Jesúsbara jidasi ẽbẽra 12 iyi apostolera bamarẽã

Jesúsba jaradiabada poaga aba ẽzadra babʉrʉde, osi nekʼãrẽ yibiata, krĩchasi jidaita yumakẽrãra iyiʉ̃me ãba trajaita akʉza kongregasionta akʉdamarẽã. Maʉ̃ oi nãã Jesúsbara kʼarebata widisi Jeowaʼa, maʉ̃ba yiwidʼi ũnadrʉ zesi. Jesúsbara iyi kʼaidubemaranebemata jidasi 12, yi apostolera bamarẽã. ¿Bʉara kʼawuabʉka kʼairabasita maʉ̃rãra? Ãyi trʉ̃ra naʉ̃rabasi: Pedro, Andrés, Santiago, Juan, Felipe, Bartolomé, Tomás, Mateo, Santiago Alfeo warra, Tadeo, Simón akʉza Judas Iscariote.

12 apostolerãra Jesús kʼaidupanasi. Jesúsbara jaradiasi sãwũã jaradia wãibarata, maʉ̃are ãyidoba zokʼasi jaradia wãmarẽã. Jeowabara ãya diasi zareata, ẽbẽrarã kayabeta akʉza wawaberata bebikʉamarẽã.

Jesúsʼra 12 apostolerãra neũdukʼawuabasi akʉza ãyi ʉ̃rʉ ĩjãbasi. Pariseorabara apostolerãra kʼãrẽ ẽ kĩrãkʼa akʉpanasimina, Jesúsbara mawũã akʉ ẽ basi. Iyi apostelarãra jaradiasi ãyi trajota bia odamarẽã. Apostolerãra Jesúsʼʉ̃me ãba bʼaibasi, bedʼea zroma erbʉde akʉza bedʼea zroma neẽãne. Bari jaraita, ãyira Jesúsʼʉ̃me bʼaibasi iyi bei nããbida akʉza iyi jẽda piradrʉbʉrʉdebida. Jesúsʼra Galileadebemabasi akʉza ʉ̃kʉrʉ apostolerasida. Maʉ̃ranebema ʉ̃kʉrʉta kima barabasi.

Apostolerãra wuabemara kĩrãkʼa nekayirua omiabasi, maʉ̃ba edaʉde aña opanasi. Edaʉde bedʼeapanasi nãã bia krĩcha ẽã akʉza ãya nekʼãrẽ jidabʉrʉde aña jidabasi. Edaʉde jʉ̃ã kʼawuabʉta ũdubida ẽ basi, edaʉde yõpanasi kʼawuadaita kʼaita audre yi zroma bʼaita, mawũãsidu ãyira ẽbẽra biabasi Jeowata kãgapanasi baera. Jesús wãna tẽã ãyara kʼarebaibasi kongregasion kristianorãra eaba wãmarẽã.