¿Bʉra kongregasionebema zõrãrã bakĩrãbʉka?

1, 2. ¿Kʼãrẽta opanʉ zõrãrãbara?

BɄTA dããrãbabʉrʉ zõrãrã kʼarebabaride bʉta mawũãra Daizeze Bedʼeade nebia bʉta oũdubibʉ bʼaibara zõrãrã bʼaita. ¿Bʉabida zõrãrãba obʉta okĩrãbʉka? (1 Tim. 3:1).

² ¿Kʼãrẽta obʉ zõrãrãbara? Mebẽrã zõrãrãra zarea opanʉ Daizeze Bedʼea jaradia wãita. Maʉ̃ awuara mebẽrãta akʉ wãpanʉ ãyaʼa so zarea diaita akʉza ãya kʼãrẽ jarabʉdeba akʉza kʼãrẽ obʉdeba kʼarebabʉ mebẽrãba Jeowa ʉ̃rʉ ĩjãbʉta audre zarea erpanamarẽã. Maʉ̃ba naʉ̃ra zõrãrãra Daizeze Bedʼeabara jarabʉ kongregasionʼa nebia diada kĩrãkʼa bʉta (Efes. 4:8).

3. ¿Kʼãrẽta oibara mebẽã abaʉba zõrãrã bʼaita? (1 Timoteo 3:​1-7; Tito 1:​5-9).

³ ¿Zõrãrã bʼaira kʼãrẽta oibara? Zõrãrã bʼaira bari mawũã nekʼãrẽ mejãcha okʼawua chuibara ẽ. Mamina naʉ̃ drʉadera ẽbẽra abaʉba dayi trajabira akʉbʉ kʼãrẽta okʼawuabʉta. Kõbe zõrãrã kongregasionebema bʼaira jipa awuarabʉ, bari Daizeze Bedʼeata jaradia kʼawua ba ẽ baibara akʉza nekʼãrẽ jaradia kʼawua ba ẽ baibara, awuarabʉrʉ oũdubibara 1 Timoteo 3:​1-7de jarabʉ nebiata akʉza Tito 1:​5-9de jarabʉta (akʉra). Naʉ̃ artikulode akʉdayi ʉ̃kʉrʉ nebiara naʉ̃ra testoba jarabʉta. Kʼawuadayi mebẽã abaʉba kʼãrẽta oibarata wuabemaba bia akʉdamarẽã, yi mebẽrãta sãwũã bia akʉita akʉza wuabemara kʼarebakĩrãbaita.

WUABEMARABA BIA AKɄDAIBARA

4. ¿Kʼãrẽta jarakĩrãbʉ mia abaʉba bʉ ʉ̃rʉ ikayirua jara ẽ baibara?

⁴ Zõrãrã bʼaira mia abaʉba iyi ʉ̃rʉ ikayirua jarakabaibara, naʉ̃ba jarakĩrãbʉ kongregasionebemara naʉ̃ mebẽã ʉ̃rʉ bia krĩchaibarata akʉza iya obʉba krĩchabi ẽ baibara wuabemara aña onʉmʉta. Wãrĩnubaira ẽbẽrarã Jeowa odebʉ ẽãbara bʉ ʉ̃rʉ imitia bedʼeayi akʉza bʉa ĩjãbʉta ĩjã ẽ bayi. Mamina naʉ̃ra ẽbẽrabara ũdudaibara bʉara wãrĩnuta jarabʉta akʉza bʉra ẽbẽra biata (Dan. 6:​4, 5). Maʉ̃ba bʉyikʉza widira, ¿mebẽrã kongregasionebemaraba akʉza wuabema ẽbẽrarãba mʉ̃ra bia akʉbʉka?

5. ¿Kʼãrẽta jarakĩrãbʉ biata kãgaibara?

⁵ Biata kãgaibara. Maʉ̃bara jarakĩrãbʉ mebẽrã kongregasionebemaba kʼãrẽ bia obʉta akʉibarata akʉza ãyaʼa biga diaibara ãyi sode nebiata erbʉ kʼaera. Adewara jarakĩrãbʉ nebia oita wuabemara kʼarebaita akʉza dayaʼa zokʼadabitapai oẽ baita awuarabʉrʉ maʉ̃ne wẽta oibarata (1 Tes. 2:8). ¿Kʼãrẽa zõrãrãbara ũdubibara biata kãgabʉta? Zõrãrãba biata kãgabʉbʉrʉ sobiade ewari jʉrʉdayi mebẽrã kongregasionebema akʉ wãnaita akʉza ãya kongregasione kʼãrẽ oibarata sobiade odayi (1 Ped. 5:​1-3). Ãya nekʼãrẽ mejãcha oibaramina mejãcha sobiapanañi mebẽrãta kʼarebapanʉ baera (Hech. 20:35).

6. ¿Kʼãrẽta jarakĩrãbʉ iyi deidu jʉ̃ẽbʉdade bia akʉibara? (Hebreos 13:​2, 16; akʉza akʉra potota).

⁶ ¿Kʼãrẽta jarakĩrãbʉ iyi deidu jʉ̃ẽbʉdade bia akʉibara? Naʉ̃bara jarakĩrãbʉ bari iyi neũdukʼawuaratrʉ bia edaibara ẽãta, wuabemara ẽbẽrarãsida bia akʉibarata (1 Ped. 4:9). Disionario abaʉba jarabʉ ẽbẽra yi deidu jʉ̃ẽbʉdade bia edabʉbara baduta bia edabʉta iya ũdukamina akʉza iyi deda jʉ̃ẽmarẽã trʉ̃bʉta. Bʉyikʉza widira, ¿mʉ̃ra ũdukaʉdeka wuabemara bia edabʉta? (Akʉra Hebreos 13:​2, 16). Zõrãrã mawũã bʉbara baduta bia edabʉ, bari jaraita ẽbẽrarã kʼãrẽ neẽ beta, mebẽrã kongresione diskurso dia jʉ̃ẽnata adewara kongregasion akʉbari zõrãrãta (Gén. 18:​2-8; Prov. 3:27; Luc. 14:​13, 14; Hech. 16:15; Rom. 12:13).

7. ¿Zõrãrãbara sãwũã ũdubibʉ platara mejãcha kãga ẽãta?

⁷ Mejãcha kãga ẽ baibara platara. Naʉ̃ba jarakĩrãbʉ zõrãrãbara mejãcha kãga ẽ baibarata nebiata, nekʼãrẽ mejãcha erbʉta mawũã ẽ bʉrʉ plata neẽãta ãyitara audre yibiabaibara Daizezedeta nãara bʉeita (Mat. 6:33). Awuarabʉrʉ audre biga bayi bʉ ewari zokʼaita bʉ zareata akʉza bʉa nekʼãrẽ erbʉ zokʼaita bʉ mebẽrã akʉita, mebẽrã kongregasionebema akʉita akʉza Daizeze Jeowa yiwidʼita (Mat. 6:24; 1 Juan 2:​15-17). Maʉ̃ba bʉyikʉza widira, ¿mʉ̃ara sãwũã akʉbʉ platara? ¿Mʉ̃ra sobiabʉka mʉ̃a nekʼãrẽ erbʉdeba? ¿Jʉrʉbʉka platara sãwũã audre erbaita mawũã ẽ bʉrʉ nekʼãrẽ bia mejãcha erbaita? (1 Tim. 6:​6, 17-19).

8. ¿Sãwũã ũdubibʉ ẽbẽra abaʉba iyikʉza bia zokʼa kʼawuabʉta?

⁸ Bʉyikʉza biʼia zokʼa kʼawua bʼaibara. Naʉ̃bara jarakĩrãbʉ bʉara kʼawuabaibarata sainʉ pai oibarata. Bari jaraita, aukʼara nekʼo ẽ baibara, nekʼãrẽ mejãcha do ẽ baibara, wuara jʉra kʼawua jʉ̃ibara, bia tẽrʉibara. Adewara nekʼãrẽ jemene ʉ̃rʉ bia jidaibara. Maʉ̃ba bʉra zarea oibara ẽbẽra naʉ̃ drʉadebemara kĩrãkʼa ba ẽ baita (Luc. 21:34; Sant. 4:4). Akʉza wuabemaraba bʉta bia eda ẽãnera ãyibawara kĩrʉrãra, awuarabʉrʉ aduʼabʉta ũdubira. Zõrãrãra ituaba beinʉma ẽ baibara akʉza ẽbẽrarãba ũdukaʉde ẽ baibara itua domiata. Bʉyikʉza widira, ¿mʉ̃a nekʼãrẽ obʉdeba ũdubibʉka mʉ̃yikʉza biʼia zokʼa kʼawuabʉta?

9. ¿Kʼãrẽta jarakĩrãbʉ biʼia krĩcha kʼawuabaibara akʉza daucha erbaibara?

⁹ Zõrãrãbara biʼia krĩcha kʼawua bʼaibara. Naʉ̃bara jarakĩrãbʉ nekʼãrẽ berabaribʉrʉdera akʉbʉta Daizeze Bedʼeaba kʼãrẽta jarabʉta naʉ̃ ʉ̃rʉ, maʉ̃ tẽã biʼia krĩchabʉ mama jarabʉde oũdubita. Mawũã obʉrʉba kʼarebabʉ krĩcha bia jidaita. Nekʼãrẽ oita jidaidera badua kʼawua ẽ jidatoto ẽ iya bia kʼawua ẽ baera (Prov. 18:13). Jeowaba kãgabʉde jidabʉ, adewara zõrãrãbara jõma daucha erbaibara. Naʉ̃bara jarakĩrãbʉ iyaʼa nekʼãrẽ omarẽã zokʼabʉdadera zokʼea obʉta, aripe obʉta akʉza wuabema nekʼãrẽra daucha ara o erbʉta. Zarea obʉbʉrʉ nama jarabʉta jõma oũdubita mawũãra wuabemarãra bʉ ʉ̃rʉ ibia bedʼeayi. Akʉdaya sãwũã Daizeze Bedʼeaba jarabʉde oũdubibarata mebẽrã burubara.

NEKʼÃRẼ JÕMAɄ̃NẼ YI MEBẼRÃTA BIA AKɄBɄ

10. ¿Kʼãrẽta jarakĩrãbʉ mebẽã abaʉba yi mebẽrã biʼia akʉ erbaibara?

¹⁰ Mebẽã aba juwa jidabʉta zõrãrã bakĩrãbʉbʉrʉ mebẽrã kongregasionebemata akʉza wuabema ẽbẽrarãta iyi mebẽrã ʉ̃rʉ ibia bedʼeabaibara. Maʉ̃ kʼarea zõrãrã jarapanʉ ãyi mebẽrãra biʼia akʉ erbamarẽã. Naʉ̃ba jarakĩrãbʉ bʉ mebẽrãra ibiade bia akʉibarata akʉza krĩcha jida kʼawuabaibarata bʉ mebẽrãita. Semanaza bʉ mebẽrãbawara ãba yi jʉreibara Jeowa ʉ̃rʉ kʼawuadaita, kʼarebaibara ãba yi jʉrebarieda wãita akʉza kʼarebaibara bʉ mebẽrãba ãya oseabʉta odamarẽã Jeowaita. ¿Kʼãrẽã naʉ̃ta odaibara zõrãrãbara? Apostol Pabloba naʉ̃ta widisi: «¿Yumakẽrã abaʉba biʼia akʉ ẽ bʉrʉ yi mebẽrãta sãwũã akʉi Daizeze kongregasionʼra?» (1 Tim. 3:5).

11, 12. Mebẽã aba zõrãrã bakĩrãbʉbʉrʉ, ¿kʼãrẽa yi wũãwũãrabara kʼẽrẽpabʉta ũdubibara? (Akʉra potota).

¹¹ Zõrãrãba wũãwũãta erbʉbʉrʉ 18 poaga ba ẽ nãã bʉta maʉ̃bara iyi deda bʉedara iya jarabʉta ũrĩbara. Zõrãrãbara yi wũãwũãrãra nekʼãrẽra jõma ibiade jaradiaibara. Mamina ãyira wabida wũãwũãra baera wuabema wũãwũãra kĩrãkʼa jemenepe ipidabakĩrãbʉ, maʉ̃ba bʉa jaradiaibara bʉ bedʼeata ũrĩ kʼawuadamarẽã akʉza wuabemarata wawiadamarẽã, adewara jaradiaibara kʼẽrẽpa bamarẽã. Adewara zõrãrãbara kʼarebaibara ãyi wũãwũãra audre Jeowa neũdukʼawua badamarẽã akʉza Daizeze Bedʼeaba jarabʉde odamarẽã. Adewara kʼarebaibara krĩchadamarẽã buru kʼoeita.

¹² Mebẽã abaʉta zõrãrã bakĩrãbʉbʉrʉ iyi wũãwũãrabara ũrĩbara iyi bedʼeata akʉza wuabemaraba jarada ẽ baibara nemitia onʉmʉta, awuarabʉrʉ kʼẽrẽpabʉta ũdubidaibara. Mebẽã aba kongregasione nekʼãrẽ oita erbʉba erbʉbʉrʉ wũãwũãta yi buru kʼoemata maʉ̃ta neẽbʉrʉ ʉ̃rabʉrʉ buru kʼoeitabʉta mamina maʉ̃ba nemitia ora zõrãrã kongregasionebemara ãba yi jʉredayi akʉdaita maʉ̃ mebẽãra waidide zõrãrã baseabʉ kʼawuaita, mawũã ẽ bʉrʉ zõrãrã kʼarebabari baseabʉ kʼawuaita (akʉra La Atalaya 15 octubre 1996debemata pagina 21, parr. 6 akʉza 7).

KONGREGASIONEBEMATA KʼAREBAIBARA

13. (1) Ẽbẽra abaʉba jʉ̃ã ẽ bʉrʉ iya jarabʉta odamarẽã, ¿kʼãrẽta oibara? (2) ¿Kʼãrẽta jarakĩrãbʉ iya kãgabʉtrʉ oẽbaibara?

¹³ Mebẽã abaʉba Daizeze Bedʼeade nebia bʉta ũdubibʉbʉrʉ naʉ̃ mebẽãra kongregasionʼitara jipade yibia. Yumakẽrã abaʉba jʉ̃ã ẽ bʉrʉ iya jarabʉta wuabemaba odamarẽã, maʉ̃bara ũrĩbʉ wuabema bedʼeata akʉza zarea obʉ wuabemaba kʼãrẽ jarabʉta biʼia kʼawuaita. Bari jaraita, zõrãrã ãba yi jʉrebʉrʉde nekãrẽ jidaide krĩcha abarika zedara akʉza Daizeze Bedʼeaba jarabʉdebʉbʉrʉ, ¿maʉ̃nera bʉra krĩcha abarika zeika ãyiʉ̃me bʉa maʉ̃ oita krĩchaba ẽ basimina? Zõrãrãbara iya kãgabʉtrʉ obʉ ẽ. Naʉ̃bara jarakĩrãbʉ jʉ̃ã ẽãta wuabemaraba odamarẽã iya krĩchakʉde. Adewara kʼawuabʉ wuabemara bedʼeara kĩrãkita ũrĩbarata (Gén. 13:​8, 9; Prov. 15:22). Akʉza zõrãrãra yomia ẽ baibara mawũã ẽ bʉrʉ kirʉmia ẽ baibara. Naʉ̃ba jarakĩrãbʉ wuabemara wawia ũdubibʉta akʉza kʼaikʼia ẽãta ãyibawara, awuarabʉrʉ zarea obʉ ibiade edaita akʉza jʉrʉbʉ ãyibawara sãwũã aduʼa baita bia edada ẽ mina (Sant. 3:​17, 18). Adewara iyaʼa kĩrʉ bedʼeabʉdade ibiade panʉbʉba kʼarebayi wuabemarasida iyiʉ̃me aduʼa bamarẽã bedʼea abarika panʉ ẽ mina (Juec. 8:​1-3; Prov. 20:3; 25:15; Mat. 5:​23, 24).

14. (1) ¿Kʼãrẽa zõrãrã bʼaira ʉ̃rabʉrʉ buru kʼoeda ẽ baibara? (2) ¿Kʼãrẽta oibara Jeowaʉ̃me kʼẽrẽpa bʼaita?

¹⁴ Mebẽã aba dããraba ẽ bʉrʉ buru kʼoedata maʉ̃ra zõrãra babe ẽ, ¿kʼãrẽa? Ewari nesida audre Jeowa neũdukʼawua bʼaita akʉza Daizeze Bedʼeade jarabʉde krĩcha jida kʼawuaita. Adewara naʉ̃ mebẽãbara Jesúsde kĩrãkʼa edabʉta ũdubibara. Adewara Jeowaba nekʼãrẽ omarẽã zokʼabʉrʉta sobiade oibara. Naʉ̃bara jarakĩrãbʉ jʉ̃ãbaibarata Jeowaba kʼawua jarayeda kongregasione nekʼãrẽ omarẽã (Mat. 20:23; Filip. 2:​5-8). Adewara Jeowaʉ̃me kʼẽrẽpa baibara, maʉ̃itara oũdubibara Jeowaba zokʼabʉta akʉza iyi organizasionba (1 Tim. 4:15).

15. ¿Zõrãrãbara diskurso bia jaradia kʼawuabaibaraka? Jara ũrĩbira.

¹⁵ Daizeze Bedʼeabara jarabʉ zõrãrãbara biʼia jaradia kʼawua bʼaibarata. Mamina, ¿maʉ̃bara jarakĩrãbʉka diskurso bia jaradiabaibarata? Mawũã ẽ. Wãrĩnubaira zõrãrã jõmaʉ̃ba diskursora bia jaradiabʉ ẽ. Mamina Daizeze Bedʼea jaradia wãbʉrʉde Daizeze Bedʼeara bia zokʼa kʼawuabaibara akʉza mebẽrã akʉ wãbʉrʉdera Daizeze Bedʼeadeba so zarea diaibara mebẽrã (naʉ̃ testoʉ̃me akʉra 1 Corintios 12:​28, 29 akʉza Efesios 4:11). Bʉa diskurso bia jaradia kʼawuabʉ ẽ mina zarea oibara biʼia okʼawuayeda, ¿maʉ̃ra sãwũã oseabʉ?

16. ¿Sãwũã mebẽã aba nejaradiabari bia bayi? (Akʉra potota).

¹⁶ Daizeze Bedʼeaba jarabʉde jaradiaibara. Zõrãrãba diskurso diabʉrʉde Daizeze Bedʼeadeba jaradiaibara akʉza wuabemara ũrãgʼa diabʉrʉde Daizeze Bedʼeadeba jaradiaibara. Maʉ̃itara biʼia estudiaibara Daizeze Bedʼeaba jaradiabʉta akʉza dayirã kartaraba jarabʉta (Prov. 15:28; 16:23). Estudiabʉrʉde bia akʉra sãwũã dayirã kartaraba testo abaʉ ʉ̃rʉ bia jara ũrĩbibʉta mawũã tẽã bʉa bia zokʼaita. Adewara zarea ora kʼarebaita ẽbẽrarãba audre kãgadamarẽã Jeowata akʉza oũdubidamarẽã Daizeze Bedʼeaba jaradiabʉde. Bʉa mawũã kʼarebaira biga bayi zõrãrãnebʉta dããraba ũrãgʼa widita akʉza iya jaradade oũdubita (1 Tim. 5:17). Zõrãrãbara mebẽrã so zarea dia kʼawua bʼaibara Daizeze Bedʼeadeba. Mamina mebẽrã ũrãgʼa diaibarabʉrʉ akʉza kʼẽãibarabʉrʉ maʉ̃ra ibiade opanʉ. Zõrãrãba wuabemata ibiade edapanʉbʉbʉrʉ akʉza nejaradiabʉrʉde Daizeze Bedʼeadeba jaradiabʉbʉrʉ mawũãra nejaradiabari bia bayi Jesús kĩrãkʼa (Mat. 11:​28-30; 2 Tim. 2:24).

ZAREA OBARA

17. (1) ¿Kʼãrẽta oibara mebẽrã zõrãrã kʼarebabarira zõrãrã bakĩrãbʉbʉrʉ? (2) ¿Zõrãrãba jʉrʉbʉrʉde kʼai mebẽãta zõrãrã babita kʼãrẽta kĩrãbedaibara? (Akʉra rekuadro jʉ̃ãrãra bʉa jarabʉrʉde bamarẽã).

¹⁷ Daizeze Bedʼeade jara ũrĩbibʉ kʼãrẽta oibarata zõrãrãba, maʉ̃ta zõrãrã kʼarebabariba kʼawuabʉrʉdera krĩchaseabʉ iyira zõrãrã babe ẽãta nekʼãrẽ biata mejãcha oũdubibara baera. Mamina kĩrãbedaibara Jeowaba akʉza iyi organizasionba jʉ̃ã ẽãta nama jarabʉde jõma daucha oũdubita (1 Ped. 2:21). Akʉza kĩrãbeibara Jeowa jaure zareaba kʼarebabʉta maʉ̃ra nebiara oũdubidaita (Filip. 2:13). Kõbe bʉara Daizeze Bedʼeade nebia jarabʉdebemara, ¿bʉara saʉ̃ta audre oũdubikĩrãbʉ? Bʉa maʉ̃ta audre bia okĩrãbʉbʉrʉ Jeowaʼa yiwidʼida akʉza biʼia estudiara bʉa kʼãrẽ nebia oũdubikĩrãbʉ ʉ̃rʉ.

18. ¿Kʼãrẽta odaibara zõrãrã kʼarebabaribara?

¹⁸ Jeowa odebʉba, zõrãrãba akʉza zõrãrã ẽãba nama naʉ̃ artikulode nebia jarabʉta oũdubidaibara (Filip. 3:16). Bʉta zõrãrã kʼarebabaribʉrʉ mawũãra zarea ora audre mebẽrã kʼarebaita. Adewara Jeowaʼa widida kʼarebamarẽã sãwũã audre bia oita iyideta akʉza sãwũã audre kʼarebaita mebẽrã kongregasionebemata (Is. 64:8). Bʉta zarea obʉbʉrʉ zõrãrã bʼaita Jeowaba kʼarebayi maʉ̃ta ũdumarẽã.