Davidta akʉza Goliatʼta

Jeowaba jarasi Samuelʼa: «Wãra Jesé deidu. Iyi warraranebema abaʉta mʉ̃a jidayi Israel nokʼo bamarẽã». Samuel jʉ̃ẽside ũdusi Jesé warra nããbemata, mõbe krĩchasi: «Naʉ̃ta iyibaibara Jeowaba jidadara». Mamina Jeowaba Samuelʼa jarasi maʉ̃ ẽãta akʉza jarasi: «Mʉ̃a ũdubʉ ẽbẽrarã sora wãrĩnu sãwũã krĩchabʉra. Bari ʉ̃rʉbʉrʉ akʉbʉ ẽ mʉ̃ara».

Jeséba yi warra nããbema awuara 6 bʉta ũdubisi Samuelʼa. Mamina Samuelba jarasi: «Jeowaba naʉ̃ranebemara miõta jida ẽ basi, ¿naʉ̃ra awuarara erbʉka?». Jeséba panʉsi: «Waebʉ yi jõmara tẽãbemata, maʉ̃bara obejarata akʉbʉ, iyi trʉ̃ra David». David deda zeside Jeowaba Samuelʼa jarasi: «¡Naʉ̃trʉ iyiʼa!». Mawũã Samuelbara aseiteta weasi David buru ʉ̃rʉ. Mawũã jidasi Davidta Israel nokʼo bamarẽã.

Tẽã israelitarãra yõnebasi pilisteorabawara. Pilisteorabara erpanasi gorogorodebema aba yi zromachuta, maʉ̃ trʉ̃ra Goliatbasi. Ewariza iyira ipidabasi israelitara kʼarea. Goliatbara naʉ̃ bedʼeata badua jarabasi: «Zokʼa bʉeidua yumakẽrã aba mʉ̃me yõmarẽã, iya mʉ̃ta iyi juwa edre baebira mawũãra daira mara nezokʼabayi. Mamina mʉ̃a naʉ̃ yumakẽrãta mʉ̃ juwa edre baebira marara dai nezokʼabayi».

Davidbara yikota edesi yi mebẽrã bʉidu, ãyira gorogororabasi. Mama Davidbara ũrĩsi Goliatba kʼãrẽ jarabadata, maʉ̃ kʼarea iya jarasi: «¡Mʉ̃ra iyiʉ̃me yõñi!». Maʉ̃ne Saúlba jarasi: «Bʉra wabida wũãwũã». Davidba jarasi: «Mʉ̃ra Jeowaba kʼarebayi».

Maʉ̃ kʼarea Saúlbara diasi yõ jʉ̃barita, yõ wãmarẽã. Mamina Davidba jarasi: «Mʉ̃ra naʉ̃ wuabara yõbe ẽ bayi». Aramaʉ̃ta Davidbara iyi kaucherata jiraedasi akʉza mõgarara juesoma jiraedasi mõbe iyi bolsode wuagasi. Aramaʉ̃ta wãsi Goliat chuidu. Goliatʼra jʉrasi: «¡Wũãwũã mʉ̃ma zera! Mʉ̃a bʉra nedʉwʉrʉ yiko babiyi». Davidba jarasi: «Bʉra mʉ̃mara uru miazʉba akʉza kuchoba, mamina mʉ̃ra bʉmara wã Jeowa trʉ̃neba. Bʉra daibawara yõbʉ ẽ awuarabʉrʉ yõbʉ Daizezeʉ̃me. Idi jõmaʉ̃ba ũdudayi Jeowara audre zareabarabʉta miazʉira akʉza kuchoira. Iya oyi marara dai juwa edre baebimarẽã».

Aramaʉ̃ta Davidbara iyi kaucheraba Goliatma batasi mõgaraba. Jeowa kʼarebadeba Goliat datrʉma deguebisi. Mawũã beisi Goliatʼra. Aramaʉ̃ta pilisteorãra wẽba wãsida ãyita beada ẽ bamarẽã. ¿Bʉara abarika ĩjãbʉka Davidba Jeowade ĩjãna kĩrãkʼa?