Rutʼta akʉza Noemita

Noemíra wãsi iyi kimaʉ̃me akʉza iyi wũãwũãra ũmebawara Moabʼeda, Israelde jarrabatabasi baera. Maʉ̃ tẽã Noemí kimara beisi. Noemí wau aba juwa jidasi Rutʼʉ̃me, ababemata juwa jidasi Orpáʼʉ̃me, maʉ̃ra wẽrãrãra Moabdebemabasi. Mamina tẽã Noemí warrara ũmera beisida.

Noemíba ũrĩside Israelde jarraba neẽãta jẽda wãsi. Rutʼta, Orpáʉ̃mera wãsi Noemí kʼaidu. Maʉ̃ne ãyi ode wãne, Noemíba jarasi ãyaʼa: «Marara kima bia akʉza ãĩgʉra bia. Mʉ̃ara kãgabʉ marara jẽda juwa jidamarẽã. Wãidua jẽda Moabʼeda». Ãya jarasi: «Daibara bʉra mejãcha kãgapanʉ, akʉza kãga ẽ bʉra doba wãmarẽãra». Noemíbara jarada ʉ̃rʉ jarasi wãmarẽã. Orpára wãsi mamina Rutʼra wã ẽ basi. Noemíba jarasi Rutʼa: «Orpára wãsi jẽda iyi pʉwʉrʉ eda akʉza iyi daizezeʼa yiwidʼita, wãra bʉsida». Rutʼba jarasi: «Mʉ̃ara bʉra doba idubʉ ẽ bayi. Bʉ pʉwʉrʉra mʉ̃ pʉwʉrʉ bayi akʉza bʉ Daizezera mʉ̃ Daizeze bayi». ¿Bʉmara Noemíra sãwũã krĩchasiba?

Rutʼta Noemíʉ̃me jẽda Israelda jʉ̃ẽsidera ne u sebadarãra ʉ̃rabʉrʉ jʉrepebarabasida. Ewari aba Rutʼra wãsi Boazba ne u erbadamae, mawũã ẽbẽrarãba amae wãnata jʉrepeita. Boazbara ũrĩbaribasi Rutbara yi pakõrẽ sãwũã bia akʉbʉta. Boazbara jarasi iyi nezokʼara ne u jʉrepepanʉra ʉ̃kʉrʉta amaenamarẽã, mawũã Rutba kʼaidu jʉrepemarẽã. Boazʼra Rahab warrabasi.

Noemíbara diamasi Rutʼa widisi: «¿Bʉara sama jʉrepede jʉ̃ẽsi ne ura?». Rutʼba panʉsi: «Boazba ne u erbʉmae». Noemíba jarasi: «Maʉ̃ra mʉ̃ kima mebẽrã. Mawũãra bʉra mama wẽrãrabawara trajade wãseabʉ. Mamara aduʼa trajaseabʉ baera».

Rutʼra mama trajabasi ne u jõma majʉrepeyeda. Boazbara ũdusi Rutʼra ẽbẽra wẽrã biabasita akʉza mejãcha trajabasita. Maʉ̃ ewaride yumakẽrãta wũãwũã neẽã beisibʉrʉ, yi kimara jẽda juwa jidaseabasi iyi kima beida mebẽrãʉ̃me. Maʉ̃ kʼarea Boazʼra juwa jidasi Rutʼʉ̃me. Ãyira wũãwũã barasi, maʉ̃ wũãwũãra trʉ̃gasida Obed. Ewari berabari wãne Obedʼra nokʼo David zezonabasi. Noemí neũdukʼawuarãra mejãcha sobiada kʼãrãpe akʉza Noemíʼa jarasida: «Nããrãra Jeowaba bʉa diasi Rutʼta, mawũã iya bʉra bia akʉbʉ. Atiara bʉra nieto barasi. Maʉ̃ kʼarea ibia bedʼeaidua Jeowa ʉ̃rʉ».