¿Kʼãrẽa jarapanʉ Jesura Daizeze warrata?

Daizeze Bedʼeaba panʉbʉ

Daizeze Bedʼeabara jarabʉ Jesura Daizeze warrata (Juan 1: 49). Daizezera nekʼãrẽ jõma parãna; Daizezeba dayirãta parãsibʉrʉ Jesusida iya parãsi, maʉ̃ba Jesura iyi warra (Salmo 36:9; Apocalipsis 4:11). Daizeze Bedʼeabara jara ẽ Daizezebara wũãwũãra erbasita ẽbẽrarãba wũãwũã tobari kĩrãkʼa.

Daizeze Bedʼeaba jarabʉ angelerãra Daizeze wũãwũãrata (Job 1:6). Adewara jarabʉ Adánsida Daizeze wũãwũãbasita (Lucas 3:38). Mamina Daizeze Bedʼeaba jarabʉ Jesura Daizeze wũãwũã audre yibiata iya nãã parãsi baera akʉza iyidobaʉba osi baera.

• ¿Jesura naʉ̃ drʉaeda zei naena ʉ̃tʉ basika?

• ¿Jesura naʉ̃ drʉaeda zei nawedara kʼãrẽta obasi ʉ̃tʉra?

¿Jesura naʉ̃ drʉaeda zei naena ʉ̃tʉ basika?

Jesura naʉ̃ drʉaeda zei naena ʉ̃tʉ basi angel kĩrãkʼa, iyikʉza jarasi ʉ̃tʉba eda zesita (Juan 6:38; 8:23).

Daizezebara Jesuta nãã parãsi, Daizeze Bedʼeaba naʉ̃ta jarabʉ Jesu ʉ̃rʉ:

• «Iyitrʉ nããra parãsi nekʼãrẽ jõmabʉ parãi naweda» (Colosenses 1:15).

• «Daizezeba nãã parãnaba» (Apocalipsis 3:14).

Propesiatabʉ, maʉ̃ra bedʼeabasi ẽbẽra dããrabade bada ʉ̃rʉ, Jesuba maʉ̃ propesia ʉ̃rʉ aripe berabaribisi (Miqueas 5:2; Mateo 2:4-6).

¿Jesura naʉ̃ drʉaeda zei nawedara kʼãrẽta obasi ʉ̃tʉra?

Jesura ʉ̃tʉra nekʼãrẽ audre yibiade trajabasi. Jesura naʉ̃ trajo ʉ̃rʉ bedʼeabasi yi zezeʼa naʉ̃ widiside: «Zeze mʉ̃ra bʉ kʼaita yi zromata babira, bʉme yi zromata bada kĩrãkʼa naʉ̃ drʉa parãi naena» (Juan 17:5).

Kʼarebasi yi zezeta nekʼãrẽ wuabemara parãita. Jesura yi zeze kʼawa trajasi ẽbẽra nekʼãrẽ okʼauba kʼarebabʉ kĩrãkʼa (Proverbios 8:30). «Daizezeba iyideba nekʼãrẽ jõma osi bajãta akʉza naʉ̃ ẽjũãta» (Colosenses 1:16).

Daizezebara Jesudeba nekʼãrẽ jõma parãsi, angelerata akʉza nama nekʼãrẽ jõmabʉta (Apocalipsis 5:11). Maʉ̃ ʉ̃rʉ bia kʼawuadaita krĩchara naʉ̃ta: bʉ ẽbẽra dibujota obʉ de sãwũã oita akʉza awuru ẽbẽratabʉ maʉ̃ dibujo kĩrãkʼa de parãnʉmʉita, Jeowata Jesuʉ̃me mawũã ãba trajabasi, baera maʉ̃ra ẽbẽrane kĩrãkʼa osida.

Jesura Bedʼea. Jesu nama naʉ̃ drʉaeda zei nawedara Daizeze Bedʼeabara trʉ̃gabʉ kʼãrẽ «Bedʼeata» (Juan 1:1). Naʉ̃ba jarakĩrãbʉ Jeowabara Jesuta zokʼasita angelera nejaradiamarẽã.

Adewara Daizezebara zokʼasi Jesuta ẽbẽrabawara bedʼeaita maʉ̃ne, Jeowabara zokʼasibaibara Jesuta Adán Evaʉ̃me bedʼeamarẽã jardn Edénʼne (Génesis 2:16, 17). Jeowaba zokʼasi angel abaʉba edemarẽã Israel pʉwʉrʉrata drʉa ibʉawabʉde akʉza Jeowaba jarasi maʉ̃ angel bedʼeata ũrĩmarẽã, maʉ̃ra Jesubasibaibara (Éxodo 23:20, 23).a