¿Jeowa ʉ̃rʉ Kʼawuabipanʉrãra sõbe ũdu kʼawuabʉ bʉara? ʉ̃kʉrʉ daidebemara, bʉ de kʼaitabʉbaibara mawũãẽbʉrʉ bʉme ãba trajabʉbaibara, nejaradiabari demae ãba nekʼawuabʉbaibara, akʉza edaude bʉme bedʼeabaribaibara Daizeze Bedʼea ʉ̃rʉ. Mawũẽra ¿wãrĩnubaira kʼaipe daira, akʉza kʼãrẽa bedʼeapanʉpe daiba ĩjãbʉ ʉ̃rʉ awuru ẽbẽrarã?

Daira wuabema ẽbẽra kĩrãkʼa bʉ. Daidera edabʉ yumakẽrãrata akʉza yuwẽrãrata naʉ̃ drʉa jõmaʉ̃nẽbemata, plata mejãcha erbʉta akʉza plata mejãcha neẽãta. Ʉ̃kʉrʉ daidebemara religionbarabeasi, ʉ̃kʉrʉbara ĩjãnaẽbasi Daizezera, mawũãsidu Jeowa ʉ̃rʉ Kʼawuabibari baina, jõmaʉ̃ba naara biʼia krĩchasida Daizeze Bedʼeaba jarabʉta (Hechos 17:11). Ĩjãsida daiba kʼawuadata, mõbebʉrʉ krĩchasida dayi dobaʉba Daizezeba kãgabʉ oita.

Nebia ũdupanʉ Daizeze Bedʼea kʼawuabʉdeba. Naʉ̃ drʉade ẽbẽra bʉ kĩrãkʼa daisida bedʼea zroma erbʉ, akʉza krĩcha obe, mamina wãrĩnu Daizeze Bedʼearadebemaba jarabʉta opanʉbaera ewari jõmaʉ̃nẽ, dai bebʉra audre biabʉ (Salmo 128:1, 2). Maʉ̃ kʼãrẽa jarapanʉ ẽbẽrarã Daizeze Bedʼeade bedʼea bia kʼawua wãnata.

Opanʉ wãrĩnu Daizeze bedʼearadebemaba jarabʉta. Naʉ̃ bedʼeabara, mejãchade webʉ dayirã biabaita. Adewara awuruta wawia ũdubibʉ akʉza wãrĩnuta jarabibʉ, akʉza awuru kʼarebaita. Naʉ̃ wãrĩnu Daizeze bedʼearadebemabara kʼarebabʉ dayirã biabaita, akʉza ẽbẽrarã dayirã kʼaitabʉ bia oita. kʼarebabʉ mebẽrãbawara ãbabaita, kʼawuaita aripe oita aripe oẽãta. Dayirãbara ĩjãpanʉ «Daizezebara zhãrã awuara eda ẽãta», maʉ̃ba naʉ̃ drʉa jõmaʉ̃nẽ dai ãba yi jʉrebʉra jõma abʼarikabʉ, maʉ̃ba daibara ẽbẽra awuarabe mitia akʉẽ, politika oẽ. Abʼarika wuabema ẽbẽrarã kĩrãkʼabʉmina, dai pʉwʉrʉra awuarabʉ (Hechos 4:13; 10:34, 35, DB).

• ¿Kʼãrẽne abʼarikabʉ Jeowa ʉ̃rʉ Kʼawuabipanʉrãra wuabemara ẽbẽraʉ̃mera?

• ¿Kʼãrẽne kʼarebabʉ wãrĩnu Daizeze bedʼearadebemabara Jeowa ʉ̃rʉ Kʼawuabipanʉrãra?

Ẽbẽrarã mejãchaʉba krĩchapanʉ Jeowa ʉ̃rʉ Kʼawuabipanʉrã religionra yiwidita. Mamina wãrĩnu Daizeze odebʉrãra dos mil setesiento poaga audreba trʉ̃gadata, «mʉ ʉ̃rʉ k’awuabipanʉrã» (Isaías 43:10-12). Poaga mil nowesiento treinta y uno bainaena, ũdu kʼawuapanasi Daizeze Bedʼea kʼawuabaribasita. Mawũẽra ¿Kʼãrẽa jidasida Jeowa ʉ̃rʉ Kʼawuabipanʉrã trʉ̃ra?

Kʼawuabibʉbaera kʼaita Daizezera. Jeowa trʉ̃ra, Daizeze Bedʼeadera mil audre bʉchu, mawũã ũdubibʉ Daizeze Bedʼea naara juwaba bʉda kikibariba. Mamina ʉ̃kʉrʉba tradusipanʉ Daizeze trʉ̃ra, Daizezeta akʉza Señorta. Mamina Daizezera yi ũdubisi Moiseara Jeowade akʉza iya jarasi «mʉ trʉ̃ra ewari jõmaʉ̃nẽbayi» (Éxodo 3:15). Mawũã yi ũdubisi awuarabʉta wuabemara daizeze zeriẽãraira. Maʉ̃ kʼãrẽa daira mejãchade sobiapanʉ Daizeze trʉ̃ neneẽãbʉta erpanʉbaera.

Dayirãba obʉta ũdubibʉbaera. Abeldeba yẽta, ẽbẽra mejãchaʉta bedʼeasida iya Jeowa wãrĩnu ĩjãbada ʉ̃rʉ. Tẽã jũneãra zesida awururata Noeta, Abraanta, Sarata, Moiseta, akʉza Davita maʉ̃rasida ãba edapanʉ, wãrĩnu jarabarirata jãrãra kĩrãkʼa bʉbawara (Hebreos 11:4–12:1). Abʼarika ẽbẽra abaʉba juezmae ẽbẽra neneẽãbʉare bedʼeabari kĩrãkʼa, dayirãbida Daizeze ʉ̃rʉ wãrĩnuta jaradiakĩrãpanʉ maʉ̃are bedʼeaita.

Jesude kĩrãkʼa opanʉbaera. Daizeze Bedʼeabara jarabʉ Jesura «wãrĩnu kʼẽrẽpa jarabari» (Revelación [Apocalipsis] 3:14). Jesubara jaradiasi yi zeze trʉ̃ra akʉza zesi «naʉ̃ ẽjũãẽna wãrãta jaraita» Daizeze ʉ̃rʉ (Juan 17:26; 18:37, DB). Maʉ̃ kʼãrẽa wãrĩnu iyi kʼaidubʉrabara Jeowa trʉ̃ta erbaibara akʉza jarakʼaibara. Maʉ̃ta opanʉ Jeowa ʉ̃rʉ Kʼawuabipanʉrãbara.

• ¿Kʼãrẽa jidasida Daizeze bedʼea kʼawuabarira Jeowa ʉ̃rʉ Kʼawuabipanʉrã trʉ̃bari?

• ¿Sõbedaʉba erbʉ Jeowabara naʉ̃ drʉadera iyi ʉ̃rʉ kʼawuabipanʉrãra?

• ¿Saʉ̃ Jeowaba iyi ʉ̃rʉ kʼawuabibari zroma erbʉra?

Daizeze Bedʼeabara jarasi Kristo beuda tẽãra jaradiabari zeriẽãta ʉ̃tʉzeita kristianorane eda, akʉza maʉ̃rabara Daizeze Bedʼeade wãrĩnu jarabʉta aña jaradiaibasi (Hechos 20:29, 30). Maʉ̃ra aripe berabarisi, kristiano zeriẽãbara, Jesude kĩrãkʼa odaẽbasi awuarabʉrʉ ãya ĩjãbʉtrʉ jaradiasida, mawũã kristianora zeriẽãta ũdubisida (2 Timoteo 4:3, 4). ¿Dayirãbara kʼãrẽa ĩjãpanʉ Daizeze Bedʼeara wãrĩnuta?

Ewari arabasi Jeowaba wãrĩnu ʉ̃tʉzebita. Daizezebara jarasi naʉ̃ ewari jõbodoarera «jʉrʉdayi wãrĩnuta akʉza maʉ̃ra mejãchade eaba wãñi» (Daniel 12:4). Poaga 1870dera ẽbẽra wika ãba yi jʉrepanasi wãrĩnu kʼawuaita, mawũã ãyara kʼawuasida iglesiade jaradiabadara, Daizeze Bedʼeadeba jaradiaẽbasita. Maʉ̃ kʼãrẽa biʼia krĩchasida audre bia kʼawuaita Daizeze Bedʼeaba jaradiabʉta, maʉ̃ba Jeowabara kʼarebasi iyi jaure zarẽãba.

Yumakẽrãra kʼẽrẽpapanʉrãbara jʉrakʼawua akʉsida Daizeze Bedʼeara. Maʉ̃ra ẽbẽra Daizeze Bedʼea kʼawuabarirabara okĩrãne opanasi. Ãyara idi dayirãba opanʉ kĩrãkʼa, biʼia akʉpanasi Daizeze Bedʼeara. Ãya Daizeze Bedʼeadebemata bersikulo aba ũrĩẽbasibʉrʉ, jʉrʉpanasi awuruta ãyi kʼarebamarẽã audre biʼia ũrĩta, mawũã Daizeze Bedʼeade jarabʉ kĩrãkʼabasibʉrʉ, maʉ̃trʉ bʉpanasi ãyara. Mawũã Daizeze Bedʼeara iyidoba bedʼeabʉ kĩrãkʼabasi, mawũã ʉ̃tʉzebisida wãrĩnuta Daizeze trʉ̃ ʉ̃rʉ, akʉza Daizeze Nokʼo ʉ̃rʉ, akʉza Daizezeba ẽbẽrarãita kʼãrẽ krĩchabʉta naʉ̃ drʉaita, adewara beuda tẽã sãwũãbʉta, akʉza beudara jẽdababita. Mawũã biʼia jʉrʉdadeba kʼarebasi ẽdrʉita sewadeba (Juan 8:31, 32).

Poaga 1879dera, Daizeze Bedʼea jaradiabarirabara krĩchasida jõmaʉ̃ba kʼawuadamarẽã wãrĩnura. Maʉ̃ poagadeba yẽta idi dayirãba karta erpanʉta ojʉdrʉsida. La Atalaya Anunciando el Reino de Jehováa. Idi ewadera Daizeze Bedʼea wãrĩnu erpanʉrã, 240 pʉwʉrʉde jaradiapanʉ, bedʼea 750 awuara awuaraka. Mawũã jaradiadakabasi wãrĩnuarãra.

• ¿Jesu beuda tẽãra sãwũãsi Daizeze Bedʼea wãrĩnuara?

• ¿Sãwũã ʉ̃tʉzebisida Daizeze Bedʼeade wãrĩnu jarabʉra?

Poaga mejãchaba, Daizeze Bedʼeara Jeowa ʉ̃rʉ Kʼawuabipanʉrãba ʉ̃tʉzebibʉta, akʉza dedekapanʉ kĩrã awuara awuaraka. Mamina tẽã jʉneã kʼawuasida nesidapanasita tradusion yiwidi oita ẽbẽrarãba audre «kʼawuadamarẽã wãrĩnuta», Daizezeba maʉ̃ta kãgabʉbaera ẽbẽrarãita (1 Timoteo 2:3, 4). Maʉ̃ kʼãrẽa poaga 1950dera Daizeze Bedʼeara inglede dedekasida, dayirãba tradusidata Daizeze Bedʼea Traducción del Nuevo Mundoa, maʉ̃ra wãrĩnu aripe bedʼeabʉ akʉza bʉ 130 bedʼea awuara awuaraka.

Nesidapanasi Daizeze Bedʼea aba daya audre ẽza ũrĩta. Bedʼeara ewari wãne awuara wãbaera, maʉ̃ba Daizeze Bedʼea mejãchade tradusibʉra daya biʼia ũrĩẽbasi, akʉza zõrãrã nabema bedʼeata erbasibaera, maʉ̃ba zarebasi daya ũrĩta. Adewara ũdusida Daizeze Bed’ea naara juwaba bʉdata audre aripe jarabʉta, maʉ̃ba audre ẽza ũrĩbasi ebreo bedʼeade, akʉza arameo bedʼeade, akʉza griego bedʼeade.

Nesidapanasi tradusion Daizeze Bedʼeade aripe jarabʉta. Tradusipanʉrãbara Daizeze Bedʼeadera ãyi krĩchata eda bʉbeẽ, aripe jarabaibara Daizeze Bedʼeaba jarabʉ kĩrãkʼa. Mamina ʉ̃kʉrʉ Daizeze Bedʼeadera Jeowa trʉ̃ra edaneẽ.

Nesidabasi Daizeze Bedʼea aba yi oda wawia ũdubita. (2 Samuel 23:2) Dayirãba tradusisidade Daizeze Bedʼeata, Daizeze Jeowa trʉ̃ra edabʉesida 7000 audre, Daizeze Bed’ea naara juwaba bʉdade edabʉ kĩrãkʼa. Maʉ̃ra edre ũdubibʉ (Salmo 83:18). Ãya Jʉrak’awua akʉpanasibaera Daizeze Bedʼeata, Dayirãba tradusidara akʉkĩrãne akʉpanʉ, audre ẽza ũrĩpanʉbaera. Bʉa Daizeze Bedʼeata bʉ bedʼeade erbʉẽbʉsida, kãgapanʉ akʉbamarẽã Jeowa bedʼeara nruemaza (Josué 1:8; Salmo 1:2, 3).

• ¿Kʼãrẽa krĩchasida Daizeze Bedʼea tradusidaita?

• ¿Kʼãrẽa nruemaza akʉbaibara Daizeze Bedʼeara, yi kʼawuakĩrãbʉbara Daizezeba kãgabʉta?