Bakuru karra jidabʉ kĩrãkʼa bʉa kʼawuabʉbʉrʉ bʉta kʼaita yi edebi ẽ bayi.
WARRARAITA
9 Kʼawuaita bʉ kʼaita
¿KʼÃRẼTA OIBARA?
Bʉ trʉ̃ba akʉza bʉ kakuaba sãwũã daucha biabʉdeba ũdubi ẽ kʼaita bʉra awuarabʉrʉ bʉa kʼãrẽ nebia erbʉba bʉ sode, bʉa ĩjãbʉba akʉza bʉ sãwũãbʉdeba ũdubibʉ kʼaita bʉra.
¿KʼÃRẼA YIBIA?
Bʉa kʼawuabʉrʉde kʼaita bʉra, obʉ bʉa wãrĩnu ĩjãbʉta akʉza idu wuabemara warrara yi edebi ẽ.
«Ẽbẽrarã mejãchaʉta muñeko kĩrãkʼabʉ, ãyikʉza jida ẽ baera kʼãrẽ wua jʉ̃ita» (Adrian).
«Mʉ̃ara kʼawuabʉrʉ kʼãrẽta wãrĩnuare bedʼeaita edaude zaremina. Mʉ̃a wãrĩnu kʼawuachu kʼairata mʉ̃ neũdukʼawuata ãya obʉdeba akʉza mʉ̃a kʼãrẽta obʉta ãyibawarabʉde» (Courtney).
DAIZEZE BEDʼEABA JARABɄTA: «Naʉ̃ ẽjũãne bʼedʼe bʼearãũdua, awuarabʉrʉ krĩcha zhiwidʼidʼe nʉmeba kĩrãẽpa bʼeaudua» (Romanos 12:2 Daizeze Bedʼea, Wycliffe Inc.).
¿KʼÃRẼTA OIBARA?
Bʉa kʼawuaita bʉra atiara kʼaita akʉza ʉ̃ra zeide kʼãrẽ bakĩrãbʉta, nãã bia akʉibara bʉa kʼãrẽta bia obʉta akʉza kʼãrẽta bia oẽãta adewara bʉa ĩjãbʉta. Maʉ̃ kʼawuaita naʉ̃rata widira.
Kʼãrẽta bia obʉta: «¿Kʼãrẽta biʼia okʼawuabʉ mʉ̃ara? ¿Kʼãrẽne awuarabʉ? ¿Mʉ̃ kakua jõma bia zokʼa kʼawuabʉka? ¿Ũmadaʉ aripe jʉ̃ẽbʉka, mʉ̃ra trajamiaka mawũã ẽ bʉrʉ diakĩrã diabʉka wuabemara?».
ŨRÃGʼA: Bʉa bʉ sode kʼawua ẽ bʉrʉ kʼãrẽ nebia erbʉta, kʼareba widira bʉ yibarira mawũã ẽ bʉrʉ bʉ neũdukʼawuara.
DAIZEZE BEDʼEABA JARABɄTA: «Aba abakaʉba akʉibara ãya obʉra, mawũã mejãcha sobiabayi nekʼãrẽ aripe oya zarea ozebʉrʉ kʼarea, krĩcha ẽã iya obʉta wuabemaraʉ̃me» (Gálatas 6:4).
Kʼãrẽta bia oẽãta: «¿Kʼãrẽ nekayirua mʉ̃ sodebʉta awuara oibara? ¿Mʉ̃a kʼawuachuka mʉ̃ sãwũãbʉde mesera nekayirua oita? ¿Mʉ̃ sãwũãbʉde mʉ̃ kakuara jõma daucha zokʼa kʼawuai mʉ̃ara?».
DAIZEZE BEDʼEABA JARABɄTA: «Dayirãba «Nekayiruata neẽã apanʉbʉrʉ», dayikʉza yi sewabʉ akʉza wãrĩnu bedʼeaira neẽbayi dayirãne» (1 Juan 1:8).
Bʉa ĩjãbʉta: «¿Kʼãrẽ bedʼea mʉ̃a ũrĩbʉba kʼarebai kʼẽrẽpa bʼaita akʉza kʼãrẽa? ¿Mʉ̃ara ĩjãbʉka Daizezera? ¿Mʉ̃ara sãwũã kʼawuachu Daizezera chuta? ¿Mʉ̃ara sãwũã kʼawuabʉ maʉ̃ra aripebʉ ẽãta akʉza kʼãrẽa? ¿Mʉ̃ara sãwũã akʉbʉ nekʼãrẽ ʉ̃ra zeira?».
DAIZEZE BEDʼEABA JARABɄTA: «Bʉ jʉra kʼawuabʉba kʼarebayi akʉza bʉ buru biaba kʼarebayi» (Proverbios 2:11).