«Bʉ mebẽãra jẽda piradrʉyi»

1. ¿Matthewbara sãwũã wãrĩnu ĩjãbʉta ũdubisi jẽda piradrʉi ʉ̃rʉra?

WŨÃWŨÃ zake yi trʉ̃ Matthewta mejãcha kayabʉ baera, mejãcha operasion osida. Iyi poaga 7baside ewari aba yi mebẽrãbawara JW Broadcasting^® ta akʉbasi, maʉ̃ Broadcasting jõbodoare bideo trãbide ũdubisida ẽjũã kĩrãwãreãnẽ ẽbẽra jẽda beidata sãwũã yi mebẽrãbawara jẽda yi ũdubarabʉta.b Maʉ̃ Broadcasting akʉ berabari tẽã, Matthewbara yibarirãra orra kʼãrãpe jarasi: «Papa, zeze ¿ũdusidaka?, mʉ̃ beibʉrʉbʉsida jẽda piradrʉyi akʉza jẽda yi ũdudayi, aduʼapananidua». Krĩchara yibarira kʼãrẽaba sobiapanasita ãyi wũãwũãba wãrĩnu soiduba ĩjãbasi baera jẽda piradrʉi ʉ̃rʉ.

2, 3. ¿Kʼãrẽa yibia biʼia krĩchaita jẽda piradrʉi ʉ̃rʉra?

² Edaʉde yibia dayirãba bia krĩchaita jẽda piradrʉi ʉ̃rʉ (Juan 5:28, 29). ¿Kʼãrẽa yibia maʉ̃ ʉ̃rʉ bia krĩchaita? Kʼawua ẽ baera dayirãbara dayi kʼãrẽ ewaride kaya kʼãrãpe beita, mawũã ẽ bʉrʉ dayirã mebẽrãta (Ecl. 9:11; Sant. 4:13, 14). Jẽda piradrʉi ʉ̃rʉ wãrĩnu soiduba ĩjãbʉba, kʼarebaseabʉ maʉ̃ bedʼea zroma zebʉrʉde awuantaita (1 Tes. 4:13). Daizeze Bedʼeabara jarabʉ Jeowabara dayirãra aba abaka bia ũdukʼawuabʉta akʉza mejãcha kãgabʉta (Luc. 12:7). Jeowaba dayirã biʼia ũdukʼawuabaibara dayi nãã sãwũãbadade jẽda piradrʉbira akʉza dayi bei nãã dayi burude krĩchabadata jõma jẽda kĩrãbebira. Jeowaba dayirã mejãcha kãgabʉ baera ewari jõmaʉ̃nẽ babiyi akʉza ẽbẽra beidara jẽda piradrʉbiyi, mawũã ẽjũã kĩrãwãreãnẽ sobiapanamarẽã.

³ Naʉ̃ artikulode nããra kʼawuadayi kʼãrẽa ĩjãnaibarata jẽda piradrʉi ʉ̃rʉra, tẽã kʼawuadayi sãwũã Daizeze Bedʼeade nebʉrabʉba kʼarebaita audre ĩjãnaita. Naʉ̃ artikulode testobʉra naʉ̃ nebʉra ʉ̃rʉ bedʼeabʉ: «Bʉ mebẽãra jẽda piradrʉyi» (Juan 11:23). Adewara kʼawuadayi kʼãrẽta odaibarata audre ĩjãnaita jẽda piradrʉi ʉ̃rʉra.

¿KʼÃRẼA WÃRĨNU ĨJÃSEAPANɄ JẼDA PIRADRɄI Ʉ̃RɄ JARABɄRA?

4. Dayaʼa bedʼea jaradapeadara ĩjãira daya nãã, ¿kʼãrẽta biʼia kʼawuaibara? Yizata jara ũrĩbira.

⁴ Dayaʼa jaradapeada bedʼeata ĩjãibʉrʉ, daya kʼawuabaibara maʉ̃ ẽbẽrabara okĩrãbʉta akʉza zarea barabʉta maʉ̃ aripe oita. Krĩchara naʉ̃ yizata, bʉ dera nãgʉba mãrĩñi, mamina bʉ neũdukʼawuaba bʉ orra kʼãrãpe bʉaʼa jarayi: «Mʉ̃a kʼareba ara odiayi bʉ dera». Iyira wãrĩnu bedʼeabʉ akʉza bʉa kʼawuabʉ iya kʼarebakĩrãbʉta akʉza bʉa kʼawuabʉbʉrʉ iyara de okaʉta akʉza nekʼãrẽ jõma erbʉta maparãita kʼawuabʉ wãrĩnu ara odiaita. Abarika Jeowaba jarabʉ ẽbẽra beidara jẽda piradrʉbita mamina, ¿iyira zarea barabʉka akʉza mawũã okĩrãbʉka?

5, 6. ¿Kʼãrẽa wãrĩnu ĩjãnaibara Jeowabara jẽda piradrʉbikĩrãbʉta beidara?

⁵ ¿Jeowabara ẽbẽra beidara jẽda piradrʉbikĩrãbʉka? Mawũã. Jeowabara iyi bedʼeade ẽbẽrarã bʉbisi ẽbẽra beida jẽda piradrʉbi ʉ̃rʉra (Is. 26:19; Os. 13:14; Apoc. 20:11-13). Jeowaba jarabʉra jõma aripe obʉ (Jos. 23:14). Adewara Jeowabara jẽda piradrʉbikĩrãbʉ ẽbẽra beidara, ¿kʼãrẽa mawũã jarapanʉ?

⁶ Krĩchara Jobʼba jaradata. Jobʼbara kʼawuabasi iyi beibʉrʉdera Jeowabara jẽda piradrʉbikĩrãbʉta (Job 14:14, 15, nota). Abarika Jeowabara iyi odebʉta kʼẽrẽpa beidara jẽda piradrʉbikĩrãbʉ mawũã zrogabape akʉza sobiapanamarẽã. Kõbe, ¿sãwũã krĩchabʉ Jeowabara ẽbẽrarã mejãchaʉba iyi ũdukʼawua ẽ beida ʉ̃rʉra? Maʉ̃rasida Jeowabara jẽda piradrʉbikĩrãbʉ (Hech. 24:15). Mawũã iyita ũdukʼawuadamarẽã, adewara ewari jõmaʉ̃nẽ iyi neũdukʼawua badamarẽã (Juan 3:16). Jeowabara wãrĩnu jẽda piradrʉbikĩrãbʉ beidara.

7, 8. ¿Kʼãrẽa ĩjãseapanʉ Jeowara zarea barabʉta ẽbẽra beida jẽda piradrʉbita?

⁷ ¿Jeowara zarea barabʉka ẽbẽra beida jẽda piradrʉbira? Mawũã, Jeowabara nejõma oseabʉ (Apoc. 1:8). Jeowara mejãcha zarea barabʉ iyi nejʉra baduta jõbita akʉza beibʉsida (1 Cor. 15:26). Dayirãba mawũã Jeowa ʉ̃rʉ kʼawuabʉrʉba so zarea diabʉ akʉza aduʼapanʉ. Krĩchara mebẽã Emma Arnold berabaridata. Segunda Guerra Mundial baeside, iyita akʉza yi mebẽrãbawara bedʼea zromata mejãcha ũdusida. Iyara so zarea diabasi yi kauʼa, yi mebẽrãnebemata, nazi kampo konsentrasione beisi baera. Emmaba yi kauʼa jarasi: «Ẽbẽrarã mejãcha bei zebʉrʉta jẽda babe ẽ bʉrʉ, naʉ̃ba jarakĩrãbʉ beira audre zarea barabʉta Daizeze Jeowaira, mamina maʉ̃ra wãrĩnu ẽ». Mia kʼaita neẽ Jeowa kĩrãkʼa zarea barabʉra. Jeowaba ẽbẽrarã bebʉ diada baera akʉza iya jẽda zokʼai babiseabʉ ẽbẽra beidara.

⁸ Adewara ĩjãpanʉ Jeowaba ẽbẽra beidara jẽda piradrʉbita iyi burudera jõma jẽda kĩrãbeseabʉ baera. Jeowabara chĩdau aba abaka trʉ̃bʉ ãyi trʉ̃neba (Is. 40:26). Maʉ̃ba jõma biʼia kĩrãbebʉ yi beidarãra (Job 14:13; Luc. 20:37, 38). Jeowabara jõma jẽda kĩrãbeseabʉ ẽbẽra beida sãwũãbadata, iyi kakuata, iyi kĩrãta akʉza iyi buru sãwũãbadata. Adewara jõma jẽda kĩrãbebiseabʉ ẽbẽra beida burude sãwũã krĩchabadara.

9. ¿Kʼãrẽa ĩjãbʉ bʉara Jeowaba ẽbẽra beida jẽda piradrʉi ʉ̃rʉ jarabʉra?

⁹ Dayirãbara wãrĩnu ĩjãseabʉ Jeowaba ẽbẽrarã jẽda piradrʉbi ʉ̃rʉra, iyira zarea barabʉ baera akʉza okĩrãbʉ baera maʉ̃ta. Adewara dayirãbara Jeowa ʉ̃rʉ ĩjãseapanʉ, iya naena ẽbẽra beidara jẽda piradrʉbisi baera. Daizeze Bedʼeadera eda jarabʉ Jeowabara zarea diasita ẽbẽrarã iyiʉ̃me kʼẽrẽpapanʉra, ẽbẽra beidata jẽda piradrʉbimarẽã. Maʉ̃ mawũã zarea diadadebemara basi yi warra Jesuta. Akʉdaya ʉ̃kʉrʉ ẽbẽrarã Jesuba jẽda piradrʉbidadebemata, Juan nejʉacha zroma 11ba jarabʉta.

JESU NEŨDUKʼAWUA IYA KÃGABɄTA BEISI

10. ¿Kʼãrẽta berabarinʉmʉ Betaniane Jesuba Jordán kĩrãre Daizeze Bedʼea jaradianʉmʉena akʉza kʼãrẽta osi iyara? (Juan 11:1-3).

¹⁰ (Akʉra Juan 11:1-3). Krĩchara kʼãrẽta sãwũã berabarisita Betaniane. Naʉ̃ poagadera poaga 32 jõbodoare Kristo tẽã, mamabasi Jesu neũdukʼawua Lázarota akʉza yi mebẽã Marta, Maríaʉ̃me (Luc. 10:38-42). Maʉ̃ne Lázarora mejãcha kayasi, maʉ̃ kʼarea yi mebẽrãra krĩcha zroma opanʉ. Maʉ̃ kʼarea bedʼeata jara bʉesida Jesuʼa, mamina Jesura Jordán kĩrãrebasi, mainʉ jʉ̃ẽira ewari ũme wãibarabasi (Juan 10:40). Ẽbẽra Jesuʼa bedʼea jarada eda wãnata iyidu jʉ̃ẽinʉbaira Lázarora beisi. Jesuba kʼawuabasimina iyi neũdukʼawua beisita mawũãsidu ariya ewari ũme besi pʉwʉrʉ Jordán kĩrãre. Maʉ̃ tẽãbʉrʉ wãsi Betaniaena, mamina Jesu jʉ̃ẽinʉbaira Lázaro beidata ewari kimarebasi. Jesu mainʉ jʉ̃ẽbʉrʉde nebiata okĩrãbʉ, maʉ̃ba yi neũdukʼawuarata kʼarebakĩrãbʉ, mamina maʉ̃ daucha Jeowa ʉ̃rʉ ibia bedʼeamarẽã kãgabʉ (Juan 11:4, 6, 11, 17).

11. ¿Kʼãrẽta kʼawuapanʉ naʉ̃ nebʉradebara neũdukʼawua bia bʼai ʉ̃rʉra?

¹¹ Naʉ̃ nebʉradeba kʼawuapanʉ dayirãbara neũdukʼawua bia erbai ʉ̃rʉ. Martaba Maríaʉ̃meba Jesuʼa bedʼea jara bʉesidadera, jara ẽ basi Betaniaena zemarẽã, awuarabʉrʉ jarasi iyi neũdukʼawua Lázarora kayanʉmʉta (Juan 11:3). Jesubara Lázarora iyi chumaeba jẽda piradrʉbiseabasi, mamina mawũã oẽ basi, awuarabʉrʉ wãsi iyi neũdukʼawua María, Martaʉ̃me bʼaita. ¿Bʉa erbʉka neũdukʼawua bʉa iyaʼa kʼareba widi ẽãne kʼarebabʉta? Mawũã erbʉbʉrʉ bʉa kʼawuabʉ bʉ neũdukʼawuabara kʼarebaita bʉa «bedʼea zroma» erbʉde (Prov. 17:17). Mawũẽra Jesu kĩrãkʼa neũdukʼawua bia badadrʉ. Kõbebʉrʉ jẽda akʉdaya kʼãrẽta sãwũã berabarisita.

12. ¿Jesuba kʼãrẽta jarasi Martaʼa akʉza iyara kʼãrẽa ĩjãseabʉ Jesuba jaradara? (Juan 11:23-26).

¹² (Akʉra Juan 11:23-26). Martaba kʼawuasi Jesura Betania kʼawabasita, maʉ̃ kʼarea iyita jʉrʉ wãsi daucha zedaita, mõbe jarasi: «Nokʼó, bʉta nama bʼasibʉrʉ mʉ nawewaura beu ẽbakʼausia» (Juan 11:21). Jesuba Lázaro bebiseabasimina iya nekʼãrẽ bia zromata oita krĩchabasi. Maʉ̃ kʼarea Jesuba Martaʼa jarasi: «Bʉ mebẽãra jẽda piradrʉyi». Adewara Jesuba naʉ̃ta jarasi iyi ʉ̃rʉ audre ĩjãbita: «Mʉ̃ yi piradrʉbibarira akʉza bebʉ diabʉra». Naʉ̃ra wãrĩnu, Jeowaba zarea diasi Jesuʼa ẽbẽra beidata jẽda piradrʉbimarẽã. Jesubara naweda jẽda piradrʉbisi yuwẽrã zaketa beidata dããraba ẽ badata, tẽã juneane jẽda piradrʉbisikĩrã yumakẽrã iyabaʉ ewaride beidata (Luc. 7:11-15; 8:49-55). ¿Jesuba mawũã osibʉrʉ, jẽda piradrʉbiseabʉka ẽbẽra beida ewari kimarebara akʉza ʉ̃seabʉra?

«LÁZARO, ÃĨ ZERA»

13. Juan 11:32-35 bayeda jarabʉdera, ¿sãwũã sentisi Jesura, Maríata akʉza wuabemara jẽganʉmʉta ũduside? (Akʉra potota).

¹³ (Akʉra Juan 11:32-35). Krĩchara kʼãrẽta sãwũã berabarisita, Maríabara orrasi Jesuta. Iyara abarika jarasi yi mebẽãba jarada kĩrãkʼa: «Nokʼó, bʉta nama bʼasibʉrʉ mʉ nawewaura beu ẽbakʼausia». Maʉ̃ba ãyita adewara ãyi kʼawapanʉra jẽgapanʉ, mamina maʉ̃ta Jesuba ũduside mejãcha sopʉasi. Maʉ̃ kʼarea so borekea akʉ kʼãrãpe jẽgasi. Jesubara biʼia kʼawuabʉ ẽbẽra beibʉrʉdera kʼãrẽaba pʉabʉta, maʉ̃ kʼarea Jesubara jõbikĩrãbʉ zʉbʉriara.

14. María jẽganʉmʉ kʼarea Jesu sãwũã sentidadeba, ¿kʼãrẽta jaradiabʉ Jeowa ʉ̃rʉ?

¹⁴ Jesuba María jẽganʉmʉta ũduside iyisida sopʉa sentida kʼarea, naʉ̃ba ũdubibʉ Jeowabara so borekea akʉbʉta. ¿Sãwũã kʼawuapanʉ? Nããbema artikulode kʼawuasida Jesubara ũdubisi baera Jeowara sãwũã krĩchabʉta akʉza sentibʉra (Juan 12:45). Jesura jẽgasi iyi neũdukʼawuara zʉbʉrianʉmʉ kʼareara, naʉ̃ba ũdubibʉ Jeowabara dayirãra so zʉbʉria akʉbʉta zʉbʉriabʉdera (Sal. 56:8). Jeowa mawũãbʉba dayirãra iyi kʼawa bakĩrãpanʉ.

15. Juan 11:41-44 bayeda jarabʉdera, ¿kʼãrẽta berabarisi Lázaro joʉdapeadamaera? (Akʉra potora).

¹⁵ (Akʉra Juan 11:41-44). Jesura zesi Lázaro mõgara zobeade wuagadamae, mõbe jarasi yi mõgara ara anakʉta ãĩ bʉedamarẽã. Aramaʉ̃ne Martaba jarasi maʉ̃ta oda ẽ marẽã yi mebẽã kakuara ʉ̃seasi baera. Aramaʉ̃ta Jesuba panʉsi: «¿Mʉ̃a jarasi ẽka bʉa ĩjãta erbʉbʉrʉ Daizezeba nekʼãrẽ nebia obʉrʉ ũduita?» (Juan 11:39, 40). Aramaʉ̃ta Jesubara ʉ̃ta akʉ kʼãrãpe yiwidʼisi wuabemara daidu. Jesubara mawũã osi iya kãgabʉ baera jõmaʉ̃ta ibia bedʼeadamarẽã Jeowa ʉ̃rʉ, maʉ̃ tẽã jarasi: «Lázaro, ãĩ zera». Maʉ̃ne ãĩ zesi Lázarora, mawũã Jesubara osi miõba okata (akʉra nota estudio Juan 11:17de jarabʉ ʉ̃rʉ).

16. ¿Sãwũã audre ĩjãbibʉ jẽda piradrʉi ʉ̃rʉra Juan nejʉacha zroma 11de nebʉrabʉbara?

¹⁶ Juan nejʉacha zroma 11de nebʉrabʉba dayirã kʼarebabʉ audre ĩjãbita beidara jẽda piradrʉita, ¿sãwũã ĩjãbibʉ? Kĩrãbedadrʉ Jesuba Marta jaradata: «Bʉ mebẽãra jẽda piradrʉyi» (Juan 11:23). Jesubara abarika yi Zezede kĩrãkʼa jẽda piradrʉbikĩrãbʉ, adewara zarea barabʉ. Jesu jẽgadaba ũdubibʉ beipanʉra akʉza pʉara wãrĩnu taʉbikĩrãbʉta. Lázaro beida jẽda piradrʉbidaba, Jesubara ũdubibʉ iyira zarea barabʉta beidara jẽda piradrʉbita. Kĩrãduada ẽ baibara Jesuba Martaʼa jaradata: «¿Mʉ̃a jarasi ẽka bʉa ĩjãta erbʉbʉrʉ Daizezeba nekʼãrẽ nebia obʉrʉ ũduita?» (Juan 11:40). Kʼawuapanʉ Jeowaba beidara jẽda piradrʉi ʉ̃rʉ jarabʉra iyara jõma aripe berabaribita. Mamina, ¿kʼãrẽta odaibara mawũã ĩjãbʉ audre ĩjã bʼaita?

¿KʼÃRẼTA ODAIBARA AUDRE ĨJÃITA ẼBẼRA BEIDA JẼDA PIRADRɄI Ʉ̃RɄRA?

17. Daizeze Bedʼeade beida jẽda piradrʉda ʉ̃rʉ lebʉrʉdera, ¿kʼãrẽ ʉ̃rʉ krĩchaibara?

¹⁷ Lera naweda beida sãwũã jẽda piradrʉda ʉ̃rʉ akʉza maʉ̃ ʉ̃rʉ bia krĩchara. Daizeze Bedʼeadera jarabʉ ẽbẽrarã 8 beidata jẽda piradrʉbida ʉ̃rʉ.c Kĩrãkita estudiara naweda ẽbẽrarã beida jẽda piradrʉda ʉ̃rʉra, mawũã estudiabʉrʉde kĩrãbera naʉ̃ra yumakẽrãrãra, wẽrãrãra akʉza wũãwũãrãra wãrĩnu zokʼaipanasita. Maʉ̃ra nebʉra ʉ̃rʉ lebʉrʉde, kʼawuara sãwũã Jeowaba jẽda piradrʉbikĩrãbʉta beidara akʉza zarea barabʉta, adewara bia krĩchara beida jẽda piradrʉda yi audre yibia ʉ̃rʉ, Jesu ʉ̃rʉ. Adewara krĩchara Jesu beida jẽda piradrʉsidera, ẽbẽra mejãchaʉba ũdusita. Naʉ̃ba kʼarebabʉ dayirãba beida jẽda piradrʉi ʉ̃rʉ ĩjãbʉra audre ĩjãita (1 Cor. 15:3-6, 20-22).

18. ¿Sãwũã bia zokʼaseabʉ trãbira beida ʉ̃rʉ jarabʉra? (Akʉra nota).

¹⁸ Jʉrʉdaibara trãbi beida jẽda piradrʉi ʉ̃rʉ jarabʉtad (Efes. 5:19). Naʉ̃ra trãbibara kʼarebayi dayirãba ẽbẽra beida jẽda piradrʉira wãrĩnu ĩjãnaita. Mara mebẽrãbawara ãba yi jʉrebʉrʉde Jeowa ʉ̃rʉ kʼawuadaita, naʉ̃ra trãbita trãnaidua, burude kʼawuadaidua akʉza bia krĩchaidua naʉ̃ trãbide kʼãrẽ bedʼea jarabʉta. Nekʼãrẽ berabarida kʼarea dayi beibodobʉde, mawũã ẽ bʉrʉ dayirã mebẽrã beibʉrʉde, Daizeze jaure zareaba dayirãʼa kĩrãbebiyi naʉ̃ trãbiba kʼãrẽ jarabadara. Naʉ̃ba dayirãʼa so zarea diayi.

19. ¿Dayirãbara sãwũã krĩchaseabʉ jẽda piradrʉi ʉ̃rʉra? (Akʉra rekuadro «¿Kʼãrẽta widi bʉa ãyaʼa?»).

¹⁹ Krĩchara ẽjũã biadebʉta. Jeowabara dayirã diasi krĩcha bamarẽã ẽjũã biade sãwũã bʼaita. Mebẽã wẽrã abaʉba jarabʉ: «Mʉ̃a mejãcha krĩchabʉ baera ẽjũã kĩrãwãreãnẽbʉta, maʉ̃ba mʉ̃a sentibʉ nepono ẽjũã biadebʉra mʉ̃a ʉ̃bʉta». Krĩchara bʉra yi daucha zebʉrʉta ẽbẽra nããra Daizeze odebada beidaʉ̃me, ¿bʉara kʼãrẽ bedʼeata widi ãyara? Krĩchara bʉra yi daucha zebʉrʉta bʉ mebẽrã beidaʉ̃me, maʉ̃nera bʉara bedʼeata widiyi iyaʼa, iyita bʉrayi, mawũã ẽ bʉrʉ mejãcha sobiabayi iyita ũdubʉrʉ baera.

20. ¿Kʼãrẽta odaita krĩchadaibara dayirã aba abaka?

²⁰ Jeowaʼa mejãcha biga diapanʉ beidara jẽda piradrʉbi baera. Dayirãbara naʉ̃ra wãrĩnu ĩjãpanʉ aripe berabaribita Jeowabara, iyara okĩrãbʉ baera akʉza zarea barabʉ baera. Maʉ̃ kʼarea ewariza zarea odaibara audre zarea ĩjãnaita beida jẽda piradrʉi ʉ̃rʉra. Mawũã zarea opanʉbʉrʉ dayirãra audre Jeowa kʼawapanañi. Jeowaba dayirã jarabʉrʉ kĩrãkʼabʉ: ‹Mara mebẽrã beidara akʉza jẽda panañi›.