«Yi Jeowa jʉrʉbʉra nebia wae ẽ bayi»

1. ¿Kʼãrẽ bedʼea zromata ũdusi Davidbara?

DAVIDʼRA mĩrʉ wãsi nokʼo Saúlba beakĩrãbasi baera akʉza iyira yiko neẽ basi, maʉ̃ kʼarea pʉwʉrʉ Nobʼidu jʉ̃ẽsi pan juesoma widita (1 Sam. 21:1, 3). Maʉ̃ tẽã iyi kʼaidubemabawara wãsi egoro zobeade mĩrʉita (1 Sam. 22:1). ¿Davidʼra kʼãrẽa mawũã berabarisi?

2. ¿Kʼãrẽa Saúlba obadara biga ẽ basi? (1 Samuel 23:16, 17).

² Saúlbara jʉrabasi Davidʼra yõne bia wãbasi baera akʉza kʼawuabasi baera iya Jeowa bedʼeata ũrĩ ẽ basi baera Jeowaba jʉrʉsita Davidʼta nokʼo bamãrẽa (akʉra 1 Samuel 23:16, 17). Saúlʼra waidide nokʼobasi baera gorogorora mejãcha erbasi, maʉ̃ kʼarea Davidʼra mĩrʉ wãsi iyi bebʉ kʼarea. ¿Saúlbara krĩchabasika iyira zarea erchʉta Jeowaba David nokʼo babi ẽ marẽã? (Is. 55:11). Daizeze Bedʼeabara jara ẽ maʉ̃ra, mamina dayirãba kʼawuapanʉ Saúlba obadara biga ẽ basita. Ẽbẽra Jeowaʉ̃me yõbʉra bia wã ẽ baera.

3. ¿David bedʼea zroma ũdubasimina kʼãrẽta krĩcha ẽ basi?

³ Davidbara ũdubisi edabʉta krĩchabʉta. Iyira nokʼo bakĩrã ẽ basi awuarabʉrʉ Jeowaba jʉrʉsi nokʼo bamãrẽa (1 Sam. 16:1, 12, 13). Maʉ̃ kʼarea, Saúlbara jʉrabasi Davidʼra akʉza beakĩrãbasi. Davidbara krĩcha ẽ basi iyi kayirua berabaribʉra Jeowadeba zesita akʉza iyi yiko wiña erbaside. Mĩrʉ wãside Jeowa ʉ̃rʉ aña krĩcha ẽ basi, awuarabʉrʉ iyi mawũã berabariside bʉsi Salmo 34:10de jarabʉta: «Yi Jeowa jʉrʉbʉra nebia wae ẽ bayi».

4. ¿Kʼãrẽ widita panʉnai?

⁴ Edaʉde Jeowa ode panʉrabara yiko mejãcha erbʉ ẽ akʉza ãya nesidabʉ jõma erbʉ ẽ,b maʉ̃ta audre berabaribʉ naʉ̃ pandemiaba. Maʉ̃ra audre berabari wãñi zʉbʉria zroma zebʉrʉde (Mat. 24:21). Atia panʉnañi widita kimare: ¿Sãwũã Davidʼra nebia wae ẽ basi? ¿Kʼãrẽa sobia kʼawuaibara dayirã nebia erbʉba? ¿Kʼãrẽa kʼawuaseapanʉ Jeowaba wãrĩnu akʉita? ¿Kʼãrẽta oseapanʉ zʉbʉria zroma zei nãã?

«NEKʼÃRẼ WAE Ẽ BAYI»

5, 6. ¿Sãwũã kʼarebabʉ Salmo 23:1-6 ba kʼawuaita kʼãrẽta jarakĩrãkʉta Jeowa ode panʉrãra «nebia wae ẽ baita»?

⁵ ¿Kʼãrẽta jarakĩrãbasi Davidba jaraside Jeowa ode panʉrãra nebia wae ẽ baita? Salmo 23ba jarabʉba kʼarebaseabʉ dayirã maʉ̃ audre biʼia ũrĩta (akʉra Salmo 23:1-6). Davidba naʉ̃ salmo jara jʉ̃drʉsi: «Jeowara obeja akʉbari. Maʉ̃ba mʉ̃ra nekʼãrẽ wae ẽ bayi». Akʉza Davidba jarabʉ iya nekʼãrẽ bia erbʉta Jeowata iyi obeja akʉbari baera. Jeowaba kʼarebabʉ kʼawuaita sãwũã aripe oita akʉza iyiʉ̃mebʉ bedʼea zroma ũdubʉde akʉza bia wãne, Davidbara kʼawuabasi iyi Jeowaʉ̃mebʉmina naʉ̃ba jarakĩrãkʉasi ẽãta iyira bedʼea zroma ũdu ẽ baibasita. Iyira sopʉabasimina akʉza nejʉra erbasimina kʼawuabasi Jeowara iyi obeja akʉbarita. Maʉ̃ kʼarea jarasi pera ẽ baita.

⁶ ¿Sãwũã Davidʼra nebia wae ẽ basi? Iya nekʼãrẽ jõma erbasi Jeowa kʼaita bʼaita akʉza sobia bʼaita, nekʼãrẽ mejãcha erbaita nesida ẽ basi iyira sobiabasi baera Jeowaba diabʉba akʉza iyitara audre biga basi Jeowaba akʉbʉta.

7. Lucas 21:20-24 bayeda jarabʉdebara, ¿kʼãrẽta oibarabasi kristianora siglo nããradebemabara?

⁷ Davidba bʉdaba jaradiabʉ aukʼara kãga ẽ bʼaita nebia daya erbʉta. Dayirãba nebia erbaseabʉmina naʉ̃ta mejãcha kãgabe ẽ. Atia kʼawuadayi sãwũã kristianora siglo nããradebemaba ũrĩbarabasita naʉ̃ta (akʉra Lucas 21:20-24). Jesuba jarasi Jerusalén pʉwʉrʉta gorogororaba pʉrrabʉdata ũdubʉdadera, katumaena mĩrʉ wãibarabasi. Naʉ̃ oira ãya nekʼãrẽ erbada jõma amaeibarabasi, mawũãtrʉ ẽdrʉibasi baera. Dããraba karta Jarakabʉba jarasi: «Ãya amaeibarabasi ãyi deta, ãyi drʉata, ãyi netata jõma. Maʉ̃ta osida soiduba ĩjãsida baera Jeowaba kʼarebaita akʉza ãyitara Jeowa bedʼea ũrĩta audre yibiabasi nekʼãrẽ amaeira».

8. ¿Kʼãrẽta jaradiabʉ dayirã mebẽrã siglo nããradebema berabaridaba?

⁸ Kristianora siglo nããradebemaba berabaridaba, ¿kʼãrẽta jaradiabʉ dayirã? Karta Jarakabʉba jarasi: «Ʉ̃ra zeide dayirãba ũdubibara sõbe kãgabʉta nebia dayirãba erbʉta, dayirãitara saʉ̃ta audre yibiabai ẽdrʉita mawũã ẽ bʉrʉ nebiata audre kãgaita. Mawũã zʉbʉria zroma zebʉrʉde dayirãra zarea oibara maʉ̃ bedʼea pʉa awuantaita. Idiba ʉ̃ta krĩchaibara kʼãrẽta oita kristianora nããbemaba oda kĩrãkʼa».c

9. Idi ewade, ¿sãwũã kʼarebabʉ Pablo ũrãgʼaba?

⁹ Ãyitara zarebasibaibara ãya nekʼãrẽ jõma erbada amaepe awuru drʉaeda wãira, maʉ̃ kʼarea ãya nesidabasi ĩjãita, Jeowaba ãyi kʼarebaita. Maʉ̃ kʼarea Pabloba ũrãgʼata diasi ãyaʼa kʼarebaita, iya jarasi: «Mara bebʉdera plata mejãcha kãgaraidua awuarabʉrʉ, sobiapanaidua nekʼãrẽ maraba erbʉba. Iya jarabʉ baera: ‹Mʉ̃a bʉra amae ẽ bayi akʉza ewari jõmaʉ̃nẽ bʉ kʼawabayi›. Soidʉba jaraseapanʉ: ‹Jeowara mʉ̃ kʼarebabari. Maʉ̃ba mʉ̃ra pera ẽ. ¿Mʉ̃ra kʼãrẽta oseabʉ yumakẽrãbara?›» (Heb. 13:5, 6). Kristianora Pabloba ũrãgʼa diada ũrĩnapeadaraitara mejãcha zare ẽ basi, awuru drʉa jʉ̃ẽbʉrʉde mama sobia bʼaira. Ãya soidʉba ĩjãpanasi Jeowaba diaibasita ãya nesidabʉra. Idibida Pablo ũrãgʼaba kʼarebaseabʉ ĩjã bʼaita ãyide kĩrãkʼa.

«SOBIAPANAIDUA MARABA NEKʼÃRẼ ERBɄBA»

10. ¿Kʼãrẽba kʼarebasi Pablora akʉza idibida sãwũã kʼarebabʉ dayirãra?

¹⁰ Pabloba Timoteoʼa ũrãgʼaside jarasi: «Erpanʉbʉrʉ kʼãrẽ koita akʉza kʼãrẽ jʉ̃ĩta maʉ̃ba sobiapanaibara» (1 Tim. 6:8). Naʉ̃ba jarakĩrãkʉ ẽ dayirãra de bia erchʉbe ẽãta, yiko bia kobe ẽãta mawũã ẽ bʉrʉ wua biʼia jʉ̃be ẽãta, awuarabʉrʉ Pabloba jarakĩrãbasi dayirãra sobiabaibarata nekʼãrẽ dayirãba erbʉba (Filip. 4:12). Naʉ̃ba kʼarebasi Pablora. Idibida dayirãitara audre yibiabaibara Jeowa neũdukʼawua bʼaita nebia erbaikaʉde (Hab. 3:17, 18).

11. ¿Kʼãrẽta kʼawuapanʉ Moisésba israelitara jaradadeba?

¹¹ Jeowaba kʼawuabʉ dayirãba wãrĩnu kʼãrẽta nesidabʉta dayirãneira. Akʉdadrʉ kʼãrẽta jarasita Moisésba israelitaraʼa drʉa ibʉawabʉmae 40 poaga berabaribiside: «Bʉa nekʼãrẽ obʉrʉde Jeowaba kʼareba zebʉrʉ baera, iya akʉbʉ bʉ drʉa ibʉawabʉde wãta, 40 poaga ba Jeowa bʉ̃me bʉta akʉza bʉa nekʼãrẽ jõma diabʉta» (Deut. 2:7). Maʉ̃ 40 poaga berabariyeda Jeowaba ãya diasi manata akʉza ãyi wua jõbi ẽ basi (Deut. 8:3, 4). Mamina ʉ̃kʉrʉ israelitarabara nemejãcha erbakĩrãbasi, maʉ̃ kʼarea Moisésba ãyaʼa kĩrãbebisi nesida ẽãta nemejãcha erbaira. Dayirãta sobiapanʉbʉrʉ nekʼãrẽ erbʉba akʉza biga diapanʉbʉrʉ Jeowaba nekʼãrẽ wiña kiru diabʉidu, naʉ̃ba sobiabiyi iyita.

ĨJÃPANAIDUA JEOWABA WÃRĨNU KʼAREBAITA

12. ¿Kʼãrẽa kʼawuapanʉ Davidbara iyikʉza ĩjãikaʉde Jeowata ĩjãsita?

¹² Davidbara kʼawuabasi Jeowara ẽbẽra iyi kãgabʉ kʼawabʉta. Iya Salmo 34 bʉside zʉbʉriabasimina sentisi Jeowa angel iyi kʼawabʉ kĩrãkʼa. Naʉ̃ra sentisi Jeowata soiduba ĩjãbasi baera (Sal. 34:7). Davidba jarasi Jeowa angelra gorogoro iyi nejʉra jʉ̃ãbʉ kĩrãkʼabʉta, Davidʼra gorogoro zarebasimina akʉza Jeowaba jarasimina iyi nokʼo bʼabita, iyikʉzaʉba krĩcha ẽ basi iyi nejʉra iyi dobaʉba beaita (1 Sam. 16:13; 24:12). Awuarabʉrʉ ĩjãsi Daizezeta akʉza ĩjãsi Jeowa angelba ẽdrʉbiseabʉta yi kʼẽrẽpabʉta. Dayirãbara kʼawua ẽ kʼãrẽ bedʼea pʉata ũduseabʉta mamina kʼawuabʉ neida berabarira akʉza beibʉbʉrʉ Jeowaba piradrʉbiseabʉta.

13. ¿Gog de Magogbara kʼãrẽa krĩchai dayirãra mesera beaseabʉta akʉza kʼãrẽa perada ẽ bayi? (Akʉra poto yi nããrabemata).

¹³ Aranʉbai dayirãba ũdubibara Daizeze ĩjãbʉta akʉza iya dayirã kʼarebaita. Gog de Magogba [pʉwʉrʉra ãba yi jʉrebʉ Jeowa pʉwʉrʉ pẽwãita] dayirã pẽwãbʉrʉde krĩchaseapanʉ ãya dayirã beaseabʉta, mamina dayirãbara ũdubibara Jeowa wãrĩnu ĩjãpanʉta akʉza iya kʼarebaita dayirãra. Nokʼoraba krĩchadayi dayirãra neẽãta kʼaiba kʼarebaita (Ezeq. 38:10-12). Ãya krĩchadayi dayirãra mesera beaseabʉta põgata neẽ baera, mamina dayirãbara soiduba ĩjãpanʉ baera ũdudayi angelera dayirã kʼawabʉta akʉza kʼarebaita. Maʉ̃ta ãya ũduda ẽ bayi ĩjãta neẽ baera. Maʉ̃ne dayirãra pera ẽ bayi angelerata yõi baera dayirãbari (Apoc. 19:11, 14, 15).

KRĨCHARA KʼÃRẼTA OSEABɄTA ZɄBɄRIA ZROMA ZEI NÃÃ

14. ¿Idi kʼãrẽta oibara kʼawuaita kʼãrẽta oita zʉbʉria zroma zebʉrʉde?

¹⁴ Nããra, kĩrãbeibara platata mejãcha kãga ẽ baibarata akʉza nebiata, tẽã mĩrʉ wãbʉrʉde jõma amaeibara baera. Yi ũmera, idi sobiabaibara dayirãba erbʉba akʉza kĩrãbeibara Jeowa neũdukʼawua babʉrʉtrʉ sobia bʼaita. Idi audre kʼawuapanʉbʉrʉ Daizeze ʉ̃rʉ, soiduba ĩjãnañi Jeowaba wãrĩnu ẽdrʉbiseabʉta zʉbʉria zroma zebʉrʉde.

15. ¿Davidbara kʼãrẽta kʼawuasi iyi nãã berabaridadeba?

¹⁵ Akʉdadrʉ kʼãrẽba kʼarebasita Davidʼra bedʼea zroma awuantaita. Iya jarasi: «Mayikʉzaʉba akʉidua Jeowara ẽbẽra biata; yi ẽbẽra iyi kʼarebata jʉrʉbʉra sobiabʉ» (Sal. 34:8). Naʉ̃ bedʼeaba ũdubibʉ Davidbara soiduba ĩjãbasita Daizezebʉrʉ iyi kʼarebaita. David kʉ̃rãbaside yõsi gorogoro zromaʉ̃me, yi trʉ̃ Goliatbasi akʉza iya jarasi: «Jeowaba mʉ̃ juwa edre baebiyi bʉra». Iya naʉ̃ra jarasi Jeowaba wãrĩnu kʼarebaita kʼawuabasi baera (1 Sam. 17:46). Maʉ̃ tẽã Saúlba badua jʉrʉbasi David sãwũã beaita, mamina Jeowara ewari jõmaʉ̃nẽ iyiʉ̃mebasi (1 Sam. 18:12). Davidbara kʼawuabasi Jeowaba kʼarebaseabʉta naenaʉ̃ba kʼareba zebʉrʉbasi baera. Idi maʉ̃ba dayirãsida kʼarebaseabʉ bedʼea zroma awuantaita.

16. ¿Kʼãrẽta oseabʉ bʉa Jeowa ĩjãbʉta audre warimarẽã?

¹⁶ Idi dayirãta zarea opanʉbʉrʉ dayirãba ĩjãbʉta audre waribita, tẽãne zare ẽ bayi ĩjãita Jeowaba ẽdrʉbita. Bari jaradaita: krĩchara bʉa trajo erbʉta maʉ̃ba ewari neẽ ãba yi jʉreita, jaradia wãita akʉza asambleaeda wãita, maʉ̃ kʼarea bedʼeaibara bʉ nokʼoʉ̃me idʉbʉi kʼawuaita. Mamina maʉ̃ba trajota aduara ĩjãra Jeowaba bʉa nesidabʉta diaseabʉta akʉza iyira bʉme bʼaita ewari jõmaʉ̃nẽ (Heb. 13:5). Mebẽrã mejãchaʉta ewari jõmaʉ̃nẽ trajapanʉ Jeowaita, ãya jaraseapanʉ Jeowaba sãwũã kʼareba zebʉrʉta.

17. ¿Saʉ̃ yi testo poaga 2022 debemara akʉza kʼãrẽta kĩrãbebibʉ?

¹⁷ Jeowata dayirãʉ̃mebʉbʉrʉ pera ẽ baibara nekʼãrẽ ʉ̃ra zei kʼarea. Dayirãba iyita nãã jʉrʉpanʉbʉrʉ iyara doba amae ẽ bayi dayirãra. Zõrãrã Burubiaraba kʼawuapanʉ aranʉbai dayirãba zʉbʉria zromata ũduita. Maʉ̃ kʼarea jidasida Salmo 34:10ta poaga 2022debema bamarẽã, naʉ̃ testoba jarabʉ: «Yi Jeowa jʉrʉbʉra nebia wae ẽ bayi». Naʉ̃ba dayirã kĩrãbebibʉ kʼãrẽta oibarata zʉbʉria zroma zei nãã akʉza ĩjãita Jeowabara dayirãra doba amae ẽãta.