Kʼãrẽta kʼawuapanʉ Jesu jẽgadadeba

1-3. ¿Kʼãrẽba jẽgabibʉ dayirãra?

¿ARANɄWEDA jẽgasika? Edaʉde dayirãra sobiaba jẽgabʉ mawũã ẽ bʉrʉ sopʉa kʼarea. Bari jarita, dayi mebẽã beibʉrʉ kʼarea. Mawũã berabarisi mebẽã Lorileib Estados Unidosdebemata, iya jarasi: «Mʉ̃ kau beisidera, mʉ̃ra mejãcha sopʉabasi, mʉ̃a krĩchabasi mia kʼaiba mʉ̃ kʼarebabe ẽãta, jipa beikĩrã krĩcha basi».

² Edaʉde dayirãra jẽgabʉ ẽbẽraba Daizeze Bedʼeata ũrĩkĩrã ẽ baera. Mawũã berabarisi mebẽã Hiromi, Japóndebemata, iya jarasi: «Mʉ̃ra mejãcha sopʉabʉ ẽbẽraba ũrĩkĩrã ẽ baera Daizeze Bedʼeata, maʉ̃ kʼarea Jeowaʼa jẽga yiwidʼibʉ akʉza widibʉ ẽbẽra ababida ũdu diamarẽã bʉ bedʼea ũrĩkĩrãbʉta».

³ Edaʉde dayirãra naʉ̃ra mebẽrã kĩrãkʼa berabaribʉ (1 Ped. 5:9). Jeowa ode sobia bakĩrãpanʉmina, edaʉde jẽgabʉ ẽbẽraba Daizeze Bedʼea ũrĩkĩrã ẽ baera, dayi mebẽrã beisi baera akʉza ũdubʉ bedʼea zromata, naʉ̃ba obʉ zarea bamarẽã Jeowa ode bʼaita (Sal. 6:6; 100:2). ¿Kʼãrẽta oseapanʉ mawũã sentibʉdera?

4. ¿Kʼãrẽta kʼawuadai naʉ̃ artikulodera?

⁴ Jesu yizaba kʼarebaseabʉ, «Jesús jẽgasia» sopʉa sentisi baera (Juan 11:35; Luc. 19:41; 22:44; Heb. 5:7). Naʉ̃ artikulode kʼawuadayi sõbeda jẽgasita Jesura, kʼãrẽta kʼawuapanʉta Jesu ʉ̃rʉ akʉza Jeowa ʉ̃rʉ, adewara dayirã sopʉaba jẽgabibʉdera ¿Kʼãrẽta odaibarata?

JẼGASI IYI NEŨDUKʼAWUARA KʼAREA

5. ¿Kʼãrẽta jaradiabʉ Jesu ʉ̃rũ Juan 11:32-36 bayedara?

⁵ Poaga 32de, Jesu neũdukʼawua Lázaro kayabadata beisi (Juan 11:3, 14). Jesubara mejãcha kãgabasi yi neũdukʼawua Lázarota akʉza yi mebẽã María akʉza Martata. Ãyira mejãcha sopʉapanasi yi mebẽã beida kʼarea. Lázaro beida tẽã Jesura Betaniama wãsi, mama panasi baera Martata Maríaʉ̃me. Martaba kʼawuaside Jesu ãyima uruta kĩrãyu wãsi, ãyi daucha zesidade Martaba jarasi: «Nokʼo, bʉta nama bʼasibʉrʉ mʉ nawewaura beu ẽbakʼausia» (Juan 11:21). Maʉ̃ tẽã, María jẽganʉmʉ ũduside akʉza wuabemara ẽbẽrata iyisida «jẽgasi» (akʉra Juan 11:32-36).

6. ¿Kʼãrẽa jẽgasi Jesura jari ewaridera?

⁶ ¿Kʼãrẽa jẽgasi Jesura maʉ̃ ewaridera? Libro Perspicacia para comprender las Escrituras panʉbʉ naʉ̃ bedʼeata: «Beisi baera iyi neũdukʼawua Lázarota akʉza ũdusi baera yi mebẽã Marta akʉza María jẽganʉmʉta, maʉ̃ kʼarea iyisida jẽgasi».c Adewara Jesubara krĩchasibaibara, Lázaro beinãã sãwũã zʉbʉriadata, naʉ̃ba jẽgabisi. Bʉ mebẽãta beisibʉrʉ mawũã ẽ bʉrʉ bʉ neũdukʼawuata, bʉsida abarika sentisibaibara. Atia kʼawuadayi bedʼea ũbea Lázaro nebʉradeba kʼawuabʉta.

7. ¿Kʼãrẽta ũdubisi Jesu jẽgadabara?

⁷ Jeowabara kʼawuabʉ bʉ sãwũã sentibʉra. Jesura «Jeowa yiza» baera iyi jẽgaside ũdubisi Jeowa sãwũã sentibʉta (Heb. 1:3; Juan 14:9). Bʉta zʉbʉriabʉbʉrʉ bʉ mebẽã beida kʼarea, Jeowabara kʼawuabʉ bʉ sãwũã sentibʉra, mamina maʉ̃ awa ẽ, iyisida sopʉa sentibʉ bʉ kĩrãkʼa. Jeowabara bʉ mejãcha sopʉabʉta ara arigʉbikĩrãbʉ (Sal. 34:18; 147:3).

8. ¿Sãwũã kʼawuapanʉ Jesubara jẽda piradrʉbita beidara?

⁸ Jesubara jẽda piradrʉbikĩrãbʉ bʉ neũdukʼawuara akʉza bʉ mebẽrã beidara. Jesuba jarasi Martaʼa: «Bʉ nawewaura jẽda piradrʉya». Maʉ̃ta Martaba ĩjãsi (Juan 11:23-27). Marta Jeowa odebasi baera, iya kʼawuabasi Elíasba akʉza Eliseoba jẽda piradrʉbisita ẽbẽrã beidara (1 Rey. 17:17-24; 2 Rey. 4:32-37). Adewara ũrĩsi baibara, Jesuba jẽda piradrʉbisita ʉ̃kʉrʉ ẽbẽrã beidara (Luc. 7:11-15; 8:41, 42, 49-56). Mawũẽra, ¿kʼãrẽta kʼawuapanʉ dayirãbara, Jesuba iyi neũdukʼawuara zowaĩnĩgʉa diabaside jẽgadadebara? Jesubara jẽda piradrʉbikĩrãbʉta ẽbẽrã beidara, naʉ̃ra soiduba ĩjãseabʉ dayirãbara.

9. Bʉara, ¿sãwũã kʼarebaseabʉ Jesude kĩrãkʼa yi mebẽrã beida kʼarea zuburia bʉra? Yizata aba jara ũrĩbira.

⁹ Bʉa kʼarebaseabʉ yi mebẽrã beida kʼarea zʉbʉriabʉra. Jesura mawũã bari jẽga ẽ basi María akʉza Martaʉ̃me, awuarabʉrʉ biʼia ũrĩsi adewara bedʼea biata jarasi ãyaʼa so zarea diaita. Dayirãbida abarika kʼarebaseabʉ yi mebẽã beida kʼarea zʉbʉriabʉta. Mebẽã Dan, Australiadebemaba naʉ̃ta jarasi: «Mʉ̃ kima beisidera, mebẽrã kongregasionebemaba mʉ̃ta akʉsida, mʉ̃ jẽgabasidera ãya mitia akʉ ẽ basi, awarabʉrʉ bedʼea biata jarasida mʉ̃a so zarea diaita. Adewara mʉ̃ kʼãrẽ oamabʉde mebẽrãba kʼarebabasi, mʉ̃ karro zʉgʉita, ne edaita akʉza neoita. Adewara mʉ̃me ãba yiwidʼipanasi, ãyira mʉ̃ zʉbʉriabʉde mʉ̃ mebẽãara kĩrãkʼabasi» (Prov. 17:17).

JESURA JẼGASI ẼBẼRA KʼAREA

10. ¿Kʼãrẽ ʉ̃rʉ bedʼeabʉ Lucas 19:36-40 bayeda?

¹⁰ Poaga 33de ewari 9 nisánʼne, Jesura jʉ̃ẽsi Jerusalénma. Mawũẽra ẽbẽrarã mejãcha sobiapanʉ baera iyi ʉ̃rʉ ode bʉepanasi wuata, mawũã ũdubipanasi Jesura ãyi nokʼo bamarẽã kãgabʉta (akʉra Lucas 19:36-40). Daizeze Bedʼeaba jarabʉ Jesu «Jerusalén kʼaita zebʉrʉdʼera akʉ maʉ̃ pʉwʉrʉ kʼarea jẽgabʉrʉta». Jesu jẽganʉmʉne jarasi: Jerusaléne kʼãrẽ zʉbʉria berabarita (Luc. 19:41-44).

11. ¿Kʼãrẽa sopʉabasi Jesura Jerusalén kʼarea?

¹¹ Jesura sopʉabasi, judiora maʉ̃ ewaride mejãcha sobiabasimina, tẽãne ũrĩ ẽ bai baera Daizeze Nokʼo ʉ̃rʉ jarabʉra. Maʉ̃ kʼarea jõma makenaibasi baera (Luc. 21:20-24). Jesuba jarada kĩrãkʼa aripe berabarisi, mejãcha judioraba ũrĩna ẽ basi. Idi ewaridera, ¿bʉchumaera ẽbẽrabara ũrĩkĩrãbʉka Daizeze Nokʼo ʉ̃rʉra? Bʉta Daizeze Bedʼea jaradiaita zarea obʉbʉrʉ, mamina ẽbẽraba ũrĩna ẽ bʉrʉ Jesu kʼãrẽa jẽgada kĩrãbebʉba, kʼarebayi. Atia akʉdayi, sãwũã kʼarebaseabʉta.

12. Jesu jẽgadaba, ¿kʼãrẽta kĩrãbebibʉ dayirãʼa Jeowa ʉ̃rʉ?

¹² Jeowabara kãga ẽbẽrarãra. Jesu jẽgadaba dayirã kĩrãbebibʉ Jeowaba kʼãrẽaba kãgabʉta ẽbẽrarã. Iyara kãgabʉ bei ẽ marẽã «Awuarabʉrʉ iyara kãgaba jʉ̃abʉ maraba kayirua obʉta, jẽda krĩchamarẽã» (2 Ped. 3:9). Dayirãbara kãgata ũdubiseabʉ ẽbẽrarã jaradiabʉrʉde Daizeze Bedʼeata, ẽbẽrã soidu jʉ̃ẽmarẽã (Mat. 22:39).

13, 14. (1) ¿Jesubara sãwũã ũdubisi ẽbẽrarã so borekea akʉbʉta? (2) ¿Dayirãbara sãwũã ũdubiseabʉ ẽbẽrarã so borekea akʉbʉta?

¹³ Jesura zarea osi biʼia jaradiaita. Jesubara so borekea akʉbasi baera akʉza kãgabʉ baera, jaradia kĩrãbasi ewariza Daizeze ʉ̃rʉ ẽbẽrarã (Luc. 19:47, 48). Ẽbẽra mejãchabasi baera iya jaradiabʉ ũrĩkĩrãta, edaʉde ewari neẽ basi iyi nekoita (Mar. 3:20). Akʉza ewari aba diamasi, yumakẽrã abaʉba jʉrʉ jʉ̃ẽsi Jesuta iyiʉ̃me bedʼeaita, Jesura iyiʉ̃me bedʼeasi diamasibasimina (Juan 3:1, 2). Ẽbẽrarã jõma iyi bedʼea ũrĩpanʉrãra iyi kʼaidu jʉ̃drʉda ẽ basimina, jõmaʉ̃ba ũrĩsida Daizeze ʉ̃rʉ. Idi ewadera, dayirãbara kãgapanʉ ẽbẽrã jõmaʉ̃ba ũrĩmarẽã Daizeze Bedʼeara (Hech. 10:42). Mawũã oira, biʼia krĩchaibara kʼãrẽta oibarata ẽbẽrarã audre jaradiaita.

¹⁴ Nekʼãrẽ jõma ora ẽbẽrarã audre jaradiaita. Iyabaʉ ũmadaʉde Daizeze Bedʼeata jaradiapanʉbʉrʉ, ũdu ẽ bayi ẽbẽra yi ũrĩkĩrãbʉta. Mebẽã Matildaba jarasi: «Mʉ̃a mʉ̃ kimaʉ̃meba zarea opanʉ jaradia wãita badu ũmadaʉde. Diapedara wãpanʉ nenẽdobarima jaradiade, ũmatipaʉdera ode jaradiapanʉ esibidordeba. Diamasiare jaradia wãpanʉ deza, deza». Dayirãba kãgabʉ ũmadaʉde jaradiaikaʉde, jaradiaibarata ẽbẽrarã dedabʉ ũmadaʉde. Dayirãba mawũã odara, Jeowara sobiabayi dayirãʉ̃me.

JESURA JẼGASI DAIZEZE TRɄ̃ NENEẼÃ ERBAI KʼAREA

15. Lucas 22:39-44 bayeda jarabʉdera, ¿kʼãrẽta osi Jesubara iyi bei naweda?

¹⁵ Poaga 33de ewari14 nisánʼne, Jesura jʉ̃ẽsi Getsemaníma, mama yiwidʼisi Jeowaʼa, jõma jarasi iyi sãwũã sentibʉta (akʉra Lucas 22:39-44). Maʉ̃ ewaride Jesuba kʼawuabasi iyi beita arakʼaitabata, maʉ̃ kʼarea Jeowaʼa soiduba yiwidʼida ʉ̃rʉ yiwidʼisi iyi kʼarebamarẽã (Heb. 5:7). Iyi bei naweda, ¿kʼãrẽta widisi Jesubara? Iya widisi Jeowa so zarea diamarẽã kʼẽrẽpa bʼaita akʉza oita iya jarabʉta. Jeowabara ũrĩsi iyi bedʼeata akʉza angel aba zokʼabʉesi so zarea diamarẽã.

16. Jesura Getsemaníne basidera, ¿kʼãrẽa sopʉa yiwidʼibasi?

¹⁶ Jesura jẽgasi sopʉabasi baera ẽbẽrarãba Daizeze trʉ̃ ʉ̃rʉ imitia bedʼeapanasi baera. Adewara iya kʼawuabasi Jeowaba zokʼasita, iyi trʉ̃ neneẽãbʉta ũdubimarẽã. Bʉita zarebʉrʉ Jeoware kʼẽrẽpa bʼaita, ¿kʼãrẽta kʼawuapanʉ Jesu jẽgadeba? Akʉdaya bedʼea ũbea dayirã kʼarebaseabʉta.

17. ¿Jeowaba Jesu bedʼea zʉbʉria bedʼeada panʉnanebara kʼãrẽta kʼawuaseapanʉ?

¹⁷ Jeowaba ũrĩbʉ bʉa iyaʼa widibʉra. Jeowaba ũrĩsi yi warra iyaʼa so zʉbʉria bedʼeadara. ¿Kʼãrẽa? Jesura kʼẽrẽpabasi baera akʉza iya ũdubisi baera Daizeze trʉ̃ra neneẽãbʉta. Dayirãsida zarea opanʉbʉrʉ Jeoware kʼẽrẽpa bʼaita akʉza ũdubipanʉbʉrʉ iyi trʉ̃ra neneẽãbʉta, iya ũrĩñi dayirã bedʼeara (Sal. 145:18, 19).

18. ¿Kʼãrẽa jarapanʉ Jesubara kʼawuabʉta dayirã sãwũãbʉra?

¹⁸ Jesuba kʼawuabʉ dayirã sãwũãbʉra. Dayirã sopʉapanʉne, nesidapanʉ neũdukʼawua dayi sãwũãbʉ ũrĩbʉta, dayi kĩrãkʼa berabarida kĩrãkʼabʉta. Jesura dayirã neũdukʼawua bia baseabʉ, iyira abarika dayirã kĩrãkʼa sopʉabasi baera akʉza bedʼea pʉa ũdusi baera. Iya kʼawuabʉ dayirãra egoro omata maʉ̃ kʼarea kʼareba diabʉ dayirãba «nesidabʉdade» (Heb. 4:15, 16). Adewara iyara idʉ yi kʼarebabisi angel abaʉʼa, dayirãsida yi kʼarebabibara zõrãrã mawũã ẽ bʉrʉ kartade kʼãrẽbʉta akʉibara, maʉ̃ kʼarebara Daizezedeba zebʉ baera.

19. ¿Kʼãrẽba kʼarebai bʉita zarebʉrʉ Daizezeare kʼẽrẽpa bʼaita? Yizata aba jara ũrĩbira.

¹⁹ Jeowaba dayirã diayi neneẽã baita. Dayirãba iyaʼa yiwidʼibʉrʉde iya diabʉ zareata akʉza neneẽã baita. Dayirã yiwidʼibʉrʉdera «Daizeze neneẽãbʉbara jõmaʉ̃ra krĩchaira ʉ̃tabʉba wuagayi mara sora» (Filip. 4:6, 7). Daizeze neneẽãbʉbara kʼarebabʉ dayirã so aduʼa bʼaita akʉza bia krĩchaita. Mawũã berabarisi mebẽã Luzta, iya jarabʉ: «Mʉ̃ sopʉa sentibʉ, maʉ̃ kʼarea krĩchabʉ Jeowaba kãga ẽãta. Mamina mʉ̃ mawũã krĩchabʉde Jeowaʼa yiwidʼibʉ akʉza jarabʉ mʉ̃ sãwũã sentibʉta, yiwidʼibʉba kʼarebabʉ mʉ̃ so aduʼa bʼaita». Mebẽã Luz berabaridadeba kʼawuaseapanʉ, wãrĩnu yiwidʼibʉbara kʼarebabʉta dayirã so aduʼa bʼaita.

20. ¿Kʼãrẽta kʼawuasida Jesu jẽgadadeba?

²⁰ Jesu jẽgada kĩrãbebʉba dayirã mejãcha kʼarebabʉ akʉza so zarea diabʉ. Nããra, kʼawuasida dayi neũdukʼawuara mebẽrã beibʉrʉdera kʼarebaibarata akʉza ĩjãibarata Jeowaba Jesuʼʉ̃meba kʼarebaita dayirã mebẽrã beibʉrʉde. Yi ũmeta, kʼawuasida Jeowaba akʉza Jesuʼʉ̃mebara ẽbẽrarã so borekea ũdubipanʉta, dayirãbida ãyide kĩrãkʼa so borekea ũdubira, jʉrʉibara ẽbẽrarã sãwũã audre jaradiaita. Yi ũbea, Jesu jẽgabadaba so zarea diabʉ dayirã, ũdubibʉ baera Jeowaba akʉza Jesuba kʼawuabʉta dayirã sãwũãbʉta akʉza ãya kʼarebaita dayirã sopʉabʉde. Aranʉbai «Daizezebara jõma jõbiyi daʉbara» maʉ̃ bedʼea bia zei nãã zarea oidua naʉ̃ ũrãgʼa ũbea idi kʼawuadata oita (Apoc. 21:4).