¿Kʼãrẽta oi Daizeze Nokʼobara?

DAIZEZE NOKʼOBA ODATA

Nãã kʼawuasida, Jesuba jarabadata. Naʉ̃ba ũdubibʉ Daizezebara Jesukristota ʉ̃tʉ Nokʼo babisita.

Daizeze Bedʼeabara jarabʉ Jesuba zokʼa jʉ̃drʉsidera, nããra ʉ̃tʉba jʉretasi Diaruta (iyabaʉta Ãtomĩata) iyi angelera kayiruabawara. Naʉ̃ Drʉadebʉrʉ nekayirua oseabʉ baera 1914deba kayiruara audre eaba wã (Apocalipsis 12:7, 9).

Naʉ̃ drʉa jõmaʉ̃nẽ kayiruara audre wãmina, Nokʼo Jesuba nekʼãrẽ biata obʉ ẽbẽrarãita. Iyara zokʼabʉ Daizeze bedʼea naʉ̃ drʉade jõma jaradiaita iya jarada kĩrãkʼa, adewara kʼãwũã Daizeze bedʼea jaradiapanʉba ẽbẽrarã mejãchaʉta kʼarebabʉrʉ Daizeze Bedʼearadebema kʼawuaita akʉza maʉ̃ne jarabʉde odamarẽã (Isaías 2:2-4). Naʉ̃ra ẽbẽrarãbara trajora jʉra kʼawua akʉpanʉ akʉza yi mebẽrãbawara ãba sobiapanʉ adewara nekʼãrẽ bia yi edebi ẽ. Daizeze Bedʼeabara kʼarebabʉ ãyi bebʉra audre bia bamarẽã adewara nekʼãrẽ jõma obʉ Daizeze Nokʼo edre sãwũã ẽbẽra bia bʼaita.

¿ARANɄ KʼÃRẼTA OI DAIZEZE NOKʼOBARA?

Jesuba ʉ̃tʉ zokʼabʉmina, ẽbẽrarãbara naʉ̃ Drʉade zokʼabʉ. Mamina Daizezeba jarasi Jesuʼa: «Zokʼara bʉ nejʉrara ẽzadraʉba» (Salmo 110:2). Aranʉ Jesubara iyi nejʉrara jõma makenañi akʉza naʉ̃ drʉade bedʼea zromabʉsida, adewara jõbiyi yi zʉbʉria opanʉsida Daizeze Bedʼea ũrĩkĩrãpanʉta.

Maʉ̃ ewaridera, Daizeze Nokʼobara naʉ̃ta oyi:

• Jõma makenañi religion zeri ẽãra. Daizeze Bedʼeabara jarabʉ religion zeri ẽãra wẽrã odebema kĩrãkʼabʉta, maʉ̃ra aranʉ jõma jõĩta. Mawũẽra religion zeri ẽã Daizeze ʉ̃rʉ sewa nebʉra jaradiabʉra adewara ẽbẽra bebʉta zʉbʉria obʉra wuara neẽbayi. Maʉ̃ra makenabʉrʉdera ẽbẽrarã mejãchaʉba ĩjãkĩrã ẽ bayi mawũã berabaribʉra (Apocalipsis 17:15, 16).

• Jõma makenañi nokʼora ẽbẽrarãra. Daizeze Nokʼobara jõma makenañi nokʼora ẽbẽrarãra (Apocalipsis 19:15, 17, 18).

• Makenañi ẽbẽra kayiruarata. ¿Kʼãrẽba sãwũãi jari ẽbẽrarã kayirua oitabʉra ewari jõmaʉ̃nẽ akʉza Daizeze Bedʼea ũrĩkĩrã ẽãra? «Ẽbẽra kayiruarãra naʉ̃ drʉadera jõma makenañi» (Proverbios 2:22).

• Makenañi Diaruta (iyabaʉta Ãtomĩa) akʉza angelera kayiruarata. Diaruba akʉza angelera kayiruabawaraʉba «wua sewakʉa ẽ marẽã» (Apocalipsis 20:3, 10).

¿Kʼãrẽba sãwũãi ẽbẽrarã Daizeze Nokʼo edre bakĩrãbʉra?

¿KʼÃRẼTA OI DAIZEZE NOKʼOBARA ẼBẼRARÃ KʼAREA?

Ʉ̃tʉba, Jesubara bia zokʼayi wuabemara nokʼora nama egorodebemaira. Adewara iyira kʼarebadayi 144.000 ẽbẽrarã iya jidadaraba (Apocalipsis 5:9, 10; 14:1, 3). Iya jõma obiyi Daizezeba kãgabʉta naʉ̃ Drʉade. ¿Kʼãrẽta oi Daizeze Nokʼobara ẽbẽrarã kʼarea?

• Jõma jõbiyi kayata akʉza beibʉta. «Mia abaʉ ẽbẽraba jara ẽ bayi, kayakʉ mʉ̃ra» akʉza «beira wuara neẽbayi» (Isaías 33:24; Apocalipsis 21:4).

• Wãrĩnu neneẽãpanañi akʉza aduʼapanañi. «Bʉ wũãwũãrãra Jeowaba jaradiayi akʉza bʉ wũãwũãrãra biode neneẽãpanañi» akʉza «ãya ne u uba udamae jewedadayi akʉza bakuru iguera edre, adewara miõba daʉperada ẽ bayi» (Isaías 54:13; Miqueas 4:4).

• Trajo bia diayi. «Mʉ̃a jʉrʉdarabara ãyi juwaba trajadara ãyitabayi. Bari ewarade zarea opana ẽ bayi» (Isaías 65:22, 23).

• Ara oyi dayirã drʉa ãrĩbʉta. «Drʉa ibʉawabʉta akʉza egoro kʼãrẽ dia ẽãta maʉ̃rãra sobiabayi, adewara koribi drʉa ibʉawabʉra sobiabayi akʉza neponorata ʉ̃tʉ zeyi azapran kĩrãkʼa» (Isaías 35:1).

• Ẽbẽrarã jaradiaibara ãya kʼãrẽta oibarata ewari jõmaʉ̃nẽ bamarẽã. «Ewari jõmaʉ̃nẽ bʼaira, bʉta ũdukʼawuadaibara Daizeze wãrĩnuara, abapai bʉta akʉza bʉa wũãwũã Jesukristo zokʼadata» (Juan 17:3).

Daizezebara kãgabʉ bʉabida ũdumarẽã naʉ̃ nebiata (Isaías 48:18). Wuarebema artikulodera kʼawuadayi kʼãrẽta oibarata naʉ̃ ẽjũã biade bʼaita.