Bʉitara idi ewadera, ¿kʼãrẽta jarakĩrãbʉ Apocalipsis librobara?

1, 2. ¿Kʼãrẽa yibia Apocalipsis librora dayirãitara?

BɄA ewari aba akʉra ẽbẽra awuruba erbʉ potota, nama ũduyi ẽbẽra bʉa ũdukata. Mamina bʉa ũduyi abaʉde bʉta edabʉta, maʉ̃ kʼarea bia akʉyi maʉ̃ potota. Mõbe krĩchayi sama akʉza sõbeda sakasita, adewara jʉrʉbʉ saʉ̃rata bʉa ũdukʼawuabʉta mama edapanʉranebemata. Bʉitara naʉ̃ potora audre yibia wuabemaraira.

² Apocalipsis librora naʉ̃ poto kĩrãkʼabʉ, ¿kʼãrẽa? Nããra, dayirãita bʉsida baera. Apocalipsis libro jʉ̃drʉbʉrʉde jarabʉ: «Daizezebara jarasi Jesuʼa aranʉbai kʼãrẽta berabarita, Jesuba iyi nezokʼara ũdubimarẽã» (Apoc. 1:1). Naʉ̃ librora ẽbẽra jõmaita bʉda ẽ basi, awuarabʉrʉ dayirã Daizeze nezokʼaraita bʉsida. Mawũẽra libro Apocalipsis lebʉrʉde kʼawuadayi, mama eda jarabʉra dayirãba kʼarebabʉta aripe berabarimarẽã.

3, 4. Apocalipsis libroba jarabʉdebara, ¿sõbede aripe berabari jʉ̃drʉsi mama eda jarabʉ propesiara akʉza dayirãba kʼãrẽta oibara?

³ Adewara libro Apocalipsisʼra yibia jaradiabʉ baera dayirã sõbede aripe berabarita mama eda jarabʉ propesiara (Apoc. 1:10). Poaga 96 kʼawa Kristo tẽã Juanba bʉsimina naʉ̃ra propesiara sõbede aripe berarari jʉ̃drʉita, maʉ̃ra iyabaʉ poagade aripe berabari ẽ basi, awuarabʉrʉ poaga tẽãbʉrʉ aripe berabarisi (Mat. 25:14, 19; Luc. 19:12). Daizeze Bedʼeaba ũdubibʉ naʉ̃ propesiara aripe berabarisita 1914de, Jesuba ʉ̃tʉ zokʼa jʉ̃drʉside. Apocalipsis librodebʉ propesia jarabʉta kʼãrẽta berabarita Daizeze pʉwʉrʉta, maʉ̃ra aripe berabari jʉ̃drʉsi poaga 1914deba yẽta.

⁴ Dayirãra panʉ baera naʉ̃ra propesiara aripe berabarinʉmʉ ewaride, maʉ̃ba kĩrãbedaibara ũrãgʼa Apocalipsis 1:3de jarabʉta: «Sobiabayi yi nemi jĩgʉa lebʉra bedʼea naʉ̃ propesiadebemata adewara sobiabayi yi ũrĩbʉrʉta akʉza yi obʉrʉta bedʼea nama bʉchʉbʉde kĩrãkʼa». Nama jarabʉ, bedʼea aripe berabarira arakʼaita ba baera dayirãbara nemi jĩgʉa ledaibara bedʼea naʉ̃ propesiadebemara, ũrĩbara akʉza oibara mama jarabʉta. Atia akʉdayi saʉ̃ bedʼea naʉ̃ propesiadebemarata ũrĩbarata.

¿BɄA OBɄRA JEOWABARA BIA AKɄBɄKA?

5. ¿Kʼãrẽta jaradiabʉ Jesuba mebẽrã siglo nããradebema ũrãgʼa diadaba?

⁵ Apocalipsis libro yi kapitulo abaʉde ũdubibʉ, Jesubara kʼawuabʉta kongregasionʼra naʉ̃ drʉa jõmaʉ̃nẽbema kʼãrẽta berabarinʉmʉta (Apoc. 1:12-16, 20; 2:1). Naʉ̃ta ũdubisi Asia menordebema kongregasionʼra 7 panʉʼa bedʼea zokʼaside. Maʉ̃ bedʼea zokʼa bʉedadeba Jesuba ũrãgʼata diasi mebẽrã siglo nããradebemara, ãya obʉrʉta Jeowaba bia akʉmarẽã. Akʉza idi ewadebida naʉ̃ra ũrãgʼaba kʼarebabʉ dayirãsida, ¿kʼãrẽta jaradiabʉ naʉ̃ba? Jesubara biʼia kʼawuabʉta dayirã wãrĩnu Jeowa neũdukʼawua kʼawuaita. Iya kʼawuabʉ dayirãba kʼãrẽta oibarata Jeowaba bia akʉmarẽã, maʉ̃ kʼarea kʼarebabʉ akʉza jaradiabʉ kʼãrẽta oibarata. Atia akʉdayi ʉ̃kʉrʉ ũrãgʼa Jesuba diadara dayirãba idi oibarata.

6. (1) Apocalipsis 2:3, 4de jarabʉdebara, ¿kʼãrẽ bedʼea zromata erpanasi mebẽrã Éfesodebemabara? (2) ¿Kʼãrẽta jaradiabʉ naʉ̃ba dayirãʼa?

⁶ (Akʉra Apocalipsis 2:3, 4). Jeowa kʼarea nãã kãga erbadata idubʉrãra. Jesuba mebẽrã Éfesodebema jaradaba ũdubisi, ãya bedʼea zroma erbadara awuantasimina tẽã juneane idubʉsidata nãã kãga ũdubibadata. Ãya Jeowaba bia akʉmarẽãbasibʉrʉ jẽda kãga ũdubibarabasi Jeowaʼa, nãã ũdubibada kĩrãkʼa. Idi ewadebida abarika berabaribʉ, bari awuantaibara ẽ awuarabʉrʉ wãrĩnu kãgade awuantaibara. Jeowaba dayirãba obʉ awa akʉ ẽ, awuarabʉrʉ dayirãba kʼãrẽ kʼãrẽa obʉsida akʉbʉ. Iya kãgabʉ dayirãba obʉra iyi kãgaba odamarẽã akʉza iyaʼa biga diakĩrãpanʉ baera (Prov. 16:2; Mar. 12:29, 30).

7. (1) Apocalipsis 3:1-3 bayeda jarabʉdebara, ¿kʼãrẽ bedʼea zromata ũdusi Jesuba kongregasion Sardisʼdebemane? (2) ¿Kʼãrẽta oibara dayirãbara?

⁷ (Akʉra Apocalipsis 3:1-3). Ʉ̃rʉmapanadrʉ. Mebẽrã Sardisʼdebemabara awuru bedʼea zromata erpanasi. Ãya nãã mejãcha zarea opanasi Jeowaba zokʼabʉ oita, mamina tẽãne ãya nãã obada kĩrãkʼa oda ẽ basi, awuarabʉrʉ wiña owãsida. Maʉ̃ba Jesuba jarasi ãyira ʉ̃rʉma bʼaibarabasita. ¿Kʼãrẽta jaradiabʉ naʉ̃ba dayirãʼa? Dayirãba kʼawuapanʉmina Jeowaba kĩrãdua ẽ baita dayirãba iyi kʼarea kʼãrẽ opanʉra, krĩcha ẽ baibara nãã dayirãba mejãcha zarea osi baera iya zokʼabʉ oita, idira mejãcha oira nesida ẽãta (Heb. 6:10). Dayirãba idi ewade nãã mejãcha obada kĩrãkʼa obeda ẽ bʉrʉ, zarea odaibara dayirãba oseabʉta oita Jeowa kãgaba akʉza ʉ̃rʉmapanaita (1 Cor. 15:58; Mat. 24:13; Mar. 13:33).

8. ¿Jesuba mebẽrã Laodiceadebema jaradadebara kʼãrẽta kʼawuapanʉ dayirãba?

⁸ (Akʉra Apocalipsis 3:15-17). Ora Jeowaba zokʼabʉta sobiade akʉza soiduba. Bedʼea Jesuba Laodiceadebemara zokʼadaba ũdubisi awuru bedʼea zromata. Ãya nekʼãrẽ Jeowaita obadara nãã obada kĩrãkʼa sobiade oda ẽ basi. Maʉ̃ kʼarea Jesuba jarasi ãyira «sobiabʉ ẽãta» akʉza «nekʼãrẽ neẽãbʉta». Mawũẽra ãyira ʉ̃rʉmaibarabasi Jeowaba zokʼabʉta sobiade oita (Apoc. 3:19). Idi ewade Jeowaba zokʼabʉta sobiade oda ẽ bʉrʉ, biʼia akʉdaibara nebia Jeowaba akʉza iyi organizasionba dayirã diabʉta. Mawũãtrʉ ãya nekʼãrẽ obʉ kʼarea biga diakĩrãnañi (Apoc. 3:18). Edaʉde dayirãba nebiata mejãcha erbakĩrãpanʉbʉrʉ naʉ̃ba jĩga babiseabʉ Jeowadeba, maʉ̃ba dayirãba kãgapanʉ Jeowaba zokʼabʉta nããra bʉeita.

9. ¿Kʼãrẽta oda ẽ baibara dayirãba?

⁹ Apostataraba jarabʉta ũrĩ ẽ baibara. Jesuba kʼẽãsi ʉ̃kʉrʉ mebẽrã Pérgamonebemara kongregasionta ãba ba ẽ basi baera akʉza ãyirainʉ yõbibasi baera (Apoc. 2:14-16). Mamina ibia bedʼeabasi mebẽrã Tiatiradebemara ʉ̃rʉ, ãya ũrĩna ẽ basi baera Diaruba jaradiabʉta akʉza jarasi Daizeze ode kʼẽrẽpa panamarẽã (Apoc. 2:24-26). Naʉ̃ra mebẽrã Diaruba jaradiada ũrĩnaneba Daizezedeba jĩga wãnara jẽda krĩchadaibarabasi ãya odata, mõbe nebiata oibarabasi. Idi ewadebida dayirãba oẽ baibara nekʼãrẽ Jeowaba zokʼabʉdebʉ ẽãra. Apostataraba edaʉde jarapanʉmina Daizezeba jarabʉta ũrĩkĩrãpanʉta, ãya obʉba ũdubibʉ wãrĩnu ũrĩkĩrãna ẽãta Daizezeba zokʼabʉra (2 Tim. 3:5). Dayirãba biʼia akʉpanʉbʉrʉ Daizeze Bedʼeaba jarabʉta zare ẽ bayi kʼawuaita saʉ̃ba aña jaradiabʉta akʉza saʉ̃ba aripe jaradiabʉta, mawũã opanʉbʉrʉ aña jaradiabʉdade yi sewabida ẽ bayi (2 Tim. 3:14-17; Jud. 3, 4).

10. ¿Kʼãrẽta kʼawuapanʉ Jesuba mebẽrã Pérgamonebema akʉza Tiatiradebema jaradadeba?

¹⁰ Mara kakuata bia zokʼa kʼawuaidua, kayirua oda ẽ bʼaita. Mebẽrã Pérgamonebemaba akʉza Tiatiradebemaba awuru bedʼea zromata erpanasi. Ãya ũdubasi ẽbẽraba ãyi kakuata bia zokʼa ẽãta, mõbe kayiruata opanasita, mawũãsidu iduaribipanasi. Maʉ̃ kʼarea Jesuba kʼẽãsi ãyira (Apoc. 2:14, 20). Naʉ̃ba jaradiabʉ dayirãba dayirã kakuata bia zokʼada ẽ bʉrʉ, Jeowabara bia akʉ ẽ baita iyi ode panʉta dããrabamina (1 Sam. 15:22; 1 Ped. 2:16). Naʉ̃ drʉade nekayirua mejãcha opanʉmina Jeowaba kãgabʉ dayirãba iya zokʼabʉta odamarẽã, mawũã wawia ũdubita (Efes. 6:11-13).

11. ¿Kʼãrẽta kʼawuasida nainʉbayeda? (Akʉra yi rekuadro «¿Kʼãrẽta kʼawuapanʉ idi ewade?»).

¹¹ ¿Kʼãrẽta kʼawuasida nainʉbayeda? Kʼawuasida kʼãrẽta oibarata Jeowaba bia akʉmarẽã dayirãba obʉta. Dayirãba aña opanʉbʉrʉ zarea odaibara maʉ̃ nemitia idubʉita (Apoc. 2:5, 16; 3:3, 16). Atia akʉdayi nekʼãrẽ awuru Jesuba jaradata naʉ̃ra kongregasionʼra.

PẼWÃBɄDADE AWUANTAYI AWA BʼAIDUA

12. ¿Jesuba ũrãgʼata diasi kongregasion Esmirnanebema akʉza Filadelfiadebema, dayirãbara kʼãrẽta kʼawuapanʉ naʉ̃nebara? (Apocalipsis 2:10).

¹² Atia akʉdayi kʼãrẽta jarasita Jesuba kongregasion Esmirnanebema akʉza Filadelfiadebema. Jesuba jarasi naʉ̃ra mebẽrã ãyi pẽwãbʉdade perada ẽ marẽã, Jeowaba kʼarebai baera ãyita iyiare kʼẽrẽpapanasi baera (akʉra Apocalipsis 2:10; 3:10). ¿Kʼãrẽta kʼawuapanʉ naʉ̃ bedʼeadeba? Kʼawuapanʉ dayirãra ʉ̃ra zeide pẽwãnaita, mamina maʉ̃ ewari zebʉrʉde awuantaya awa panaibara (Mat. 24:9, 13; 2 Cor. 12:10). Yibiabayi maʉ̃ ʉ̃rʉ krĩchaita.

13, 14. Apocalipsis 12de jarabʉ yõ berabarida ʉ̃rʉ, ¿kʼãrẽta berabari zebʉrʉ Daizeze nezokʼarãra naʉ̃ yõ kʼarea?

¹³ Apocalipsisba jarabʉ dayirã ewaridera Daizeze nezokʼarãra pẽwãnaita. Kapitulo 12ba jarabʉ Jesu Nokʼo ba kʼãrãpe iyi angelerabawara yõsidata Diaruʉ̃me akʉza iyi kʼaidubemabawara (Apoc. 12:7, 8). Diarura aduasi, maʉ̃ kʼarea Jesuba uda jʉretasi, maʉ̃ba ãyara mejãcha zʉbʉriabibʉ ẽbẽrarãta (Apoc. 12:9, 12). Maʉ̃ kʼarea, ¿kʼãrẽta berabaribʉ Daizeze ode panʉrãra?

¹⁴ Apocalipsisba ũdubibʉ Diaru sãwũãbʉta ʉ̃tʉba jʉretada tẽã. Iyira jẽda ʉ̃ta wãbe ẽ baera, maʉ̃ kʼarea kĩrʉbʉ akʉza zʉbʉriabibʉ ʉ̃ta wãira nama egorode panʉta, ãyira Daizeze Nokʼobaribʉ nama egorode akʉza Jesu ʉ̃rʉ jaradiapanʉ (Apoc. 12:17; 2 Cor. 5:20; Efes. 6:19, 20). ¿Naʉ̃ propesia sãwũã aripe berabaribʉ?

15. ¿Apocalipsis librode testigora ũme jarabʉra kʼairabasi?, ¿kʼãrẽta berabarisi ãyira?

¹⁵ Diarubara Daizeze nejʉrara pẽwãbisi mebẽrã ʉ̃ta wãirãra naʉ̃ drʉade jaradia wãpanʉ akʉbarirata. Ʉ̃kʉrʉ maʉ̃ranebemara nemejãcha opanasi Jeowa organizasione, naʉ̃rabasi Apocalipsis librode testigorab ʉ̃mebʉ beadata jarabʉra (Apoc. 11:3, 7-11). Poaga 1918de mebẽrã jaradiapanʉra akʉbaridebemata jidasida 8 karselde bʉedaita ewari biobayeda, mawũã berabaridadeba ẽbẽrabara krĩchaseapanasi wua jaradiada ẽ baita.

16. ¿Kʼãrẽta berabarisi poaga 1919de akʉza Diaruba kʼãrẽta ozebʉrʉ maʉ̃neba yẽta?

¹⁶ Adewara Apocalipsis 11de jarabʉ testigora ũme beida tẽãra jẽda piradrʉita. Maʉ̃ta aripe berabarisi ãyi karseldebada poaga aba berabarida tẽã. Marzo 1919de, mebẽrãra ẽdrʉside akʉza ãyi ʉ̃rʉ i kayirua jaradara wua jarada ẽ basi. Aramaʉ̃ta mebẽrã karseldeba ẽdrʉda tẽã mesera jʉrʉsida sãwũã jẽda jaradia jʉ̃drʉita, mamina Diarurabara maʉ̃neba yẽta jʉrʉsi sãwũã zʉbʉriabita mebẽrã naʉ̃ drʉa jõmaʉ̃nẽbemata (Apoc. 12:15). Maʉ̃ kʼarea dayirã jõmaʉ̃ba nesidapanʉ awuanta bʼaita akʉza ĩjã bʼaita (Apoc. 13:10).

ZAREA ORA JEOWABA ZOKʼABɄ JÕMA OITA

17. ¿Diaruba neida okĩrãbʉmina kʼaiba kʼarebabʉ Daizeze pʉwʉrʉra?

¹⁷ Apocalipsis libroba kapitulo12de jarabʉ Daizeze pʉwʉrʉ pẽwãbʉdadera erbaibasita kʼaiba kʼarebaita (Apoc. 12:16). Diarubara politikoraneba akʉza juezʼraneba neida obʉ Daizeze pʉwʉrʉta, mamina edaʉde naʉ̃ra juezʼrabara akʉza politikorabara kʼarebabʉ Daizeze pʉwʉrʉra. Maʉ̃ kʼarea ʉ̃kʉrʉ juezʼrabara iduaribibʉ Jeowa ʉ̃rʉ Kʼawuabipanʉrãba Daizezedebemata odamarẽã. Mawũã berabaribʉrʉdera Jeowa ʉ̃rʉ Kʼawuabipanʉrãra zarea opanʉ audre jaradiaita (1 Cor. 16:9).

18. ¿Naʉ̃ ewari jõbodoarera dayirãbara kʼãrẽta odaibara?

¹⁸ Jesuba jarasi Daizeze ewari zei nããra iyi kʼaidubemaraba jaradiaibasita bedʼea bia Daizeze Nokʼodebemata naʉ̃ drʉa jõmaʉ̃mae (Mat. 24:14). Maʉ̃ aripe oita angeleraba kʼarebapanʉ akʉza Apocalipsis librode jarabʉ naʉ̃ angelba «edeita bedʼea bia jõkata ẽbẽrarã jõma naʉ̃ drʉade panʉraita: bedʼea awuarabʉraita, ẽbẽra awuarabʉraita adewara pʉwʉrʉraitabida (Apoc. 14: 6).

19. ¿Jeowa ʉ̃rʉ Kʼawuabipanʉrãbara kʼãrẽta jaradiai ẽbẽrarãra?

¹⁹ Jeowa pʉwʉrʉbara bedʼea biata jaradiaibara, mamina maʉ̃ awa ẽ. Apocalipsis 8, 9 akʉza 10ba jarabʉ ʉ̃kʉrʉ angeleraba jarapanʉta kʼãrẽta berabarita yi ẽbẽra Daizeze Nokʼoba jarabʉde bʉ ẽãra. Maʉ̃ba Jeowa ʉ̃rʉ Kʼawuabipanʉrãbara ẽbẽrarã jaradiapanʉ ãyi kʼãrẽta berabarita, maʉ̃ba naʉ̃ bedʼeara ãyitara pʉrea kĩrãkʼabʉ akʉza granizo kĩrãkʼabʉ. Naʉ̃ bedʼea jaradiapanʉba ũdubibʉ Jeowaba kʼãrẽta oita nekʼãrẽ naʉ̃ drʉadebema Diaruba zokʼabʉta (Apoc. 8:7, 13). Ẽbẽrarãbara nesidapanʉ kʼawuaita Daizeze ewari zeira arakʼaitabata, mawũãtrʉ idubʉdai baera nekʼãrẽ kayirua ãya nãã obadara akʉza mawũãtrʉ ẽdrʉdayi Daizeze ewaride (Sof. 2:2, 3). Naʉ̃ bedʼeara ẽbẽrarãitara biga ẽ bai baera zowaĩnĩgʉata erpanaibara maʉ̃ bedʼea jaraita. Ewari bedʼea zroma ũdubʉrʉdera dayirãba ẽbẽrarã bedʼea jaraira audre zare bayi (Apoc. 16:21).

NAɄ̃ PROPESIABA BEDʼEA JARABɄTA ŨRĨDA

20. ¿Kʼãrẽ ʉ̃rʉ bedʼeadayi wuarebema artikulodera?

²⁰ Naʉ̃ propesiaba jarabʉra dayirãbara ũrĩbara, nama jarabʉra dayirãba ũdui baera (Apoc. 1:3). Mamina, ¿sãwũã awuantaseapanʉ dayirã pẽwãbʉdadera? ¿Sãwũã zowaĩnĩgʉade jaradiasepanʉ maʉ̃ bedʼeara? Nekʼãrẽ ũmeba kʼarebaseabʉ: nããra, Apocalipsis libroba Daizeze nejʉra ʉ̃rʉ jarabʉba, yi ũmeta, dayirãba nebi ʉ̃ra zeita krĩchapanʉba dayirãta kʼẽrẽpapanʉbʉrʉ. Maʉ̃ ʉ̃rʉ bedʼeadayi wuarebema artikulode.