Jõma Daizeze Bedʼeade Daizeze Nokʼo ʉ̃rʉ bedʼeabʉta. Jeowabara jõma aripe oyi iya oita krĩchabʉra iyi Nokʼodeba. ¿Kʼãrẽ Daizeze Nokʼora? ¿Sãwũã kʼawuapanʉ idi iya zokʼanʉmʉta? ¿Kʼãrẽta ozebʉrʉ idibasidu? ¿Kʼãrẽta oi ʉ̃ra zeide? Maʉ̃ bedʼeara panʉñi naʉ̃ne, yi 32de akʉza yi 33de.

1. ¿Kʼãrẽ Daizeze Nokʼora akʉza kʼai iyi Nokʼora?

Daizeze Nokʼora Jeowaba nʉmʉsi. Maʉ̃ Nokʼora Jesuba zokʼabʉ ʉ̃tʉba (Mateo 4:17; Juan 18:36). Daizeze Bedʼeabara jarabʉ Jesu ʉ̃rʉ: «Iya zokʼabʉra jõkabayi» (Lucas 1:32, 33). Iyira Nokʼo baera ẽbẽrarã jõmaʉ̃ta zokʼayi naʉ̃ drʉade.

2. ¿Kʼairaba zokʼapanʉ Jesubawaraʉba?

Jesubara iyi dobaʉba zokʼanʉmʉ ẽ. Ẽbẽrarã pʉwʉrʉ awuara awuarakadebemaba akʉza bedʼea awuara awuarakadebemaba, zokʼadayi naʉ̃ drʉara (Apocalipsis 5:9, 10). ¿Ẽbẽrarã sõbeba zokʼadai Jesubawaraʉba? Jesu naʉ̃ drʉa eda zedadeba, ẽbẽrarã mejãchaʉta iyi bedʼeata ũrĩsida. Maʉ̃ranebemata 144.000 ʉ̃ta wãñi iyibawara zokʼadaita (akʉra Apocalipsis 14:1-4). Mamina wuabema ẽbẽrarãra naʉ̃ drʉade panañi (Salmo 37:29).

3. ¿Kʼãrẽa audre yibia Daizeze Nokʼora wuabema nokʼoira?

Ʉ̃kʉrʉ nokʼo naʉ̃ drʉadebemaba bia zokʼakĩrãpanʉmina, zarea neẽ bia zokʼadaita. Maʉ̃ra nokʼora ewari berabari wãne awuru nokʼota bʉepanabari, maʉ̃ra nokʼorabara ẽbẽrarãra krĩchada ẽ. Daizezebara «bʉyi Nokʼo jõkata» (Daniel 2:44). Jesubara jõma zokʼayi naʉ̃ drʉara akʉza jõma ẽbẽrarã daucha akʉyi. Iyira ẽbẽra bia, kãga ũdubibʉ akʉza aripe obʉ, maʉ̃ba iyara jaradiayi ẽbẽrarã iyi kĩrãkʼa ẽbẽra bia bamarẽã, kãgata ũdubimarẽã akʉza aripe odamarẽã (akʉra Isaías 11:9).

4. Nokʼo mejãcha zarea barabʉba zokʼa jʉ̃drʉyi naʉ̃ drʉara

Jesutrʉ mejãcha zareabarabʉ nekʼãrẽ wuabemara nokʼoraira akʉza iya bia zokʼaseabʉ. Akʉra Mateo 28:18, mõbe naʉ̃ta panʉidua:

• ¿Kʼãrẽa Jesuba obʉtrʉ audre yibia wuabema nokʼoraira?

Nokʼo naʉ̃ drʉadebemabara ʉ̃kʉrʉ pʉwʉrʉta zokʼabʉ adewara poaga wĩka zokʼabʉ. ¿Mawũã abarika berabarika Daizeze Nokʼosida? Akʉra Daniel 7:14, mõbe naʉ̃ta panʉidua:

• ¿Kʼãrẽa yibia Daizeze Nokʼo jõka baira?

• ¿Kʼãrẽa yibia Daizeze Nokʼoba naʉ̃ drʉa jõma zokʼa baita?

5. Nokʼo naʉ̃ drʉadebemara jõñi

¿Kʼãrẽa nokʼora naʉ̃ drʉadebʉrãra Daizezebara jõbi? Akʉra BIDEOTA, mõbe naʉ̃ta panʉidua:

BIDEO: ¿Kʼãrẽ Daizeze Nokʼora? (wiña ũdubibʉ) (1:41)

• ¿Kʼãrẽta ozebʉrʉ nokʼo naʉ̃ drʉadebemabara?

Akʉra Eclesiastés 8:9, mõbe naʉ̃ta panʉidua:

• Bʉmara, ¿yibia baika nokʼo ẽbẽrarãba zokʼai kaude Daizeze Nokʼobʉrʉ zokʼamarẽã? ¿Kʼãrẽa?

6. Daizeze Nokʼode zokʼapanʉraba kʼawuapanʉ dayirã sãwũãbʉra

Jesura dayirã kĩrãkʼa zʉbʉriasi baera «iyara dayirãra so zʉbʉria akʉbʉ dayirã zʉbʉria kʼarea» (Hebreos 4:15). Jeowabara ẽbẽrarã 144.000ta jidabʉrʉ ʉ̃ta wãita Jesubawara zokʼa jʉ̃drʉita. Naʉ̃ra ẽbẽrarãra pʉwʉrʉ awuara awuarakadebema akʉza bedʼea awuara awuarakadebema (Apocalipsis 5:9).

• Jesuba akʉza iyi kʼaidu zokʼairaba ẽbẽrarã ʉ̃rʉ krĩchabʉ, maʉ̃ kʼawuabʉrʉba, ¿bʉra sobiabʉka? ¿Kʼãrẽa?

7. Daizeze Leyba zokʼabʉtrʉ audre yibia ẽbẽrarãba zokʼabʉira

Nokʼo naʉ̃ drʉadebʉrabara leyta opanabari mawũã ãyi pʉwʉrʉra bia akʉita akʉza kʼarebaita. Daizeze Nokʼobida abarika erbʉ leyta, maʉ̃ kʼarea iyi kʼaidupanʉrabida odaibara maʉ̃ra. Akʉra 1 Corintios 6:9-11, mõbe naʉ̃ta panʉidua:

• ¿Naʉ̃ drʉara sãwũã baiba ẽbẽrarãba obʉrʉde Jeowaba kãgabʉta?a

• Jeowabara kãgabʉ drʉa bia zebʉrʉde ẽbẽrarãba iya jarabʉta odamarẽã, ¿bʉmara maʉ̃ra yibiaka? ¿Kʼãrẽa mawũã panʉbʉ bʉara?

• ¿Sãwũã kʼawuapanʉ ẽbẽrarã Daizeze Bedʼea ũrĩ ẽã panʉrãra Daizeze Bedʼea ũrĩseabʉta? (Akʉra nejʉacha zake 11).

KĨRÃBEITA

Daizeze Nokʼora wãrĩnuara, iyira ʉ̃tʉbʉ akʉza naʉ̃ drʉa jõma zokʼayi iyara.

Panʉnadrʉ

• ¿Kʼairaba zokʼapanʉ Daizeze Nokʼodera?

• ¿Kʼãrẽa Daizeze Nokʼora audre yibia wuabema nokʼoira?

• ¿Kʼãrẽta kãgabʉ Daizezebara ẽbẽrarãba odamarẽã ẽjũã kĩrãwãreãnẽ?

JɄRɄDA AUDRE KʼAWUAITA

Akʉra Jesuba kʼãrẽta jaradiasita Daizeze Nokʼo sama bai ʉ̃rʉ.

«¿Daizeze Nokʼora dayirãba bari sode erbʉka?» (Artikulo jw.org)

¿Kʼãrẽa Jeowa ʉ̃rʉ Kʼawuabipanʉrãra Daizeze Nokʼoarebʉ ẽbẽrarã nokʼoare bai kaude?

Soiduba Daizeze Nokʼoare panʉ (1:43)

Akʉra Daizeze Bedʼeaba kʼãrẽta jarabʉta ẽbẽrarã 144.000 Jeowaba jidada ʉ̃rʉ Jesubawaraʉba zokʼaita.

«¿Kʼairata ʉ̃ta wãi?» (Artikulo jw.org)

¿Kʼãrẽba kʼarebasi yuwẽrã aba karselde badaba ĩjãita Daizeze Nokʼobʉrʉ jõma bedʼea zroma naʉ̃ drʉadebʉra ara oseabʉta?

«Sãwũã kʼawuasi nemitia wua berabari ẽ baita» (¡Despertad!, noviembre 2011de)

Daizeze Nokʼobara ʉ̃tʉ zokʼa jʉ̃drʉsi 1914deba. Mamaʉ̃ba ʉ̃ta, arakaitaba nokʼoraba naʉ̃ drʉade zokʼabʉ jõita, ¿sãwũã kʼawuapanʉ maʉ̃ra? Atia akʉdaya bedʼea ũme Daizeze Bedʼeaba jaradata akʉza 1914deba ʉ̃ta ẽbẽrarã sãwũã zʉbʉria jʉ̃drʉdata.

1. ¿Kʼãrẽta berabarita jarasi Daizeze Bedʼeabara?

Daniel librode jarabʉ Daizeze Nokʼoba zokʼa jʉ̃drʉita «7 ewari» berabarida tẽã (Daniel 4:16, 17). Maʉ̃ tẽã Jesubida abarika jarasi maʉ̃ 7 ewarira iyabaʉta «pʉwʉrʉra judiora ẽã ewari jõita», adewara jarasi maʉ̃ ewarita wabida jõ ẽ basita (Lucas 21:24). Atia kʼawuadayi 7 ewari jõnata 1914de.

2. ¿1914deba ʉ̃ta ẽbẽrarãra sãwũãpanʉ akʉza naʉ̃ drʉara sãwũã wã?

Jesu kʼaidupanʉrabara widisida: «¿Maʉ̃ra sõbede berabaripe, kʼãrẽta ũdudaipe bʉ ewaridera, adewara naʉ̃ ewarinʉmʉ jõi ewaridera?» (Mateo 24:3). Jesuba jarasi iyi Nokʼobada tẽã nekʼãrẽ mejãcha berabarita. Bari jaradaita, ũdudaita jarrabata, drʉa ureta akʉza yõta (akʉra Mateo 24:7). Daizeze Bedʼeaba jarasi ẽbẽrarã kayirua bʼaita, «ewari jõbodoarera» ũdu wãnaita «bedʼea zroma daya obe ẽãta» (2 Timoteo 3:1-5). 1914deba ʉ̃ta ẽbẽrarãba kʼãwũã mitia opanʉra audre ũdu wãna.

3. ¿Daizeze Nokʼoba zokʼa jʉ̃drʉdadeba yẽta kʼãrẽa audre ũdu wãna zʉbʉriara?

Jesuba ʉ̃tʉ zokʼa jʉ̃drʉda tẽã, Diaruta akʉza iyi angelera kayiruabawara yõsida Jesume, mamina Diarura aduasi. Daizeze Bedʼeaba jarabʉ, iyira «jʉretasida» «akʉza iyi kʼaidupanʉra angelerasida jʉretasida» (Apocalipsis 12:9, 12). Diarura arigʉ kĩrʉbʉ iyi beira arakaita ba baera, maʉ̃ba ẽbẽrarãta mejãcha zʉbʉriabibʉ naʉ̃ drʉade. Maʉ̃ba naʉ̃ drʉara arigʉ mitia wã, mamina Daizeze Nokʼobara jõma jõbiyi maʉ̃ zʉbʉriara.

AUDRE BIʼIA KʼAWUADADRɄ

4. Daizeze Bedʼeaba jarabʉta dayirãba juachadara poaga 1914ta ũdubibʉ

BIDEO: Daizeze Nokʼobara zokʼa jʉ̃drʉsi 1914deba ʉ̃ta (5:02)

Daizezebara osi nokʼo Babilonianebema Nabucodonosorta kʼãĩmokaramarẽã nekʼãrẽ ʉ̃ra berabarita. Danielba maʉ̃ kʼãĩmokara jara ũrĩbiside nekãrẽ ũme ʉ̃rʉ jarakĩrãbasi, nokʼo Nabucodonosorba zokʼabʉ ʉ̃rʉ akʉza Daizeze Nokʼo ʉ̃rʉ (akʉra Daniel 4:17).a

Akʉra Daniel 4:20-26, mõbe naʉ̃ta panʉidua:

• A) ¿Nabucodonosorbara kʼãrẽta ũdusi kʼãĩmokaradera? (Akʉra nejʉacha zake 20 akʉza 21).

• B) ¿Kʼãrẽta berabaribasi bakurura? (Akʉra nejʉacha zake 23).

• C) ¿Kʼãrẽta berabaribasi «7 ewari» berabarida tẽãra? (Akʉra nejʉacha zake 26).

Bakuru kʼãĩmokarade ũdudata akʉza Daizeze Nokʼota

KʼÃRẼ Ʉ̃RABɄRɄ BERABARITA (Daniel 4:20-36)

Nokʼo bʉeda

A) Bakuru zromata

Nokʼora neẽ basi

B) «Tʉbʉera bakurura» mõbe «berabaribara 7 ewari bayeda»

Nokʼobara jẽda zokʼa jʉ̃drʉsi

C) «Akʉza jẽda zokʼa jʉ̃drʉyi»

Nãã kʼãĩmokarade jaradapeada berabaridata:

• D) ¿Bakurubara kʼãrẽta jarakĩrãbʉ? (Akʉra nejʉacha zake 22).

• E) ¿Kʼãrẽ ewaride zokʼa ẽ aduasi? (Akʉra Daniel 4:29-33).

• F) ¿Nabucodonosor kʼãrẽta berabarisi «7 ewari» berabarida tẽã? (Akʉra Daniel 4:34-36).

YI NÃÃ KʼÃĨMOKARADADE JARADAPEADA BERABARIDATA

Nokʼo bʉeda

D) Nabucodonosor, Babiloniadebema nokʼo

Nokʼora neẽ basi

E) Poaga 606 Kristo nãã berabarida tẽã, Nabucodonosor kĩrãnemasi maʉ̃ba zokʼa ẽ basi «7 ewari» bayeda

Nokʼobara jẽda zokʼa jʉ̃drʉsi

F) Nabucodonosor iyi kĩrãnema badadebara biasi, maʉ̃ba jẽda zokʼa jʉ̃drʉsi

Yi ũme kʼãĩmokaradade jaradapeada berabaridata:

• G) ¿Bakurubara kʼairata jarakĩrãbʉ? (Akʉra 1 Crónicas 29:23).

• H) ¿Kʼãrẽ ewaride wua zokʼada ẽã aduasida? ¿Sãwũã kʼawuapanʉ maʉ̃ra nokʼoraba Jesu naʉ̃ drʉade baside zokʼada ẽ basita? (Akʉra Lucas 21:24).

• I) ¿Sama akʉza kʼãrẽ ewaride jẽda zokʼa jʉ̃drʉsida maʉ̃ Nokʼora?

YI ŨME KʼÃĨMOKARADADE JARADAPEADA BERABARIDATA

Nokʼo bʉeda

G) Nokʼo Israelitaraba Daizeze pʉwʉrʉta zokʼabasi

Nokʼora neẽ basi

H) Jerusalenʼra jõma ãrĩsi poaga 607de K.n. akʉza nokʼo Israelitaraba zokʼabadara jõsi 2.520 poaga bayeda

Nokʼobara jẽda zokʼa jʉ̃drʉsi

I) Jesubara ʉ̃tʉ zokʼa jʉ̃drʉsi Daizeze Nokʼota

5. 1914deba naʉ̃ drʉara awuara wãsi

Akʉra BIDEOTA.

BIDEO: 1914deba naʉ̃ drʉara awuarawãsi (1:10)

Jesubara jarasi naʉ̃ drʉara sãwũã wãita iya zokʼa jʉ̃drʉda tẽã. Akʉra Lucas 21:9-11, mõbe naʉ̃ta panʉidua:

• Naʉ̃ra ʉ̃ra kʼãrẽ berabaridara kama jarabʉra, ¿saʉ̃ta ũrĩsi bʉara?

Apostol Pablobara bʉsi ẽbẽrarã naʉ̃ ewari jõbodoare nʉminanera sãwũã panaita. Akʉra 2 Timoteo 3:1-5, mõbe naʉ̃ta panʉidua:

• Naʉ̃ testoba jarabʉdera, ẽbẽrarãba obʉdebara, ¿saʉ̃rata ũdubʉ bʉara?

6. Kʼãwũã kʼawuabʉdaba Daizeze Nokʼo ʉ̃rʉ audre okĩrã oseabʉ

Akʉra Mateo 24:3, 14, mõbe naʉ̃ta panʉidua:

• ¿Kʼãrẽba ũdubibʉ Daizeze Nokʼoba zokʼanʉmʉta?

• ¿Bʉara kʼãrẽta oibara maʉ̃ oita?

Daizeze Nokʼobara idi ewade zokʼanʉmʉ, arakaitaba naʉ̃ drʉa jõma zokʼa jʉ̃drʉita. Akʉra Hebreos 10:24, 25, mobe naʉ̃ta panʉidua:

• ¿Dayirã jõmaʉ̃ba kʼãrẽta oseapanʉ ewari jõĩra arakaita ba baera?

KĨRÃBEITA

Daizeze Bedʼeade kʼãrẽ zeya adara akʉza naʉ̃ drʉade nekʼãrẽ berabarinʉmʉta, ũdubibʉ Daizeze Nokʼobara zokʼanʉmʉta. Maʉ̃ ʉ̃rʉ ĩjãbʉta ũdubibʉ Daizeze Nokʼo ʉ̃rʉ jaradia wãbʉde akʉza ãba yi jʉrebarima wãbʉde.

Panʉnadrʉ

• Danielba iyi librode jaradadebara, ¿kʼãrẽta berabarisi 7 ewari tẽãra?

• ¿Bʉara kʼãrẽa wãrĩnu ĩjãbʉ Daizeze Nokʼoba zokʼa jʉ̃drʉsita 1914deba ʉ̃ta?

• ¿Bʉara sãwũã ũdubiseabʉ Daizeze Nokʼoba zokʼanʉmʉta?

JɄRɄDA AUDRE KʼAWUAITA

Akʉra ẽbẽra kʼawuapanʉraba kʼãrẽta jarabʉta naʉ̃ drʉa sãwũã awuarabʉ ʉ̃rʉ 1914deba ʉ̃ta.

«Idi ewadera ẽbẽraba nãã nebia obadara ũduda ẽ» (¡Despertad!, abril 2007de)

Akʉra Mateo 24:14 ʉ̃ra berabariba sãwũã kʼarebasita yumakẽrã aba.

«Mʉ̃ara audre jemenekĩrã béisbol nekʼãrẽ wuabemaraira» (Jarakabʉ, num. 3, 2017de)

¿Sãwũã kʼawuapanʉ Danielba ʉ̃ra berabarita jaradara yi zroma 4de Daizeze Nokʼo ʉ̃rʉ jarakĩrãbaside?

«¿Daizeze Nokʼobara sõbedaʉba zokʼa jʉ̃drʉsi? (Yi nããbemata)» (Jarakabʉ, 1ne octubrede 2014de)

¿Sãwũã kʼawuapanʉ 7 ewarira Daniel yi zroma 4de jaradara jõsita 1914de?

«¿Daizeze Nokʼobara sõbede zokʼa jʉ̃drʉsi? (Yi ũmeta)» (Jarakabʉ, 1ne noviembrede 2014de)

Daizeze Nokʼoba zokʼanʉmʉ, aranʉbai iya naʉ̃ drʉadera nebiata weyi. Akʉdaya Daizeze Nokʼoba kʼãrẽ nebiata weita ẽbẽrarãita akʉza maʉ̃ kʼarea sãwũã sobia jʉ̃ãseabʉta.

1. ¿Kʼãrẽta oi Daizeze Nokʼobara naʉ̃ drʉade neneẽã bamarẽã akʉza ẽbẽrarãba aripe odamarẽã?

Daizeze yõ ewari zebʉrʉdera Jesubara jõma makenañi ẽbẽrarã kayiruarata akʉza nokʼora naʉ̃ drʉadebʉrata (Apocalipsis 16:14, 16). Daizeze Bedʼeaba jarabʉ: «Aranʉbai neẽbayi jipa so kayiruaberãra» (Salmo 37:10). Maʉ̃ra berabariyi Jesuba obʉrʉde, Jesubara Daizeze Nokʼodeba neneẽã babiyi akʉza ara oyi naʉ̃ drʉata (akʉra Isaías 11:4).

2. ¿Ẽbẽrarãra sãwũã baiba Daizeze Bedʼea naʉ̃ drʉa jõmaʉ̃ba ũrĩbʉrʉdera?

Daizeze Nokʼoba naʉ̃ drʉa jõma jipa zokʼabʉrʉde, «ẽbẽra biaratrʉ duanañi maʉ̃ drʉadera akʉza ewari jõmaʉ̃nẽbayi maʉ̃ ʉ̃rʉra» (Salmo 37:29). Krĩchara bʉ bʉmae ẽbẽrarã jõmaʉ̃ta ẽbẽra biata, Jeowa kãgabʉta akʉza ãyirai yi kãgapanʉta, ¿bʉmara maʉ̃ra yibia bai ẽka? Miõta kaya ẽ bayi akʉza jõmaʉ̃ta ewari jõmaʉ̃nẽ panañi.

3. ¿Daizeze Nokʼobara kʼãrẽta oi ẽbẽra kayiruarãra jõbida tẽãra?

Jesubara ẽbẽra kayiruarãra jõbida tẽã 1.000 poagabayeda zokʼayi. Jesuba akʉza 144.000bawaraʉba kʼarebayi ẽbẽrarãra nemitiadeba ẽdrʉbita akʉza ewari jõmaʉ̃nẽ bʼaita. Maʉ̃ 1.000 poaga jõbʉrʉdera naʉ̃ drʉara ẽjũã kĩrãwãreã bayi, ẽbẽrarã mama panʉrabara ũrĩñi Jeowaba jarabʉta akʉza sobia panañi. Aramaʉ̃ta Jesubara yi Zezeʼa diayi jẽda iyi Nokʼota, adewara Daizeze trʉ̃ra neneẽã erpanañi (Mateo 6:9, 10). Mama ũdubiyi wãrĩnu Jeowabʉrʉ zokʼaseabʉta akʉza ẽbẽrarã iyi bedʼea ũrĩpanʉrãra biʼia akʉbʉ. Jesuba iyi Nokʼo Jeowa jẽda diada tẽã, Jeowabara beayi Diaruta akʉza angelera kayiruarata akʉza jõma ẽbẽrarã iyi bedʼea jipa ũrĩkĩrã ẽã panʉrata (Apocalipsis 20:7-10). Daizeze Nokʼoba nekʼãrẽ obʉra ewari jõmaʉ̃nẽ bayi.

AUDRE BIʼIA KʼAWUADADRɄ

4. Daizeze Nokʼoba naʉ̃ drʉadebʉ nokʼora jõma jõbiyi

«Yumakẽrãba ewari jõmaʉ̃nẽ awuru yumakẽrãta zokʼabʉ maʉ̃ kayirua oita» (Eclesiastés 8:9). Daizezebara iyi Nokʼodeba ara oyi naʉ̃ drʉa ãrĩnata.

Akʉra Daniel 2:44 akʉza 2 Tesalonicenses 1:6-8, mõbe naʉ̃ta panʉidua:

• Jeowaba Jesumebara, ¿kʼãrẽta oi nokʼorata akʉza ẽbẽrarã maʉ̃ nokʼoare bʉra jõbita?

• ¿Bʉara sãwũã biʼia kʼawuabʉ, Jeowaba Jesumeba oira jõma aripe oita?

5. Jesura wuabemara nokʼoraira yibia

Jesura Nokʼo bia bʼai baera iya nekʼãrẽ nebiata oyi ẽbẽrarãita. Akʉra BIDEOTA, jẽda kĩrãbedaita sãwũã ũdubisi Jesubara ẽbẽrarã kʼarebakĩrãbʉta akʉza Daizezeba iya zarea diasita ẽbẽrarã kʼarebamarẽã.

BIDEO: Jesu nama udabasidera nebia oũdubisi Daizeze Nokʼoba kʼãrẽ nebia oita (1:13)

Jesuba naʉ̃ drʉade nekʼãrẽ odaba, ũdubisi Daizeze Nokʼoba kʼãrẽ nebia oita. Naʉ̃ra nebia edrebʉdebemara, ¿bʉara saʉ̃ta audre ũdukĩrãbʉ? Akʉra jõma testora maʉ̃ra bedʼea ʉ̃rʉ jarabʉta.

6. Jõma Jeowa Nokʼodeba sobiapanañi ʉ̃ra zeide

BIDEO: Dayirã sobia bʼaira Jesudeba ũdudayi (4:38)

Akʉra Salmo 145:16, mõbe naʉ̃ta panʉidua:

• ¿Bʉra sãwũã krĩchabʉ kʼawuabʉ baera Jeowaba «zokʼaibʉra nekʼãrẽ jõma kãgabʉta» diai baera?

KĨRÃBEITA

Daizezebara iyi Nokʼodeba oyi iya jaradara. Naʉ̃ drʉara ẽjũã kĩrãwãreã babiyi mama bayi ẽbẽrarã iyi bedʼea ũrĩpanʉrata ewari jõmaʉ̃nẽ.

Panʉnadrʉ

• ¿Daizeze trʉ̃ra sãwũã neneẽã bai iyi Nokʼodeba?

• ¿Kʼãrẽa wãrĩnu ĩjãpanʉ Daizezebara iya jaradara aripe berabaribita iyi Nokʼodeba?

• Daizeze Nokʼoba nebia weya abʉdebemara, ¿bʉara saʉ̃ta audre ũdukĩrãbʉ?

JɄRɄDA AUDRE KʼAWUAITA

Kʼawuara kʼãrẽta Daizeze yõ ewarira.

«¿Kʼãrẽ Daizeze yõ ewarira?» (Artikulo jw.org)

Jesúsʼra bedʼeasi zʉbʉria zroma ʉ̃rʉ akʉra kʼãrẽta baerabarita maʉ̃ ewaride (Mateo 24:21).

«¿Kʼãrẽ zʉbʉria zromara?» (Artikulo jw.org)

Akʉra sãwũã mebẽrã ãba krĩchapanʉta ãyira ẽjũã kĩrãwãreãnẽ Daizeze Nokʼo edre akʉza sobiabarabʉta.

Krĩchara ẽjũã kĩrãwãreãnẽbʉta (1:50)

Lera nebʉrata, «Nekʼãrẽ mejãcha widibasi mʉ̃yikʉza», nama kʼawuadayi sãwũã politikoba iya bedʼea widibadara ũdusita.

«Daizeze Bedʼeabara mʉ̃ bebʉra awuarababibʉ» (Jarakabʉ, 1ne enerode 2012de)