Dai ãba daʉcha yi jʉrepanʉrã jedekoza pagapanʉneẽ. Awuarabʉrʉ nabema kristianoraba obada kĩrãkʼa jʉrʉpanʉ zõrãrã biata, «akʉita Daizeze kongregasionta» (Hechos 20:28, DB). Naʉ̃ra zõrãrãbara audre ĩjãbʉ Daizezera, akʉza akʉbʉ mebẽrã kongregasionnebemata, akʉza «oamane opanaraidua awuarabʉrʉ okĩrã oidua, mia jʉrʉraidua plata ũduita, awuarabʉrʉ zarea trajaidua» (1 Pedro 5:1-3). ¿Kʼãrẽta opanʉ dayirã kʼarebaita?

Dayirã akʉbʉ akʉza kʼarebabʉ. Zõrãrãbara kʼareba edebʉ mebẽrã kongregasionnebʉrãra, akʉza kʼarebabʉ ãya Daizeze ĩjãbʉta audre ĩjãnamarẽã. Ãya kʼawuapanʉ Daizezeba jidasita kongregasion akʉmarẽã, ãya kãgabʉta omarẽã jaraẽ, awuarabʉrʉ kʼarebabʉ dayirã biabaita, akʉza sobiabaita (2 Corintios 1:24). Abʼarika ẽbẽra abaʉba iyi obeja akʉkĩrã akʉbʉ kĩrãkʼa, mawũã akʉbʉ zõrãrãbida krĩchapanʉ audre ũdu kʼawuaita aba abaka jõma Daizeze obejarãra (Proverbios 27:23).

Jaradiapanʉ Daizezeba kãgabʉ oita. Semanaza kongregasionne nejaradiapanʉ zõrãrãbara, kʼarebaita Daizeze ĩjãbʉra audre ĩjã wãnamarẽã (Hechos 15:32). Akʉza naʉ̃ra zõrãrãbara Daizeze Bedʼea jaradia wãpanʉ, adewara dayirãbawara Daizeze Bedʼeara jaradiapanʉ, maʉ̃daʉcha jaradiapanʉ sãwũã jaradiaibarata Daizeze Bedʼeara.

Dayirã aba abaka kʼarebabʉ. Dayirãba Daizeze audre ĩjãita nesidabʉbaera, zõrãrãbara akʉdezebʉ dayirã deda, akʉza Daizeze Nokʼo ʉ̃rʉ bedʼeabaridemae bedʼeabʉ dayirãbawara. Adewara maʉ̃daʉcha kʼarebabʉ dayirãra akʉza zarea diabʉ Daizeze Bedʼeadeba (Santiago 5:14, 15).

Ãyi kongregasionne trajabʉ awuara, bʉ zõrãrã trabajo bio erbeta, akʉza yi mebẽrã akʉita, maʉ̃ kʼãrẽa maʉ̃ra mebẽrã mejãcha trajabʉbaera dayirãbara wawia ũdubibara (1 Tesalonicenses 5:12, 13).

• ¿Kʼãrẽta opanʉ zõrãrã kongregasionnera?

• ¿Sãwũã ũdubibʉ dayirã aba abaka krĩchabʉta?

Daizeze Bedʼeabara jarabʉ yumakẽrã ũmebʉta kongregasion akʉpanʉta. Maʉ̃rãra «zõrãrã akʉza zõrãrã k’arebabarira» (Filipenses 1:1). Adewara kongregasion bʉmae biobʉ maʉ̃ra mebẽrãra. ¿Kʼãrẽne kʼarebabʉ zõrãrã kʼarebabarirabara dayirãra?

Kʼarebapanʉ zõrãrãta. Zõrãrã kʼarebabarirãra Daizeze ĩjãbʉ soiduba, daya ĩjãseabʉ, akʉza biʼia kʼawuabʉta, ʉ̃kʉrʉra warrara, ʉ̃kʉrʉra audre zõrãrã. Ãyara kongregasionne nekʼãrẽ oita kʼarebabʉ, akʉza kongregasion daʉcha ãba jʉre erbaita, ãyira nruemaza mejãcha trajabʉ. Mawũã zõrãrã ewari erbʉ jaradiaita akʉza mebẽrã akʉita.

Trajapanʉ mejãcha awuru kʼãrẽa. Ʉ̃kʉrʉ zõrãrã kʼarebabarira ẽbẽra ãba daʉcha obarira, akʉza ẽbẽra ãba yi jʉrebarima zebʉrʉde biga jarabari. Ʉ̃kʉrʉra yi zabari akʉbari, akʉza karta dedekabari, ʉ̃kʉrʉra plata juachabari akʉza mebẽrã kongregasionnebema Daizeze Bedʼea jaradia wãimae jaradiabari. Mawũã kʼarebapanʉ Daizeze Nokʼo ʉ̃rʉ bedʼeabaride ara oita, akʉza kʼarebabʉ zõrãrã yideta, zõrãrã kongregasionnebemaba jarabʉ kĩrãkʼa. Ãya badu kʼãrẽta omarẽã jarabʉdade opanʉ, ãyira zokeapanʉbaera jõmaʉ̃ba wawia ũdubipanʉ (1 Timoteo 3:13).

Ãyara Daizeze wãrĩnu ĩjãbʉta ũdubipanʉ. Zõrãrã kʼarebabarira jʉrʉsida Daizeze ode kẽrẽpapanʉbaera. Ãya yeda jaradiabʉdeba kʼarebabʉ dayirãba ĩjãbʉ audre ĩjãita. Akʉza Daizeze Bedʼea jaradiabʉdeba, kʼarebabʉ dayirãbida abʼarika oita, akʉza ãyi zokeabʉdeba ũdubibʉ sobiata, akʉza ãbabaita (Efesios 4:16). Tẽã jʉneãne ãyira kongregasionne zõrãrãbaseabʉ.

• ¿Kʼãrẽta obʉ zõrãrã kʼarebabarirabara?

• ¿Sãwũã kʼãrẽbabʉ zõrãrã kʼarebabarirabara kongregasion bia erbaita?

Bernabe ʉ̃rʉ akʉza Pablo ʉ̃rʉ audreẽãne bedʼeabʉ Daizeze Bedʼea Griega kristianora. Maʉ̃ra yumakẽrãra kongregasion akʉbari zõrãrãbasi, akʉpanasi nabema kongregasionta. ¿Kʼãrẽa mawũã opanasi? wãrĩnu krĩchapanasibaera mebẽrãba Daizeze ĩjãbʉta. Pablobara jarasi iya jẽda akʉ wãkĩrãbʉta mebẽrã sãwũã wã kʼawuaita. Iyitara kʼãrẽẽbasi mebẽrã zarea diaita wawara wãibasimina (Hechos 15:36). Idi ewadebida mawũã abʼarika krĩchabʉ kongregasionra akʉbari zõrãrãbida.

Dayirã kʼarebaita zebʉ. Kongregasionra akʉbari zõrãrãbara akʉpanʉ beinte kongregasion, akʉza maʉ̃rabawara semana aba ãba berabaribʉ, maʉ̃ba poaga abaʉde ũme akʉ jũẽbʉ kongregasionra. Dayirãbara mejãcha kʼawuaseabʉ naʉ̃ra mebẽrãneba akʉza yi kimaneba, akʉza ãyita juwa jidabʉbʉrʉ. Ãyara ũdu kʼawuakĩrãbʉ warrarata akʉza zõrãrãta, akʉza dayirãbawara Daizeze bedʼea jaradia wãkĩrãbʉ akʉza ẽbẽra dayirãba Daizeze Bedʼea kʼawuabibʉrata akʉ wãkĩrã. Kongregasionra akʉbari zõrãrãbara akʉpanʉ zõrãrã kongregasionnebema bawaraʉba mebẽrãrata, adewara ãya jaradiapanʉ bedʼea biata ãba yi jʉrebarimae akʉza asambleade dayirã zarea diaita (Hechos 15:35).

Ũdubibʉ dayirã jõma krĩchabʉta. Kongregasionra akʉbari zõrãrãbara mejãchade krĩchabʉ kongregasionraba Daizeze ĩjãbʉra. Zõrãrãta akʉza zõrãrã kʼarebabarirabawara ãba yi jʉrepanʉ, kʼawuaita ãya ozebʉrʉta akʉza ãya ũrãgʼa bia diabʉ ãya oi ʉ̃rʉ. Kʼarebapanʉ yi naa edebarirata ãya audre bia jaradiaita Daizeze Bedʼeata mawũã wari wãita, ãya kãga ẽbẽra dayirãbawara ãba yi jʉrebʉra, akʉza kʼãrẽãba kʼawuabʉta Daizeze ʉ̃rʉ. Naʉ̃ra mebẽrãra dayirãita «bia trajapanʉ» (2 Corintios 8:23). Maʉ̃ kʼãrẽa ãya ĩjãbʉ kĩrãkʼa ĩjãnaibara akʉza ãya Daizeze mejãcha kãga kĩrãkʼa kãgadaibara (Hebreos 13:7).

• ¿Kʼãrẽa akʉ jũẽpanʉ kongregasionra akʉbari zõrãrãbara, kongregasionra?

• ¿Bʉra sãwũã kʼarebaseabʉ ãya akʉ jũẽbʉrʉdera?

Mebẽrã zʉbʉria berabaribʉrʉdera Jeowa ʉ̃rʉ Kʼawuabipanʉrãra, mesera wãpanʉ kʼarebaita. Mawũã ũdubipanʉ wãrĩnu yi kãgapanʉta (Juan 13:34, 35; 1 Juan 3:17, 18). ¿Kʼãrẽne kʼarebabʉ?

Nekʼãrẽ diabʉdeba kʼarebabʉ. Kristianora Antiokiiadebemabara diabʉesida platata mebẽrã Judeadebema pʉwʉrʉ kʼarebaita ãyi jarrababa berabariside (Hechos 11:27-30). Idibida abʼarika opanʉ, dayirãbida ʉ̃kʉrʉ mebẽrã zʉbʉriatakirʉ kʼawuabʉdade maʉ̃ba dayirãbara kongrasioneba soiduba diabʉepanʉ platata, mebẽrã kʼarebaita ãya nesidabʉ edamarẽã (2 Corintios 8:13-15).

Kʼarebade jũẽpanʉ. Zõrãrã pʉwʉrʉ mitia berabaridamaebʉba aba abaka jʉrʉpanʉ mebẽrã kongregasionnebemata, kʼarebaita kʼãrẽba sãwũãberabariẽmarẽã. Yi kʼarebabarirabara diabʉepanʉ yi kota, baniata, wuata, medikota akʉza deta jʉrʉdiapanʉ. Mejãcha wãpanʉ Jeowa ʉ̃rʉ Kʼawuabipanʉrã mebẽrã kʼarebade ãyikʉza, de odiaita, Daizeze Nokʼo ʉ̃rʉ bedʼeabaride ara oita. ¿Kʼãrẽa mesera trajapanʉ? naara, ãbapanʉbera, yi ũmeta, naa mawũã trajasebʉdabaera, maʉ̃ba mesera kʼarebade wãpanʉ yi nesidapanʉmae. Mawũã «audre nebia obaibara dayirãbawara ãba ĩjãbʉme», akʉza kʼarebapanʉ awururata dayirãba kʼarebaseabʉde, saʉ̃ religion krĩchaẽã (Gálatas 6:10).

Kʼarebapanʉ Daizeze audre ĩjãmarẽã akʉza zarea diapanʉ. Yi zʉbʉriadabara nesidabʉ ãyi so zarea diadamarẽã. Maʉ̃ kʼãrẽa Jeowaba, so zarea diayi (2 Corintios 1:3, 4). Maʉ̃ kʼãrẽa, yi zʉbʉriabʉrãra ũdubipanʉ Daizeze Bedʼeaba bedʼea bia jarabʉta. Mamara jarabʉ Daizeze Nokʼoba jõma jõbita mitia berabaribʉta, pʉabibʉta, akʉza zʉbʉria bibʉta (Revelación 21:4).

• ¿Kʼãrẽa Jeowa ʉ̃rʉ Kʼawuabipanʉrãbara mesera kʼarebaseabʉ zʉbʉriabʉrʉde?

• ¿Sãwũã so zarea diapanʉ yi ẽbẽra zʉbʉriadara?

Jesura iyi beinabedara bedʼeasi iyi kʼaidu kimarebʉra, Pedroʼa, Santiagoʼa, Juanʼa akʉza Andreʉ̃me. Iya jaraibaera iyi zei ewarira sãwũãbaita naʉ̃ drʉa jõbodoare, widisi bedʼeata «¿kʼairape yi wãrĩnu nezokʼara jipabʉrãra akʉza biʼia krĩchabʉrãra, Nokʼobara yi nezokʼara zokʼa amaesi jõma iyi deda bʉ ʉ̃rʉ, yiko diamarẽã nekobari ũmadaʉde?» (Mateo 24:3, DB, 45, TNM; Marcos 13:3, 4, DB). Jesura bedʼeaẽbasi yiko daya koi ʉ̃rʉ, yikobara jarabʉ Daizeze ʉ̃rʉ kʼawuaita. Naʉ̃ bedʼeaba Jesubara jarasi iyara jʉrʉita ẽbẽrarã yiko diabarita naʉ̃ drʉa jõbodoare. ¿Kʼaipe yi wãrĩnu nezokʼara?

Maʉrãra wiña ãbapanʉ, Jesu kʼaidubemara jaure zareaba jidada. ¿Kʼãrẽ «nezokʼara»? maʉ̃ra kristianorãra wiñapanʉ ʉ̃ta wãita, akʉza iyabaʉta Zõrãrã burubia ãba yi jʉrepanʉ, ãyira Jeowa ʉ̃rʉ Kʼawuabipanʉrã. Naʉ̃ra kristianorabara Daizeze ʉ̃rʉ kʼawuaita diapanʉ, Jeowaba jarabʉ opanʉrãita. Naʉ̃ra nezok’araneba erpanʉ kʼarebara «yiko diabamarẽã yiko diai ũmaʉ̃daʉde» (Lucas 12:42).

Akʉpanʉ Daizeze deta. Jesubara iyi nezokʼara jara amaesi akʉdamarẽã Jeowa pʉwʉrʉta akʉza ãba daʉcha jʉre erbamarẽã, maʉ̃ oira ãyara dayirã diaibara kʼãrẽ jõma nesidabʉta, akʉza jaradiabʉ Daizeze Bedʼea sãwũã jaradiaibarata akʉza kongregasionneba jaradiamarẽã. Dayirãba nesidabʉ diaya, «nezokʼara jipabʉrãra akʉza biʼia krĩchabʉrãra» Daizeze ʉ̃rʉ kʼawuabigabʉ, karta, Daizeze Bedʼea jaradia wãbari diabʉdeba, akʉza ãba yi jʉrebarimae programa diabʉdeba akʉza asambleadeba.

«Nezokʼara», jipapanʉ wãrĩnu soiduba ĩjãbʉbaera Daizeze Bedʼeaba jarabʉta, akʉza mawũã aripe opanʉ Daizeze Bedʼea bia jaradiabʉdeba, akʉza biʼia krĩchabʉbara, jura kʼawua obʉ Jesuba krĩchabadata (Hechos 10:42). Jeowabara kʼarebabʉ Jeowa ʉ̃rʉ Kʼawuabipanʉrã waribi wãne akʉza nemejãcha diabʉ iyi ʉ̃rʉ kʼawuadamarẽã.

• ¿Kʼaita amaesi Jesubara iyi kʼaidubemara yiko diabamarẽã?

• ¿Kʼãrẽne nezokʼara jipabʉ akʉza biʼia krĩchapanʉ?

Nabema 100 poagadera, Zõrãrã Burubia ãba yi jʉrepanasi maʉ̃rãra wiñapanasi, maʉ̃rãra Jesu kʼaidubemabasi akʉza zõrãrã Jerusalennebemabasi. Ãyira bedʼea abʼarika zepanasi jõmaʉ̃ra kongregasionbari (Hechos 15:2). Ãyi mawũã bedʼea abʼarika zeira biʼia jʉrʉpanasi Daizeze Bedʼeade akʉza Daizeze jaurea yi edebipanasi (Hechos 15:25). Idi abʼarika Zõrãrã Burubia ãba yi jʉrepanʉ naarabemaraba obada kĩrãkʼa.

Daizezebara maʉ̃raneba iya kãgabʉta obibʉ. Mebẽrã ʉ̃ta wãira Zõrãrã Burubia ãba yi jʉrepanʉbara mejãchade kãgapanʉ Daizeze Bedʼeara, akʉza mejãcha kʼawuabʉ sãwũã ãba daʉcha jʉre erbaita akʉza Daizeze ʉ̃rʉ kʼawuabita. Semanaza ãba yi jʉrepanʉ kʼawuaita mebẽrã naʉ̃ drʉa jõmaʉ̃nẽbemaba nesidabʉta. Naara obada kĩrãkʼa, Daizeze Bedʼeade eda jarabʉta jaradiabʉ, ãya diabʉebʉdeba kartata akʉza kongregasionra akʉbari zõrãrã, akʉza wuabema mebẽrãneba. Maʉ̃neba krĩcha abapaipanʉ akʉza abʼarika opanʉ (Hechos 16:4, 5). Zõrãrã Burubia ãba yi jʉrepanʉbara Daizeze ʉ̃rʉ kʼawuabarita diapanʉ, Daizeze Nokʼo ʉ̃rʉ jaradiaita kʼarebapanʉ, akʉza akʉpanʉ kongregasionne akʉmarẽã bʉdapeadata.

Daizeze jaure zarea yi edebipanʉ. Zõrãrã Burubia ãba yi jʉrepanʉbara jʉrʉpanʉ Jeowa kʼarebata iyabʉrʉ nejõma zokʼaseabʉbaera, akʉza kongregasion buruta jʉrʉpanʉ Jesuta (1 Corintios 11:3; Efesios 5:23). Maʉ̃rãra Daizeze pʉwʉrʉ Nokʼobaita krĩchaẽ, abʼarika kristianora ʉ̃ta wãi kĩrãkʼa «naʉ̃rabara pewa wãna korderota [Jesu] iyi wãmae» (Revelación 14:4). Zõrãrã Burubia ãba yi jʉrepanʉbara mejãchade biga diabʉ ãyibari yiwidʼibʉ kʼãrẽa.

• ¿Kʼairabasi nabema 100 paogade ãba yi jʉrepananara?

• ¿Sãwũã Zõrãrã Burubia ãba yi jʉrepanʉbara Daizeze kʼarebata jʉrʉpanʉ?

Betel ebreo bedʼeadera jarabʉ «Daizeze de» (Génesis 28:17, 19). Jeowa ʉ̃rʉ Kʼawuabipanʉrãbara jõmaʉ̃ drʉade erpanʉ Betelta mamaʉ̃ba kʼareba zokʼapanʉ akʉza kʼarebabʉ Daizeze Bedʼea jaradiaita. Zõrãrã Burubia ãba yi jʉrebʉra bʉ Nuewa Yorde (Estado Unido) mamaʉ̃ba akʉbʉ jõmaʉ̃ drʉadebema Betelde kʼãrẽ opanʉta. Mebẽrã mama ãba trajabʉra ũdu kʼawuapanʉ Betel mebẽrãta. Mebẽrãra kĩrãkʼapanʉ, nekopanʉ, ãbapanʉ, trajapanʉ, akʉza Daizeze Bedʼea ãba kʼawuapanʉ (Salmo 133:1).

Mama jõma trajabʉbara ãyi zarea jõma diapanʉ. Jõma Betelbʉmaera trajabʉ yumakẽrãta akʉza yuwẽrãta, maʉ̃rãra ewari erbʉ Daizezeba kãgabʉ oita, akʉza Daizeze Nokʼo ʉ̃rʉ jaradiabibʉ (Mateo 6:33). Mia abaʉta pagapanʉẽ, awuarabʉrʉ jõma diapanʉ kʼãĩbarita, akʉza yikota, akʉza wiña diapanʉ platata ãyi nesida edamarẽã. Aba abakaʉba erbʉ ãyi sãma trajaira, ʉ̃kʉrʉ trajabʉ opisinamae, neobarimae, nekobari ara obarimae, akʉza ʉ̃kʉrʉ trajabʉ karta ʉ̃tʉzebibarimae, akʉza karta ãba bʉebarimae, ʉ̃kʉrʉ de imabarimae, akʉza wua tõbabarimae, akʉza ʉ̃kʉrʉ de ara obarimae.

Mamara mejãcha trajapanʉ Daizeze Nokʼo ʉ̃rʉ kʼareba jaradiaita. Betel aba abakaʉba kʼarebabʉ Daizeze Bedʼea ʉ̃rʉ wãrĩnuta kʼawuadamarẽã ẽbẽra jõmaʉ̃ba. Naʉ̃ kartaba mawũã ũdubibʉ. Akʉza Zõrãrã Burubia ãba yi jʉrebʉba akʉsida kartara, mõbebʉrʉ diabʉesida korreode jõmaʉ̃ mebẽrã tradusipanʉʼa, akʉza makina zroma karta ʉ̃tʉzebibaride osida, mamaʉ̃ba diabʉesida kongregasion siento die mil (110.000). Audre bʉa ãyi trajapanʉza, mebẽrã Betelbara audre kʼarebabʉ Daizeze Bedʼea bia jaradiaita meserabai (Marcos 13:10).

• ¿Kʼairata Betelde trajapanʉ akʉza kʼãrẽta diapanʉ?

• ¿Betelde trajapanʉrãbara kʼãrẽne audre kʼarebapanʉ?

Mebẽrã Beteldebemara trajapanʉ kĩrã awuara awuaraka Daizeze Bedʼea kʼareba jaradiaita naʉ̃ drʉa jõmaʉ̃nẽ, tradusipanʉne, karta ʉ̃tʉzebipanʉne, karta ãba bʉepanʉne, karta wagapanʉne, akʉza bideo grawapanʉne akʉza bedʼeawa grawapanʉne.

Mebẽrã Betel akʉbari ãbabʉba akʉbʉ kʼãrẽ opanʉta. Zõrãrã Burubia ãba yi jʉrebʉbara idu zokʼabibʉ zõrãrã ũbea, mawũãẽbʉrʉ audrebʉa Betel akʉmarẽã. Maʉ̃rabara jarapanʉ sãwũã wãta ãyi drʉade akʉza bedʼea zroma zebʉta, mawũã kʼawuapanʉ tẽã jʉneãne karta ʉ̃tʉzebidaira kʼãrẽ ʉ̃rʉ bedʼeabidaita, ãba yi jʉrepanʉmae akʉza asambleamae. Audreẽãne Zõrãrã Burubiabara zokʼabʉebʉ ãyidebemata aba Betelda, maʉ̃bara kʼarebabʉ ũrãgʼa bia diaita, mebẽrã betel akʉbari ãbabʉta ãya obʉra bia omarẽã (Proverbios 11:14). Maʉ̃ba akʉ jũẽbʉrʉdera ãba yi jʉrepanʉ iya bedʼea biata jaradiaibaera, Betelde trajapanʉrã zarea diaita.

Kongregasionta kʼarebabʉ. Kõgregasionbaira Betelbʉrʉ kʼawua jarabʉ, akʉza mamaʉ̃ba zokʼapanʉ yi naa edebarirata, akʉza misionerorata akʉza kongregasionra akʉbari zõrãrãta. Adewara ãyara asamblea oita ara opanʉ, adewara Daizeze Nokʼo ʉ̃rʉ bedʼeabaride oita, akʉza kongregasionma diabʉepanʉ kartata. Mama Betelde jõma opanʉrã opanʉ Daizeze Bedʼea daʉcha jaradia wãita (1 Corintios 14:33, 40).

• ¿Sãwũã kʼarebabʉ mebẽrã Betel akʉbari ãbabʉba Zõrãrã Burubia ãba yi jʉrebʉrãra?

• ¿Kʼãrẽta opanʉ Beteldera?

«Bedʼea bia», «ebẽrãra jõma panʉrãita bedʼea awuara bʉraita, akʉza ẽbẽra awuarabʉraita akʉza pʉwʉrʉraita», opanʉ karta bedʼea 750 bedʼea awuara awuaraka maʉ̃raita (Revelación 14:6). ¿Sãwũã opanʉ maʉ̃ trabajo zareara? kʼarebapanʉ naʉ̃ drʉa jõmaʉ̃nẽbema karta bʉbariraba, akʉza tradutorera Daizeze odebʉraba, maʉ̃rãra ãyi jõma Jeowa ʉ̃rʉ Kʼawuabipanʉrã.

Iyarãra Inglede bʉchu. Zõrãrã Burubia ãba yi jʉrepanʉbara akʉbʉ karta bʉbarideda opanʉta, Betel Estado Unidode. Mamaʉ̃ba diabʉepanʉ trabajota karta bʉbarirama maʉ̃ Betelde trajapanʉʼa, akʉza diabʉepanʉ wuabema Betelma. karta bʉbarira bio erbʉba kʼarebabʉ jʉrʉita kultura biobʉdebamata, dayirã karta jõmaʉ̃ drʉadebemaba kãga akʉdamarẽã.

Kartara diabʉepanʉ tradusipanʉrãza. Naʉ̃ karta ʉ̃tʉzebida tẽãra akʉza bia akʉda tẽãra, zokʼabʉepanʉ korreode naʉ̃ drʉade tradutorera bʉrama. Aramaʉ̃ta ãyara tradusipanʉ kartara, maʉ̃ kʼãrẽa tradutorerabara biʼia akʉpanʉ «bed’ea wãrĩnuara aripe bʉita» abʼarika Inglede jarabʉ kĩrãkʼa aripe jaraita (Eclesiastés 12:10).

Komputadorbara kʼarebabʉ mesera oita. Komputadorbara Karta Bʉbarirane kĩrãkʼa akʉza tradutorerane kĩrãkʼa oẽmina. Meserabai kʼarebaseabʉ disionariode edabʉ jʉrʉita, bedʼea awuara bedʼeabe jʉrʉita, akʉza nekʼãrẽ ʉ̃rʉ kʼawuakĩrãbʉ jʉrʉita. Maʉ̃ kʼãrẽa Jeowa ʉ̃rʉ Kʼawuabipanʉrãbara osida Sistema Electrónico de Edición Plurilingüe (inglede jarabʉ MEPS) maʉ̃ komputadorde karta bio edabʉeseabʉ bedʼea awuara awuaraka, akʉza ãba daʉcha opanʉ dibujoʉ̃me abʼarika, mõbe makina zromane ʉ̃tʉzebipanʉ.

¿Kʼãrẽa mejãcha trajapanʉ, ẽbẽrarã wiñabʉmina awuara bedʼea bʉta? Jeowa krĩchara bʉbaera «jõmaʉ̃ba kʼawuadamarẽã wãrĩnuta, akʉza ẽbẽra jõmaʉ̃ta ẽdrʉmarẽã» (1 Timoteo 2:3, 4).

• ¿Kãrẽta opanʉ karta bʉbarirabara Dayirã karta oira?

• ¿Kʼãrẽa tradusipanʉ bedʼea awuara awuaraka?

Poagaza Jeowa ʉ̃rʉ Kʼawuabipanʉrãbara ʉ̃tʉzebipanʉ akʉza bari dedekapanʉ mejãchade Daizeze Bedʼeata akʉza kartarata, adewara Daizeze Nokʼo ʉ̃rʉ bedʼeabarideta opanʉ akʉza Betelta, akʉza ara oerpanʉ, akʉza kʼarebapanʉ Beteldebʉrata, akʉza misionerorata, akʉza diabʉepanʉ zʉbʉriaberabaridamae kʼarebadamarẽã. Mamina ¿sãma ũdupanʉ plata maʉ̃ jõma pagaira?

Diesmo wididaẽ, akʉza pagai nesidaneẽ, akʉza plata wididaẽ. Daizeze bedʼea jaradia wãira plata mejãcha nesidapanʉmina, plata wididaẽ ẽbẽrarã. Poaga 100 audreba, Atalayaba jaradata dayirãra wãrĩnu Jeowaba kʼarebabʉta. Akʉza jarasi ẽbẽrarã kʼareba wididaẽbaita. Maʉ̃ra mawũã ozebʉda (Mateo 10:8).

Pagapanʉ ẽbẽrarãba soiduba diabʉdeba. Ẽbẽra mejãchaʉba kãga Dayirãba Daizeze Bedʼeadeba jaradiabʉra, maʉ̃ kʼãrẽa ẽbẽrarãbara ãyi soiduba diabʉ platara. Adewara Jeowa ʉ̃rʉ Kʼawuabipanʉrãsida ewari erpanʉ Daizeze Bedʼea jaradia wãita akʉza soiduba diapanʉ ãyabida platata, Daizezeba kãgabʉ jaradiaita naʉ̃ drʉa jõmaʉ̃nẽ (1 Crónicas 29:9). Daizeze Nokʼo ʉ̃rʉ bedʼeabarideda, akʉza asamblea obadamae bʉ plata edabʉebarita, yi edabʉe kĩrãba edabʉemarẽã. Mawũaẽbʉrʉ eda wãseabʉ internetʼne jw.org. Yi audre plata soiduba diapanʉrã, diapanʉ plata mejãcha erbʉẽãba, maʉ̃ra ẽbẽrarã, ẽbẽra wẽra pedraba plata soiduba diada kĩrãkʼabʉ, maʉ̃ kʼãrẽa Jesubara ibia jarasi iya plata diada kʼãrẽa plata edabʉebaride (Lucas 21:1-4). «Aba abakaʉba mãyi sodeba krĩchabʉta oidua» (1 Corintios 16:2; 2 Corintios 9:7).

Dayirãbara wãrĩnu ĩjãpanʉ Jeowabara kʼarebaita ẽbẽraba ãyi soiduba diamarẽã ãya diakĩrãbʉta, Daizeze Nokʼo ʉ̃rʉ jaradiapanʉ kʼarebaita, mawũã Jeowaba krĩchabʉta aripe oita (Proverbios 3:9).

• ¿Kʼãrẽa dayirãra ãba daʉcha yi jʉrepanʉ wuabema religionraira?

• ¿Sãwũã opanʉ ẽbẽrarãba soiduba plata diadara?

Dai ãba Daizeze Bedʼea ũrĩbarira trʉ̃gapanʉ Daizeze Nokʼo ʉ̃rʉ bedʼeabarideta. Mawũã trʉ̃gapanʉ mama jaradiapanʉbaera Daizeze Bedʼeadeba Daizeze Nokʼo ʉ̃rʉ, akʉza Jesuba obada ʉ̃rʉ (Lucas 8:1).

Mamara ẽbẽrarã ãba yi jʉrebari Daizezeba jarabʉ ũrĩta. Mamaʉ̃ba akʉpanʉ Daizeze Bedʼea bia jaradia wãita (Mateo 24:14). Daizeze Nokʼo ʉ̃rʉ bedʼeabaridera yi zromata akʉza wiñakĩrʉta opanʉ, mamina maʉ̃ra jõmaʉ̃ra de kĩrãkʼabʉ. Maʉ̃ Daizeze Nokʼo ʉ̃rʉ bedʼeabaridedara ãba yi jʉrepanʉ kongregasion bio. Poagaza Daizeze Nokʼo ʉ̃rʉ bedʼeabaridera mejãcha opanʉ (nrʉemaza juesoma opanʉ) kongregasion daʉcha wari wãita. ¿Sãwũã opanʉ maʉ̃ra? (Mateo 19:26).

Maʉ̃ra opanʉ jõma ãba zebibʉrʉde ẽbẽrarãba soiduba diadaba. Naʉ̃ platara diabʉepanʉ Betelma, mamaʉ̃ba kongregasionma diabʉepanʉ Daizeze Nokʼo ʉ̃rʉ bedʼeabaride oita, mawũãẽbʉrʉ maʉ̃ de ara oita.

Maʉ̃ de oira pagapanʉẽ awuarabʉrʉ ãyi soiduba kʼareba opanʉ. Drʉa jõmaʉ̃nẽ jʉrʉ erpanʉ Daizeze ʉ̃rʉ bedʼeabaride obarirata. Maʉ̃ra de obarirãra ya wãpanʉ kongregasion bʉza ãyi bʉ drʉade, jõma ãyira soiduba trajapanʉ, akʉza wãpanʉ omitia bʉde kʼarebaita kongregasion Daizeze Nokʼo ʉ̃rʉ bedʼeabaride odiadaita. Ʉ̃kʉrʉ drʉadera jʉrʉpanʉ Jeowa ʉ̃rʉ Kʼawuabipanʉrã audre kʼawuabʉta Daizeze Nokʼo ʉ̃rʉ bedʼeabaride opanʉta maʉ̃ kʼareba oita, akʉza maʉ̃ de ara oita. Mama trajapanʉrãnebemara ʉ̃kʉrʉba audre kʼawuabʉ, ãyira jõma soiduba trajapanʉ, mamina audre bʉ kongregasionnebemarata Daizeze Nokʼo ʉ̃rʉ bedʼeabaride opanʉta. Jeowa jaure zareadeba akʉza iyi pʉwʉrʉ mejãcha zarea trajapanʉneba mawũã ũdupanʉ (Salmo 127:1; Colosenses 3:23).

• ¿Kʼãrẽa trʉ̃gapanʉ dai ãba yi jʉrebarira Daizeze Nokʼo ʉ̃rʉ bedʼeabarideta?

• ¿Sãwũã opanʉ Daizeze Nokʼo ʉ̃rʉ bedʼeabaridera naʉ̃ drʉadera?

Jõma Daizeze Nokʼo ʉ̃rʉ bedʼeabaridera erpanʉ, Daizeze trʉ̃ neneẽãbʉta Jeowa ʉ̃rʉ Kʼawuabipanʉrãbara. Maʉ̃ kʼãrẽa jaiguabiẽã erpanaibara, maʉ̃ra audre yibiabaera Daizezeba jarabʉ ũrĩta, maʉ̃ kʼãrẽa jõmaʉ̃ba kʼarebaseabʉ.

Ãba yi jʉrenʉmana tẽã imaibara Daizeze NoKʼo ʉ̃rʉ bedʼeabaridera. Ãba yi jʉreda tẽã, kongregasionnebema yumakẽrãba akʉza yuwẽrãba imapanʉ Daizeze Nokʼo ʉ̃rʉ bedʼeabarideta. Semanane ewariaba jidapanʉ audre bia zʉgʉita. Zõrãrãba mawũãẽbʉrʉ Zõrãrã kʼarebabariba kʼarebabʉ maʉ̃ trabajo oira, maʉ̃ kʼãrẽa kartadebʉ erpanʉ kʼãrẽta oita. De imaita, kʉda (piso) zʉgʉita, de jareita, jebedabari ara oita, chuwabari de zʉgʉita, bentana jareita akʉza espejo jareita, adewara seanʉmʉ añabʉeita, akʉza ewarade mitianʉmʉ imaita akʉza ara oita. Poagaza programa opanʉ jõmaʉ̃ba ara biʼia zʉgʉtakĩrʉdaita. Warrara de ima jaraira mejãchade biga, maʉ̃ba ãyara wawia ũdubiyi dayirã ãba yi jʉrebaridera (Eclesiastés 5:1).

Kʼarebapanʉ ara oita. Poagaza Daizeze Nokʼo ʉ̃rʉ bedʼeabaridera biʼia akʉpanʉ eda akʉza aĩ, kʼãrẽ ara oi nesidabʉ kʼawuaita, biʼia erbaita, mawũã tẽã jʉneãne kʼãrẽ edanʉmaẽbaita (2 Crónicas 24:13; 34:10). Daizeze Nokʼo ʉ̃rʉ bedʼeabarideta neneẽã erbʉbʉrʉ akʉza biʼia erbʉbʉrʉ, maʉ̃ra biga Daizezeba jarabʉ ũrĩta. Dayirãba kʼarebabʉbʉrʉ ara oita, ũdubidayi kʼãrẽãba yibiata dayirãita akʉza mejãcha kãgata Jeowara (Salmo 122:1). Adewara wuabema ẽbẽrarãba biʼia ũdudayi (2 Corintios 6:3).

• ¿Kʼãrẽa bari akʉbabeẽ dayirã ãba yi jʉrebaridera?

• ¿Kʼãrẽ trabajota opanʉ Daizeze Nokʼo ʉ̃rʉ bedʼeabaride neneẽã erbaira?

¿Kʼawuakirãbʉka Daizeze Bedʼea ʉ̃rʉ? ¿Audre kʼawuakĩrãbʉka Daizeze Bedʼeade eda kʼãrẽ jarabʉta, akʉza ẽbẽrarã ʉ̃rʉ, akʉza sãwũã berabaridata? ¿Bʉara krĩchabarika Daizeze Bedʼeabara kʼarebaseabʉta bedʼea zroma erbʉ ara oira? Bʉa mawũã krĩchabʉbʉrʉ, akʉde jũẽseabʉ libro kĩrãtana wagabarideta, Daizeze Nokʼo ʉ̃rʉ bedʼeabaridemae.

Libro kĩrãtana wagabaridedara jʉrʉseabʉ audre kʼawuaita. Bʉara jõma erbʉẽbaibara Jeowa ʉ̃rʉ Kʼawuabipanʉrãba kartara ʉ̃tʉzebibʉra bʉ bedʼeade. Mamina Daizeze Nokʼo ʉ̃rʉ bedʼeabaridedara bʉ libro kĩrãtana wagabarita mamara jõmabʉ kartara akʉza yiwidita zebʉ. Akʉza ũduseabʉ Daizeze Bedʼea awuru bedʼeade tradusibʉta, akʉza disionariota. Mamara jʉrʉseabʉ ãba yi jʉreina akʉza ãba yi jʉreda tẽã. Adewara computadortabʉbʉrʉ maʉ̃bara erbʉbaibara Watchtower library, maʉ̃nera daiba karta mejãcha erbʉta edabʉ, akʉza kʼarebaseabʉ daya audre mesera jʉrʉita, bedʼeata, akʉza bersikulota.

Kristianoraba Obʉ Kĩrãkʼa akʉza Daizezeita Trajapanʉ. Jʉrʉseabʉ libro kĩrãtana wagabarideda karta bʉa omarẽã jaradapeadata oita. Yi nejaradiabaride akʉbʉra yi audre kʼawuabʉba akʉbʉ, maʉ̃bara jõma daʉcha ara oerbʉ, akʉza kartara yiwidi zebʉta edabʉebʉ. Mawũãẽbʉrʉ bʉa Daizeze Bedʼea jaradiabʉba jaradiayi sãwũã ũduita bedʼea bʉa jʉrʉbʉra. Kĩrãbera Daizeze Nokʼo ʉ̃rʉ bedʼeabaridemaebara edebeẽãta librora, adewara jʉra kʼawua akʉibara arĩẽbaita akʉza eruẽbaibara.

Daizeze Bedʼeabara jarabʉ dayirãba jʉrʉbʉbʉrʉ «oro wagabʉ kĩrãk’a», «mawũã ũduk’awuayi Daizeze ʉ̃rʉ» (Proverbios 2:1-5). Daizeze Nokʼo ʉ̃rʉ bedʼeabarideda libro kĩrãtana wagabari bʉra maʉ̃ kʼawuaita yibia.

• ¿Kʼãrẽ kʼarebata ũdudai libro kĩrãtana wagabarideda Daizeze Nokʼo ʉ̃rʉ bedʼeabarideda bʉbara?

• ¿Kʼaiba kʼarebaseabʉ audre jʉrʉ kʼawuaita libro kĩrãtana wagabaridedara?

Jesukristobara jarasi iyi kʼaidubemara «aramaʉ̃ kĩrãkʼa ʉ̃nata marãneta ʉ̃nabiudua zhãrã kĩrãbita, aramaʉ̃ne marãba biata obʼeta ũdudʼamarẽã, maʉ̃neba ibia jaradʼamarẽã marã Zeze ʉ̃tre bʼʉta» (Mateo 5:16, DB). Maʉ̃ kʼãrẽa erpanʉ computadorta, interneta. Internetʼne jw.org ũdubibʉ Jeowa ʉ̃rʉ Kʼawuabipanʉrãba ĩjãbʉta, akʉza kʼãrẽ obʉta. Mamina ãyara ¿kʼãrẽta diapanʉ?

Audreẽãne widibʉta Daizeze Bedʼeadeba panʉbʉta. Ũduyi ẽbẽrarãba audreẽãne bedʼea widibʉ panʉita. Karta zakera ¿Ewari abaʉde neẽbaika zʉbʉriara? akʉza ¿Beudarãra jẽda piradrʉika? maʉ̃ra ʉ̃tʉzebiaseabʉ 600 bedʼea awuara awuaraka. Akʉza ũduyi Traducción del Nuevo Mundo bedʼea 130 audrebʉta, adewara ũduyi sãwũã Daizeze Bedʼea audre biʼia kʼawuaita libro ¿Qué enseña realmente la Biblia?. Akʉza ũduyi kartara Atalayata akʉza Despertata, naʉ̃ra kartarata akʉseabʉ, akʉza ũrĩseabʉ internetʼne. Adewara ʉ̃tʉzebiseabʉ MP3, PDF akʉza EPUB. Bʉa kãgabʉrʉ ʉ̃tʉzebiseabʉ bʉ bedʼeade, ũdubita Daizeze Nokʼo ʉ̃rʉ kʼawuakĩrãbʉa. Adewara bʉ karta akʉza bideo mejãcha bedʼea zeẽbʉ bedʼeadebʉta, akʉza drama Daizeze Bedʼeadeba odata ʉ̃tʉzebiseabʉ, akʉza bʉ trãbi biʼia zakiruta bʉ kʼãrẽ oẽãne ũrĩmarẽã.

Jeowa ʉ̃rʉ Kʼawuabipanʉrã ʉ̃rʉ wãrĩnu jarabʉta. Naʉ̃ internetʼnera bedʼea yiwidi jaradapeadata bʉ akʉza bideode ũdubibʉ dayirãba naʉ̃ drʉade opanʉta, Jeowa ʉ̃rʉ Kʼawuabipanʉrãba kʼãrẽ obʉta, akʉza zʉbʉriaberabaribʉrʉde kʼarebapanʉta. Adewara jarabʉ asamblea arakaitaba ʉ̃rʉ, akʉza sãwũã bedʼeaita Betelme.

Maʉ̃ internetʼneba wãrĩnurãra jũẽbipanʉ naʉ̃ drʉa jõmaʉ̃nẽ ẽbẽrarãba kʼawuadamarẽã, akʉza jũẽbʉ pʉwʉrʉ Antartidaidu. Yiwidʼipanʉ «Daizeze bedʼeara wuaabʉrʉ» jara wãnamarẽã naʉ̃ drʉa jõmaʉ̃nẽ Daizeze ʉ̃rʉ ibia bedʼeadamarẽã (Hechos 6:7, DB).

• ¿Sãwũã kʼarebabʉ jw.org ẽbẽraba Daizeze Bedʼeade wãrĩnu jarabʉ kʼawuamarẽã?

• ¿Kʼãrẽ ʉ̃rʉ jʉrʉ kĩrãi dai internetʼnera?