma erpanʉmina
10 Jeowaʼa widibara buru biata diamarẽã. Bedʼea zroma ũdubʉrʉde sobia bʼaira, Daizezeʼa yiwidʼibara, mawũã buru biata diamarẽã dayirãba nekʼãrẽ oita bʉrʉde bia jidaita (akʉra Santiago 1:5). Santiagoba jarada kĩrãkʼa dayirãbara badua widibara Jeowaʼa buru biara, iyira maʉ̃ kʼareara kĩrʉ ẽ baera, awuarabʉrʉ iyara diakĩrã diabʉ dayirã buru biara (Sal. 25:12, 13). Jeowabara bia kʼawuabʉ dayirãra kʼãrẽne berabarinʉmʉta maʉ̃ba iyara kʼarebakĩrã kʼarebabʉ dayirãra. Naʉ̃ kʼawuaiba dayirãra sobiapanʉ. Kõbebʉrʉ akʉdayi sãwũã Jeowaba buru bia diabʉta.
11 Dayirãba buru bia ũduira Daizeze Bedʼeata akʉibara (Prov. 2:6). Akʉza kartara dayirã organizasionebemata. Mamina bari Daizeze Bedʼea akʉibara ẽ, awuarabʉrʉ oũdubibara dayirãba akʉdata (Sant. 1:22). Dayirãba naʉ̃ta opanʉbʉrʉ naʉ̃ba kʼarebayi dayirãra ẽbẽra bia bʼaita audre (Sant. 3:17). Akʉzade bedʼea zroma ũdubʉrʉde naʉ̃ba maʉ̃ kʼarea krĩchabi ẽ bayi, sobiapanañi.
ip-1-S 352, 355 parr. 21, 22
Mia abaʉ ẽbẽraba jara ẽ bayi: «Kayakʉ mʉ̃ra»
21 Isaíasba propesia jaradara idi ewadera aripe berabarinʉmʉ. Bari jaradaita yi sewabida ẽ wuabemara religion zeri ẽã. Wuabemara religion zeri ẽãbara jarapanʉ dayi beida tẽãra ʉ̃ta dogota, mawũã ẽ bʉrʉ eda wãita ẽbẽra kayirua basibʉrʉ. Akʉza Jeowa kʼarebata erpanʉ iyi bedʼeadeba kʼarebabʉ ẽbẽra bia baita akʉza nekʼãrẽ oita bia jidaita. Akʉzade Jeowabara diasi yi warrata dayirãbari beimarẽã, mawũã dayirãta iyi neũdukʼawua badamarẽã (Colosenses 1:13, 14; 1 Pedro 2:24; 1 Juan 4:10). Akʉza Jeowa ʉ̃rʉ Kʼawuabipanʉrãra iyi bedʼeata ũrĩpanʉ baera, mejãcha kayada ẽ. Bari jaradaita badu ẽbẽrata erkʼãĩpanʉ ẽ, maʉ̃ba kayada ẽ kaya kayiruaba akʉza tabakota dopanʉ ẽ, maʉ̃ba jida ẽ kaya kayirua wuabemara ẽbẽra kayabʉ kĩrãkʼa (1 Corintios 6:18; 2 Corintios 7:1).
22 Mamina propesia Isaías 33:24ra jõma aripe berabariyi ẽjũã kĩrãwãreãnẽbʉrʉ Jesúsba zokʼabʉrʉde. Wãbe ẽã panʉrãra jẽda wãñi, daʉberrepanʉrabara ũdudayi, kaya kayirua za ũdupanʉra wua neẽbayi, yi ũrĩ ẽã panʉrabara ũrĩnañi (Isaías 35:5, 6). Maʉ̃nera ẽbẽrarã biara awa biapanai baera maʉ̃raba kʼareba ẽjũã kĩrãwãreã babidayi naʉ̃ drʉara.
Jʉrʉda nekʼãrẽ biʼiabʉta Daizezedebemata
w23.05 15 parr. 8
Neneẽãbʉ ode bʼaibara
8 Ʉ̃kʉrʉbara krĩchaseabʉ mawũã berabaridara yibiabasita maʉ̃ ewaridebʉrʉ mamina, ¿naʉ̃bara idira dayirãta kʼarebabʉka? Kʼarebaseabʉ, idi dayirãra Neẽãbʉ ode wãbʉ kĩrãkʼabʉ baera. Dayirãta ʉ̃ta wãibʉrʉ, mawũã ẽ bʉrʉ nama egorode bʼaibʉrʉ, zarea odaibara neneẽãbʉ ode bʼaita. Neneẽãbʉ Odebaibara kʼarebabʉ dayirã Jeowaba kãgabʉde bʼaita akʉza Daizeze Nokʼoba ẽjũã kĩrãwãreãnẽ nebia webʉrʉdebida iya kãgabʉde baita (Juan 10:16). Poaga 1919deba ʉ̃ta yumakẽrãraba, yuwẽrãraba, warraraba, amaesida Babilonia Zromata mawũã Jeowaba kãgabʉta ojʉ̃drʉsida, bʉsida maʉ̃ne edabʉbaibara. Ʉ̃kʉrʉ ẽbẽra naʉ̃ ode jʉ̃drʉdara 100 poagaba, ʉ̃kʉrʉta aranʉwedaʉba naʉ̃ ode jʉ̃drʉsi.
16-22 FEBREROBAYEDA
BEDʼEA BIA DAIZEZE BEDʼEADE ŨDUDATA ISAÍAS 36, 37
Perarãra bʉa ũrĩbʉ kʼarea
lfb kapitulo 55 pag. 132 parr. 3
Jeowa angelba kʼarebasi Ezequíasʼra
Nokʼo Senaqueribʼbara erbasi rabsaketa, maʉ̃ra jarakĩrãkʉasi iyi nezokʼa audre yi zromata, maʉ̃ta zokʼa bʉesi Jerusalénʼena, Jerusalénʼnebema ẽbẽrarã kʼarea ipidamarẽã. Naʉ̃ rabsakera Jerusalén pʉwʉrʉdeba jĩgaʉba jʉrasi: «Jeowabara marara kʼarebabe ẽ. Ezequías yi sewabiraidua, mia abaʉ Daizezeba marara kʼarebabe ẽ daidebara».
ip-1-S 387 parr. 10
Nokʼo abaʉba ĩjãbʉta ũdubisi baera nebiata ũdusi
10 Rabsakeba kĩrãbebisi Judiora ãyira judioraira ʉ̃tabʉta. Bari jaraita jarasi diaita dos mil kabayo, mawũã Judádebʉ kʼawuaita maʉ̃ra kabayora zokʼaita. Maʉ̃ba ũdubikĩrãbasi asiriorãra audre yi zromata Judádebemaraira akʉza jarasi Jeowaba kʼarebanʉmʉta asiriorãra ãyira Jerusalénʼinʉ ba baera (Isaías 36:8-10). Mamina wãrĩnubaira Jeowadeba zeibasi kʼarebara judioraitara mawũã kabayoraneba zeibasi ẽ (Proverbios 21:31).
ip-1-S 388 parr. 13, 14
Nokʼo abaʉba ĩjãbʉta ũdubisi baera nebiata ũdusi
13 Rabsakeba jarasi Ezequíasba jarabʉbʉrʉ Jeowaba kʼarebaita ãyira maʉ̃ta ĩjãna ẽ marẽã judioraba akʉza jarasi mia abaʉ pʉwʉrʉdebema Daizezeba kʼareba au ẽ basita nokʼo Asiriadebemaba neida oẽ marẽã maʉ̃ pʉwʉrʉta akʉza Samariadebemasida kʼareba ẽ baita (Isaías 36:18-20).
14 Rabsakebara Daizeze ʉ̃rʉ wãrĩnu ĩjãbasi ẽ baera, kʼawua ẽ basi Samariadebemarãra jĩga wãsidata Jeowadeba akʉza daizeze zeri ẽã yiwidʼipanasi Samariadebemarãra. Maʉ̃ra Daizezebara kʼareba auda ẽ basi nokʼo Asiriadeba ẽdrʉita (2 Reyes 17:7, 17, 18). Mamina Jerusalénʼnebemarara jẽda Jeowa ʉ̃rʉ ĩjãsidabasi, maʉ̃ba Jeowabara kʼarebaibasi Jerusalénʼnebema ẽbẽrarãra.
Jʉrʉda nekʼãrẽ biʼiabʉta Daizezedebemata
w24.06 21 parr. 8
Kĩrãbedaibara Jeowara wãrĩnu zokʼaibʉta
Davidbara ewari jõmaʉ̃nẽ kĩrãbebasi Jeowabara iyira kʼarebaita, maʉ̃ kʼarea dayirãba iyide kĩrãkʼa opanʉbʉrʉ bedʼea zroma zebʉrʉdera awuantadayi (Sal. 118:6). Dayirãba krĩchapanʉbʉrʉ Jeowaba naena sãwũã kʼareba zebʉrʉta, dayirãbara audre zarea ĩjãseabʉ. Bari jaradaita, lera nebʉra Jeowaba ẽbẽrarã iyiʉ̃me kʼẽrẽpa badarata sãwũã kʼarebasita (Is. 37:17, 33-37). Adewara jw.org de ũduseabʉ Jeowaba sãwũã kʼareba zebʉrʉta iyi odepanʉrãra. Adewara krĩchara bʉra Jeowabara sãwũã kʼarebasita naena. Wãrĩnubaira, bʉara beaka wuita, mia imamata, mawũã Jeowa kʼareba ũduita, mamina kĩrãbera Jeowaba bʉ sãwũã kʼareba zebʉrʉta. Bari jaradaita, iya jarabʉ iyi neũdukʼawua ba zemarẽã (Juan 6:44). Bʉra Jeowaba kʼarebabʉ baera iyi odebʉ. Yibiabayi Jeowa widita kĩrãbebimarẽã sõbede panʉsita bʉa wididara, bʉ kʼarebadata akʉza sõbede bedʼea zromaneba ẽdrʉbidata. Bʉa kĩrãbebʉbʉrʉ Jeowaba sãwũã kʼareba zebʉrʉta audre ĩjãbayi Jeowaba bʉra tẽã kʼarebaita.
23 FEBRERODEBA–1 MARZOEDA
BEDʼEA BIA DAIZEZE BEDʼEADE ŨDUDATA ISAÍAS 38-40
Obeja akʉbariba bia akʉbʉ kĩrãkʼa Daizezeba bia akʉyi iyi obejarãra
w23.02 2, 3 parr. 3, 4
¿Kʼãrẽta jaradiabʉ Daizeze Bedʼeabara iyi parãna ʉ̃rʉra?
3 (Akʉra Isaías 40:8). Daizeze Bedʼeabara ẽbẽrarã ũrãgʼa bia dia zebʉrʉta poaga bio ba. ¿Sãwũã mawũã ozebʉrʉ? Nããrãra Daizeze Bedʼeara bʉsida nedʉwʉrʉ e ʉ̃rʉ (pergamino) akʉza royo ʉ̃rʉ, mamina tẽã maʉ̃ra jõsi, maʉ̃ kʼarea dayirãbara idi ewadera erpanʉ ẽ Daizeze Bedʼea nããra bʉdapeadara. Mamina Jeowaba osi ẽbẽrarãba maʉ̃nebema kopiata odamarẽã, yi kopia opananara nemitia omiabasimina, jʉra kʼawua osida jõma aripe bʉdaita. Ẽbẽra Daizeze Bedʼea ʉ̃rʉ estudiabʉba jarasi: «Neẽ wua awuru librora naʉ̃ kĩrãkʼa jõma aripebʉ bʉra». Daizeze Bedʼea bʉdapeada kikibarimina, yi nekʼãrẽ maʉ̃ ʉ̃rʉ bʉdapeada jõsimina akʉza yi ẽbẽra bʉdapeadara nemitia omiabasimina, Daizeze Bedʼeabara jõma aripe jarabʉ Jeowaba krĩchabʉra.
4 «Jõma kʼãrẽ biara akʉza jõma nekʼãrẽ aripebʉra» Jeowadeba zebʉ (Sant. 1:17). Nekʼãrẽ bia Daizeze Jeowaba dayirã diadara Daizeze Bedʼea. Ẽbẽra abaʉba dayirã nekʼãrẽ bia diabʉrʉdera naʉ̃ba ũdubibʉ iya dayirã bia ũdukʼawuabʉta akʉza kʼawuabʉta dayirãba kʼãrẽta nesidabʉta. Abarika Jeowaba dayirã iyi bedʼeata diasi baera naʉ̃ba ũdubibʉ dayirã ũdukʼawuabʉta akʉza krĩchabʉta dayirã ʉ̃rʉ. Naʉ̃ artikulode kʼawuadayi sãwũã Daizeze Bedʼeaba ũdubibʉta Jeowara buru biata, aripe obʉta akʉza kãga ũdubibʉta. Nããra kʼawuadayi sãwũã Daizeze Bedʼeaba ũdubibʉta Jeowara buru biata.
cl-S 70 parr. 7
Daizezeba iyi zareata zokʼabʉ dayirã kʼarebaita
7 Jeowaba jarabʉ iyira obeja akʉbari kĩrãkʼabʉta, maʉ̃ba ũdubibʉ iyara dayirãra wãrĩnu kʼarebakĩrãbʉta soiduba (Ezequiel 34:11-16). Isaías 40:11ba naʉ̃ta jarabʉ Jeowa ʉ̃rʉ: «Obeja akʉbariba bia akʉbʉ kĩrãkʼa Daizezeba bia akʉyi iyi obejarãra. Iyi juwaba ãba edayi obeja wũãwũãrãra akʉza iyi trʉ̃ane edekʉayi». Obeja zake abaʉba iyita obeja akʉbariba juwade edamarẽãbʉbʉrʉ, orrabʉ mawũã obeja akʉbariba juwade edamarẽã. Jeowasida maʉ̃ kĩrãkʼabʉ, dayirãba kʼareba nesidabʉdera kʼarebakĩrãbʉ iyara soiduba.
w25.05 12 parr. 14
Jeowaba bʉaʼa so zarea diabʉ
14 Adewara Jeowabara kʼãrẽta osi judiora kʼarebaita perada ẽ marẽã. Ãyaʼa kĩrãbebisi iyira mejãcha zarea barabʉta akʉza nekʼãrẽ mejãcha kʼawuabʉta. Ʉ̃ta akʉ jarasi bajãta, ũdubita chĩdaurabʉra iya parãsita, adewara maʉ̃ra trʉ̃ra aba abaka kʼawuabʉta (Is. 40:25-28). Naʉ̃ba jarakĩrãbʉ Daizeze Jeowabara kʼawuabʉta ẽbẽrarã iyi odebʉ trʉ̃ aba abaka. Jeowaba zarea erbʉbʉrʉ chĩdaura parãita, naʉ̃ba ũdubibʉ dayirã zarea erbʉta iyi pʉwʉrʉ kʼarebaita. Mawũẽra judiorãra neẽbasi kʼãrẽa pera bʼaira.
Jʉrʉda nekʼãrẽ biʼiabʉta Daizezedebemata
w25.05 29, 30 parr. 12
¿Bʉitara kʼãrẽaba yibia Jeowa trʉ̃ra?
12 Jeowa trʉ̃ ʉ̃rʉ ibia bedʼeabʉrʉdera, dayirãbara Jesúsde kĩrãkʼa opanʉ. Isaíasba jarasi Jesús zei nãã ẽbẽra abaʉba Jeowa trʉ̃ ʉ̃rʉ bedʼeaibasita maʉ̃ba o ewabʉ kĩrãkʼa bʼaibasita (Is. 40:3). ¿Naʉ̃ bedʼeara sãwũã aripe berabarisi? Juan buru kʼoebibariba Jesús zei nãã iyi ʉ̃rʉ bedʼeabasi maʉ̃ba o ewabʉ kĩrãkʼabasi, Jesúsʼra zesi baera Jeowa trʉ̃ne akʉza Jeowa trʉ̃ne bedʼeabasi baera (Mat. 3:3; Mar. 1:2-4; Luc. 3:3-6). Adewara Isaíasba naʉ̃ta jarasi: «Jeowaba zarea erbʉra ũdubiyi» (Is. 40:5). ¿Maʉ̃ra sãwũã aripe berabarisi? Jesús nama egoroeda zeside iya obadadeba ũdubisi sãwũãbʉta Jeowara, maʉ̃ba Jeowata nama egoroeda zebʉrʉ kĩrãkʼabasi (Juan 12:45).