KARTARARABɄ INTERNET'NE Watchtower
Watchtower
KARTARARABɄ INTERNET'NE
embera katio
  • DAIZEZE BED'EA
  • KARTARA
  • ÃBA YI JɄREBARI
  • ¿Bʉara kʼãrẽta ũdui dai kristianora ãba yi jʉrebarimaera?
    ¿Idi ewadera kʼairaba opanʉ Jeowaba jarabʉra?
    • YI 5

      ¿Bʉara kʼãrẽta ũdui dai kristianora ãba yi jʉrebarimaera?

      Jeowa ʉ̃rʉ Kʼawuabipanʉrã Daizeze Nokʼo ʉ̃rʉ bedʼeabari deda Argentinane

      Argentina

      Ãba yi jʉrepanʉ Jeowa ʉ̃rʉ Kʼawuabipanʉrã Sierra Leonane

      Sierra Leona

      Ãba yi jʉrepanʉ Jeowa ʉ̃rʉ Kʼawuabipanʉrã Belgikade

      Belgika

      Ãba yi jʉrepanʉ Jeowa ʉ̃rʉ Kʼawuabipanʉrã Malasiade

      Malasia

      Ẽbẽrarã mejãchaʉta wãnaẽ ãyi religionmara, ãya widibʉta panʉnaẽbaera, akʉza zʉbʉriabʉrʉde kʼarebadaẽbaera. Mawũẽra ¿bʉra kʼãrẽa wãibara Jeowa ʉ̃rʉ Kʼawuabipanʉrã ãba yi jʉrebʉmaera? ¿ãyara kʼãrẽta diaiba?

      Ãbabaita ẽbẽrarã sobiapanʉrãbawara, akʉza awuru bia oita krĩchabʉbawara. Nabema Poaga siennera (100), kristianorãra ãba daʉcha yi jʉrebasi kongregasionne akʉza ãba zepanasi Daizezeba jarabʉ oita, Daizeze Bedʼea akʉita akʉza ãyirai yi kʼarebaita (Hebreos 10:24, 25). Ãba yi jʉrepanasi kãgade yi mebẽrãbawara, yi neũdukʼawuara kĩrãkʼa panasi (2 Tesalonicenses 1:3; 3 Juan 14). Idi dayirãbida abʼarika opanʉ akʉza maʉ̃ra kĩrãkʼa sobiapanʉ.

      Kʼawuayi kʼãrẽa yibiata wãrĩnu Daizeze bed’earadebemaba jarabʉ oita. Mebẽrã naarabemaba obada kĩrãkʼa, opanʉ yumakẽrãba, yuwẽrãba akʉza wũãwũãraba, ãba yi jʉrepanʉ ũrĩta yi audre kʼawuabʉba jaradiabʉta, sãwũã kʼarebabʉta wãrĩnu Daizeze bedʼearadebemaba jarabʉta obʉbʉrʉ (Deuteronomio 31:12; Nehemías 8:8). Ẽbẽra jõmaʉ̃ta bedʼeasea-bʉ, widibʉdade panʉita, akʉza trãseabʉ ãyi trãbideba, mawũã kristianorabara ãyi sode erbʉta ʉ̃tʉzebibʉ (Hebreos 10:23).

      Daizeze audre ĩjãita. Pablobara iyi ewaribasidera bʉ diabʉesi kongregasion abaʉʼa naʉ̃ta «mʉã marã ũdu krĩña bʼʉa, aramaʉ̃nerã zhiya zareabi nʉmeãña Jesúsdʼebema ĩjã bʼedʼeba marãbidʼa mʉãbidʼa» (Romanos 1:11, 12, DB). Mebẽrãbawara ãbabʉbara ãyi ãba yi jʉrebarimaera, kʼarebabʉ dayirãba ĩjãbʉra audre wari wãita, adewara baita kristianora kĩrãkʼa.

      ¿Kʼãrẽa wãẽ bʉra ãyi ãba yi jʉrebʉmae bʉa audre bia ũdu kʼaiwuaita? bʉ mama jũẽbʉrʉde daiba bia akʉdaya. Dai ãba yi jʉrebʉmaera bari eda wãbʉ akʉza mia kʼãrẽsida wididaẽ.

      • ¿Kʼaide kĩrãkʼa opanʉ dai ãba yi jʉrebarimaera?

      • ¿Sãwũã kʼarebabʉ kristianora ãba yi jʉrebaribara?

      AUDRE KʼAWUAITA

      Bʉa kʼawua kĩrãbʉbʉrʉ Daizeze Nokʼo ʉ̃rʉ bedʼeabari deda sãwũãbʉta, jarada Jeowa ʉ̃rʉ Kʼawuabipanʉrã edemarẽã ũdu kʼawuabide.

  • ¿Sãwũã kʼarebabʉ dayirã mebẽrãbawara ãba yi jʉrebʉbara?
    ¿Idi ewadera kʼairaba opanʉ Jeowaba jarabʉra?
    • YI 6

      ¿Sãwũã kʼarebabʉ dayirã mebẽrãbawara ãba yi jʉrebʉbara?

      Jeowa ʉ̃rʉ Kʼawuabipanʉrã bedʼeapanʉ awurura Daizeze odebʉbawara

      Madagaskar

      Jeowa ʉ̃rʉ Kʼawuabipanʉrã abaʉba kʼarebabʉ yi neũdukʼawua kristianota

      Noruega

      Kristiano zõrãrã abaʉba akʉbʉ mebẽa aba

      Libano

      Jeowa ʉ̃rʉ Kʼawuabipanʉrã ãbapanu

      Italia

      Dayirã oi zromane wãimina, akʉza ewari kayiruabʉde wãimina, Jeowa ʉ̃rʉ Kʼawuabipanʉrã ãba yi jʉrebarima wãira wãmaẽ. ¿Kʼãrẽa bedʼea zroma erbuidu akʉza mapaesidu wãpanʉ mebẽrãbawara ãba yi jʉreita?

      Yibia dayirãita. Pablobara jarasi kʼãrẽa yibiata ãba yi jʉrebarima wãira «krĩchaidua mayirai k’arebaita, akʉza kãgaita» (Hebreos 10:24). Naʉ̃ bedʼeabara jarabʉ dayirãi audre biʼia ũdu kʼawuabaita. Mawũã jarasi pablobara, akʉza krĩchaita wuabemarata. Dayirãba ũdu kʼawuabʉrʉde mebẽrã awuru kongregasionnebemata, kʼawuapanʉ ãyisida abʼarika dayirã kĩrãkʼa bedʼea zroma erbasita, akʉza maʉ̃ba kʼarebaseabʉ audre dayirã bia wãita.

      Erpanʉ neũdukʼawuara jõkata. Ãba yi jʉrebarimaera mawũãbari ũdubariawa nʉmʉẽ, awuarabʉrʉ bʉ neũdukʼawuarata. Adewara maʉ̃rabawara ewari abaʉde wãpanʉ jemene. ¿Sãwũã kʼarebabʉ dayirãra maʉ̃bara? kʼarebabʉ audre ãba yi kãgapanaita. Maʉ̃ba dayirã neũdukʼawua bedʼea zroma erbʉdera jʉrʉpanʉ ãyi kʼarebaita, audre dayi neũdukʼawuabaera (Proverbios 17:17). Jõma kongregasionnebemara bedʼeabʉba «zhi kʉãgʼa bʼeaudua» mawũã ũdubidua (Romanos 12:10, DB).

      Kãgapanʉ neũdukʼawuara jʉrʉmarẽã Daizezeba kãgabʉ obʉbawara. Jeowa ʉ̃rʉ Kʼawuabipanʉrãne eda ũduyi maʉ̃ra. Akʉza iduaribirãra ãba yi jʉrebaita daibawara.

      • ¿Kʼãrẽa yibia ãbabaira mebẽrãbawara kongregasionne?

      • ¿Sõbede ũdukʼawuakĩrãi dai kongregasionra?

  • ¿Kʼãrẽ ʉ̃rʉ bedʼeabʉ dai ãba yi jʉrebarimaera?
    ¿Idi ewadera kʼairaba opanʉ Jeowaba jarabʉra?
    • YI 7

      ¿Kʼãrẽ ʉ̃rʉ bedʼeabʉ dai ãba yi jʉrebarimaera?

      Jeowa ʉ̃rʉ Kʼawuabipanʉrã ãba yi jʉrepanʉ Nueba Zelandade

      Nuewa Zelanda

      Jeowa ʉ̃rʉ Kʼawuabipanʉrã ãba yi jʉrepanʉ Japonne

      Japon

      Jeowa ʉ̃rʉ Kʼawuabipanʉrã ãba yi jʉrepanʉ Ugandade

      Uganda

      Jeowa ʉ̃rʉ Kʼawuabipanʉrã ũmeba ũdubibʉ Daizeze Bedʼeata Lituaniane

      Lituania

      Kristiano nabema ewaribasidera ãba yi jʉrebarimae, naara trãpanasi, maʉ̃are yiwidʼipanasi, akʉza biʼia akʉpanasi Daizeze Bedʼeadebemata (1 Corintios 14:26). Bʉ dai ãba yi jʉrebarimae zebʉrʉdera bʉa ũduyi abʼarika obʉta.

      Daizeze Bedʼeadeba jaradiapanʉ dayirã biabaita. Semana jõbʉrʉza kongregasion jõma ãba yi jʉrepanʉ ũrĩta diskurso biblikota maʉ̃ra treinta minutobayeda jaradiapanʉ, mama ũdubipanʉ dayirãra sãwũã kʼarebabʉta Daizeze Bedʼeaba, akʉza naʉ̃ ewaride. Jarapanʉ yi mama ãba bʉara ãya Daizeze Bedʼea erbʉde akʉdamarẽã. Maʉ̃are kʼawuayi Estudio de la Atalayata, maʉ̃ra jaradiadayi orababayeda, mamara jarapanʉ kongregasionne panʉa akʉdamarẽã Atalayata. Naʉ̃ kartabara jaradiabʉ sãwũã Daizeze Bedʼeaba ũrãgʼabia diabʉ oibarata. Naʉ̃ drʉa jõma siento dies mil kongregasion audre bʉba kʼawuapanʉ iyabaʉ bedʼeata.

      Kʼarebabʉ daiba audre biʼia jaradiaita. Adewara ãba yi jʉrepanʉ diamasi semanane bedʼea ũbeabʉ kʼawuaita maʉ̃ trʉ̃ra Kristianoraba Obʉ Kĩrãkʼa akʉza Daizezeita Trajapanʉ, naʉ̃ra opanʉ libro Kristianoraba Obʉ Kĩrãkʼa akʉza Daizezeita Trajapanʉba jarabʉ kĩrãkʼa maʉ̃ra ʉ̃tʉzebʉ jedekoza. Yi naara ojʉ̃drʉira, Bedʼea Bia Daizeze Bedʼeade Ũduda, kʼarebabʉ ũrĩta Daizeze Bedʼea kongregasionba naara akʉdapeadata. Maʉ̃arebema trʉ̃ra Ora Bʉa Daizeze Bedʼea Jaradiabʉrʉde, maʉ̃nera edabʉ ũdubipanʉ mebẽrãba sãwũã jaradaiata Daizeze Bedʼeata awuruʼa. Akʉza ʉ̃rãgʼa bia diabariba kʼarebabʉ sãwũã akʉita akʉza sãwũã bedʼeaita (1 Timoteo 4:13). Yi jõira Baita Kristianora kĩrãkʼa, maʉ̃bara jaradiabʉ sãwũa Wãrĩnu Daizeze Bed’earadebema kʼarebaita dayi bebʉra. Maʉ̃nera edabʉ widita akʉza panʉita, kʼarebʉ audre Daizeze Bedʼea biʼia ũrĩta.

      Bʉ dai ãba yi jʉrebarimae jũẽbʉrʉdera, bʉa biʼia ũduyi sãwũã bia jaradiapanʉta Daizeze Bedʼeaba jaradiabʉta (Isaías 54:13).

      • ¿Kʼãrẽta ũdui Jeowa ʉ̃rʉ Kʼawuabipanʉrã ãba yi jʉrebarimae jũẽbʉrʉdera?

      • ¿Saʉ̃ semanane wãkĩrãi bʉra dai ãba yi jʉrebarimara?

      AUDRE KʼAWUITA

      Ãba yi jʉrebari ewari zeinaena akʉra kʼãre ʉ̃rʉ bedʼeaita. Akʉza Daizeze Bedʼeadebemata bʉa kʼawua wãra maʉ̃ra bʉita bigabayi.

  • ¿Kʼãrẽa biʼia wua jʉ̃kʼãrape wãpanʉ ãba yi jʉrebarimara?
    ¿Idi ewadera kʼairaba opanʉ Jeowaba jarabʉra?
    • YI 8

      ¿Kʼãrẽa biʼia wua jʉ̃kʼãrape wãpanʉ ãba yi jʉrebarimara?

      Yi zezeba biʼia wua ara jʉ̃bibʉ yi wuãwua ãba yi jʉrebarima wãita

      Islandia

      Yi papaba biʼia wua ara jʉ̃bibʉ  yi wuãwua ãba yi jʉrebarima wãita

      Mejiko

      Biʼia wua jʉ̃bibʉ Jeowa ʉ̃rʉ Kʼawuabipanʉrã Guinea-Bissaudebemata

      Guinea-Bissau

      Mebẽrã pilipinasnebemta wã ãba yi jʉrebarima

      Pilipinas

      ¿Bʉa akʉbʉka kartade potora dai Jeowa ʉ̃rʉ Kʼawuabipanʉrã sãwũã bia wua jʉ̃pe wãbʉra dai ãba yi jʉrebarima? ¿kʼãrẽa mejãchade wuaara biʼia jʉ̃panʉ?

      Daizezeta wawia panʉbaera. Wãrĩnu Daizezebara akʉẽ dayi ẽbẽraba jʉ̃bʉta (1 Samuel 16:7). Mamina dai ãba zebʉrʉdera zepanʉ iya kãgabʉ oita, dai krĩchara bʉ Daizeze wawia ũdubita, akʉza mebẽrãta wawia ũdubita. Dayirãra juez daidura biʼia wua jʉ̃ñi iyita wawiapanʉbaera. Abʼarikabʉ dayirã ãba yi jʉrebarima biʼia wua jʉ̃ wãibara mawũãra ũdubidayi wawiabʉta Jeowara «naʉ̃ drʉa juezbera» (Génesis 18:25).

      Ũdubita Daizeze bedʼearadebemaba jarabʉ obʉta. Daizeze Bedʼeabara jarabʉ kristianora wua jʉ̃ita «ariguide akʉza kʼẽrẽpa» (1 Timoteo 2:9, 10). «Ariguide» wua jʉ̃ita, maʉ̃bara jarakĩrãbʉ wua jʉ̃ẽbaita dayi kʼakʉa jõma ũdubibʉta, awururaba akʉdamarẽã. Adewara «kʼẽrẽpa» wua jʉ̃ibara jarakĩrãbʉ dayirã biʼia wua jʉ̃ita, mawũã kʼawuaẽ wua jʉ̃ẽbaita, akʉza mititia jʉ̃ẽbaita. Naʉ̃ Daizeze bedʼearadebemabara iduaribibʉ dayirãba jidamarẽã dayima bʉta. Dayirã biʼia wua jʉ̃bʉdeba kʼarebabʉ «Daizezeba jaradiabʉra biʼia ũdudamarẽã» bia bedʼeaira nesidae (Tito 2:10; 1 Pedro 2:12). Dayirãta ãba yi jʉrebari eda biʼia wua jʉ̃pe wãra, kʼarebabʉ awuru ẽbẽrarãta Jeowa pʉwʉrʉde eda zemarẽã.

      Bʉ kʼãrẽ wua jʉ̃i neẽãba idubʉrãra wãita Daizeze Nokʼo ʉ̃rʉ bedʼeabari dema. Dayirãbara wua mejãchabari edadata jʉ̃ wãita nesidaẽ, dayirã jaigʉaẽbʉ ũdubira akʉza biʼia wua jʉ̃bʉta ũdubira.

      • ¿Kʼãrẽa biga dayirã biʼia wua jʉ̃ira Daizezeba kãgabʉ oita?

      • ¿Kʼãrẽ Daizeze bedʼearadebemaba kʼarebabʉ dayirãba kãgabʉ jidakĩrãbʉra?

  • ¿Kʼãrẽta oibara dayi ãba yi jʉrebarima wãinaẽnara?
    ¿Idi ewadera kʼairaba opanʉ Jeowaba jarabʉra?
    • YI 9

      ¿Kʼãrẽta oibara dayi ãba yi jʉrebarima wãinaẽnara?

      Jeowa ʉ̃rʉ Kʼawuabipanʉrã abaʉba akʉbʉ kartata ãba yi jʉrebarima wãinaẽna

      Kamboya

      Jeowa ʉ̃rʉ Kʼawuabipanʉrã abaʉba akʉbʉ kartata ãba yi jʉrebarima wãinaẽna
      Jeowa ʉ̃rʉ Kʼawuabipanʉrã abaʉba akʉbʉ kartata ãba yi jʉrebarima wãinaẽna

      Ukrania

      Bʉta Daizeze Bedʼea kʼawuabʉbʉrʉ Jeowa ʉ̃rʉ Kʼawuabipanʉrãbawara, naena akʉbʉbaibara bʉa karta jaradiadaita. Bʉa audre kʼawuakĩrãbʉbʉrʉ abʼarika oibara ãba yi jʉrebarimae kʼawuapanʉsida. Bʉa semanane kʼawuapanʉta kʼẽrẽpa akʉbʉbʉrʉ, mawũãra audre kʼawuayi bʉara.

      Krĩchara sõbede akʉza sãma kʼawuaita. ¿Kʼãrẽ ewaride Daizeze Bedʼeawa kʼawuaseabʉ? ¿diapeda trajade wãinabeda, diamasi wũawũãra kʼãĩna tẽã? bʉta ewari neẽbʉrʉ, ewari jʉrʉda Daizeze Bedʼea kʼawuaita, akʉza iduaribirãra awuruba jarabʉ kʼãrẽa bʉa krĩchabʉ oita. Jʉrʉda sãma kʼawuaita Daizeze Bedʼeara, mõbe kĩara radiota, telebisorta akʉza teleponota. Daizeze Bedʼea kʼawuai nabeda yiwidʼida Daizezeʼa, maʉ̃ba kʼarebayi daya nekʼãrẽ mejãcha krĩchabʉ krĩchaẽbaita mawũã Daizeze Bedʼeade jarabʉawa kʼawuayi (Filipenses 4:6, 7).

      Eruda yi bedʼea audre jarabʉta akʉza juwa ʉ̃ta wuaita krĩchara. Krĩchara maʉ̃ kartade bedʼeabʉ ʉ̃rʉ. Akʉza akʉra maʉ̃ karta trʉ̃ta, maʉ̃ kartadebʉra jõma abʼarika bedʼeabʉ akʉza akʉra potota, akʉza akʉra jẽda krĩchabibʉ widibʉta mama yi edabʉ audre jarabʉ kʼawuaita. Maʉ̃are akʉra parrapota akʉza jʉrʉda mama widibʉ panʉita. Jʉrʉda Daizeze Bedʼeade testo eda kartade bʉchʉbʉẽãta, akʉza krĩchara sãwũã jarabʉta (Hechos 17:11). Bʉa ũdubʉrʉde widibʉ aripe panʉbʉta, eruda kĩrãduaẽbaita. Mawũã ãba yi jʉrebarimae jũẽbʉrʉdera juwa ʉ̃ta wãseabʉ bʉa kʼawuada jaraita.

      Akʉra semanaza ãba yi jʉrebarimae jaradiapanʉta, mawũã bʉa audre kʼawuayi «ne biata» Daizeze Bedʼeadebemata (Mateo 13:51, 52).

      • ¿Kãrẽta oibara Daizeze Bedʼea kʼawuaira ãba yi jʉrebarima wãinabeda?

      • ¿Kʼãrẽta oibara ãba yi jʉrebarimae juwa ʉ̃ta wuaira?

      AUDRE KʼAWUAITA

      Ʉ̃tre jarabʉ kĩrãkʼa ora, naara kʼawuara Atalayata, maʉ̃are Estudio kongregasionnebemata. Bʉa nejaradiabʉba kʼarebayi akʉza ãba yi jʉrebarimae zebʉrʉde bʉ juwa ʉ̃ta wuamarẽã.

  • Mebẽrãbawaraʉba k’awuaibara Jeowaba jarabʉ oita
    ¿Idi ewadera kʼairaba opanʉ Jeowaba jarabʉra?
    • YI 10

      Mebẽrãbawaraʉba k’awuaibara Jeowaba jarabʉ oita

      Mebẽra ãba sobiapanʉ Daizeze jarabʉ oita

      Korea del Sur

      Juwa jidapanʉrãba ãba akʉpanʉ Daizeze Bedʼeata

      Brasil

      Jeowa ʉ̃rʉ Kʼawaubipanʉrã abaʉba akʉbʉ Daizeze Bedʼeata

      Australia

      Mebẽra abaʉba kʼawuapanʉ Daizeze Bedʼeadebemata

      Guinea

      Daaraba, Jeowaba kãgabʉta mebẽrãra ãba yi jʉrepanamarẽãbʉta mawũã ãya ĩjãbʉta audre wari wãmarẽã, akʉza bia wãmarẽã ãyi deda (Deuteronomio 6:6, 7). Maʉ̃ kʼãrẽa Jeowa ʉ̃rʉ Kʼawuabipanʉrãbara jʉrʉpanʉ ewari semanane Daizezeba jarabʉ oita dayi mebẽrãbawara, akʉza aduaapanʉ, adewara bedʼeabʉ kʼãrẽta nesidabʉta yi mebẽrãba Daizeze kʼaitabaita. Akʉza yi dobabʉbara ewari mejãcha erbaseabʉ Daizeze Bedʼeadebʉ audre jʉrʉita.

      Jeowa kʼaitabaita. «Daizeze kʼaita baidua, mawũãra iyira marã kʼaitabaya» (Santiago 4:8). Dayirãba Jeowa audre ũdu kʼawuabʉrʉde kʼawuadayi sãwũãbʉta iyira, adewara iyi bedʼeade akʉbʉdeba audre ũdu kʼawua wãñi iya kʼãrẽta okĩrãta. Bʉ mebẽrabawara Daizeze Bedʼeade jarabʉ kʼawuaira akʉibara Daizeze Bedʼeata, akʉza akʉibara semanane Kristianoraba Obʉ Kĩrãkʼa akʉza Daizezeita Trajapanʉ kartata mama jarabʉta oibara. Ãyi aba abakaʉba akʉseabʉ Daizeze Bedʼeata, maʉ̃are jõmaʉ̃ba jaradayi ãya kʼawuadata Daizeze Bedʼeadebemata.

      Dayirã mebẽrãbawara ãbabaita. Juwa jidabʉrata, akʉza yibarirata yi wũãwũabawara Daizeze Bedʼeata ãba kʼawuapanʉbʉrʉ audre kʼawuayi. Maʉ̃ obʉrʉdera sobiapanʉ akʉza kʼẽrẽpa opanʉ, mebẽrã jõmaʉ̃ba jũãpanʉ maʉ̃ oira. Yibaribara jaradiakĩrãpanʉ Atalayadebemata akʉza Despertadebemata, mawũãẽbʉrʉ jw.orgdebemata, yi wũãwũara arabiabe kʼawua. Mawũãẽbʉrʉ bedʼeseabʉ yi wũãwũãrabawara nejaradiabarimae bedʼea zroma erbʉ ʉ̃rʉ, akʉza sãwũã ara oita maʉ̃ra. Kʼãrẽa akʉdaẽ JW Broadcasting (tv.jw.org) maʉ̃re bedʼeaidua kʼãrẽta kʼawuasidata, adewara trãseabʉ trãbi aba ãba yi jʉrebarimae zebʉrʉde bia trãita, maʉ̃ jõna tẽãra kʼãrẽ dosebʉ.

      Jeowaba jarabʉ oita ewari jʉrʉbʉ dayirãra, maʉ̃bara kʼarebabʉ dayirã mebẽrãba audre kãgadamarẽã Jeoawata. Akʉza iya kʼarebayi dayirãba obʉra (Salmo 1:1-3).

      • ¿Kʼãrẽa ewari jʉrʉpanʉ mebẽrãbawaraʉba Daizezeba jarabʉ oita?

      • ¿Kʼãrẽta oibara yibaribara sobiade oita Jeowaba jarabʉta?

      AUDRE KʼAWUAITA

      Widida awuru mebẽrã kongregasionnebema mebẽrãbawaraʉba kʼãrẽta oibarata Jeowaba jarabʉ oira. Akʉza jʉrʉda karta Daizeze Nokʼo ʉ̃rʉ bedʼeabari demaebʉta wũãwũãra jaradiaita Jeowa ʉ̃rʉ.

  • ¿Kʼãrẽa opanʉ asamblea zromara?
    ¿Idi ewadera kʼairaba opanʉ Jeowaba jarabʉra?
    • YI 11

      ¿Kʼãrẽa opanʉ asamblea zromara?

      Jeowa ʉ̃rʉ Kʼawuabipanʉrãra asamblea regionaldepanʉ Mejikode

      Mejiko

      Karta dedekabʉ asamblea regional Alemaniane

      Alemania

      Jeowa ʉ̃rʉ Kʼawuabipanʉrã Bosuana asamblea regionaldebʉ

      Bosuana

      Yumakẽrã aba buru kʼoebʉ Nikaraguade

      Nikaragua

      Italiade  ũdubipanʉ asamblea regionalde dramata

      Italia

      ¿Akʉbʉka naʉ̃ra kĩrã sãwũã sobiabʉra? naʉ̃rãra dai asamblea eda wãbarira, naara Daizeze odebʉraba obada kĩrãkʼa, jarasi poaga abaʉde asamblea ũbea odamarẽã, daira mejãcha sobiapanʉ ãba yi jʉrepanʉbaera asambleade (Deuteronomio 16:16). Poaga abaʉde asamblea ũbea opanʉ, maʉ̃ra Kongregasionra akʉbari zõrãrã asamblea, maʉ̃ra poaga abaʉde ũme opanʉ ewari aba abaka, ababemara asamblea regional, maʉ̃ra ewari ũbeabayeda opanʉ. ¿Maʉ̃bara sãwũã kʼarebabʉ dayirãra?

      Kʼarebabʉ audre bia baita dayirã mebẽrãbawara. Israelitarãra mejãcha sobiapanasi Jeowa ʉ̃rʉ ibia bedʼeai kʼãrẽa «jõmara daidu», daisida abʼarika sobiapanʉ asambleade ãbapanʉbaera mebẽrãbawara Daizezeba jarabʉ oita (Salmo 26:12; 111:1). Maʉ̃ asambleadera ũdu kʼawuabʉ Jeowa ʉ̃rʉ Kʼawuabipanʉrã awuru kongregasionnebemata, akʉza awuru drʉadebemata. Ũmatipababʉrʉdera ãba nekopanʉ asamblea obadamae, mamara jõmaʉ̃ta ãba sobiapanʉ (Hechos 2:42). Mamara ũdubipanʉ wãrĩnu «mebẽrãne zhi kʉãgʼa bʼeaudua. Zhiya zhi wawiaitrʉ bʼeaudua» naʉ̃ drʉa jõmaʉ̃nẽ (Romanos 12:10, BD).

      Kʼarebabʉ audre dayirãba Daizeze ĩjãita. Israelitarãra mejãchede kʼarebabasi «ũrĩsidabaera Daizeze Bedʼeaba jarabʉta» (Nehemías 8:8, 12). Asambleade jaradiapanʉbara daira mejãcha kʼarebabʉ. Mama jaradiapanʉrã Daizeze Bedʼeadebema. Ẽbẽra abaʉba jaradiabʉ Daizeze Bedʼea ʉ̃rʉ, akʉza dramane jaradiapanʉ Daizezeba kãgabʉ oita. Adewara ũrĩbipanʉ mebẽrãba ãyi zʉbʉria berabaridata mawũãsidu Daizeze odebʉ, akʉza ãyira maʉ̃ba bia wãta. Dayirãra maʉ̃ba kʼarebabʉ. Akʉza asamblea regionaldera ũdubipanʉ dramata naarabemaraba wua jʉ̃badata maʉ̃ra Daizeze Bedʼeade eda jarabʉta opanʉ, maʉ̃ba audre bia ũrĩbibʉ Daizeze Bedʼeara. Asamblea obʉrʉza buru kʼoepanʉ yi Daizezeba jarabʉde bakĩrãbʉta.

      • ¿Kʼãrẽa asambleadera mejãcha sobiapanʉ?

      • ¿Sãwũã kʼarebabʉ dai asambleade eda wãiba?

      AUDRE KʼAWUITA

      Ũdu kʼawua kĩrãbʉbʉrʉ dai sãwũãbʉta, kãgapanʉ wãmarẽã tẽã jʉneã daiba asamblea obʉdade. Bʉa Daizeze Bedʼea jaradiabʉba ũdubiseabʉ kʼãrẽ ʉ̃rʉ bedʼeadaita asambleade. Bʉ kalendariode eruda sõbede odaita akʉza sãma oita akʉza kʼãrẽ ũmadaʉde odaita, adewara ewari jʉrʉda mama wãita.

  • ¿Sãwũã daʉcha oerpanʉ Daizeze Bedʼea jaradia wãira?
    ¿Idi ewadera kʼairaba opanʉ Jeowaba jarabʉra?
    • YI 12

      ¿Sãwũã daʉcha oerpanʉ Daizeze Bedʼea jaradia wãira?

      Jeowa ʉ̃rʉ Kʼawuabipanʉrã Daizeze Bedʼea jaradiapanʉ deza deza

      España

      Jeowa ʉ̃rʉ Kʼawuabipanʉrã abaʉdebemaba jaradiabʉ Daizeze Bedʼeata parkede

      Bielorrusia

      Jeowa ʉ̃rʉ Kʼawuabipanʉrã abaʉba jaradiabʉ Daizeze Bedʼeata telepononeba

      Jon Kon

      Jeowa ʉ̃rʉ Kʼawuabipanʉrã ẽbẽrabʉmae Daizeze Bedʼea jaradiabʉ

      Peru

      Jarasi Jesubara iyi beinaẽna, naʉ̃ bedʼeata. «Kʼãwũã bedʼea biata Daizezeta Nokʼodʼebemata jaradʼaya ẽjũã jõmaʉ̃ maẽ, aramaʉ̃ne zhãrã jõmaʉ̃ba kʼawuadʼaya, mobebʉrʉ zeya ewari nʉmʉta jõĩrã» (Mateo 24:14, DB). ¿Sãwũã jõmaʉ̃ra drʉade jaradiadaibasi Daizeze Bedʼeara? Jesuba nama egorode zeside obada kĩrãkʼa obʉdeba (Lucas 8:1).

      Ẽbẽrarãta akʉ jũẽpanʉ ãyi deda. Jesubara jaradiasi yi kʼaidubemara bedʼea biata jaradiamarẽã deza deza (Mateo 10:11-13; Hechos 5:42; 20:20). Naarabemara kristianorabara kʼaʉchuasi saʉ̃daʉcha jaradiaita Daizeze Bedʼeara (Mateo 10:5, 6; 2 Corintios 10:13). Idibida daiba Daizeze Bedʼea jaradiapanʉrã daʉcha oerpanʉ, maʉ̃ba kongregasion aba abakaʉba kʼaʉchu saʉ̃daʉcha jaradiaita Daizeze bedʼeara. Mawũãra Jesuba jaradata aripe odayi «zhãrãã jaradʼamarẽã» jaradata (Hechos 10:42, DB).

      Jʉrʉ wãpanʉ ẽbẽrarãbʉmae. Jesubara jaradiasi Daizeze Bedʼeara ẽbẽrabʉmae, pʉzakida, bania juebadamae (Marcos 4:1; Juan 4:5-15). Idi daibida abʼarika jaradiapanʉ Daizeze Bedʼeara daiba jaradiaseabʉmae, ode, nenedobarimae, parkede, mawũãẽbʉrʉ telepononeba. Akʉza jaradiapanʉ dayirãba ĩjãbʉta dayirã de kʼaitabʉa, dayi neũdukʼawua trabajodebema, nejaradiabaridemae, mebẽrã jaradiaseabʉ. Nekʼãrẽ jõma obʉ ẽbẽra mejãchaʉba ũrĩnamarẽã «bedʼea bia iya ẽdrubita» (Salmo 96:2).

      Krĩchara kʼaia Daizeze Nokʼo ʉ̃rʉ bedʼeakĩrãbʉta, akʉza maʉ̃ba nekʼãrẽ bia weita ʉ̃rabʉrʉ. Bʉ dobaʉba kʼawuabarãra naʉ̃ bedʼea biara. Awuarabʉrʉ jaradiara yi naara ẽbẽra ũdubʉrʉa.

      • ¿Kʼãrẽ bedʼea biata jaradiade wãibara?

      • ¿Sãwũã Jeowa ʉ̃rʉ Kʼawuabipanʉrãbara Jesude kĩrãkʼa opanʉ Daizeze Bedʼea jaradia wãita?

      AUDRE KʼAWUAITA

      Widida bʉa Daizeze Bedʼea jaradiabʉa, sãwũã biʼia jaradiaita bʉa Daizeze Bedʼeade kʼawua wãta.

  • ¿Kʼãrẽ yi naa edebarira?
    ¿Idi ewadera kʼairaba opanʉ Jeowaba jarabʉra?
    • YI 13

      ¿Kʼãrẽ yi naa edebarira?

      Ewari jõmaʉ̃nẽ Daizeze Bedʼea jaradiabari

      Kanada

      Ewari jõmaʉ̃nẽ Daizeze Bedʼea jaradiabari

      Daizeze Bedʼea deza deza jaradiabʉ

      Daizeze Bedʼea jaradiabari

      Daizeze Bedʼea jaradiabari

      Daizeze Bedʼea dayi abaʉba kʼawuabari

      Daizeze Bedʼea dayi abaʉba kʼawuabari

      Bedʼea precursorbara jarakĩrãbʉ yi naa edebarita, drʉa mia kʼaiba akʉ jũẽnakamae naara jũẽbʉ o ewabʉ ẽbẽra kʼaidu zedamarẽã. Jesusida yi naa edebaribasi, naʉ̃ drʉa eda zokʼasida bedʼea jaradiamarẽã Daizeze ʉ̃rʉ akʉza o ewamarẽã ewari jõmaʉ̃nẽ baita (Mateo 20:28). Idibida Jesuba obada kĩrãkʼa opanʉ, ewari erpanʉ Daizeze Bedʼea jaradiaita ẽbẽrarã, mawũã maʉ̃ra ẽbẽrarãsida Daizeze odebamarẽã (Mateo 28:19, 20). Maʉ̃ kʼãrẽa ʉ̃kʉrʉra yi naa edebaribabʉ.

      Ewari jõmaʉ̃nẽ Daizeze Bedʼea jaradiabari. Jõma Jeowa ʉ̃rʉ Kʼawuabipanʉrãra Daizeze Bedʼea biata jaradiapanʉ. Maʉ̃ kʼãrẽa ʉ̃kʉrʉrabara obʉ yi naa edebaribaita, mawũã jedeko abaʉde setenta (70) ora diabaita. Maʉ̃ oya ãyara jʉrʉpanʉ ũmatipa eda trajaita, ʉ̃kʉrʉ jʉrʉpanʉ Yi naa edebari siento treinta (130) ora diabaribaita, mõbe zokʼabʉepanʉ Daizeze Bedʼea audre jaradiai nesidabʉmae. Ãyara jedekoza siento treinta (130) ora diaibara mawũãẽbʉrʉ audre, Daizeze Bedʼea jaradiabʉta. Yi naa edebarira nekʼãrẽ mejãcha erbʉẽ, akʉza sobiapanʉ ãya erbʉba, adewara jũãpanʉ Jeowaba kʼarebaita ãyi jõma kʼãrẽ nesidabʉra (Mateo 6:31-33; 1 Timoteo 6:6-8). Yi naa edabari setenta (70) ora dia beẽbʉrʉ, akʉza siento treinta (130) ora dia beẽbʉrʉ, Yi naa edebari treinta (30) o sinkuenta (50) ora diabari baseabʉ, maʉ̃bara jedekoza treinta (30) mawũãẽbʉrʉ sinkuenta (50) ora diaibara Daizeze Bedʼea jaradiabʉta.

      Yi naa edebaribara Daizezeta ẽbẽrata kãgabʉbaera jaradiabʉ. Abʼarika Jesuba kʼawuabada kĩrãkʼa, dayirãbida kʼawuapanʉ ẽbẽrabara nesidapanʉta Daizeze Bedʼea jaradiadamarẽã (Marcos 6:34). Mamina Dayirãbara kʼawuapanʉ ãyi kʼarebaseabʉta, ewari jõmaʉ̃nẽ panamarẽã. Ẽbẽra kãgaba yi naa edebarira ewari jʉrʉbʉ maʉ̃ra Daizeze Bedʼea jaradiaita (Mateo 22:39; 1 Tesalonicenses 2:8). Naʉ̃ba kʼarebabʉ audre ĩjãita akʉza Daizeze neũdukʼawuarabaita, maʉ̃ba mejãchade sobiabibʉ (Hechos 20:35).

      • ¿Kʼãrẽ yi naa edebarira?

      • ¿Kʼãrẽba kʼarebabʉ Daizeze Bedʼea ewari jõmaʉ̃nẽ jaradiaira?

  • ¿Sãwũã nekʼawuabipanʉ Daizeze Bedʼea ewari neẽã jaradiabʉrãra?
    ¿Idi ewadera kʼairaba opanʉ Jeowaba jarabʉra?
    • YI 14

      ¿Sãwũã nekʼawuabipanʉ Daizeze Bedʼea ewari neẽã jaradiabʉrãra?

      Ẽbẽrarã Daizeze Bedʼea jaradiabarira misionero ewari neẽã jaradiapanʉ Daizeze Bedʼeata

      Estado Unido

      Nekʼawuabarira Galaa Watchtower nejaradiabaridedabʉ Daizeze Bedʼea kʼawuaita
      Nekʼawuapanʉ misionerobaita

      Galaa nejaradiabaride (Paterson, Nuewa Yor)

      Misionerora juwa jidabʉraba jaradiapanʉ Daizeze bedʼeata panamane

      Panama

      Jeowa ʉ̃rʉ Kʼawuabipanʉrãitara Daizeze Bedʼeaba jaradiabʉra yibia. Maʉ̃ba erpanʉ nekʼawuabarita Daizeze Bedʼea ewarineẽã jaradiapanʉrãita. Mawũã biʼia jaradiamarẽã (2 Timoteo 4:5).

      Yi naa edebarira nejaradiabaride. Maʉ̃ra ewari 6bayeda opanʉ yi naara edebari 70 ora obʉrãita, opanʉ Daizeze Nokʼo ʉ̃rʉ bedʼeabarideda. Maʉ̃rãra poaga aba berabaribaibara mama wãira. Maʉ̃ra opanʉ ãyi kʼarebaita Jeowa kʼaitabamarẽã, akʉza Daizeze Bedʼea biʼia jaradiadamarẽã, ãya obʉde jipatakĩrãmarẽã.

      Nejaradiabaride Daizeze Bed’ea jaradiabariraita. Maʉ̃ra jedeko ũmebayeda opanʉ, maʉ̃ra yumakẽrã yuwẽrã dobabʉraita akʉza juwa jidabʉraita. Mamina baibara 23 akʉza 65 poaga, akʉza yi naa edebaribara biʼia kʼawuabaibara, adewara ãyi zokʼabʉdama wãibara Daizeze Bedʼea jaradiade. Jesuba obada kĩrãkʼa oira, jarapanʉ «zachua mʉta, zok’abʉera mʉta» (Isaías 6:8; Juan 7:29). Maʉ̃ba aña wãbʉrʉdera naabada kĩrãkʼa babeẽ, akʉza awuru kulturata ũdu kʼawuaibara, awuru bedʼeata kʼawuaibara. Maʉ̃ba nekʼawuabari dedara kʼawuayi Daizeze nebiata ãyi wãbʉrʉmae kʼarebamarẽã, maʉ̃ba kʼãrẽbayi Jeowaare bedʼeaita akʉza iya daʉcha erbʉ ʉ̃rʉ.

      Galaa Watchtower nejaradiabaride. Galaabara jarabʉ ebreodera «mõgara ãba jʉrepebʉta, maʉ̃ra biga jaradiaita». Maʉ̃ra ojʉ̃drʉsida poaga 1943de. Maʉ̃neba yẽta 8.000 audre zokʼabʉesida misionerorãra, nekʼawuada tẽã drʉa jõmaʉ̃nẽ (Hechos 13:47). Misionerora, naara jũẽsidade pʉwʉrʉ peruma, neẽbasi ababida kongregasionra, idira bʉ 1.000 audre. Japonma jũẽsidadera neẽbasi 10bida Jeowa ʉ̃rʉ Kʼawuabipanʉrãra, mamina idira bʉ 200.000 audre. Mamara jedeko 5bayeda biʼia akʉpanʉ Daizeze Bedʼeara, mamaʉ̃ba zokʼapanʉ awuru drʉa eda Daizeze Bedʼea jaradiade. Mama wãira trʉ̃panʉ yi naara edebari 130 ora obarita, akʉza misionerorata, akʉza Kongregasionra akʉbari zõrãrãta akʉza betelde trajabʉrata.

      • ¿Kʼãrẽa erpanʉ yi naa edabarira nejaradiabaridera?

      • ¿Kʼairata wãseabʉ nejaradiabaride Daizeze Bed’ea jaradiabarimara?

Librora joma Ẽbẽra bedʼeade (2004-2025)
Ãĩ wãita
Eda wãita
  • embera katio
  • Dedekai
  • Mʉ̃a kãgata
  • Copyright © 2025 Watch Tower Bible and Tract Society of Pennsylvania
  • Kartadebʉ Sãwũã Zok'aita
  • Neida bʉkʉabe ẽ eda
  • Configuración de privacidad
  • JW.ORG
  • Eda wãita
Dedekai