ARTIKULO KʼAWUAITA 46
Jeowabara kʼarebabʉ sobiade awuantadamarẽã
«Jeowabara jʉ̃ãbʉ mara kʼarebaita akʉza maraʼa so zʉbʉria ũdubiyi» (IS. 30:18).
TRÃBI 3 Tú me das fuerza, confianza y valor
KʼÃRẼTA ŨDUDAITAa
1, 2. (1) ¿Kʼãrẽta panʉnai naʉ̃ artikulodera? (2) ¿Sãwũã ũdubibʉ Jeowabara dayirãra wãrĩnu kʼarebakĩrãbʉta?
JEOWABARA dayirãra kʼarebabʉ bedʼea zroma awuantaita akʉza iyita sobiade trajaita. ¿Sãwũã kʼarebabʉ iyara dayirãra? akʉza ¿Jeowaba dayirã kʼarebabʉ kʼarea kʼãrẽ nebiata ũdupanʉ? Naʉ̃ra naʉ̃ artikulode panʉñi. Mamina maʉ̃ panʉi nãã kʼawuadaya naʉ̃ widita: «¿Jeowabara wãrĩnu kʼarebakĩrãbʉka dayirãra?».
2 Apostol Pabloba ebreora karta bʉ dia bʉedaba kʼarebaseabʉ naʉ̃ bedʼea panʉita. Pabloba bʉsi: «Jeowabara mʉ̃ kʼarebabari, maʉ̃ba mʉ̃ra pera ẽ. ¿Mʉ̃ra kʼãrẽta oseabʉ yumakẽrãbara?» (Heb. 13:6). Ʉ̃kʉrʉ Daizeze Bedʼeadera jarabʉ kʼarebabari bedʼeabara jarakĩrãbʉta ẽbẽra abaʉta iyaʼa kʼareba widibʉrʉde wẽbabari kĩrãkʼabʉta kʼarebaita. Krĩchara Jeowata wẽbabʉta ẽbẽra aba kʼareba nesidabʉta kʼarebaita. Naʉ̃ba bʉaʼa ũdubibʉ Jeowabara wãrĩnu mesera kʼarebakĩrãbʉta. Mawũẽra Jeowata dayirã kʼawabʉ baera sobiade awuantadayi bedʼea zromara.
3. ¿Kʼãrẽ nekʼãrẽ ũbeadeba kʼarebabʉ Jeowabara dayirãba bedʼea zroma sobiade awuantaita?
3 ¿Sãwũã kʼarebabʉ Jeowabara bedʼea zroma sobiade awuantaita? Maʉ̃ panʉnaita akʉdaya Isaías librota. ¿Kʼãrẽa? Jeowaba Isaías propesia ũdubidara idi ewade dayirãitabida yibia baera. Adewara Isaías Jeowa ʉ̃rʉ bedʼeasidera dayirãba ũrĩne jarasi. Bari jaraita akʉdaya Isaías kapitulo 30ba jarabʉta. Nama Isaíasba yiza biata zokʼasi ũdubita Jeowaba sãwũã kʼarebabʉta iyi pʉwʉrʉra. Iya jarasi Jeowaba kʼarebabʉta nããra, dayirãʼa yiwidʼibʉ ũrĩbʉde akʉza panʉbʉde. Ũmeta, dayirãʼa nekʼãrẽ jaradiabʉde. Akʉza ũbeata, idi ewade dayirãʼa nebia diabʉde akʉza ʉ̃ra zeide. Naʉ̃ bedʼea ũbea ʉ̃rʉ biʼia kʼawuadaya Jeowaba sãwũã kʼarebabʉ ʉ̃rʉ.
JEOWABA ŨRĨBɄ DAYIRÃ BEDʼEARA
4. (1) ¿Kʼãrẽta jarasi Jeowabara judioraʼa Isaías ewaridebemara akʉza kʼãrẽta berabarimarẽã iduaribisi? (2) ¿Kʼãrẽ bedʼea biata jarasi Jeowabara judioraʼa kʼẽrẽpanʉrãra? (Isaías 30:18, 19).
4 Isaías kapitulo 30 jʉ̃drʉbʉrʉde Jeowaba jarasi naʉ̃ta judiora ʉ̃rʉ «mara yi jipa ũrĩkĩrã ẽãra» akʉza «kayirua opanʉne wueta kayirua opanʉ». Adewara Jeowaba jarasi: «Marara pʉwʉrʉ jipa ũrĩkĩrã ẽ baera [...] Jeowa leyta ũrĩkĩrã ẽ» (Is. 30:1, 9). Pʉwʉrʉraba ũrĩ ẽ basi baera Jeowaba zokʼabʉta Isaíasba jarasi ãyira mejãcha zʉbʉriaita (Is. 30:5, 17; Jer. 25:8-11). Maʉ̃ kʼarea ãyira Babiloniaena jidape edesida. Mamina maʉ̃ne edabasi ʉ̃kʉrʉ judiorata Jeowaʉ̃me kʼẽrẽpabʉta, maʉ̃ kʼarea Isaíasba bedʼea biata erbasi ãyita. Isaíasbara jarasi Jeowabara ewari abaʉde akʉza ãyira jẽda wãbita Jerusalénma mawũã mama panamarẽã (akʉra Isaías 30:18, 19). Maʉ̃ra jõma aripe berabarisi. Jeowabara ãyira Babilonianeba ẽdrʉbisi, mamina maʉ̃ mawũã berabarira poaga mejãcha berabarisi. Bedʼea «Jeowabara jʉ̃ãbʉ maraʼa kʼarebaita», naʉ̃bara jarakĩrãbasi Jeowaba judiora ẽdrʉbira ewari bio berabarita. Mawũã judiorãra 70 poagabayeda basi Babiloniane jẽda Jerusalénma zei naweda (Is. 10:21; Jer. 29:10). Israelitara Babiloniaena jida edesidadera mejãcha jẽgapanasi sopʉapanasi baera, mamina Jerusalénʼena jẽda zesidera sobiaba mejãcha jẽgasida.
5. ¿Isaías 30:19bara dayirãʼa kʼãrẽta kʼawuabibʉ?
5 Idi ewadera dayirãba so zareata ũduseabʉ naʉ̃ bedʼeadeba: «Kʼarebamarẽã jʉrabʉrʉdera iya wãrĩnu kʼarebayi» (Is. 30:19). Isaíasbara jarasi Jeowabara ũrĩta dayirãba kʼareba widibʉde akʉza mesera panʉita. Isaíasba akʉza jarabʉ: «Bʉ bedʼea ũrĩbʉrʉde panʉñi». Naʉ̃ba dayirã kĩrãbebibʉ Jeowabara kʼarebakĩrãbʉta iyaʼa kʼareba widibʉra. Naʉ̃ kʼawuaiba kʼarebabʉ bedʼea zroma sobiade awuantaita.
6. ¿Isaíasba jaradabara sãwũã ũdubibʉ Jeowabara dayirã yiwidʼibʉra aba abaka ũrĩbʉta?
6 ¿Adewara kʼãrẽta jaradiabʉ naʉ̃ bersikulobara dayirã Jeowa yiwidʼibʉ ʉ̃rʉ? Jeowabara ũrĩbʉta dayirã aba abaka yiwidʼibʉra. Isaías kapitulo 30 jʉ̃drʉbʉrʉdera Jeowaba zokʼabʉ bedʼea aba mawũã ũdubita ẽbẽra jõmaʉ̃ʼa bedʼeabasita, mamina yi bersikulo 19de zokʼabʉ bedʼea «bʉra» mawũã Jeowara ẽbẽra abaʉʼa bedʼeabʉ kĩrakʼabasi. Isaíasba bʉsi «bʉra wuara jẽga ẽ bayi», «kʼarebamarẽã jʉrʉbʉrʉdera», «bʉ bedʼea ũrĩbʉrʉde panʉñi». Jeowara zeze bia baera yi kaʉra akʉza yi warra sopʉabʉa jara ẽ «bʉra zarea bʼaibara bʉ mebẽã kĩrãkʼa», awuarabʉrʉ Jeowabara dayirã aba abaka akʉbʉ akʉza dayirã yiwidʼibʉra biʼia ũrĩbʉ (Sal. 116:1; Is. 57:15).
¿Kʼãrẽta jarakĩrãbasi Isaíasba jaraside: «Iyita [Jeowa] enaʉ̃ibiraidua»? (Akʉra parrapo 7).
7. ¿Sãwũã ũdubisi Isaíasba akʉza Jesuba badua yiwidʼi bʼaira yibiata?
7 Dayirãta Jeowaʼa yiwidʼibʉrʉde dayi krĩcha zroma obibʉ ʉ̃rʉ Jeowaba dayirãba zarea nesidabʉta diayi. Dayirãba bedʼea zroma erbʉta mesera taʉ ẽ bʉrʉ Jeowaʼa widida ʉ̃rʉ widibaibara iya zarea diamarẽã maʉ̃ awuantaita. Jeowabara mawũã yiwidʼidamarẽã kãgabʉ Isaíasba jarada kĩrãkʼa: «Iyita [Jeowa] enaʉ̃ibiraidua» (Is. 62:7). ¿Kʼãrẽta jarakĩrãkʉ naʉ̃ba? Dayirãra badua yiwidʼidaibarata Jeowaʼa. Mawũã obʉba Jeowata enaʉ̃bi ẽ baita. Isaíasba bedʼea jaradabara dayirã kĩrãbebibʉ Jesuba Lucas 11:8-10 bayeda akʉza 13de yiza jarada ʉ̃rʉ. Nama Jesuba dayirã diabʉ Jeowa yiwidʼida ʉ̃rʉ yiwidʼi bamarẽã, Jeowaʼa dayirãba kãgabʉta perada ẽã wididamarẽã akʉza Daizeze jaure zareata wididamarẽã, adewara Jeowaʼa widida ʉ̃rʉ widibara bia jida kʼawuaita.
JEOWABA DAYIRÃ JARADIABɄ KʼÃRẼ OITA
8. ¿Nawedara sãwũã aripe berabarisi Isaías 30:20, 21ne jarabʉta?
8 (Akʉra Isaías 30:20, 21). Jerusalén Babilonia gorogororaba poaga aba audu sei jedekobayeda audu purra jidasidadera, israelitarãra mejãcha zʉbʉriasida. Dayirãba pan akʉza bania ewariza erbʉ kĩrãkʼa israelitarabida ãyi zʉbʉriara ewariza erpanasi. Mamina yi bersikulo 20 akʉza 21ne Jeowaba jarasi judioraʼa ãya nemitia obadata jẽda krĩchapanʉbʉrʉ akʉza maʉ̃ta idubʉdara Jeowabara kʼarebaita. Isaíasba jarasi Jeowara Nejaradiabari biata, maʉ̃ ũdubita jarasi Jeowabara israelitara jaradiaita kʼãrẽta oibarata iya kãgabʉde panamarẽã. Naʉ̃ bedʼeara aripe berabarisi judiora Babilonia juwadeba ẽdrʉbiside. Mawũã Jeowabara ũdubisi Nejaradiabari biata akʉza iyi pʉwʉrʉʼa jaradiasi jẽda yiwidʼi jʉ̃drʉdamarẽã iya kãgabada kĩrãkʼa. Idi ewadera dayirãra mejãcha sobiapanʉ Jeowata dayirã Nejaradiabari bia baera.
9. ¿Idi ewadera Jeowabara dayirãʼa sãwũã jaradiabʉ?
9 Naʉ̃ra bersikulode Isaíasba jaradiabʉ Jeowaba dayirãʼa Nejaradiabʉta nekʼãrẽ ũmeneba, nããra, Isaíasba jarasi: «Bʉa ũduyi bʉ nejaradiabari biara bʉyi dabʉba». Naʉ̃ yizadera Isaíasba jarasi nejaradiabarira iyi nekʼawuabari nãã edaʉnʉmʉta. Idi ewadera dayirãitara arigʉ yibia Jeowaba dayirã jaradiabʉ baera. ¿Idi ewadera Jeowabara sãwũã jaradiabʉ? Iyi organizasioneba jaradiabʉ. Jeowa biga diapanʉ iyi organizasioneba biʼia jaradiabʉ baera. Dayirãʼa jaradiapanʉne ãba yi jʉrebʉde, asamblea eda wãbʉde, broadcasting akʉbʉde akʉza dayirã kartara akʉbʉdeba kʼarebaseabʉ bedʼea zroma sobiade awuantaita.
10. ¿Jeowara sãwũã dayirã ãbʉdeareba bedʼeabʉ kĩrãkʼabʉ?
10 Ũmeta, Isaíasbara jarasi Jeowaba dayirã sãwũã jaradiabʉta: «Bʉyi kʉwʉrʉba ũrĩñi mʉ̃ bedʼeata bʉyi ãbʉdeareba». Isaíasbara jarasi Jeowara Nejaradiabari iyi nekʼawuabari ãbʉdeare wãbʉ kĩrãkʼabʉta, mawũã jaradiaita saʉ̃ ode wãita. Daizezebara iyi bedʼea bʉbidara dããraba, maʉ̃ba dayirãba iyi bedʼea lebʉrʉdera iyita dayirã ãbʉdeareba bedʼeabʉ kĩrãkʼabʉ (Is. 51:4).
11. ¿Sobiade awuantadaira kʼãrẽta odaibara?
11 ¿Kʼãrẽ nebiata ũduseapanʉ Jeowaba iyi organizasioneba kʼarebabʉdebara akʉza iyi Bedʼeadeba? Isaíasbara bedʼea ũme jarasi, nããra «Naʉ̃ta yi oara», ũmeta «Naʉ̃ne wãra» (Is. 30:21). Bari ũdukʼawua ẽ baibara saʉ̃ ode wãita awuarabʉrʉ maʉ̃ne wãibara. Daizeze Bedʼeaba akʉza Jeowa organizasionba jaradiabʉ dayirãba kʼãrẽta omarẽã kãgabʉta Jeowaba, adewara jaradiabʉ sãwũã oita dayirãba kʼawua wãra. Dayirãba ũrĩpanʉbʉrʉ Jeowaba zokʼabʉta akʉza maʉ̃ta opanʉbʉrʉ sobiade awuantadayi Jeowaita trajabʉde akʉza Jeowaba nebiata mejãcha diayi.
JEOWABARA DAYIRÃʼA NEBIA DIABɄ
12. Isaías 30:23-26 bayedara, ¿Jeowabara kʼãrẽ nebiata diabʉ iyi pʉwʉrʉara?
12 (Akʉra Isaías 30:23-26). ¿Naʉ̃ propesiara sãwũã aripe berabarisi israelitara Babilonianeba jẽda wãside ãyi pʉwʉrʉma? Jeowabara ãyaʼa nekʼãrẽ biata mejãcha diasi ãyi bia bamarẽã. Bari jaraita, yikota mejãcha diasi, adewara ãya nekʼãrẽ nesidabʉta Jeowa kʼawa bʼaita. Mawũã wiña wiñane jẽda owãnamarẽã Jeowaba kãgabʉde. Jeowa pʉwʉrʉbara nãã mawũã nebia mejãcha erbakabasi. Bersikulo 26de jarabʉ Jeowabara kʼarebasita israelitarãra iyi bedʼeata biʼia ũrĩmarẽã (Is. 60:2). Jeowaba nebia diadaba kʼarebasi iyi pʉwʉrʉra iyita sobiade trajamarẽã akʉza so zarea diasi «ãyi sota bia sentibʉ baera» (Is. 65:14).
13. ¿Jeowaba propesia Isaíasʼa jaradara idi ewadera sãwũã aripe berabaribʉ?
13 Jeowaba propesiade jarasi israelitarãra Babilonianeba jẽda wãita ãyi drʉaeda. Mawũã iya kãgabʉde yiwidʼi bʼaita. ¿Maʉ̃ propesiara idi ewadebida abarika berabarinʉmʉka? Mawũã, mamina ¿sãwũã berabaribʉ maʉ̃ra? Poaga 1919deba ʉ̃ta ẽbẽrarã mejãchaʉta ẽdrʉ zebʉrʉ Babilonia zromaneba, maʉ̃ra religion zeri ẽãra naʉ̃ drʉa jõmaʉ̃nẽbema. Jeowabara israelitarãra iya drʉa bia diaya adama edesi. Mamina ẽbẽrarã Babilonia zromaneba ẽdrʉdara drʉa audre biabʉma edebʉ. Maʉ̃ra paraíso espiritual (Is. 51:3; 66:8). Mamina, ¿kʼãrẽ maʉ̃ paraíso espiritualʼra?
14. ¿Kʼãrẽ paraíso espiritualʼra akʉza idi ewadera kʼairata panʉ mamara? (Akʉra ¿Kʼãrẽta jarakĩrãkʉ?).
14 Poaga 1919deba, Kristo tẽã, ẽbẽrarã ʉ̃ta wãira mejãchade sobiapanʉ paraíso espiritualde.b Ewari berabari wãne ẽbẽrarã nama egorode panairasida maʉ̃ paraíso espiritualde sobiapanʉ akʉza Jeowabara nebiata mejãcha diabʉ (Juan 10:16; Is. 25:6; 65:13).
15. ¿Idi ewadera samabʉ ẽjũã kĩrãwãreã jauredebemara?
15 Idi ewadera ¿samabʉ ẽjũã kĩrãwãreã jauredebemara? Jeowa pʉwʉrʉra naʉ̃ drʉa jõmaʉ̃maebʉ baera ẽjũã kĩrãwãreã jauredebemara naʉ̃ drʉa jõmaʉ̃maebʉ. Maʉ̃ kʼarea kʼãrẽ ẽ dayirã samabʉta. Ẽbẽra jõmaʉ̃ta ẽjũã kĩrãwãreã jauredebemane eda baseabʉ, mamina maʉ̃itara oibara Jeowaba zokʼabʉta.
¿Sãwũã dayirã aba abakaʉba kʼarebaseabʉ ẽjũã kĩrãwãreã jauredebema audre biʼia bamarẽã? (Akʉra parrapo 16 akʉza 17).
16. ¿Kʼãrẽta oibara ẽjũã kĩrãwãreã jauredebema nebiabʉ akʉita?
16 Ẽjũã kĩrãwãreã jauredebemane eda bʼaira, biga diaibara mebẽrã naʉ̃ drʉa jõmaʉ̃nẽbemaba obʉ kʼarea. ¿Sãwũã opanʉ maʉ̃ra? Dayirãbara akʉibara mebẽrãba nekʼãrẽ bia obʉta, mawũã ãya nekʼãrẽ aña obʉta akʉda ẽ baibara (Juan 17:20, 21). ¿Kʼãrẽa yibia mawũã oira? Krĩchara naʉ̃ yizata. Bʉta parke eda wãra bʉa ũduyi bakuru biobʉta. Maʉ̃ kĩrãkʼa kongregasionebida bʉa ũduyi mebẽrã awuru kulturadebemata akʉza awuara bedʼeapanʉrata, adewara krĩcha awuarapanʉta (Is. 44:4; 61:3). Zarea odaibara akʉita sãwũã Jeowa organizasion biʼiabʉta mawũã akʉda ẽ baibara mebẽrã aba abakaʉba kʼãrẽ nemitia obʉta. Iduaribida ẽ baibara dayirãba aña obʉ kʼarea mawũã ẽ bʉrʉ dayirã mebẽrãba nemitia obʉ kʼarea, aña krĩcha ẽ baita Jeowa organizasionba sãwũã bia obʉ ʉ̃rʉ.
17. ¿Sãwũã dayirã aba abakaʉba kʼarebaseabʉ kongregasione aduʼa ãba bʼaita?
17 ¿Kʼãrẽta oibara dayirã aba abakaʉba kongregasion ãba erbaita? Dayirã aba abakaʉba jʉrʉibara aduʼa bʼaita (Mat. 5:9; Rom. 12:18). Dayirãba kongregasione wuabemabawara aduʼa bʼaita jʉrʉbʉrʉde kʼarebabʉ naʉ̃ ẽjũã kĩrãwãreã jauredebema audre bia bʼaita. Kĩrãbedaibara Jeowabara ẽbẽra aba abaka ẽjũã kĩrãwãreã jauredebemane panʉta wesita iya kãgabʉde panamarẽã (Juan 6:44). Krĩchara Jeowara kʼãrẽaba sobiabʉta, iya ũdubʉrʉde dayirãra zarea opanʉta mebẽrã zarea diaita akʉza mebẽrãbawara aduʼa bʼaita, ãyira Jeowaitara biʼiabʉ (Is. 26:3; Ageo 2:7).
18. ¿Dayirãbara kʼãrẽ ʉ̃rʉ krĩchaibara akʉza kʼãrẽa?
18 Jeowabara iyi kʼaidubemara nebiata mejãcha diabʉ. Maʉ̃bara, ¿sãwũã kʼarebabʉ dayirãra? Dayirãba krĩchapanʉbʉrʉ Daizeze Bedʼeade eda jarabʉta akʉza kartaraba jarabʉta, naʉ̃ba kʼarebayi dayi sode nebia erbaita mawũã mebẽrã kãga ũdubita (Rom. 12:10). Dayirãba idi ewade nekʼãrẽ bia ũdubʉ ʉ̃rʉ krĩchabʉba kʼarebabʉ audre Jeowa kʼawa bʼaita. Dayirãba krĩchabʉde Jeowaba ʉ̃ra zeide kʼãrẽ nebia wei ʉ̃rʉ naʉ̃ba audre zarea diabʉ Jeowaita trajakĩrã bʼaita ewari jõmaʉ̃nẽ. Naʉ̃ba kʼarebayi dayirã Jeowaita sobiade trajaita.
AWUANTA BʼAITA KRĨCHAPANɄ
19. (1) ¿Isaías 30:18de jarabʉdebara dayirãba kʼãrẽta ĩjãpanʉ? (2) ¿Kʼãrẽba kʼarebai dayirãba sobiade awuantaita?
19 Jeowara dayirãre bayi naʉ̃ ewari jõbodoare (Is. 30:18). Dayirãba kʼawuapanʉ Jeowabara jõma aripe obʉta maʉ̃ba iya iduaribi ẽ bayi Diaruba zokʼa bamarẽã iya jarada ewaride wueta (Is. 25:9). Dayirãbara jʉ̃ãpanʉ Jeowaba ẽdrʉbiyeda. Maʉ̃ zeyedara biʼia akʉita krĩchapanʉ Daizezeʼa yiwidʼibʉ ʉ̃rʉ, Daizeze Bedʼea estudiape akʉza maʉ̃ ʉ̃rʉ krĩchabʉta, adewara Daizezeba kʼãrẽ nebia wei ʉ̃rʉ krĩchabʉta. Mawũã opanʉbʉrʉ Jeowabara kʼarebayi sobiade awuantaita iyita trajabʉde.
TRÃBI 142 Bedʼea zromata awuantayi Jeowa kʼarebadeba
a Naʉ̃ artikulode kʼawuadaya bedʼea ũbea, Jeowaba sãwũã kʼarebabʉta iyi nezokʼaraba bedʼea zroma ũdubʉrʉde sobiade awuantadamarẽã. Akʉdaya sãwũã Jeowaba kʼarebabʉta Isaías 30 akʉbʉdadeba, adewara kʼawuadayi kʼãrẽa yibiata yiwidʼita, Daizeze Bedʼea leita akʉza krĩchaita dayirãba nebia idi erbʉ ʉ̃rʉ adewara nebia ʉ̃ra zei ʉ̃rʉ.
b KʼÃRẼTA JARAKĨRÃKɄ: «Paraíso espiritual» ẽbẽra bedʼeade, Ẽjũã kĩrãwãreã jauredebema. Naʉ̃ bedʼeabara jarakĩrãbʉ dayirãra maʉ̃ ẽjũã kĩrãwãreãnẽbʉ kĩrãkʼapanʉ Jeowa ãbaʉba yiwidʼibʉde akʉza mejãcha erpanʉ yiko jauredebemata akʉza maʉ̃ra religion zeri ẽãraba jaradiadata erpanʉ ẽ. Adewara dayirãbara bedʼea bia Daizeze Nokʼo ʉ̃rʉ sobiade jaradiapanʉ adewara Jeowa kʼawapanʉ akʉza mebẽrãbawara aduʼapanʉ ãya kʼarebabʉ baera dayirãba bedʼea zroma sobiade awuantaita. Naʉ̃ ẽjũã kĩrãwãreã jauredebemane edapanʉ, Jeowaba zokʼabʉta aripe opanʉne akʉza zarea opanʉne iyide kĩrãkʼa oita.