YI 18
¿Sãwũã kʼawuapanʉ saʉ̃ta kristianora wãrĩnuarata?
Ẽbẽra mejãchaʉba krĩchapanʉ ãyira kristianorata, mamina abarika ĩjãna ẽ adewara abarika krĩchada ẽ nebia oide akʉza nemitia oide. Mawũẽra, ¿sãwũã kʼawuapanʉ saʉ̃ta kristianora wãrĩnuarata?
1. ¿Kʼãrẽta jarakĩrãbʉ bedʼea kristianobara?
Naʉ̃bara jarakĩrãbʉ Jesu kʼaidubemarata (akʉra Hechos 11:26). ¿Sãwũã ũdubipanʉ wãrĩnu Jesu kʼaidupanʉta? Jesuba jarasi: «Marãba mʉ bedʼeata aribʼae bʼebʉrʉ wãrĩnu mʉta pẽwã bʼea» (Juan 8:31). Naʉ̃ba jarakĩrãbʉ kristianora wãrĩnuarabara Jesuba jaradiabʉta ũrĩbarata. Jesuba iya jaradiadara Daizeze Bedʼeadeba jaradiasi, kristianora wãrĩnuarabara ãya jõma jaradiabʉra Daizeze Bedʼeadeba jaradiabʉ, Jesuba oda kĩrãkʼa (akʉra Lucas 24:27).
2. ¿Kristianora wãrĩnuarabara sãwũã ũdubipanʉ kãgara?
Jesuba zokʼasi naʉ̃ta iyi kʼaidubemaraʼa: «Zhiya zhi kʉãgʼaudua marãta mʉã kʉãgʼa kĩrãkʼa» (Juan 15:12). ¿Sãwũã ũdubisi Jesubara iyi kʼaidubemara kãgabʉta? Ãyita ewari jʉrʉsi, zowaĩnĩgʉa diasi, kʼarebasi, adewara ãyibari beisi (1 Juan 3:16). Abarika Jesude kĩrãkʼa kristianora wãrĩnuarabara bari bedʼeaba kãgata jarabʉ ẽ, awuarabʉrʉ oũdubibʉ maʉ̃ta.
3. ¿Kʼãrẽta obʉ kristianora wãrĩnuarabara?
Jesubara iyi kʼaidubemara naʉ̃ trajota diasi, «zokʼakuasia Daizezeta Nokʼodʼebemata» jaradiade (Lucas 9:2). Nããbema kristianorabara bari templode akʉza sinagogade jaradiada ẽ basi, awuarabʉrʉ ãyara Daizeze Bedʼeara jaradiasida ẽbẽra kabana bʉmae akʉza deza deza (akʉra Hechos 5:42; 17:17). Idi ewadebida kristianora wãrĩnuarabara Daizeze Bedʼeata jaradiabʉ ẽbẽrarã bʉmae. Wuabema ẽbẽrarãta kãgapanʉ baera ewari jʉrʉpanʉ, zowaĩnĩgʉa diapanʉ Daizeze Bedʼeadeba akʉza nebia zeita jaradiapanʉ (Marcos 12:31).
AUDRE BIʼIA KʼAWUADADRɄ
Kʼawuadayi kʼãrẽne awuarabʉta kristianora wãrĩnuarãra ẽbẽrarã Jesude kĩrãkʼa oda ẽãneba akʉza iya jarabʉta ũrĩ ẽãneba.
4. Opanʉ Daizeze Bedʼeaba zokʼabʉta
Nããbema kristianoraitara Daizeze Bedʼeara yibiabasi.
Ʉ̃kʉrʉ ẽbẽraba jarapanʉ ãyira kristianota, mamina krĩchada ẽ Daizeze Bedʼeaba zokʼabʉ oita. Akʉra BIDEOTA, mõbe naʉ̃ta panʉidua:
Ʉ̃kʉrʉ iglesia kristianora apanʉraba kãgada ẽ basi Jesuba jaradiabʉta ẽbẽrarãba kʼawuadamarẽã, ¿ãyara maʉ̃ra sãwũã osida?
Jesubara jaradiasi Daizeze Bedʼeade wãrĩnu eda jarabʉta. Akʉra Juan 18:37, mõbe naʉ̃ta panʉidua:
Jesuba jaradadera, ¿saʉ̃ kristianorata wãrĩnuare panʉ?
5. Jaradiapanʉ Daizeze Bedʼeade jarabʉta
Nããbema kristianoraitara Daizeze Bedʼeara jaradiapanasi.
Jesu ʉ̃ta wãi naweda iyi kʼaidubemara trajota amaesi, maʉ̃ra idibasidu opanʉ. Akʉra Mateo 28:19, 20 akʉza Hechos 1:8, mõbe naʉ̃ta panʉidua:
¿Kʼai sõbebayeda akʉza samabayeda jaradiai Daizeze Bedʼeara?
6. Opanʉ ãya jaradiabʉta
¿Sãwũã ũdusi Tombara wãrĩnuarãra? Akʉra BIDEOTA, mõbe naʉ̃ta panʉidua:
Naʉ̃ bideodera, ¿Tombara kʼãrẽa idubʉsi religionʼra iya ĩjãbadara?
¿Sãwũã kʼawuasi Tombara wãrĩnuta ũdusita?
Bʉa obʉtrʉ audre yibia bʉ bedʼeabʉira. Akʉra Mateo 7:21, mõbe naʉ̃ta panʉidua:
Jesuitara saʉ̃ta audre yibia, ¿dayirãba jarabʉ ĩjãbʉta, mawũã ẽ bʉrʉ dayirãba oũdubibʉta?
7. Ãyirai yi kãga ũdubipanʉ
Nããbema kristianoraitara ãyirainʉ yi kãga ũdubipanasi.
Kristiano wãrĩnuarãra iyi bebʉta diaseabʉ awuru mebẽrãbari. Akʉra BIDEOTA, mõbe naʉ̃ta panʉidua:
¿Kʼãrẽa mebẽã Lloyd beikĩrãbasi mebẽã Johanssonbari?
Bʉmara, ¿Lloydbara Kristianora wãrĩnune kĩrãkʼa osika?
Akʉra Juan 13:34, 35, mõbe naʉ̃ta panʉidua:
¿Jesu kʼaidubemarabara (kristianora wãrĩnuara) sãwũã edadaibarabasi ẽbẽrarãʼa awuru pʉwʉrʉdebemata?
¿Jesu kʼaidubemarabara sãwũã kãgata ũdubiseapanasi yõ ewaridera?
Ʉ̃KɄRɄBA KRĨCHAPANɄTA: «Kʼãrẽ ẽ bʉ kʼãrẽ religione bʉta, audre yibia Jesu ĩjã bʼaita».
¿Bʉa saʉ̃ testota akʉbiseabʉ ũdubita saʉ̃ta kristianora wãrĩnuarata?
KĨRÃBEITA
Kristiano wãrĩnuarabara, opanʉ Daizeze Bedʼeaba jaradiabʉta, ãyi bebʉta diaseabʉ awurubari kãga baera akʉza Daizeze Bedʼeade jarabʉta jaradiapanʉ.
Panʉnadrʉ
¿Kristiano wãrĩnuarabara kʼãrẽta ĩjãpanʉ?
¿Kʼãrẽba ũdubibu saʉ̃ta kristianora wãrĩnuarata?
¿Kʼãrẽta opanʉ kristianora wãrĩnuarabara?
JɄRɄDA AUDRE KʼAWUAITA
Kʼawuara ẽbẽrarã ʉ̃rʉ sãwũã zarea opanʉta Jesuba obada kĩrãkʼa oita akʉza iya jaradiadata.
Akʉra sãwũã yuwẽrã monjabadaba ũdusita mebẽrãrata.
«Mʉ̃a jõma wididara Daizeze Bedʼeadeba panʉsida» (Jarakabʉ, 1ne abrilde 2014de)
Akʉra sãwũã kristiano wãrĩnuaraba kãgata ũdubibʉta yi mebẽrãba nesidabʉde.
Kʼarebapanʉ dai mebẽrãra naʉ̃ drʉade neida berabaribʉrʉde (wiña ũdubibʉ) (3:57)
Jesubara jarasi iyi kʼaidubemara sãwũã panaita. Kʼawuara nããbema kristianorata akʉza idibema kristianora wãrĩnuaraʉ̃me, Jesuba jarada kĩrãkʼa aripe berabaribʉta.
«¿Kristianora wãrĩnuarãra sãwũãpanʉ?» (Jarakabʉ, 1ne marzode 2012de)