ARTIKULO KʼAWUAITA 23
Yibarirãra kʼarebaidua mayi wũãwũãrãra Jeowaʼa kãgamarẽã
«Kãgara Jeowara jõma bʉ soiduba, jõma bʉ kakuaiduba akʉza jõma bʉ krĩchaiduba» (MAT. 22:37).
TRÃBI 134 Los hijos son un regalo de Dios
KʼÃRẼTA ŨDUDAITAa
1, 2. ¿Kʼãrẽa Daizeze Bedʼeade ũrãgʼabʉra edaʉde mejãcha nesida ẽ mamina tẽãne audre nesidapanʉ?
KRĨCHARA naʉ̃ yizata, juwa jidai ewaridera yi kimata akʉza yi kima wẽrãra biʼia yopanʉ adewara kĩrãkita ũrĩpanʉ mebẽãba ãyaʼa ũrãgʼa diabʉ bedʼeata. Ãya biʼia ũrĩ kʼawuabʉ maʉ̃ ũrãgʼara maʉ̃ra Daizeze Bedʼeadeba zebʉ baera. Mamina naʉ̃neba ʉ̃tara ãya audre nesidayi naʉ̃ ũrãgʼara ãyita juwa jidasi baera.
2 Juwa jidapanʉrabara biode ũrĩ zebʉrʉ ũrãgʼa wũãwũã sãwũã dapʉẽi ʉ̃rʉ, mamina ãyi wũãwũã barabʉrʉdera maʉ̃ ũrãgʼata audre nesidayi. Mawũẽra yibarirãra nekʼãrẽ mejãcha odaibara ãyi wũãwũã bia dapʉẽita. Dayirã wũãwũã neẽ nããra biode krĩcha ẽ Daizeze Bedʼeaba ũrãgʼa diabʉra wũãwũã sãwũã dapʉẽi ʉ̃rʉ, mamina dayirã wũãwũã barabʉrʉdera audre nesidabʉ maʉ̃ta. Maʉ̃ kʼarea dayirãbara ewariza lepanʉ Daizeze Bedʼeara akʉza maʉ̃ ʉ̃rʉ biʼia krĩchapanʉ, abarika israelitara nokʼoba obada kĩrãkʼa (Deut. 17:19).
3. ¿Kʼãrẽta akʉdai naʉ̃ artikulodera?
3 Mara yibarirabara mayi wũãwũã jaradiaibara Jeowa ʉ̃rʉ, naʉ̃ra arigʉ yibia. Mamina bari jaradianʉmabe ẽ Daizeze ʉ̃rʉ, kʼarebaibara wãrĩnu ãya Jeowata kãgadamarẽã. ¿Sãwũã oseapanʉ? Naʉ̃ artikulode bʉ ũrãgʼa kimare yibarira kʼarebaita (2 Tim. 3:16). Akʉza kʼawuadayi ʉ̃kʉrʉ yiza yibariraba kʼãrẽ nebia ũdudata maʉ̃ ũrãgʼa ũrĩnaneba.
ŨRÃGʼA KIMAREBɄ YIBARIRAITA
¿Yibariraba Jeowa kʼarebata jʉrʉbʉbʉrʉ akʉza yiza biata diabʉbʉrʉ kʼãrẽta berabari? (Akʉra parrapo 4 akʉza 8).
4. ¿Kʼãrẽ ũrãgʼaba kʼarebaseabʉ yibarirãra ãyi wũãwũãba Jeowa kãgamarẽãra? (Santiago 1:5).
4 Nããra: Jeowa kʼarebata jʉrʉidua. Maraba wũãwũãra kʼarebaira Jeowata kãgamarẽã, buru biata nesidabʉ, maʉ̃ kʼarea Jeowaʼa widibara (akʉra Santiago 1:5). Jeowara ũrãgʼabari yibia, ¿kʼãrẽa? Iya audre biʼia kʼawuabʉ baera badu yibariraira (Sal. 36:9). Adewara iya dayirã ũrãgʼa diabʉbara jõmaʉ̃ta kʼarebabʉ bia wãita (Is. 48:17).
5. (1) ¿Sãwũã kʼarebabʉ yibarirãra Jeowa organizasionbara? (2) ¿Kʼãrẽta kʼawuasi mebẽrã Amorimʼnebara wũãwũãra dapʉẽi ʉ̃rʉra?
5 Jeowabara kʼarebabʉ yibarirãra ãyi wũãwũã jaradiaita iyita kãgadamarẽã, Daizeze Bedʼeadeba akʉza iyi organizasioneba (Mat. 24:45). Bari jaraita, jw.org de jʉrʉseabʉ libro Bʉra ewari jõmaʉ̃nẽ sobia baseabʉ yi 50de akʉza bideora mejãcha ũduyi yibarira ũrãgʼa diabʉ ʉ̃rʉ, ãya wũãwũã sãwũã dapʉẽi ʉ̃rʉ (Prov. 2:4-6).b
6. ¿Kʼãrẽba kʼarebabʉ zeze aba iyi wũãwũã dapʉẽira zare ẽ baita?
6 Yibarira mejãchaʉba biga diapanʉ Jeowa, iya kʼareba zebʉrʉ baera iyi organizasioneba. Zeze aba yi trʉ̃ Josephba naʉ̃ta jarabʉ: «Wũãwũã ũbea Daizeze ode kʼẽrẽpa dapʉẽira zareabʉ. Mʉ̃ kimata mʉ̃me yiwidʼibʉ Jeowaʼa daita kʼarebamarẽã. Daiba nesidabʉde ʉ̃tʉ zebʉ bideorata akʉza artikulorata daiba nesidabʉ ʉ̃rʉ bedʼeabʉta. Jeowa kʼareba jʉrʉiba daira biode kʼarebabʉrʉ dai wũãwũã dapʉẽita audre zare ẽ baita». Joseph akʉza yi kimaʉ̃mebara ũdu zebʉrʉ naʉ̃ra artikulorabara akʉza biodeorabara kʼarebabʉta ãyi wũãwũãra Jeowa neũdukʼawua bʼaita.
7. ¿Kʼãrẽa yibarirãra zarea oibara yiza bia diaita? (Romanos 2:21).
7 Yi ũmeta: Mayi yizadeba jaradiaidua. Wũãwũãrabara jõma obʉ ãya akʉbʉta. Yibarirabara jõma aripe obe ẽ nemitia omia baera (Rom. 3:23). Mamina yi buru biara zarea obʉ aripe oita mawũã ãyi yizadeba jaradiaita (akʉra Romanos 2:21). Zeze abaʉba jarasi: «Algodonba bania sõbʉ kĩrãkʼa wũãwũãrabida jõma sõbʉ», adewara jarasi: «Wũãwũãraba ũdubʉrʉde daya jarabʉde oẽãta, ãyara dayaʼa jarayi». Dayirãba kãgapanʉbʉrʉ dayi wũãwũãba Jeowata kãgamarẽã dayirãba nããra kãga ũdubibara Jeowata.
8, 9. ¿Kʼãrẽta kʼawuasida Andrew akʉza Emmaba jaradadebara?
8 Yibarirabara nekʼãrẽ mejãcha oseabʉ yi wũãwũãra jaradiaita Jeowata kãgamarẽã. Andrew 17 poagabʉ akʉza buru kʼoema. Iya naʉ̃ta jarasi: «Mʉ̃ yibarirabara badua jaradiabasi yiwidʼira audre yibiata. Diamasiza mʉ̃ zezera mʉ̃me badua yiwidʼibasi mʉ̃ yiwidʼi berabarisimina. Mʉ̃ papaba akʉza mʉ̃ zezeʉ̃meba jarabasi Jeowara badua daya kãgade yiwidʼiseabasita, maʉ̃ kʼarea mʉ̃itara yiwidʼi bʼaira jipade audre yibiabasi. Akʉza idira mʉ̃ra bia sentibʉ Jeowa yiwidʼibʉrʉde adewara akʉbʉ Jeowara mʉ̃ zeze mʉ̃ kãgabʉ kĩrãkʼa». Mara yibarirãbara kĩrãbeibara, Jeowata arigʉ kãgapanʉbʉrʉ naʉ̃ba oseabʉ mara wũãwũãbida Jeowata mejãcha kãgamarẽã.
9 Emma zeze ãyi dedaʉba wãsidera yi papara mejãcha debe barabesi. Emmaba jarabʉ: «Mʉ̃ papaba plata wiña ũdubasi baera daitara jipade zareanʉmasi. Mamina mʉ̃ papaba ewari jõmaʉ̃nẽ jarabasi Jeowabara akʉbʉta iyiʉ̃me kʼẽrẽpabʉra akʉza ãya nesidabʉta diabʉta. Maʉ̃ta iya obʉdeba maʉ̃ bedʼea ĩjãbʉta ũdubibasi. Mʉ̃ papabara iyi yizadeba jaradiabasi». ¿Kʼãrẽta kʼawuapanʉ dayirãbara? Bedʼea zroma erpanʉmina yibarirabara ãyi yizadeba jaradiaseapanʉ (Gál. 6:9).
10. ¿Sõbede jaradiaseabasi israelitarabara ãyi wũãwũãrãra? (Deuteronomio 6:6, 7).
10 Yi ũbeata: Badua bedʼeaibara bʉyi wũãwũãrabawara. Jeowabara jarasi israelitaraʼa ewariza badua bedʼeabaibarabasita ãyi wũãwũãrabawara (akʉra Deuteronomio 6:6, 7). Mawũã opanʉbʉrʉ yibarirabara oseabasi ãyi wũãwũãba Jeowata kãgamarẽã. Bari jaraita, yi zezebara nejaradiaseabasi ãyi warrara ne ubʉde akʉza ne u jʉrepebʉde, adewara yi paparabida ãyi kauʼara nejaradiaseabasi nekʼãrẽ kʼasʉbʉde akʉza ne kʼabʉde. Yibarirata ãyi wũãwũãrabawarabasidera Daizeze ʉ̃rʉ nejaradiaseabasi. Bari jaraita, bedʼeaseabasi Jeowaba ãyi sãwũã kʼareba zebʉrʉ ʉ̃rʉ akʉza kʼãrẽ nebiata dia zebʉrʉ ʉ̃rʉ.
11. ¿Sõbede bedʼeaseapanʉ yibarira Daizeze odepanʉra yi wũãwũãrabawara?
11 Idi ewaridera yibarirãra mejãcha trajapanʉ baera akʉza warrarãra kolegiodepanʉ baera ewari neẽ ãba bʼaita. Maʉ̃ kʼarea yibarirãra ewari jʉrʉibara ãyi warrabawara ãba bʼaita akʉza ãba bedʼeapanaita (Efes. 5:15, 16; Filip. 1:10). Mawũã oira semanaza mebẽrãbawaraʉba Jeowa ʉ̃rʉ kʼawuabʉba kʼarebaseabʉ. Warra yi trʉ̃ Alexanderba jarabʉ: «Mʉ̃ zezebara nekʼãrẽ jõma obʉ semanaza mebẽrãbawara Jeowa ʉ̃rʉ kʼawuabʉta adua ẽ baita akʉza estudio jõbʉrʉde ãba audre eda wua bedʼeapanʉ».
12. ¿Kʼãrẽta kĩrãbeibara mebẽrã burubara yi mebẽrãbawara Jeowa ʉ̃rʉ kʼawuabʉrʉdera?
12 ¿Kʼãrẽta oseabʉ yi mebẽrã burubara yi mebẽrãbawara Jeowa ʉ̃rʉ kʼawuapanʉne, yi warrara masena ẽ marẽã? Bari jaraita, ãba estudiaseabʉ libro Bʉra ewari jõmaʉ̃nẽ sobia baseabʉ. Naʉ̃ librota estudiapanʉbʉrʉ kʼarebaseabʉ audre bedʼeaita yi wũãwũãrabawara. Yibariraba kãgapanʉbʉrʉ ãyi wũãwũãba ãyide ĩjãmarẽã, semanaza yi mebẽrãbawaraʉba Jeowa ʉ̃rʉ kʼawuapanʉne kʼẽãrãra mara wũãwũãra. Adewara bʉ mebẽrãbawara ãba Jeowa ʉ̃rʉ kʼawuapanʉne, bʉ warraraba jarara krĩcha abarika bʉ ẽãta Daizeze Bedʼeaba jarabʉde, maʉ̃ kʼareara kʼẽãrãra, awuarabʉrʉ ibiade bedʼeara iyi soidu jʉ̃ẽita akʉza biga diara iyi sãwũã krĩchabʉta jarasi baera. Bʉ warraba jarara iyi sãwũã sentibʉta akʉza krĩchabʉta, bʉitara zare ẽ bayi kʼarebaita.
¿Yibarirabara sãwũã Jeowaba nekʼãrẽ jõma parãnaneba jaradiaseabʉ yi wũãwũãrara? (Akʉra parrapo 13).
13. ¿Sãwũã kʼarebaseabʉ yibarirabara yi wũãwũãra Jeowa kʼawa bʼaita?
13 Yibarirabara jʉrʉseabʉ yi wũãwũãra sãwũã kʼarebaita Jeowa kʼawa bamarẽã. Jeowa ʉ̃rʉ jaradiaira ewari jõmaʉ̃nẽ Daizeze Bedʼeadeba jaradiaita nesida ẽ. Papa abaʉba yi trʉ̃ Lisaba naʉ̃ta jarabʉ: «Kʼarebabasi dai wũãwũãra Daizeze ʉ̃rʉ kʼawuaita, naʉ̃ drʉade nekʼãrẽ jõma parãbʉdeba. Wũãwũãra mejãcha ipidapanʉne ãyi usa zakeba oda kʼarea, ãya kĩrãbebipanasi Jeowara sobiabʉta, dayirã sobiapanʉ kĩrãkʼa».
¿Yibarirãra marabara ũdukʼawuabʉka mara wũãwũã neũdukʼawuara? (Akʉra parrapo 14).d
14. ¿Kʼãrẽa yibarirabara kʼarebaibara ãyi wũãwũãrãra neũdukʼawua bia erbamarẽã? (Proverbios 13:20).
14 Yi kimareta: Kʼarebara mara wũãwũãrãra neũdukʼawua bia erbamarẽã. Daizeze Bedʼeabara jarabʉ dayi neũdukʼawuabara nebiata obiseabʉta mawũã ẽ bʉrʉ nemitiata obiseabʉta (akʉra Proverbios 13:20). Mara yibarirabara, ¿kʼawuabʉka kʼaita bʉ wũãwũã neũdukʼawuara? ¿Bʉara biʼia ũdukʼawuabʉka ãyira akʉza ãyibawara ãbabidabarika? ¿Kʼãrẽta oseabʉ bʉ wũãwũãra kʼarebaita neũdukʼawua Jeowa kãgabʉta erbamarẽã? (1 Cor. 15:33). Bʉ wũãwũãʉ̃me nekʼãrẽ obʉrʉdera trʉ̃ra mebẽrã Jeowaʉ̃me neũdukʼawua biata ãyibawara bʼaita (Sal. 119:63).
15. ¿Kʼãrẽta oseabʉ yibarirabara kʼarebaita ãyi wũãwũaba neũdukʼawua bia erbamarẽãra?
15 Yiza aba akʉdadrʉ. Yibari aba yi trʉ̃ Tony akʉza yi kimaʉ̃meba kʼãrẽta opanʉta ãyi wũãwũãra kʼarebaita neũdukʼawua bia erbamarẽã: «Mʉ̃a akʉza mʉ̃ kimaʉ̃meba poaga bio ba trʉ̃ zebʉrʉta mebẽrã kultura awuaradebemata, zõrãrãta akʉza warrarata dai deda neko zemarẽã. Adewara mebẽrãbawara Jeowa ʉ̃rʉ kʼawuapanʉ, mawũã ũdukʼawuapanʉ ẽbẽrarã Jeowa mejãcha kãgabʉta akʉza sobiapanʉ Jeowaba zokʼabʉta obʉ baera. Akʉza dai dedara kʼãĩ zebari kongregasionʼra akʉbari zõrãrãta akʉza mebẽrã zokʼa bʉepanʉ awuru drʉa eda Daizeze Bedʼea jaradiabarirata adewara wuabema mebẽrãrata. Daiba ũdu zebʉrʉ naʉ̃ra mebẽrãba ãyi sãwũã berabarida nebʉrabʉba akʉza ãyi sãwũã zarea obʉba Jeowaba zokʼabʉ oita, dai wũãwũãra audre kʼarebabʉta Jeowa kʼawa bʼaita». Yibarirãra, bʉa nekʼãrẽ oseabʉta jõma ora kʼarebaita bʉ wũãwũãra neũdukʼawua bia erbamarẽã.
BɄ WŨÃWŨÃRA JẼDA ZESEABɄ JEOWAMA
16. ¿Kʼãrẽta kĩrãbeibara yibarirabara yi wũãwũãraba Jeowaba zokʼabʉta okĩrã ẽ bʉrʉ?
16 Bʉta zarea obʉmina bʉ wũãwũãra jaradiaita Jeowa kʼawa bamarẽã, mamina bʉ wũãwũãba jarara okĩrã ẽãta Jeowaba zokʼabʉta, ¿bʉara kʼãrẽta oseabʉ? Krĩcharãra bʉa aña jaradiasita. Kĩrãbera Jeowabara dayirã aba abaka iduaribibʉ kʼãrẽ kʼawua jidamarẽã iya zokʼabʉ oita mawũã ẽ bʉrʉ oẽ baita. Bʉ wũãwũãba Jeowata idubʉra, krĩcharãra jẽda ze ẽ baita. Iyira jẽda zeseabʉ Jeowama. Kĩrãbera Jesuba nebʉradata warra aba aduada ʉ̃rʉ (Luc. 15:11-19, 22-24). Iyara jõma aña osimina jẽda zesi. Mamina bʉa krĩchaseabʉ: «Naʉ̃ra bari nebʉra, naʉ̃ra wãrĩnu bʼaira mawũã berabari ẽ basi». Atia akʉdayi Elie yizata, naʉ̃ba ũdubibʉ naʉ̃ra wãrĩnu berabaribʉta.
17. ¿Sãwũã kʼarebabʉ bʉra Elie yizabara?
17 Elieba jarabʉ iyi yibarira ʉ̃rʉ: «Mʉ̃ yibarirabara nekʼãrẽ jõma osi jaradiaita Jeowata kãgamarẽã akʉza Daizeze Bedʼeata. Mamina mʉ̃ kʉ̃rãbaside mʉ̃a jõma aña ojʉ̃drʉsi». Eliebara nemitiata obasi wuabemaraba ũdu ẽãne, maʉ̃ daucha Jeowadesida obasi. Adewara yibariraba nekʼãrẽ jõma obadara iyi kʼarebaita Eliebara ũrĩkĩrã ẽ basi ãyi ũrãgʼara. Eliera wãsi iyi dedaʉba akʉza oẽ basi Jeowaba zokʼabʉta, mawũã Jeowadeba jĩgarabasimina edaʉde Daizeze ʉ̃rʉ bedʼeabasi iyi neũdukʼawuaʉ̃me. Elieba jarabʉ: «Mʉ̃a badua Jeowa ʉ̃rʉ bedʼeabʉde audre krĩchabasi iyi ʉ̃rʉ. Mʉ̃ yibariraba wãrĩnu Daizeze ʉ̃rʉ jaradiadara ne u waribari kĩrãkʼa, wiña wiñane mʉ̃ sode warisi». Maʉ̃ tẽã Eliera jẽda zesi Jeowama.c Yibarirãra mejãcha sobiabasibaibara iyaʼa wiñayiruedaʉba Jeowa kãgamarẽã jaradiasida baera (2 Tim. 3:14, 15).
18. ¿Sãwũã akʉbʉ bʉara yibariraba zarea opanʉra kʼarebaita ãyi wũãwũãraba Jeowata kãgamarẽã?
18 Mara yibarirãra Jeowabara trajo biata diabʉ kʼarea. Maraba dapʉẽpanʉ baera, wũãwũãra tẽãne Jeowaba zokʼabʉde panairata (Sal. 78:4-6). Kʼawuapanʉ naʉ̃ trajo oira zareabʉta, maʉ̃ kʼarea biga diakĩrãpanʉ soiduba marabara bia opanʉta. Nekʼãrẽ jõma oidua mara wũãwũãra kʼarebaita Jeowa kãgamarẽã akʉza ũrĩmarẽã Jeowaba ũrãgʼabʉta, mawũã opanʉbʉrʉ Daizeze Jeowara mejãcha sobiabayi mara kʼarea (Efes. 6:4).
TRÃBI 135 Jehová te pide: “Sé sabio, hijo mío”
a Yibarirabara kʼarebabʉ ãyi wũãwũãba nesidabʉ jõma erbaita adewara aduʼapanaita ãyi wũãwũãta mejãcha kãgapanʉ baera. Mamina mejãcha zarea opanʉ jaradiaita audre kãgamarẽã Jeowata. Mawũã oita, naʉ̃ artikuloba ũrãgʼa kimare diabʉ.
b Eda wãra jw.org de akʉza akʉra bideo Jehová nos enseñó a educar a nuestros hijos.
c Akʉra «La Biblia les cambió la vida» La Atalaya 1 abril 2012de.
d POTORABA ŨDUBIBɄTA: Yi zeze aba jemebʉ yi warraʉ̃me akʉza yi warra neũdukʼawuaʉ̃me, mawũã audre ũdukʼawuaita.