Lepanʉraba Widipanʉta

¿Kʼãrẽta jarakĩrãbasi Pabloba iyikʉza jaraside «wũãwũã wabida ẽ nãã toda kĩrãkʼa»? (1 Corintios 15:8).

1 Corintios 15:8de Pabloba jarasi: «Jĩrʉare mʉ̃aʼa yi ũdubisi wũãwũã wabida ẽ nãã toda kĩrãkʼa». Nããrãra jara ũrĩbibasi Pabloba naʉ̃ bedʼea jarasidera iya Jesuta ʉ̃tʉ ũdusita. Pabloba Jesu ũdusidera iyitara ẽbẽrarã ʉ̃ta wãira ewari jʉ̃drʉi nãã piradrʉbʉrʉ kĩrãkʼabasi. Mamina maʉ̃nera ẽbẽrarã ʉ̃ta wãita piradrʉira poaga mejãcha waebasi. Mamina naʉ̃ bersikulo biʼia estudiada tẽã kʼawuasida awuara jaradiaibarata.

Pabloba naʉ̃ bedʼea jarasi iyi kristiano baside. Mamina Pabloba jaraside «wũãwũã wabida ẽ nãã toda kĩrãkʼa» naʉ̃ bedʼeabara, ¿kʼãrẽta jarakĩrãbasi iyara? Naʉ̃nebara ne kĩrã bio jaraseabʉ.

Iya jʉ̃ã ẽ basi mesera kristiano bʼaita. Wũãwũã wabida ẽ nãã tobʉra mesera berabaribʉ, jʉ̃ã ẽ mawũã berabarita. Saulo iyabaʉta Pablo, iyi Damasco eda wãne mamabema kristianora pẽwãita, iya jʉ̃ã ẽ basi Jesu jẽda piradrʉda tẽã ode ũduita. Pablobara jʉ̃ã ẽ basi iyi mawũã mesera kristiano bʼaita akʉza mebẽrã Damascodebemanebida. Mawũã berabaridaba iyara ewari biobayeda ũdu ẽã besi (Hech. 9:1-9, 17-19).

Kristiano basi waidi ẽ nãã. Bedʼea «wũãwũã wabida ẽ nãã toda kĩrãkʼa» naʉ̃ bedʼeara griegodera jarakĩrãbʉ «waidi ẽ nãã tosidata». La Traducción Kadosh Israelita Mesiánica de estudio naʉ̃ba tradusibʉ naʉ̃ bedʼeara: «Tosi mʉ̃ todai ewari zei nãã». Pablo kristianobasidera Jesura jẽda ʉ̃ta wãsibasi. Yi nabema bersikulode Pabloba jarasi ʉ̃kʉrʉ mebẽrãbara ũdusita Jesu jẽda piradʉda tẽã, mamina iya Jesu jẽda piradrʉda tẽãra ũdu ẽ basi (1 Cor. 15:4-8). Jesuta Pabloʼa yi ũdubisidera iyitara naʉ̃ra «waidi ẽ nãã» yi ũdubibʉrʉ kĩrãkʼabasi.

Iya naʉ̃ bedʼea jaradaba ũdubisi sainʉ oita kʼawuabʉta. Ẽbẽrarã Daizeze Bedʼea ʉ̃rʉ mejãcha kʼawuabʉba, jarabʉ Pabloba maʉ̃ bedʼea zokʼasidera iyi ʉ̃rʉ imitia bedʼeabʉ kĩrãkʼabasita. Mamina Pabloba naʉ̃ bedʼea zokʼadabara jarakĩrãbasi iyi apostol bʼaira biga ẽãta. Iya jarasi iyikʉza: «Wuabemara apostoleraira mʉ̃trʉ edabʉ akʉza biga ẽ mʉ̃ apostol adaita mʉ̃a pẽwãbasi baera Daizeze kongregasionta. Mamina Daizeze biadeba mʉ̃ra kʼãwũãbʉ» (1 Cor. 15:9, 10).

Pabloba naʉ̃ ʉ̃rʉ bedʼeasidera iya jara ũrĩbibasibaibara sãwũã iyira mesera kristiano basita, mawũã ẽ bʉrʉ iya krĩchabasibaibara Jesuta mawũã iyaʼa yi ũdubira iyira edabʉta wuabemaraira. Mawũã berabaridara Pabloitara yibiabasi akʉza iya kʼawuasi Jesura jẽda piradrʉsita. Maʉ̃ kʼarea iya Jesu jẽda piradrʉda ʉ̃rʉ jaradiabasidera, jara ũrĩbibasi iyi sãwũã berabaridata (Hech. 22:6-11; 26:13-18).